¹ Dwã nɛ́ nǝ̀myɛ́ wẽ́, lyì nánzhǝzhɔ̌ k'e bǝ̀ dwã yó Yezu sono. Bǝ̀ y'à bǝ kaka zhe bǝ̀ la jú yé. N zɛ̃̀ n byẽ̀ ń kwã-lyì bí n wɔ̀ bɛ: ² «Lyì-zhǎ bɛ́ byɛ̀bɛ́ gǝ́ ŋwɛ́nɛ́ ǹdǝ́ nɛ mɔ́ zhe dwã nǝ̀tɔ̀ zà, e jà bǝ̀ bǝ kaka zhe bǝ̀ la jú yé. Bǝ̀ nɔ̀nɔ̀ zhe ne. ³ Bǝ̀ jàlà jààsɛ́ j'à nyɛ. À gǝ ce bǝ̀ k'â kwẽ̀ ǹdǝ́ nɔrh, bǝ̀ t'â la ŋwɔ̀nɔ́ bǝ yí jè yé.» ⁴ Ń kwã-lyì bí wɔ̀ mɔ̀: «Yẽ̀ nǝ́ nǝ m'ǎ nǝ kùjú ní gɔ-elũ èpòlò w kɔ̀bɔ́ wẽ́, nǝ́ pǝ byɛ̀bɛ́ gakó ne bǝ jí bǝ sú?» ⁵ N zɛ̃̀ n bwǝ̀rh bè n wɔ̀: «Búúri màngal rǝ̀ ŋwɛ́nɛ́ á byẽ́?» Bǝ wɔ̀ mɔ̀: «Búúri tàlpyɛ̀ rǝ̀ ŋwɛ́nɛ́ nǝ́ sõ.» ⁶ N ce lyì bí gakó jòm tɛ̃́, n zwẽ búúrí tàlpyɛ̀ y n ce Yi nǝ̀báná, n kǝ́ kǝ́ rɛ dwã wa, n pǝ ń kwã-lyì bí ni bǝ̀ bǝ̀ zwẽ bǝ m'e tǝ̀ lyì bí. Ń kwã-lyì bí zɛ̃̀ bǝ zwẽ búúrí bǝ m'e tǝ̀ bɛ̀. ⁷ Yezu kwã-lyì bí y'à zhe émɔ̀-bwǎlsɛ màngɛlɛ́ myɛ. Yezu ce Yi nǝ̀bán sǝ̀myɛ yilǝ, n zɛ̃̀ n wɔ̀ ń kwã-lyì bí ni bǝ̀ bǝ̀ zwẽ sǝ̀myɛ bǝ b'e tǝ̀ lyì bí. ⁸ Bǝ jí bǝ sú. Ń kwã-lyì bí pwà yǝywaalɛ́ rǝ̀ dàl mɔ́ rǝ sú cǐrhni nyàlpyɛ̀. ⁹ E jà lyì bí y'à yú ǹdǝ lyì mɔ̀ɔ̀rhɛ̀ rǝ̀na ta. Rǝ̀myɛ́ kwã nɛ́, n zɛ̃̀ n ce bǝ k'a kwẽ̀. ¹⁰ Rǝ̀myɛ́ yó cìcì, ńmyɛ̌ ǹdǝ́ ń kwã-lyì bí j'a zhízhílí bǝ zù bǔ-bwǝl ré wǝ bǝ̀ k'â la Dǝlmǝnutǝ tǝnà y wa. ¹¹ Farɛzhɛ̃ɛ̃bá tú bǝ ji kùr bǝ̀ n'ê mà nyǝ̀-pǎr ǹdǝ́ Yezu. Bǝ̀ y'à n'ê yǎl bǝ zhẽ̀ mò. Bǝ zɛ̃̀ bǝ̀ n'ê lwǝ̀l mò bǝ̀ ń wɛ̀rhɛ́ màmyɔ, ò n'ô byili bǝ̀ wɔ́ Yi rǝ̀ twĩ̀ mù. ¹² Yezu shǐrh fwàà, n zɛ̃̀ n wɔ̀: «Byè yil lũ w kɔ̀bɔ́ lyì bí n'ê yǎl b'à wɛ̀rhɛ́ màmyɔ? Zhǝ̀nà, à n'â wǝ̀l ába: lũ w kɔ̀bɔ́ lyì bí t'â la màmyɔ ga nɔ kǝ́dò yé.» ¹³ N zhǐr n yẽ̌ Farɛzhɛ̃ɛ̃bá nɛ, n ká n zù bǔ-bwǝl ré wǝ ń la mwǝ̃́ y èpákɛ̀. ¹⁴ Yezu kwã-lyì bí y'à swě bǝ̀ yǝ̀ kùjú zal bǝ m'e zù bǔ-bwǝl lé wẽ́ yé. Wɔ́ búrú òdù sásá bǝ̀ y'à zɔwa. ¹⁵ Yezu pǝ bɛ nyí n wɔ̀: «Dɛ̃̌na á cìn ǹdǝ́ Farɛzhɛ̃ɛ̃bá sã̀-nǝ̀byẽ̌ dé ǹdǝ́ Erɔɔdɛ sã̀-nǝ̀byẽ̌ ré.» ¹⁶ Ń kwã-lyì bí zɛ̃̀ bə̀ nʼê zɔ̀m ǹdə́ dwã bə̀ zhe: “E zɛ̃̀ wɔ́ nə́myɛ̌ gə́ yə̀ búrú zal mɔ́ yil ń nə́ ń zɔ̀m èta?” ¹⁷ Yezu lwar bə̀ gə́ nʼê zɔ̀m nɛ́, n zɛ̃̀ n bwə̀rh bè n wɔ̀: “Byè yil á nʼá wə̀l bə̀ wɔ́ á gə́ yə̀ búrú zal mɔ́ yil à nʼâ zɔ̀m èta? Á gwẽ̌ bə nə̀ kùrə̀ nyɛ̌? Á yə̀l nə̀ kùrə̀? Á surhə né pyi? ¹⁸ Á zhe yírhǝ́ á j'ǎ bǝ nɛ? Á zhe zhã̌ á j'ǎ bǝ nyɛ̌? Á k'á t'á lyǐrh, ¹⁹ à gǝ́ y'à kɔ́ kɔ́ búúrí rǝ̀nu y a pǝ lyì bí mɔ̀ɔ̀rhɛ̀ rǝ̀nu y ni bǝ dɔ̃̀ mɔ́? Á y'ǎ pwà yǝywaalɛ́ rǝ̀ dàl mɔ́ rǝ sú cǐrhni màngala?» Bǝ wɔ̀ mɔ̀: «Cǐrhni shí ǹdǝ́ nǝ̀lyè.» ²⁰ N kǝ́ n bwǝ̀rh bè n wɔ̀: «Sǝ à gǝ́ kɔ́ kɔ́ búúrí tàlpyɛ̀ y dwã w a pǝ lyì bí mɔ̀ɔ̀rhɛ̀ rǝ̀na y nɛ bǝ dɔ̃̀ mɔ́, á y'ǎ pwà yǝywaalɛ́ rǝ̀ dàl mɔ́ rǝ sú cǐrhni màngala?» Bǝ wɔ̀: «Cǐrhni nyàlpyɛ̀.» ²¹ N zɛ̃̀ n wɔ̀ bɛ: «Á nǝ zɛ̃̀ á gwẽ̌ bǝ à zɔ̀mà nɛ́ kùr nyɛ̌?» ²² Yezu ǹdə́ ń kwã-lyì bí zhǐr bə vò Betəsəyiidi. Bə̀ gə́ yú gàà, lyì zə lyìlyǒ òdù bə bə̀ ń sono, bə lwə̀l mò bə̀ ń dwə̂rh wə. ²³ N zə lyìlyǒ w jɛ̃̀ nɛ̀, n mə n du cɔ w wa, n vò kwã nɛ́, n pùrh ń tə̀tàr ò yírhə́ né wə, n cĩ́ jɛ̃̀ ò yó, n zɛ̃̀ n bwə̀rh wə̀, n wɔ̀: “Ǹ yírhə́ nə kɔna?” ²⁴ Lyìlyǒ w púr ò yírhə́ né, o wɔ̀ mɔ̀: “À nə lyì, sə bə̀ nyɛ̌ dwã ǹdə cèmé ta, bə jʼà nʼê zhə̀lə̀.” ²⁵ Yezu kə́ n zə ń jɛ̃̀ n dwə̀rh bal mɔ́ yírhə́ né ne. Bal mɔ́ zɛ̃̀ n nyǐ shɛ́shɛ́, n já n wárh, n nə kɔn gakó pamparɛ̃ɛ̃. ²⁶ Yezu zɛ̃̀ n wɔ̀ mɔ̀ bə̀ ń ká n vò jè, sə ń bə̀ká n zù cɔ w wẽ́ yé. ²⁷ Yezu ǹdə́ ń kwã-lyì bí zhǐr bə̀ la cɛmɛ nɛ́ nə̀ ŋwɛ́nɛ́ Shilipu Səzarɛ cɔ w səta mɔ́ wẽ́. Bə̀ gə́ yú sɔ́má yó, n zɛ̃̀ n bwə̀rh bè n wɔ̀: “Lyì bí nʼê wə̀l bʼàmyɛ́ wɔ́ mɔ̌?” ²⁸ Bə wɔ̀ mɔ̀: “Lyì bí jàlà nʼê wə̀l bə̀ ǹ wɔ́ Zhã-Bətiisi; jàlà zhe bə̀ wɔ́ Elyi; jàlà myɛ zhe bə̀ wɔ́ Yi nyì-zwennə mə̀dù.” ²⁹ N zɛ̃̀ n bwə̀rh bè n wɔ̀: “Sə ámyɛ̌, á nʼá wə̀l bʼà wɔ́ mɔ̌ lò?” Pyɛɛrɛ zɛ̃̀ n wɔ̀ mɔ̀: “Wɔ́ ǹmyɛ́ ǹ wɔ́ Kristə mó.” ³⁰ Yezu zɛ̃̀ n gwirhi ń yé n pə bɛ nyí n wɔ̀: “Á bə̀kʼá shɛ̀nɛ́ á byili rə̀myɛ́ lò lò nè yé.” ³¹ Rǝ̀myɛ́ kwã nɛ́, Yezu zɛ̃̀ n ji kùr ń nǝ́ ń cèrhè kàrmɔ̀ ń kwã-lyì bí ni. Ń yà ń nǝ́ ń wǝ̀l bè bǝ̀ kɔn wɔ́ nyɔ́ɔ́ bǝ̀ Numbyíní Byǐ nwɛ̀nɛ̀ dɛ̃́dɛ̃́, cɔ w náncɛsɛ́ ǹdǝ́ Yi jì y vwĩ̀-zwǝ́lnǝ bé yé né cìnǝ́ bé, ǹdǝ́ Muyiisi nyǝ́ né byilnǝ bé m'a zhɛ̃̀ mɔ̀, bǝ gu mu, sǝ ń mà n ká n bwìrhì ń dwã nǝ̀tɔ̀ yùwǝ̀. ³² Ń yà ń nǝ́ ń byili bi rǝ̀myɛ́ pamparɛ̃ɛ̃. Pyɛɛrɛ zɛ̃̀ n byẽ̀ mò n mǝ n vò kwã nɛ́, ń nǝ́ ń ji mu búlǝ́. ³³ Yezu zɛ̃̀ n pyìrhí ń yé n zǎ ń kwã-lyì bí, n gwirhi ń yé, n wɔ̀ Pyɛɛrɛ nɛ: «Zhǝl kwã nɛ́ à nyí ni Shǝtana, bǝ̀ ǹ tá ǹ zwẽ Yi nyǝ̀ná nɛ́ nyí yé. Wɔ́ numbyínsí nyǝ̀ná nɛ́ nyí ǹ nǝ́ ǹ zwẽ.» ³⁴ N zɛ̃̀ n byẽ̀ lyì-zhǎ bɛ́ ǹdǝ́ ń kwã-lyì bí n wɔ̀ bɛ̀: «Lò mɔ̀bɔ́ ǹ nǝ́ ǹ yǎl ń tó àmyɛ́ nɛ, sǝ́ zhɛ̃̀ ǹ cìnǝ̀, ń kwè ǹ dǝ̀-jɔrhɔ́ w ń zhĩ ń mǝ́ tó ne. ³⁵ Lò mɔ̀bɔ́ ǹ nǝ́ ǹ shili ǹ myǝ̌l ré, rǝ̀ m'a sá, sǝ lò mɔ̀bɔ́ ǹ shɛ̀nɛ́ ǹ myǝ̌l lé sɔ́ àmyɛ́ ǹdǝ́ yò-ècɔ̀nɔ̀ nyí rí yilǝ, ǹ m'ǎ ká nǝ rɛ. ³⁶ Lò gǝ zhe lũ w kɔn gakó, ń j'ǎ dwĩ̀ ǹ cìnǝ̀, ǹ nɛrɛ́ y zhe kùrǝ̀? ³⁷ Kɔn ŋwɛ́nɛ́ lò wɔ̌ ǹ pɛ ń mǝ́ lyǝ́r ǹ myǝ̌l ré? ³⁸ Lò mɔ̀bɔ́ ǹ dùr cìzhìl ǹdə́ àmyɛ́ ǹdə́ à zɔ̀mà nɛ́, lũ w kɔ̀bɔ́ lyì bí bə̀ wɔ́ nə̀fwə̀ə́le, ǹdə́ lwɛlɛ cìnə́ mó cəcəl wə, Numbyíní Byǐ gə tú ń Da zùwə́ y wə, ǹdə́ Yi màlɛ́kabá, ń mà n dùr cìzhìl ǹdə́ mɔ́ myɛ.”