¹ Yezu ǹdǝ́ ń kwã-lyì bí yú mwǝ̃́ y èpákɛ̀ Zhɛrasa lyì bí tǝnà y wa. ² N shí bǔ-bwǝl ré wẽ́ n du. Lò mǝ̀dù nǝ̀cílí námmǝlwɛ̀lɛ́ y'à zhe já n shí lú-bɔ̀là w n du n bǝ̀ n jǝl mo. ³ Ń yà ń nǝ́ ń zwẽ̀ lú-bɔ̀là bɛ́ wa. Lò lò yà ń wàr mɔ̀ ń nǝ́ ń lyẽ ǹdǝ́ nyáná myɛ cìcì yé. ⁴ Twǝr nánzhǝzhɔ̌ bǝ̀ y'à lyẽ ń nèsé ǹdǝ́ cǝ̌bsɛ, bǝ lyẽ ń jɛ̀sɛ́ ǹdǝ́ nyáná, n sǝ́ cǝ̌bsɛ́ ǹdǝ́ nyáná nɛ́ ga. Lò yà ń tɛ̀nɛ́ ń zhe jàn ń mà n ŋwɛ̀nɛ́ n zǝ mɔ yé. ⁵ Twéé gakó, cǝcɛ̃ ǹdǝ́ nǝ̀nyɔ́nɔ́ ga, ń yà ń ŋwɛ́nɛ́ lú-bɔ̀là bɛ́ wa, ǹdǝ́ pyàr rɛ́ wa, ń nǝ́ ń wùrhǝ́, ń nǝ́ ń zǝ nǝ́kuulí ń cɛ̀mɛ̀ ń cìnǝ̀. ⁶ Ń gǝ́ nɔ Yezu ǹdǝ́ ń gwẽ̌ ŋwɛ́nɛ́ pyépyé, n dùr n jòm ń nǝ̀dwǝ́nǝ́ yó n wùlì ń yé né, ⁷ n wǔrh dɛ̃̌ dɛ̃̌ n wɔ̀: «Yezu, Dɛ̃̌ cǝ́bal Byǐ, etǝr ǹ nǝ́ ǹ yǎl ń wɛ̀rhɛ́ nɛ nɛ́? À n'â lwǝ̀l mó Yi yil ré yilǝ, ǹ bǝ̀ká nwɛ̀nɛ̀ nɛ̀ yé.» ⁸ Yezu yà ń nǝ́ ń wǝ̀l nǝ̀cílí y ni b'è du bal mɔ́ wẽ́. Wɔ́ rǝ̀myɛ́ è ce bal mɔ́ wɔ̀ èta. ⁹ N zɛ̃̀ n bwǝ̀rh mò n wɔ̀: «Ǹ yíl byè?» Bal mɔ́ wɔ̀ mɔ̀: «À yíl ‹Nánjǝ̀jóló›, nǝ́ gǝ́ já mɔ́ yilǝ.» ¹⁰ Sǝ ń yà ń nǝ́ ń lwǝ̀l Yezu ni bǝ̀ ń bǝ̀ká n jì nǝ̀cílsí sǝ du bǝ̀ tǝnà y wẽ́ yé. ¹¹ Kùkúr nánzhǝzhɔ̌ y'à zhǐ pyɔ̀ òdù nǝ̀bán nɛ gàà, rǝ̀ n'ê dɔ̀m gɔ. ¹² Nǝ̀cílsí zɛ̃̀ sǝ lwǝ̀l Yezu ni sǝ wɔ̀: «Yẽ̌ nǝ́ vò é zù kùkúúrí tɛ̀bɛ́ èta mɔ́ wẽ́.» ¹³ N zɛ̃̀ n pǝ sɛ sɔ́má. Sǝ du sǝ zù kùkúúrí wẽ́. Rǝ̀ gakó j'a dùr rǝ cǝ́cèlé pyɔ̀ w rǝ ló mwǝ̃́ y wǝ, rǝ mɛ̃ gàà rǝ cì. Rǝ̀ gakó y'à yú mɔ̀ɔ̀rhɛ̀ rǝ̀lyè. ¹⁴ Lyì bí byɛ̀bɛ́ bǝ̀ y'à n'ê yìlì kùkúúrí ni mú dùr bǝ vò e byili cɔ w wa, ǹdǝ́ cǝ-byǐsí sǝ̀ ŋwɛ́nɛ́ cɔ w vɔ̃̀ nɛ̀ mɔ́ wẽ́. Lyì bí zɛ̃̀ bǝ̀ la vò bǝ nyǐ kɔn rɛ́ tɛ̀bɛ́ rǝ̀ wɛ̀rhɛ́ mɔ́. ¹⁵ Bǝ yí Yezu sono, bǝ pwírí mɔ̀bɔ́ nǝ̀cílsí námmǝlwǎlsɛ́ y'à zhe mó ń surhǝ né k'a bǝ̀ dwã yó, n zù gàndɛ ń jě tɛ̃́. Ywẽ zǝ bɛ. ¹⁶ Byɛ̀bɛ́ bǝ̀ y'à ŋwɛ́nɛ́ gàà bǝ̀ nɔ yò w ǹdǝ́ bǝ̀ yírhǝ́ mó, cĩ́ bi kɔn gǝ́ tó né ǹdǝ́ mɔ̀bɔ́ nǝ̀cílsí y'à zhe mó, ǹdǝ́ kɔn gǝ́ tó né ǹdǝ́ kùkúúrí mú myɛ. ¹⁷ Bǝ zɛ̃̀ bǝ lwǝ̀l Yezu ni bǝ̀ ń du bǝ̀ cɔ w wa. ¹⁸ Yezu gǝ́ tú ń nǝ́ ń zwì bǔ-bwǝl ré wǝ, bal mɔ́ mɔ̀bɔ́ nǝ̀cílsí y'à zhe mó zɛ̃̀ ń nǝ́ ń lwǝ̀l mò bǝ̀ ń mà n tó mo n vò, ¹⁹ sǝ Yezu yǝ̀ shɛ̀nɛ́ yé. Ń wò mò: «Ká vò jè, ń byili kɔn dɛ̀bɛ́ gakó Cinnɑ mú dùr ǹ nɔ̀nɔ̀ n wɛ̀rhɛ́ ǹ yil mó ǹ dwí lyì bí ni.» ²⁰ Bal mɔ́ zhǐr n vò Cɛmɛ-shí tǝnà y wa, n bwǝ̀l n byili kɔn dɛ̀bɛ́ gakó Yezu wɛ̀rhɛ́ ń yil mó. Kɔn jàr lyì bí gakó dɛ̃́dɛ̃́. ²¹ Yezu zɛ̃̀ n zù bǔ-bwǝl ré wǝ, n byɛrhɛ n ká n vò mwǝ̃́ y èpákɛ̀, ń zhǐ mwǝ̃́ y bù-cǔ w yó. Lyì nánzhǝzhɔ̌ zɛ̃̀ bǝ bǝ̀ ń sono. ²² Dwã-gùlú jì yó-cǝ́bal mǝ̀dù myɛ zɛ̃̀ n bà, ń yíl Zhǝyiiri. Ń gǝ́ nɔ Yezu, n tu ń nǝ̀dwǝ́nǝ́ yó, n wùlì ń yé né, ²³ n lwǝ̀l mò ǹdǝ́ ń wu gakó n wɔ̀: «À bǝ̀kɔ́ bǝ jàn zhe, ń nǝ́ ń yǎl n cì. Bǝ̌ zǝ ǹ jɛ̃̀ ń dwǝ̀rh mò, mùnì ga n wárh n nǝ ń cìnǝ̀.» ²⁴ Yezu zhǐr n tó mo ń la. Sǝ lyì nánjǝ̀jóló y'à tó, bǝ̀ y'à n'ê pyɛ́nɛ́ mɔ. 25 Sǝ́ nyǐ kɛ̃ mǝ̀dù yà ń ŋwɛ́nɛ́ gàà, ń yà ń tu yó, o wɛ̀rhɛ́ byinǝ shí ǹdǝ́ nǝ̀lyè ǹdǝ́ ò n'ô lyɛ̀ɛ̀ mɔ̀. ²⁵ Sǝ́ nyǐ kɛ̃ mǝ̀dù yà ń ŋwɛ́nɛ́ gàà, ń yà ń tu yó, o wɛ̀rhɛ́ byinǝ shí ǹdǝ́ nǝ̀lyè ǹdǝ́ ò n'ô lyɛ̀ɛ̀ mɔ̀. ²⁶ Ń yà ń nwɛ̀nɛ̀ dɛ̃́dɛ̃́ lyìtwǝ́rǝ́ nánzhǝzhɔ̌ jɔ̃̀ wà, n zhìlì ń jɛ̃̀-kɔn rɛ́ gakó n mǝ n shili ń cìnǝ̀, sǝ ń yǝ̀ wárh yé. Címí y gaga mɔ́ j'a kwɛrhɛ è n'ê nyáásɛ. ²⁷ Ń gǝ́ nyɛ̀ɛ̀ bǝ̀ n'ê zɔ̀m Yezu yò, n zɛ̃̀ n bǝ̀ n tó kwã nɛ́ n zù lyì-zhǎ bɛ́ wẽ́, n jɛ̃̀ɛ̃̀ jɛ̃̀ɛ̃̀ lyì bí n yí n tó Yezu kwã nɛ́ n dwǝ̀rh ń kàmǝ̀-zwǐ y ni, ²⁸ bǝ̀ ń yà ń nǝ́ ń tɛ́rɛ́ ń wẽ́ ń zhe: «Bá à gǝ dwǝ̀rh ń kàmǝ̀-zwǐ y ni myɛ cìcì, à m'a wárh.» ²⁹ Rǝ̀myɛ́ yi ní, jal mɔ́ mǝ̀ y'à n'ê dwi mú j'a zhízhílí mǝ kwĩ kùr yó. N já n tó ń yala nɛ́ wẽ́ n lwar bǝ̀ ń címí y zhɛ̀. ³⁰ Rǝ̀myɛ́ yó cìcì, Yezu já n lwar bǝ̀ jàn shí ń yala nɛ rǝ shǝ́r. N pyìrhí lyì-zhǎ bɛ́ cǝcǝl wǝ, n bwǝ̀rh n wɔ̀: «Mɔ̌ lò ń dwǝ̀rh à kàmǝ̀-zwǐ y ni?» ³¹ Ń kwã-lyì bí wɔ̀ mɔ̀: «Ǹ nǝ lyì bí gǝ́ n'ê pyɛ́nɛ́ mɔ́ nɛ́, ń jà ǹ nǝ́ ǹ bwǝ̀rh bǝ̀ wɔ́ mɔ̌ lò ń dwǝ̀rh mó?» ³² Yezu zɛ̃̀ n pyìrhí n nyǐ lyì bí bǝ̀ kǝ́kɛ́lɛ́ mɔ mɔ́ wẽ́, ń la mǝ n lwar lò yil ń wɛ̀rhɛ́ èta mɔ́. ³³ Ywẽ y'à zhe kɛ̃ mɔ́, ń nǝ́ ń kǝkǝ, ń gǝ́ yà ń yě kɔn dɛ̀bɛ́ rǝ̀ wɛ̀rhɛ́ ń yala nɛ́ wẽ́ mó yilǝ. N twẽ̌ n yí Yezu yala nɛ, n tu ń nǝ̀dwǝ́nǝ́ yó, n wùlì ń yé né, n byili mu ń wu pamparɛ̃ɛ̃. ³⁴ Yezu zɛ̃̀ n wɔ̀ mɔ̀: «À bǝ̀kɔ́, ǹ gǝ́ zhí Yi ni mú ce, ǹ nɔ ǹ cìnǝ̀. Címí y è y'à zhe mǝ́ mó zhɛ̀. Zhǝl ǹdǝ́ yǝ̀-zùlǝ́.» ³⁵ Rǝ̀myɛ́ yó, lyì shí dwã-gùlú jì y yó-cǝ́bal mɔ́ sõ kɛ̀lɛ́ w bǝ bǝ̀ ǹdǝ́ Yezu gwẽ̌ nǝ́ ń zɔ̀mà, bǝ wɔ̀ dwã-gùlú jì y yó-cǝ́bal mɔ́ nɛ: «Ǹ bǝ̀kɔ́ mɔ́ tɛ̀nɛ́ yé. Bǝ̀kɔ́n yil ǹ b'ǎ kǝ́ lyɛ̀ɛ̀ yó-cǝ́bal mɔ́?» ³⁶ Sǝ Yezu yǝ̀ bǝ̀myɛ́ zɔ̀mà nɛ́ cili yé. N zɛ̃̀ n wɔ̀ dwã-gùlú jì y yó-cǝ́bal mɔ́ nɛ: «Bǝ̀ká dùr ywẽ yé. Ǹmyɛ́ wírí ń zhí ni.» ³⁷ Ń yǝ̀ shɛ̀nɛ́ lò dõ tó mo, è gǝ dǝ̀ Pyɛɛrɛ ǹdǝ́ Zhakɛ ǹdǝ́ ń da-byǐ Zhã. ³⁸ Bǝ̀ gǝ́ yú dwã-gùlú jì y yó-cǝ́bal mɔ́ sõ kɛ̀lɛ́ wa, Yezu pwírí lyì bí n'ê kúrhǝ́, bǝ̀ n'ê wǔrh bǝ̀ m'ê ce sɔ̀ dɛ̃́dɛ̃́. ³⁹ N zù kɛ̀lɛ́ wa, n bwǝ̀rh bè n wɔ̀: «Bǝ̀kɔ́n sɔ̀ á n'á ce èta mɔ́? Byè yil á n'á kúrhǝ́? Bǝ̀sɔ́bwɛ̀lɛ́ y wɔ́ dɛ́ è dɛ̌. È yǝ̀ cì yé.» ⁴⁰ Lyì bí zɛ̃̀ bǝ̀ n'ê mɔ̀n mɔ̀. N ce bǝ̀ gakó du pwẽ̀ nè, n zɛ̃̀ n zǝ bǝ̀sɔ́bwɛ̀lɛ́ y da ǹdǝ́ è ná ǹdǝ́ ń kwã-lyì bí bǝ̀tɔ̀ y bǝ tó mo, n mǝ n zù jì y kɛ̀bɛ́ bǝ̀sɔ́bwɛ̀lɛ́ y pyě è wẽ́ mó wǝ. ⁴¹ N zǝ bǝ̀sɔ́bwɛ̀lɛ́ y jɛ̃̀ nɛ̀, n wɔ̀ ya: «Tǝlitǝ kum!» (Rǝ̀ kùr wɔ́: «À bǝ̀kɔ́, à n'â wǝ̀l mó, zɛ̃̀ dɛ̃̌!») ⁴² Rǝ̀myɛ́ yó cìcì, bǝ̀kɔ́ mɔ́ já n shí tɛ̃́ n zɛ̃̀ ń nǝ́ ń zhǝ̀lǝ̀. Lyì bí gǝ́ nɔ rǝ̀myɛ́, bǝ̀ wun zɛ̃̀ dɛ̃́dɛ̃́. Bǝ̀kɔ́ mɔ́ yà ń zhe byinǝ shí ǹdǝ́ nǝ̀lyè. ⁴³ Yezu zɛ̃̀ n gwirhi ń yé, n pǝ bɛ nyí bǝ̀ bǝ̀ bǝ̀k'a shɛ̀nɛ́ lò lò lwar yé. N zɛ̃̀ n súlí n wɔ̀ bɛ: «Pa-na mɔ kùjú n jí.»