¹ Rǝ̀myɛ́ kwã nɛ́, Yezu kǝ́ n ji kùr ń nǝ́ ń cèrhè kàrmɔ lyì bí ni mwǝ̃́ y yó. Lyì nánzhǝzhɔ̌ zɛ̃̀ bǝ bǝ̀ ń sono, sǝ bǝ̀ gǝ́ y'à já dɛ̃́dɛ̃́ mɔ́ ce, n zɛ̃̀ n zù bǔ-bwǝl rǝ̀dù wǝ, rǝ̀ ŋwɛ́nɛ́ mwǝ̃́ y wẽ́, n jòm tɛ̃́ : lyì-zhǎ bɛ́ gakó zɛ̃̀ bǝ̀ zhǐ bù-cǔ w yó. ² N zɛ̃̀ n zǝ sǝswaálsɛ ń mǝ́ ń cèchè be wẽ̀ nánzhǝzhɔ̌, ń zhe: ³ Cili-nǝ: nyǐ wɔ́ bal mǝ̀dù ń yà n du ń la ń twã́ dú. ⁴ Ń gǝ́ yú ń nǝ́ ń dwì yi ní, jíjí byǎ bɛ́ jàlà ló tɛ̃́ sɔ́má y nyí ni. Kúmsi bǝ̀ sǝ jí ri. ⁵ Bǝ̀ jàlà ló pàtá yó, shó y'à bǝ já gàà yé. Bǝ lyĩ làlà , rǝ k'a cì, rǝ̀ nèsé gǝ́ yǝ̀ y'à yǝ̀ tɛ̃́ zwì mú yilǝ. ⁶ Sǝ nǝ̀nyɔ́nɔ́ w gǝ́ byìlǝ̀, o mà rɛ̀, rǝ k'a cì, rǝ̀ nèsé gǝ́ yǝ̀ tɛ̃́ zwì mú yilǝ. ⁷ Bǝ̀ jàlà ló sɔr jàà wa. Rǝ̀myɛ́ ǹdǝ́ sɔr rɛ́ ga tó dwã rǝ lyĩ. Sɔr rɛ́ byì rǝ pyɛ́nɛ́ jíjí rí, rǝ̀ yǝ̀ byǎ ce ye:. ⁸ Bǝ̀ jàlà ló cɛ kɛ̀bɛ́ è càn wẽ́, bǝ lyĩ, rǝ byì rǝ ce byǎ nánzhǝzhɔ̌. Jíjí ywẽ́ jàlà ce byǎ shǝ́-ètɔ̀ shǝ́-ètɔ̀, jàlà ce shí-shǝ̀ldù shí-shǝ̀ldù, jàlà ce zɔ̌m zɔ̌m. ⁹ Yezu zɛ̃̀ n súlí n wɔ̀: lò ǹ zhe zhã̌ ǹ la cilu sǝ́ cili ¹⁰ Ń gǝ́ tú n kɔl n yẽ̌ lyì-zhǎ bɛ́ nɛ n vò ń zhǐ kwã nɛ́ ń dúdú, lyì bí byɛ̀bɛ́ bǝ̀ y'à zhǐ bǝ kǝ́kɛ́lɛ́ mɔ mɔ́, e súlí ń kwã-lyì bí shí ǹdǝ́ bǝ̀lyè y zɛ̃̀ bǝ bwǝ̀rh mo sǝswalá y kùrǝ̀. ¹¹ N zɛ̃̀ n wɔ̀ bɛ: Yi ce ámyɛ̌ yě rǝ̀ pyɛ̀lɛ̀ rɛ́ ywẽ̀ né nǝ̀ shèè mó kùrǝ̀. Sǝ è wɔ́ lyì bí dwã bɛ́ yilǝ, à n'â byili bǝ̀myɛ́ nɛ ǹdǝ́ sǝswaálsɛ, ¹² mùnì ga, bǝ̀ gǝ n'ê nyǐ myɛ, sǝ bǝ̀ bǝ̀k'a nǝ yé; bǝ̀ gǝ n'ê cili myɛ, sǝ bǝ̀k'a nyɛ̀ɛ̀ nǝ̀ kùrǝ̀, bǝ pyìrhí bǝ̀ wun bǝ k'a b'à sõ mùnì Yi pǝ bɛ sǔbri yé. ¹³ N zɛ̃̀ n zhízhílí n bwǝ̀rh be n wɔ̀: Á yǝ̀l sǝswalá y kɛ̀bɛ́ kùrǝ̀? Etǝr á nǝ m'a tó né á lwar sǝ̀ dwã bɛ́ kùrǝ̀? ¹⁴ Nyǐ twã́-dùrnǝ mó wɔ́ Yi zɔ̀mɛ̀ rɛ́ ń nǝ́ ń dwì. ¹⁵ Lyì jàlà n'ê cili Yi zɔ̀mɛ̀ rɛ́, sǝ Shǝtana n'ê twí làlà e vùr zɔ̀mɛ̀ rɛ́ bǝ̀ y'à zwẽ bǝ cĩ́ bǝ̀ wẽ́ mó. Bǝ̀myɛ́ mɔ́ nyɛ̌ ndǝ sɔ́má y nyí rí ta. ¹⁶ Jàlà n'ê cili Yi zɔ̀mɛ̀ rɛ́, bǝ pú e zwẽ re làlà ǹdǝ́ wu-nyɔ̃̀. Sǝ rǝ̀myɛ́ kwã nɛ́, bǝ̀ t'â pyɛ́nɛ́ bǝ̀ yẽ̌ rǝ̀ jòm bǝ̀ wẽ́ rǝ̀ pɛ nǝ̀rh yé. ¹⁷ Bǝ̀ n'ê zwẽ re kùr yó; sǝ zwini ráá nɔ̀nɔ̀ gǝ tú Yi zɔ̀mɛ̀ yilǝ, bǝ̀ n'ê gɛ bǝ̀ wun làlà. Bǝ̀myɛ́ mɔ́ nyɛ̌ ǹdǝ pàtá y yó mó ta. ¹⁸ Jàlà n'ê cili Yi zɔ̀mɛ̀ rɛ́, sǝ rǝ̀myɛ́ kwã nɛ́, ¹⁹ lũ w kɔ̀bɔ́ twǝ́lǝ́ né, ǹdǝ́ ò nǝ̀cɛ̀ndɛ́ shil, ǹdǝ́ shilǝ dwã nánzhǝzhɔ̌ n'ê twí rǝ̀ zwì bǝ̀ wẽ́, nǝ pyɛ́nɛ́ Yi zɔ̀mɛ̀ rɛ́, rǝ̀ t'â ce byǎ yé. Bǝ̀myɛ́ wɔ́ nyɛ̌ ǹdǝ sɔr rɛ́ jàà y ta. ²⁰ Jàlà n'ê cili Yi zɔ̀mɛ̀ rɛ́, bǝ zwẽ re bǝ cĩ́ bǝ̀ wẽ́, bǝ zɛ̃̀ bǝ ce byǎ. Bǝ̀ jàlà ce byǎ shǝ́-ètɔ̀ shǝ́-ètɔ̀, jàlà ce byǎ shí-shǝ̀ldù shí-shǝ̀ldù, jàlà ce byǎ zɔ̌m zɔ̌m. Bǝ̀myɛ́ wɔ́ nyɛ̌ ǹdǝ cɛ y kɛ̀bɛ́ è càn mɔ́ ta. ²¹ Yezu kǝ́ n wɔ̀ ń kwã-lyì bí ni: Bǝ̀ y'a kwè pàntɛ́mɛ́ bǝ pú nǝ̀bwɛ́nɛ́ kùr wǝ, ráá bǝ cĩ́ pal kùr wǝ? È dǝ̀ pàntɛ́mɛ́ jàà w bǝ̀ y'a cĩ́ y ní? ²² Zhǝ̀nà, kaka tɛ̀nɛ́ rǝ̀ shèè, rǝ̀ t'â la pwẽ̀ ne du yé. Kaka myɛ tɛ̀nɛ́ bǝ̀ yǝ̀l bǝ̀ t'â la rɛ lwar pamparɛ̃ɛ̃ yé. ²³ Lò ǹ zhe zhã̌ ǹ la cilu sǝ́ cili. ²⁴ N kǝ́ n wɔ̀ bɛ: Tɛ̀bɛ́ Á n'á cili mú, cili-nǝ re cɛ̀nɛ̀. Zwã̌ y kɛ̀bɛ́ á n'á ce è wẽ́ á pɛ á dwã bɛ́ nɛ mɔ́, wɔ́ èmyɛ́ cìcì wẽ́ Yi m'a ce né rǝ pǝ ámyɛ nɛ, sǝ rǝ̀ m'a súlí kɔn nɛ rǝ pǝ ába. ²⁵ Zhǝ̀nà, mɔ̀bɔ́ ń zhe, bǝ̀ m'a pɔ̃ n mǝ n súlí. Mɔ̀bɔ́ ń bǝ zhe, bǝ̀ m'a zwẽ tɛ̀bɛ́ námpɔ́lɛ́ y ń zhe mó myɛ cìcì. ²⁶ Yezu kǝ́ n ji sǝswalá n wɔ̀: À m'a byili ába kɔn dɛ̀bɛ́ rǝ̀ rǝ̀ n'ê myɛrhɛ Yi pyɛ̀lɛ̀ rɛ́. ²⁷ Lò gǝ dù jíjí dwí ń cɛ wa, ń zɛ̃̀ ń vò ǹ y'a dɛ̀ɛ̀, ń dɛ̀ɛ̀, ń dùlí ń zɛ̃̀, cǝcɛ̃ ǹdǝ́ nǝ̀nyɔ́nɔ́ ga. ²⁸ Jíjí rí n'ê lyĩ rǝ̀ zɛ̃̀ ǹdǝ́ ń yǝ̀l kɔn gǝ́ n'ê tó né yé. Jíjí rí n'ê lyĩ rǝ̀ cìcì nì, rǝ jɛ̀rɛ̀ rǝ tò rǝ ce cã̌; ²⁹ rǝ̀myɛ́ kwã nɛ́, wɔ́ púrh; rǝ zɛ̃̀ rǝ ce byǎ. Sǝ rǝ̀ gǝ tú rǝ̀ byìl rǝ̀ zhɛ̀, bǝ̀ n'ê jǝ̀r rè, bǝ̀ wɔ́ jòró yi è yúwǝ́ ³⁰ Yezu kǝ́ n wɔ̀ bɛ: «Bǝ̀kɔ́n nǝ́ m'ǎ m'é myɛrhɛ Yi pyɛ̀lɛ̀ rɛ́, ráá sǝswalá kɛ̌ nǝ́ m'ǎ m'é byili rǝ̀ gǝ́ wɔ́ nɛ́? ³¹ Rǝ̀ nyɛ̌ dwã ǹdǝ cǒ byǐ námpɔ́lɛ́ ta, è nyɛ̌ námpɔ́lɛ́ du lũ w báárɛ́ dɔma bɛ́ byǎ bɛ́ gakó. ³² Sǝ bǝ̀ gǝ dù yǝ̀, è n'ê lyĩ, e byì nánfɔ̀lɔ̀ du báárɛ́ wẽ̀ ré gakó, e tò jɛ̀rh nánfwààlɛ̀. Kúmsi n'ê twí sǝ̀ cĩ́ sǝ̀ jàlá è ywǝ́l mó wǝ.» ³³ Èta, Yezu yà ń nǝ́ ń tó sǝswaálsɛ nánzhǝzhɔ̌ dɛnnɛ ń byili bi Yi zɔ̀mɛ̀ rɛ́ ǹdǝ bǝ̀ gǝ́ y'à wɔ̌ bǝ̀ m'a nyɛ̀ɛ̀ rǝ̀ kùr né. ³⁴ Ń yà ń tá ń zɔ̀m ǹdǝ́ bɛ ǹdǝ́ è gǝ dǝ̀ ǹdǝ́ sǝswaálsɛ yé. Sǝ è gǝ wɔ́ ńmyɛ̌ ǹdǝ́ ń kwã-lyì bí dúdú, ń yà ń nǝ́ ń byili bi sǝ̀ gakó kùrǝ̀. ³⁵ Rǝ̀myɛ́ yù w cìcì, dǝ̀dɛ̀nɛ́ y gǝ́ tú e yí, Yezu wɔ̀ ń kwã-lyì bí ni: «Bà-nà nǝ́ byɛrhɛ nǝ́ vò mwǝ̃́ y èpákɛ̀.» ³⁶ Bǝ ce lyì-zhǎ bɛ́ zhǐr bǝ̀ la jè. Yezu kwã-lyì bí zɛ̃̀ bǝ kwè mò ǹdǝ́ bǔ-bwǝl ré tɛ̀bɛ́ ń yà ń ŋwɛ́nɛ́ rǝ̀ wẽ́ mó. Bǔ-bwǝlǝ dwã myɛ y'à pú ń kùrǝ̀. ³⁷ Zho nánfɔ̀lɔ̀ zɛ̃̀ ò n'ô ce, nɛ̃̌ mɔ́ zɛ̃̀ mǝ̀ n'ê zwì bǔ-bwǝl ré ń yà ń ŋwɛ́nɛ́ rǝ̀ wẽ́ mó wǝ, rǝ̀ n'ê yǎl rǝ sú. ³⁸ Yezu yà ń pyě bǔ-bwǝl ré kwã y wa, n zǝ yó-kɔ̃́ɔ̃́ n kwɛ̃́ ń yó, ń dɛ̌. Ń kwã-lyì bí zɛ̃̀ bǝ zhàrh mɔ̀, bǝ wɔ̀: «Yó-cǝ́bal, ǹ tá ǹ gá nǝ́ gǝ́ la cú mú ni?» ³⁹ N shí jan rɛ́ wẽ́ ń zɛ̃̀, n bya zho wǝ́, n wɔ̀ mwǝ̃́ y nɛ̃̌ mɔ́ nɛ: «Shĩ̌ ǹ nyí. Yẽ̌ ǹ sɔ̀ w nɛ.» Zho w j'a zhízhílí o kwĩ. Nɛ̃̌ mɔ́ myɛ zhì shɛ́ɛ́. ⁴⁰ N zɛ̃̀ n wɔ̀ ń kwã-lyì bí ni: «Byè yil á n'á dùr ywẽ? Á gwẽ̌ yǝ̀ nɛ zhí nà?» ⁴¹ Ywẽ nánfɔ̀lɔ̀ zɛ̃̀ rǝ̀ zhe be. Bǝ zɛ̃̀ bǝ̀ n'ê wǝ̀l dwã nɛ: «Bal mɔ́ mɔ̀bɔ́ wɔ́ tǝr lò, zho ǹdǝ́ mwǝ̃́ nɛ̃̌ myɛ m'ê shɛ̀nɛ́ ń nyí ni?»