¹ Rǝ̀myɛ́ yó, Yezu zhǐr n vò ń da-dǒ, sǝ ń kwã-lyì bí y'à tó mo bǝ vò. ² N zɛ̃̀ n vò dwã-gùlú jì y wẽ́ shìrhǝ́ dɛ̃ rɛ́ yùwǝ̀, ń nǝ́ ń cèrhè kàrmɔ̀ lyì bí ni. Kɔn jàr lyì bí byɛ̀bɛ́ bǝ̀ y'à n'ê cili ń zɔ̀mà nɛ́ mɔ́ nánzhǝzhɔ̌, bǝ zɛ̃̀ bǝ̀ n'ê wǝ̀lǝ̀: «Yẽ̀ mɔ̀bɔ́ nɔ zɔ̀mà nɛ́ nyɛ̀bɛ́ èta mɔ́ nɛ́? Yẽ̀ ń nɔ surhǝ né myɛ èta mɔ́ nɛ́? Sǝ màmyaarhɛ́ tɛ̀bɛ́ ń nǝ́ ń wɛ̀rhɛ́ mɔ́, yẽ̀ ń nɔ rɛ nɛ́? ³ È dǝ̀ Marɛ byǐ mú ń nǝ́ ń shǝ̀l dàárɛ́ mɔ́ nà? È dǝ̀ ńmyɛ̌ ń wɔ́ Zhakɛ ǹdǝ́ Zhoze ǹdǝ́ Zhidǝ ǹdǝ́ Shǝmɔ da-byǐ mú nà? È dǝ̀ ń nǝkwá bɛ́ bǝ̀ tó nǝ́ba bǝ̀ ŋwɛ́nɛ́ nyɔ̀nɔ̀ nà?» Wɔ́ rǝ̀myɛ́ è ce bǝ̀ y'à t'â zwẽ Yezu zɔ̀mà nɛ́ yé. ⁴ Ń zɛ̃̀ n wɔ̀ bɛ: «Bǝ̀ n'ê nyàm Yi nyì-zwennǝ jààsɛ́ gakó wǝ, sǝ bǝ̀ t'â nyàm mɔ̀ ń da-dǒ w ǹdǝ́ ń da-byǎ bɛ́ ǹdǝ́ ń da sõ kɛ̀lɛ́ w yé.» ⁵ Yezu yǝ̀ ŋwɛ̀nɛ́ n wɛ̀rhɛ́ màmyɔ òdù ga gàà, è gǝ dǝ̀ nǝ̀bwànà màngɛlɛ́, ń cĩ́ ń jɛ̃̀ bǝ̀ yó, bǝ wárh, ⁶ sǝ bǝ̀ gǝ́ yǝ̀ Yi ni zhí mú jàr mɔ̀. ⁷ Dɛ̃ rǝ̀dù, ń byẽ̀ ń kwã-lyì bí shí ǹdǝ́ bǝ̀lyè y, n ji kùr ń nǝ́ ń twĩ̀ bì bǝ̀lyè bǝ̀lyè. N pǝ bɛ ŋwɔ̀nɔ́, mùnì bǝ jì nǝ̀cílsi námmǝlwǎlsɛ. ⁸ N pǝ bɛ nyí n wɔ̀: «Á bǝ̀k'á zǝ kaka sɔ́má y kǒ yilǝ, ǹdǝ́ è gǝ dǝ̀ dǝ̀-dɔ̀lɔ̀ dúdú yé. Á bǝ̀k'á zǝ búrú ráá bɔ̀là yé; á bǝ̀k'á ce wársɛ myɛ á byẽ́ yé, ⁹ s'á ce nǝ̀cìlǝ̀ á nǝ̀rh né, s'á bǝ̀k'á zǝ kàmǝ̀-zǔrh sǝ̀lyè sǝ̀lyè yé.» ¹⁰ N wɔ̀ bɛ n súlí: «Á gǝ yú mǝ̀gã̌, kɛ̀lɛ́ kɛ̀bɛ́ á la è wẽ́ zul mó, s'á mɛ̃ gàà kɔn m'e yí dɛ̃ rɛ́ tɛ̀bɛ́ á la jàà y èmyɛ́ wẽ́ zhǐr mó. ¹¹ Cɔ kɔ̀bɔ́ á zù ò wẽ́, ò lyì bí gǝ yǝ̀ á zhǝǝlé zwẽ bǝ cili á zɔ̀mà nɛ́, s'á k'á du cɔ w òmyɛ́ wa, á pwà á nǝ̀rh. Sǝ rǝ̀myɛ́ m'a yǝ̀ myɔrhɔ ò n'ô byili bǝ̀ bǝ̀ yò zhìlì.» ¹² Bǝ zhǐr bǝ vò bǝ bwǝ̀l bǝ byili lyì bí ni bǝ̀ bǝ̀ pyìrhí bǝ̀ wun. ¹³ Bǝ̀ y'à n'ê jì nǝ̀cílsi námmǝlwǎlsɛ, bǝ̀ n'ê zal nwǝ̃̌ bǝ̀ tútǔ nǝ̀bwànà nánzhǝzhɔ̌ bǝ̀ wárhá. ¹⁴ Yezu yil du jààsɛ́ gakó wǝ. Pyɔ̌ Erɔɔdɛ myɛ nyɛ̀ɛ̀ ń yò. Lyì bí jàlà y'à n'ê wǝ̀l bǝ̀ wɔ́ Zhã-Bǝtiisi ń ká n bwìrhì n du cùùrì wẽ́, bǝ̀ wɔ́ rǝ̀myɛ́ è ce ń zhe ŋwɔ̀nɔ́ ń nǝ́ ń wɛ̀rhɛ́ màmyaarhɛ. ¹⁵ Sǝ jàlà y'à zhe bǝ̀ wɔ́ Elyi. Jàlà myɛ y'à zhe bǝ̀ wɔ́ Yi nyì-zwennǝ ǹdǝ Yi nyì-zwennǝ bé dwã bɛ́ ta. ¹⁶ Erɔɔdɛ gǝ́ nyɛ̀ɛ̀ rǝ̀myɛ́, n wɔ̀: «Zhã-Bǝtiisi mú à ce bǝ gõ̀ ń yó w mó ń ká n bwìrhì!» ¹⁷ Wɔ́ Erɔɔdɛ cìcì ń yà ń ce bǝ zǝ Zhã bǝ lyẽ mo bǝ ce byǝ̀nǝ́-jù wǝ̀. Erɔɔdɛ yà ń jú ń da-byǐ Shilipu kɛ̃ Erɔjaadɛ. ¹⁸ Zhã zɛ̃̀ ń nǝ́ ń ji mu búlǝ́ ń zhe: «Ǹ bǝ sɔ́má zhe ǹ nǝ́ ǹ jí ǹ da-byǐ mú kɛ̃ mɔ́ yé.» ¹⁹ Erɔjaadɛ lyim zɛ̃̀ rǝ̀ n'ê yì Zhã rǝ̀myɛ́ yilǝ. Ń nǝ́ ń yǎl n ce bǝ gu mu, sǝ ń yà ń wàr yé, ²⁰ bǝ̀ Erɔɔdɛ yà ń nǝ́ ń dùr Zhã ywẽ, ń gǝ́ yà ń yě bǝ̀ Zhã wɔ́ wu-cángá cí, n jà ń wɔ́ Yi lò yilǝ. Ń yà ń bǝ shɛ̀ ń yò yé. Ń gǝ nǝ́ ń cili Zhã zɔ̀mà nɛ́, ń kǝ́ ń yǝ̀l ń gǝ́ nǝ́ ń wɛ̀rhɛ́ nɛ́ yé, n jà ń yà ń só nǝ̀ cilu. ²¹ Dɛ̃ rǝ̀dù, Erɔɔdɛ yà ń nǝ́ ń wɛ̀rhɛ́ ń lul dɛ̃ yò lyǐrh címsi. N byẽ̀ ń kwã lyì-fwààlɛ́ ǹdǝ́ shǝ̀dɛ́ɛ́sɛ́ yó-cìnǝ́ bé, ǹdǝ́ Gǝlile tǝnà y lyì-fwààlɛ́ gakó. Erɔjaadɛ já n tó rǝ̀myɛ́ dɛnnɛ n nǝ bɔ̀l. ²² Ń bǝ̀kɔ́ zù címsí jàà y wa, Erɔɔdɛ ǹdǝ́ lyì bí byɛ̀bɛ́ bǝ̀ y'à n'ê jí kùjú w mú gakó yé né, n sa. Bǝ̀ wun yǝ̀ nyɛ̀n. Erɔɔdɛ zɛ̃̀ n wɔ̀ bǝ̀kɔ́ mɔ́ nɛ: «Kɔn dɛ̀bɛ́ ǹ nǝ́ ǹ yǎl sǝ́ lwǝ̀l nè.» ²³ N súlí n wɔ̀ mɔ̀: «À n'â bwǝl mó nyí: kɔn dɛ̀bɛ́ gakó ǹ gǝ lwǝ̀l nè, à b'a pɔ̃́ rɛ, bá è gǝ wɔ́ à tǝnà y kǝ̀kàlà myɛ.» ²⁴ Bǝ̀kɔ́ mɔ́ du pwẽ̀ nè n bwǝ̀rh ń ná n wɔ̀: «Bǝ̀kɔ́n à m'a lwǝ̀l?» Ń ná wɔ̀ mɔ̀: «Lwǝ̌l Zhã-Bǝtiisi yó wǝ́.» ²⁵ Bǝ̀kɔ́ mɔ́ ká n kwẽ̀ yǝ̀wǎl yǝ̀wǎl, n yí pyɔ̌ mɔ́ nyí ni n wɔ̀ mɔ̀: «À n'â lwǝ̀l mó bǝ̀ ǹ cĩ́ Zhã-Bǝtiisi yó w nǝ̀zhĩ̌ wẽ́ èlǎsɛ̃́-lǎsɛ̃́ ń pɛ̃.» ²⁶ Pyɔ̌ mɔ́ wu zhìlì, sǝ ń gǝ́ yà ń bwǝl nyí lyì bí byɛ̀bɛ́ ń yà ń byẽ̀ mó yírh w mó ce, ń yǝ̀ ŋwɛ̀nɛ́ n cẽ yé. ²⁷ N já n zhízhílí n twĩ̀ ń shǝ̀dáá èdù, n wɔ̀ b'è zhǝl e zǝ Zhã yó w e bà. Shǝ̀dáá y zhǐr e vò byǝ̀nǝ́-jì y wǝ, e gõ̀ Zhã yó wǝ́, ²⁸ e cĩ́ nǝ̀zhĩ̌ wǝ, e zǝ e bǝ̀ e pǝ bǝ̀kɔ́ mɔ́ nɛ. Bǝ̀kɔ́ mɔ́ kwè n pǝ ń ná nɛ. ²⁹ Zhã kwã-lyì bí gǝ́ nyɛ̀ɛ̀ rǝ̀myɛ́, bǝ vò bǝ kwè mò bǝ ce. ³⁰ Yezu tùntúmǝ́ bé k'a kwẽ̀ bǝ bǝ̀ ń sono, bǝ byili mu kɔn dɛ̀bɛ́ gakó bǝ̀ wɛ̀rhɛ́ ǹdǝ́ dɛ̀bɛ́ bǝ̀ cèrhè lyì bí ni mú. ³¹ Sǝ lyì nánzhǝzhɔ̌ y'à n'ê twí Yezu sono bǝ̀ k'â kwẽ̀. Rǝ̀myɛ́ ce ńmyɛ̌ ǹdǝ́ ń kwã-lyì bí y'à bǝ yé zhe sǝ bǝ jí kùjú myɛ cìcì yé. N zɛ̃̀ n wɔ̀ ń kwã-lyì bí ni: «Bà-nà nǝ́ kɔl nǝ́ vò kwã nɛ́, lò lò gǝ́ tɛ̀nɛ́ mǝ̀gã̌, á shǐrh námpɔ́lɛ́.» ³² Bǝ zhǐr bǝ vò bǝ zù bǔ-bwǝl rǝ̀dù w bǝ̀ dúdú, bǝ̀ la jàà èdù wǝ̀, lò lò gǝ́ tɛ̀nɛ́ mǝ̀gã̌. ³³ Sǝ lyì nánzhǝzhɔ̌ nɔ bɛ ǹdǝ́ bǝ̀ la, bǝ lwar bǝ̀ wɔ́ bǝ̀myɛ́. Bǝ shí cɛmɛ nɛ́ gakó wẽ́ bǝ du, bǝ dùr ǹdǝ́ bǝ̀ nǝ̀rh bǝ jɛ̀rɛ̀ Yezu ǹdǝ́ ń kwã-lyì bí gàà. ³⁴ Yezu gǝ́ shí bǔ-bwǝl ré wẽ́, n nǝ lyì bí bǝ̀ zhǐ dwã yó nánzhǝzhɔ̌. Bǝ̀ nɔ̀nɔ̀ zǝ mɔ, bǝ̀ bǝ̀ y'à nyɛ̌ ǹdǝ pyììsì shɛ̀bɛ́ sǝ̀ bǝ kálna zhe ta. N zɛ̃̀ n ji kùr ń nǝ́ ń cèrhè bè wẽ̀ nánzhǝzhɔ̌. ³⁵ Cɛ y y'à n'ê yìì, ń kwã-lyì bí zɛ̃̀ bǝ yí ń nyí ni bǝ wɔ̀ mɔ̀: «Nyɔ̀nɔ̀ wɔ́ gɔ-elũ. Kɛ̀lɛ́ tɛ̀nɛ́ bwǝ́lbwǝ́l yé. Cɛ y myɛ j'à n'ê yìì. ³⁶ Ce lyì bí zhǐr bǝ vò jààsɛ́ shɛ̀bɛ́ sǝ̀ bwǝ́l mó ǹdǝ́ cǝ-bwǎlsɛ́ wẽ́, bǝ yè kùjú bǝ jí.» ³⁷ Yezu wɔ̀ bɛ: «Á cìcì pa-na bɛ kùjú bǝ jí.» Bǝ bwǝ̀rh mò bǝ wɔ̀: «Nǝ́ zhǝl nǝ́ zǝ dwã zwã̌-àlyè tum wársɛ nǝ́ m'é yè búrú nǝ́ b'ě pǝ bɛ bǝ dɔ̃̀?» ³⁸ N wɔ̀ bɛ: «Zhǝl-nǝ á gwɛ̃ á nyǐ wɔ́ búúri màngal rǝ̀ ŋwɛ́nɛ́ á byẽ́.» Bǝ̀ gǝ́ zhǝ̀l bǝ gwɛ̃, bǝ wɔ̀ mɔ̀: «Búúri rǝ̀nu ǹdǝ́ émɔ̌rh sǝ̀lyè sǝ̀ ŋwɛ́nɛ́ nǝ́ sõ.» ³⁹ N zɛ̃̀ n pǝ bɛ nyí bǝ̀ bǝ̀ ce lyì bí jòm kùkùlǝ̀ kùkùlǝ̀ gɔ w nánlyɔ̀ w yó. ⁴⁰ Bǝ jòm zɔ̌m zɔ̌m, ǹdǝ́ shí-ènu shí-ènu. ⁴¹ N zɛ̃̀ n kwè búúrí rǝ̀nu w ǹdǝ́ émɔ̌sɛ́ sǝ̀lyè y, n kwẽ̌ n nyǐ dɛ̃̌, n ce Yi nǝ̀báná, n zɛ̃̀ n kǝ́ kǝ́ búúrí dwã wa, n pǝ ń kwã-lyì bí ni bǝ m'e tǝ̀ lyì bí. N zǝ émɔ̌sɛ́ sǝ̀lyè y myɛ n tǝ̀ lyì bí gakó. ⁴² Lò gakó dɔ̃̀ n sú. ⁴³ Ń kwã-lyì bí pwà búúrí ǹdǝ́ émɔ̌sɛ́ yǝywaalɛ́ rǝ̀ dàl mɔ́ rǝ sú cǐrhni shí ǹdǝ́ nǝ̀lyè. ⁴⁴ Bala bɛ́ byɛ̀bɛ́ bǝ̀ dɔ̀m búúrí mú y'à wɔ́ mɔ̀ɔ̀rhɛ̀ rǝ̀nu. ⁴⁵ Rǝ̀myɛ́ kwã nɛ́, Yezu já n zhízhílí n ce ń kwã-lyì bí zù bǔ-bwǝl ré wẽ́ làlà, bǝ jɛ̀rɛ̀ bǝ̀ la mwǝ̃́ y èpákɛ̀ Betǝsǝyiidi sǝta, ǹdǝ́ ńmyɛ̌ cìcì nǝ́ ń pɛ sɔ́má lyì-zhǎ bɛ́ nɛ bǝ̀ k'â la jè. ⁴⁶ Lyì bí gǝ́ lyɛ̃ bǝ zhɛ̀, n zhǐr n vò n jì pyɔ̀ òdù yó ń la Yi co. ⁴⁷ Cɛ y yìì ǹdǝ́ bǔ-bwǝl ré ŋwɛ́nɛ́ mwǝ̃́ y cǝcǝl wǝ, sǝ Yezu yà ń zhǐ pwẽ̀ nè bù-cǔ w yó ń dúdú. ⁴⁸ N pwírí ń kwã-lyì bí n'ê nwɛ̀nɛ̀ ǹdǝ́ bǔ-bwǝl ré swǎl mɔ́, bǝ̀ zho w y'à zǎ bǝ̀ yé, ǹdǝ́ cɛ y bwǝ́l lɔ́. N zhǐr ń nǝ́ ń zhǝ̀l nɛ̃̌ mɔ́ yó ń la bǝ̀ sõ, ń yà ń la bǝ lyɔ̃. ⁴⁹ Bǝ̀ gǝ́ nɔ mɔ ń nǝ́ ń zhǝ̀l nɛ̃̌ mɔ́ yó, bǝ̀ y'à n'ê bùl bǝ̀ wɔ́ yóló. Bǝ wǔrh, ⁵⁰ bǝ̀ bǝ̀ gakó nɔ mɔ, sǝ bǝ̀ y'à n'ê dùr ywẽ. Rǝ̀myɛ́ yó, Yezu zɔ̀m ǹdǝ́ bɛ n wɔ̀: «Á bǝ̀k'á dùr ywẽ yé. Kám-na á wun, bǝ̀ wɔ́ àmyɛ́.» ⁵¹ N zɛ̃̀ n zù bǔ-bwǝl ré tɛ̀bɛ́ bǝ̀ ŋwɛ́nɛ́ rǝ̀ wẽ́ mó wǝ. Zho w j'a kwĩ. Sǝ bǝ̀ wun y'à n'ê zhizhiri. ⁵² Bǝ̀ yó-kùùlí y'à ce bǝ̀ yǝ̀ búúrí kɔ́ mɔ́ kùr nyɛ̀ɛ̀ yé. ⁵³ Bǝ̀ gǝ́ byɛrhɛ mwǝ̃́ y bǝ zhɛ̀, bǝ yí bù-cǔ w kɔ̀bɔ́ ò zǎ Zhɛnɛzarɛtɛ tǝnà y sǝta mɔ́ nɛ́. ⁵⁴ Bǝ̀ gǝ́ shí bǔ-bwǝl ré wẽ́ bǝ du, lyì bí lwar Yezu pár làlà, ⁵⁵ bǝ dùr bǝ vò cɔ w wa, bǝ pwà nǝ̀bwànà ǹdǝ́ bǝ̀ pyèndè ga bǝ m'e vò jàà kɛ̀bɛ́ gakó bǝ̀ gǝ nyɛ̀ɛ̀ bǝ̀ Yezu ŋwɛ́nɛ́ è wẽ́ mó wǝ. ⁵⁶ Ń gǝ yú mǝ̀gã̌ gakó, bá è gǝ wɔ́ cǝ-fwààlɛ̀ ráá cǝ-bwǎlsɛ, ráá gɔ vúúrí wẽ́, lyì bí n'ê pwà bǝ̀ nǝ̀bwànà bɛ́ bǝ̀ twí bǝ̀ cĩ́ dwã-gùúlí jààsɛ́ wa. Bǝ̀ n'ê lwǝ̀l mò bǝ̀ ń yẽ̌ nǝ̀bwànà bɛ́ dwǝ̀rh ń kàmǝ̀-zwǐ y bɔ̀rhá nɛ́ nɛ cìcì. Sǝ byɛ̀bɛ́ gakó bǝ̀ y'à n'ê dwǝ̀rh y mó y'à n'ê wárhá.