¹ Yezu ǹdə́ ń kwã-lyì bí yʼà bwəlse Zhərəzalɛm, bə yí Bɛtəfazhɛ ǹdə́ Betəni. Cɛmɛ nɛ́ nə̀myɛ́ ŋwɛ́nɛ́ pyɔ̀ w bə̀ nʼê byẽ̀ bə̀ Olyivyə́r pyɔ̀ mɔ́ səta. N zɛ̃̀ n twĩ̀ ń kwã-lyì bí bə̀lyè, n wɔ̀ bɛ: ² “Zhəl-nə cɔ w ò ŋwɛ́nɛ́ á yé né mó wə. Á gə tú á nʼá zwì ò wẽ́, á mʼǎ nə bə̀nə-bwɛ̀lɛ́ è lyẽ tɛ̃́, lò gwẽ̌ yə̀ kùr è yó cĩ́ gaga yé. Lwə̂r-nə y á mʼá bà. ³ Lò gə bwə̀rh ába bə̀ wɔ́ byè yil á nʼá wɛ̀rhɛ́ èta mɔ́, sʼá wɔ̀ mɔ̀: ‘Cinnǝ mú zhe è tum. Sə ń mà n ká n càrh y èlǎsɛ̃́-lǎsɛ̃́.’ ” ⁴ Bə zhǐr bə vò, bə nə bə̀nə-bwɛ̀lɛ́ y è lyẽ pwẽ̀ nè bwə̀rə̀ èdù nyí ni, sɔ́má vɔ̃̀ nɛ̀. Bə lwǝ̌r yə. ⁵ Lyì bí byɛ̀bɛ́ bə̀ yʼà ŋwɛ́nɛ́ gàà mɔ́ jàlà bwə̀rh bè bə wɔ̀: “Bə̀kɔ́n á nʼá wɛ̀rhɛ́ gàà? Byè yil á nʼá lwǝ̌r bə̀nə-bwɛ̀lɛ́ yá?” ⁶ Bə lyár bɛ ǹdə Yezu gə́ yà ń byili bi ní. Lyì bí zɛ̃̀ bə yẽ̌ be bə zə bə̀nə-bwɛ̀lɛ́ y bə zhǐr. ⁷ Bə zə y bə mʼe bə̀ Yezu sono, bə lyɛ̀lɛ̀ bə̀ gàndɛ́ è yó, Yezu zɛ̃̀ n jòm. ⁸ Lyì nánzhəzhɔ̌ lyɛ̀lɛ̀ bə̀ gàndɛ́ sɔ́má y yó. Bə̀ jàlà kà cèmé vɔr bə lyɛ̀lɛ̀ nɛ́. ⁹ Lyì bí byɛ̀bɛ́ bə̀ yʼà ŋwɛ́nɛ́ ń yé né ǹdə́ ń kwã nɛ́ mɔ́ ga zɛ̃̀ bə̀ nʼê bya bə̀ zhe: “Yi nə còrhó! Cinnǝ mú mà n cĩ́ bwəl mɔ̀bɔ́ ń bàn ń yil ré yil mó yó! ¹⁰ Ń mà n cĩ́ bwəl nə́ da Dəvyidi pyɛ̀lɛ̀ rɛ́ rə̀ bàn mɔ́ yó! Sə Yi nə còrhó dɛ̃̌ Arəzana wa!” ¹¹ Yezu zù Zhərəzalɛm wu w wə, n lyɛ̃ n vò Yi jù wə̀, n nyǐ kɔn dɛ̀bɛ́ gakó rə̀ yʼà ŋwɛ́nɛ́ Yi jì y kɔ̀nɔ́ w wẽ́ mó n kə́kɛ́lɛ́ ò cã̌. Cɛ y gə́ yʼà yìì mú ce, ńmyɛ̌ ǹdə́ ń kwã-lyì bí shí ǹdə́ bə̀lyè y zɛ̃̀ bə du bə vò Betəni. ¹² È zɛ̃̀ nəkɔkɔ́lɛ́ y Yezu ǹdə́ ń kwã-lyì bí gə́ tú bə zhǐr Betəni ní, nɔrh zɛ̃̀ mə̀ zhe mo. ¹³ N nə épyìlú ò ŋwɛ́nɛ́ pyépyé, ò zhe vɔr. Ń yà ń nə́ ń bùl bə̀ dɛ̀ga ń mà n nə byǎ ò yó. Ń gə́ tú n yí, n pwírí ò bə byǎ zhe yé. Wɔ́ vɔr dúdú, bʼè yʼà də̀ épyìlə́ yi yé. ¹⁴ N zɛ̃̀ n wɔ̀ épyìlú w ni: “Lò kə́ ń tá ń la ǹ byǐ ń nyú w co gaga yé.” Sə ń kwã-lyì bí nyɛ̀ɛ̀. ¹⁵ Bə̀ gə́ yú Zhərəzalɛm, Yezu zù Yi jì y kɔ̀nɔ́ w wa, n ji kùr ń nə́ ń jì dɔ̌lna bɛ́ bə̀ yʼà nʼê yè wẽ̀ ré mó, ǹdə́ byɛ̀bɛ́ bə̀ yʼà tú wẽ̀ ré yǒ mó gakó ń ce pwẽ̀ nè. N cìrh wẽ̀ ré tɛ̀bɛ́ sə̀byì-lyə́rnə bé yʼà nʼê lyə́r bə̀ sə̀byǎ bɛ́ rə̀ yó mó n làà tɛ̃́, n cìrh byɛ̀bɛ́ bə̀ yʼà nʼê yè épwə̂nsé mó myɛ də̀gwésé n làà tɛ̃́. ¹⁶ Ń yà ń bə shɛ̀ bə̀ lò mə̀dù ga zə zhĩĩ n tó Yi jì y kɔ̀nɔ́ w w n lyɛ̃ yé. ¹⁷ N zɛ̃̀ ń nə́ ń byili bi ń zhe: “Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘Bə̀ mʼa byẽ̀ à jì y bə̀ lyì gakó Yi-co jì.’ ” N zɛ̃̀ n súlí n wɔ̀ bɛ: “Ámyɛ̌ zɛ̃̀ á zə èmyɛ́ mɔ́ e jǐrh ŋwɔ̀là jàà.” ¹⁸ Yi jì y vwĩ̀-zwə́lnə bé yé né cìnə́ bé ǹdə́ Muyiisi nyə́ né byilnə bé gə́ nyɛ̀ɛ̀ rə̀myɛ́, bə zɛ̃̀ bə̀ nʼê pyà bə̀ gə́ mʼa tó né bə gu mu. Sə bə̀ yʼà kwàl mɔ̀ yé, bə̀ lyì-zhǎ bɛ́ yʼà nʼê cèrhé ń kàrmɔ́. ¹⁹ Də̀dɛ̀nɛ́ yi gə́ tú e yí, ńmyɛ̌ ǹdə́ ń kwã-lyì bí du cɔ w wa. ²⁰ Bə̀ gə́ kʼá tó sɔ́má y bə̀ nʼê lyɛ̃ nəkɔkɔ́lɛ́ shãã shãã, bə pwírí épyìlú w Yezu yà ń bwəl n pə w mɔ́ cù ǹdə́ ò nèsé gakó. ²¹ Pyɛɛrɛ zɛ̃̀ n lyǐrh kɔn dɛ̀bɛ́ rə̀ yʼà wɛ̀rhɛ́ mɔ́, n zɛ̃̀ n wɔ̀ Yezu ni: “Yó-cə́bal, nyǐ épyìlú w ǹ bwəl ń pə w mɔ́ ò gakó cùwə̀.” ²² Yezu zɛ̃̀ n wɔ̀ bɛ: “Zhí-nə Yi ni. ²³ Zhə̀nà à nʼá wə̀l ába: lò gə wò pyɔ̀ w kɔ̀bɔ́ èta mɔ́ nɛ: ‘Zhǐr gàà ń vò ń tu mwə̃́ y wə,’ ń gə yə̀ tə́tɔ̀ná ce ń wẽ́, ń gə nə́ ń zwẽ nyí bə̀ tɛ̀bɛ́ ń zɔ̀m mɔ́ mʼa wɛ̀rhɛ́, ń mà n pwírí rə̀ wɛ̀rhɛ́ zhə̀n ga. ²⁴ Wɔ́ rǝ̀myɛ́ è ce à n'â wǝ̀l ába: kɔn dɛ̀bɛ́ gakó á gǝ lwǝ̀l á Yi-co wẽ́, s'á zwẽ nyí b'ǎ nɔ rɛ, s'á yẽ̌ bǝ̀ Yi m'a pǝ rɛ ába. ²⁵ «Á gǝ zhì dɛ̃̌ á la Yi co, e jà zùùrì ŋwɛ́nɛ́ ámyɛ̌ ǹdǝ́ lò cǝcǝl wǝ, s'á pɔ̃ sǔbri, mùnì ga á Da mɔ́ ń ŋwɛ́nɛ́ Arǝzana w mɔ́ pǝ ámyɛ á dwǝ́ǝ́ré sǔbri. [ ²⁶ Sǝ á gǝ t'á pɛ sǔbri á dwã bɛ́ nɛ, á Da mɔ́ ń ŋwɛ́nɛ́ Arǝzana w mɔ́ tá ń la ámyɛ á dwǝ́ǝ́ré sǔbri pɔ yé.]» ²⁷ Yezu ǹdə́ ń kwã-lyì bí kʼe vò Zhərəzalɛm. Ń gə́ zù Yi jì y kɔ̀nɔ́ w wẽ́ ń nə́ ń jílə́, Yi jì y vwĩ̀-zwə́lnə bé yé né cìnə́ bé, ǹdə́ Muyiisi nyə́ né byilnə bé ǹdə́ náncɛsɛ́ zɛ̃̀ bə yí ń nyí ni, ²⁸ bə bwə̀rh mò bə wɔ̀: “Yẽ̀ ǹ nɔ sɔ́má nɛ́ ǹ mə́ ǹ nə́ ǹ wɛ̀rhɛ́ rə̀myɛ́? Mɔ̌ lò ń pɔ mɔ́ sɔ́má y èmyɛ́?” ²⁹ N zɛ̃̀ n wɔ̀ bɛ: “À la ába kɔn rə̀dù sásá bwə̂rh. Á gə lyár nɛ, à mʼa zɛ̃̀ a byili ába à gə́ nɔ sɔ́má y mə̀gã̌ à mʼâ wɛ̀rhɛ́ rə̀myɛ́. ³⁰ Nɛ̃̌-mɔ́lɔ́ mɔ́ Zhã yà ń nə́ ń mɔ́lɛ́ mɔ́, wɔ́ Yi sõ ń yà ń nɔ sɔ́má nɛ́, ráá numbyínsi sõ? Lyár-na nɛ.” ³¹ Bə zɛ̃̀ bə̀ nʼê zɔ̀m ǹdə́ dwã bə̀ zhe: “Nə́ gə wò bə̀ wɔ́ Yi sõ Zhã yà ń nɔ sɔ́má nɛ́, ń mà n bwə̀rh nə́ba bə̀ wɔ́ byè yil nə́ nə yə̀ ń zɔ̀mà nɛ́ zwẽ? ³² Nə́ gə kʼé wò bə̀ wɔ́ numbyínsi sõ ń yà ń nɔ sɔ́má nɛ́ myɛ...?” Bə̀ yʼà nʼê dùr lyì bí ywẽ, bə̀ lyì bí gakó yʼà nʼê bùl bə̀ Zhã yà ń wɔ́ Yi nyì-zwennə zhə̀n zhə̀nà. ³³ Bə zɛ̃̀ bə wɔ̀ mɔ̀: “Nə́ yə̀l yé.” N wɔ̀ bɛ: “Àmyɛ tʼâ la ába à gə́ nɔ sɔ́má y mə̀gã̌ à mʼâ wɛ̀rhɛ́ rə̀myɛ́ mɔ́ byilu yé.”