¹ Farɛzhɛ̃ɛ̃bá ǹdə́ Muyiisi nyə́ né byilnə bé jàlà shí Zhərəzalɛm bə bə̀ dwã yó Yezu sono. ² Bə nə ń kwã-lyì bí jàlà bə̀ nʼê jí kùjú ǹdə́ bə̀ yə̀ bə̀ jɛ̀sɛ́ sàm yé. (È nʼê yǎl e wɔ̀ bə̀ bə̀ yə̀ sɛ̀ sàm ǹdə bə̀ lùl-e-pwírí y gə́ nʼê byili ní yé. ³ Lwar-na bə̀ Farɛzhɛ̃ɛ̃bá ǹdə́ Zhwifubá gakó yʼà nʼê zwẽ bə̀ nàmbala bɛ́ lùl-e-pwírí y nyə́ né: bə̀ yʼà tʼâ jí kùjú ǹdə́ bə̀ yə̀ jɛ̀rɛ̀ bə sã̀ bə̀ jɛ̀sɛ́ náàcɛ̀nɛ́ yé. ⁴ Bə̀ gə shí lyì-zhǎ w bə̀ túwə́, bə̀ tʼâ jí kùjú ǹdə́ bə̀ yə̀ jɛ̀rɛ̀ bə zhɛ́rhɛ́ nɛ̃̌ bə̀ yó ǹdə bə̀ lùl-e-pwírí y gə́ nʼê byili ní. Bə̀ zhe lùl-e-pwírí tùntwə̃̀ə̃̀ dwã nánzhəzhɔ̌ bə̀ nʼê wɛ̀rhɛ́. Bə̀ nʼê zhə́zhɛ́lɛ́ bə̀ zɔ̌sɛ́ ǹdə́ bə̀ kwǎlnɛ́, ǹdə́ bə̀ kùjú nə̀zhĩ̌sí, ǹdə bə̀ nyə́ né gə́ nʼê byili ní.) ⁵ Farɛzhɛ̃ɛ̃bá ǹdə́ Muyiisi nyə́ né byilnə bé gə́ nɔ Yezu kwã-lyì bí bə̀ nʼê jí kùjú w bə jʼà yə̀ bə̀ jɛ̀sɛ́ sàm, bə bwə̀rh mò bə wɔ̀: “Byè yil ǹ kwã-lyì bí tʼâ zwẽ lùl-e-pwírí y nyə́ né? Bə̀ tʼâ sàm bə̀ jɛ̀sɛ́ ǹdə lùl-e-pwírí y gə́ nʼê byili ní bə̀ mʼê jí kùjú.” ⁶ N wɔ̀ bɛ: “Á wɔ́ myìnù cìnə́. Kɔn dɛ̀bɛ́ Yi nyì-zwennə Ezəyi byili á shò-kwã nɛ́ mɔ́ wɔ́ zhə̀nà. Ń kɛ̃ bə̀ Yi wòwə̀: ‘Lyì bí byɛ̀bɛ́ wɔ́ bə̀ nyú w dúdú bə̀ nʼê cèrhé ne né, sə bə̀ wun ní nyɛ ǹdə́ nɛ. ⁷ Bə̀ nʼê cèrhé ne, sə bə̀ còrhó w bə kùr zhe yé, bə̀ kɔn dɛ̀bɛ́ bə̀ nʼê cèrhè lyì bí ni mú wɔ́ numbyínsi nyə́.’ ” ⁸ Yezu zɛ̃̀ n súlí n wɔ̀: «Ámyɛ̌ yẽ̌ Yi nyǝ́ né ne, á k'á n'á zwẽ numbyínsi lùl-e-pwírí nyǝ́.» ⁹ N kǝ́ n wɔ̀: «Á n'á bùl b'ǎ gǝ́ dwĩ̀ Yi nyǝ́ né tɛ̃́, á zɛ̃̀ á n'á zwẽ á sǝ̀pwà lùl-e-pwírí y nyǝ́ né mó càn? ¹⁰ Muyiisi wòwǝ̀: ‹Nyám ǹ da ǹdǝ́ ǹ ná.› N súlí n wɔ̀: ‹Lò mɔ̀bɔ́ ǹ bwǝl lwɛlɛ ń pǝ ǹ da ráá ǹ ná nɛ, bǝ̀ mǝ̌ sǝ bǝ gu mú.› ¹¹ Sǝ ámyɛ̌ n'á wǝ̀l lyì bí ni bǝ̀ lò wɔ̌ ń wǝ̀l ń da ráá ń ná nɛ: ‹À zhe kɔn à y'à n'â yǎl a pɔ̃́, sǝ wɔ́ Yi ni à mǝ̌ s'a pǝ rɛ,› ¹² Á n'á wǝ̀l bǝ̀ lò gǝ wò èta, kɔn k'ê dǝ̀ nyɔ́ɔ́ bǝ̀ ń sɛ̃ bɛ yé. ¹³ Èta mɔ́, á lùl-e-pwírí y á n'á cèrhè dwã nɛ mɔ́ ce Yi zɔ̀mɛ̀ rɛ́ jǐrh kɔn nánfò. Á j'ǎ n'á wɛ̀rhɛ́ wẽ̀ dwã nánzhǝzhɔ̌ rǝ̀myɛ wɔ́ èta.» ¹⁴ Yezu kǝ́ n byẽ̀ lyì-zhǎ bɛ́ n wɔ̀ bɛ: «Á gakó cili-nǝ kɔn dɛ̀bɛ́ à la ába byilu mú, s'á nyɛ̀ɛ̀ rǝ̀ kùrǝ̀. ¹⁵ 15 È dǝ̀ kɔn dɛ̀bɛ́ rǝ̀ n'ê shí pwẽ̀ nè rǝ̀ zwì numbyíní wẽ́ mó, rǝ̀ n'ê pɛ y jìmdì yé. Wɔ́ dɛ̀bɛ́ rǝ̀ n'ê shí numbyíní wẽ́ mó rǝ̀ n'ê pɛ y jìmdì. [ ¹⁶ 16 Lò ǹ la cilu, sǝ́ cili.]» ¹⁷ Ń gǝ́ tú n zhǐr n yẽ̌ lyì-zhǎ bɛ́ nɛ n zù kɛ̀lɛ́ wa, ń kwã-lyì bí zɛ̃̀ bǝ̀ n'ê bwǝ̀rh mò zɔ̀mɛ̀ rɛ́ rǝ̀myɛ́ kùrǝ̀. ¹⁸ N wɔ̀ bɛ: «Ámyɛ bǝ rǝ̀ kùr nyɛ̌ nà? Á yǝ̀l bǝ̀ kɔn dɛ̀bɛ́ rǝ̀ n'ê shí pwẽ̀ nè rǝ̀ zwì numbyíní wẽ́ mó wàr rǝ̀ n'ê pɛ y jìmdì? ¹⁹ Á bǝ nɛ bǝ̀ kɔn dɛ́ rǝ̀myɛ́ t'â zwì ń wu w wẽ́, wɔ́ ń sùlú w rǝ̀ n'ê zwì ní. Rǝ̀myɛ́ kwã nɛ́, ń gǝ la ń nà nɛ̀ jǒm, rǝ zɛ̃̀ rǝ k'a du?» Yezu wò èta n mǝ n byili bǝ̀ lò wɔ̌ ń mà n jí kùjú dwí gakó. ²⁰ N kə́ n wɔ̀: “Wɔ́ kɔn dɛ̀bɛ́ rə̀ nʼê shí numbyíní wẽ́ rə̀ dwi pwẽ̀ nè mó rə̀ nʼê pɛ y jìmdì. ²¹ Lwar-na bə̀ wɔ́ numbyíní wu w wẽ́ bùlə̀ námməlwâlsɛ nʼê shí ni: yààyàà tùntwə̃̀ə̃̀ ǹdə́ ŋwɔ̀lɛ̀ ǹdə́ lyì-guuri, ²² ǹdə́ fwǝ̌l tumə, ǹdə́ dõ kɔn yâl, ǹdə́ wu-kùlù ǹdə́ myìnù, ǹdə́ wàr ǹ cìn ǹ nə́ ń pyɛ̀nɛ́ tùntwə̃̀ə̃̀, ǹdə́ bwɛ̃̌-dǔr, ǹdə́ dõ yil zhìlù, ǹdə́ cìn-byilu, ǹdə́ lyì-bəyuru tùntwə̃̀ə̃̀. . ²³ Tùntùm-bəlwǎlsɛ́ sə̀myɛ́ gakó nʼê shí numbyíní wẽ́, sə̀ pɛ y jìmdì.” ²⁴ Yezu zhǐr gàà n vò Tiiri tǝnà y wa. N yí n zù kɛ̀lɛ́ èdù wẽ́, sǝ ń yà ń tá ń yǎl bǝ̀ lò lwar ń nyí ni gàà yé, sǝ ń yǝ̀ ŋwɛ̀nɛ́ n shèè yé. ²⁵ Kɛ̃ mǝ̀dù nǝ̀cílí námmǝlwɛ̀lɛ́ y'à zhe ń bǝ̀kɔ́, kɛ̃ mɔ́ ńmyɛ̌ mɔ́ nyɛ̀ɛ̀ bǝ̀ n'ê zɔ̀m Yezu yò, n bǝ̀ Yezu sono, n tu ń nǝ̀dwǝ́nǝ́ yó n wùlì ń yé né, ²⁶ n lwǝ̀l mò bǝ̀ ń jǐ nǝ̀cílí y námmǝlwɛ̀lɛ́ y e du ń bǝ̀kɔ́ mɔ́ wẽ́. Kɛ̃ mɔ́ jà ń yà ń dǝ̀ Zhwifu yé. Ń yà ń wɔ́ Siri tǝnà y cɔ òdù bǝ̀ n'ê byẽ̀ bǝ̀ Fenishi lyì bǝ̀kɔ́ ²⁷ Yezu zɛ̃̀ n wɔ̀ mɔ̀: “Yẽ̌ bə̀sɔ́ná bɛ́ jɛ̀rɛ̀ bə jí bə sú. Kɔn bə mǝ̌ bə̀ bə̀ kwě bə̀sɔ́ná kùjú bə pə kùl-bwálsɛ nɛ yé.” ²⁸ Kɛ̃ mɔ́ wɔ̀ mɔ̀: “Rə̀myɛ́ wɔ́ zhə̀n yó-cə́bal, sə kùl-bwálsɛ́ myɛ yʼa jí kùjú w yəywaalɛ́ rə̀ nʼê lwé tɛ̃́ bə̀sɔ́ná bɛ́ kùr w mó.” ²⁹ Yezu zɛ̃̀ n wɔ̀ mɔ̀: “Ǹ gə́ lyár èta mɔ́ yilə, ká vò jè, bə̀ nə̀cílí y du ǹ bə̀kɔ́ mɔ́ wẽ́.” ³⁰ Kɛ̃ mɔ́ gə́ zhǐr n yí jè, n pwírí nə̀cílí y du ń bə̀kɔ́ mɔ́ wẽ́, ń pyě pyònò w wə. ³¹ Yezu zhǐr Tiiri tənà y wa, n tó Sədɔ̃, n lyɛ̃ n tó Cɛmɛ-shí tənà y wa, n ká ń bàn Gəlile mwə̃́ y səta. ³² Bə zə bal mə̀dù bə bə̀ ń sono. Bal mɔ́ yà ń wɔ́ sə̀bɔ̀rhɔ̀, ń wàr ń nə́ ń zɔ̀m yé. Bə lwə̀l Yezu ni bə̀ ń cèlè ń jɛ̃̀ ń yó. ³³ Yezu zə bal mɔ́ n du lyì-zhǎ bɛ́ wẽ́ n vò kwã nɛ́, n ce jə̀fɔ́lá bal mɔ́ zhã̌ nɛ́ wa, n pùrh tə̀tàr n mə n dwə̀rh ń mə̀jòlò w ne, ³⁴ n kwẽ̌ n nyǐ dɛ̃̌, n shǐrh fwàà, n zɛ̃̀ n wɔ̀ bal mɔ́ nɛ: “Efata.” (Rə̀myɛ́ nʼê yǎl rə wɔ̀: “Púr”.) ³⁵ Rə̀myɛ́ yi ní cìcì, bal mɔ́ zhã̌ nɛ́ jʼa púr, ń mə̀jòlò w myɛ bwèlé. N zɛ̃̀ ń nə́ ń zɔ̀m wárhɛ́ wárhɛ́. ³⁶ Yezu zɛ̃̀ n pə nyí lyì bí gakó ne, bə̀ bə̀ bə̀kʼa wɔ̀ lò lò nè yé. Sə ń gə pɔ bɛ nyí gakó, bə̀ wàr bə̀ nʼê pyɛ́nɛ́ yé. Bə̀ yʼa kwɛrhɛ bə bwə̀l tɛ̀bɛ́ ń wɛ̀rhɛ́ mɔ́ bə byili. ³⁷ Sə ń gə́ wárh bal mɔ́ mɔ́ jàr lyì bí dɛ̃́dɛ̃́ kɔn lyɛ̃ cɛ nɛ. Bə̀ yʼà nʼê wə̀lə̀: “Ń tumə né gakó càn. Ń nə́ ń ce sə̀bwààrhɛ̀ myɛ cìcì zhã̌ nyɛ̀ɛ̀, n ce nyì-bədããrɛ ŋwɛ̀nɛ́ rə zɔ̀m.”