koussoube-marc-lee_mrk_text

Kǝ̀kàl-fwɛ̀lɛ̀ 3

¹ Rǝ̀myɛ́ kwã nɛ́, Yezu ká n vò dwã-gùlú jì y wẽ́. Bal mǝ̀dù yà ń ŋwɛ́nɛ́ gàà ń jɛ̃̀ y'à cùwǝ̀. ² Sǝ byɛ̀bɛ́ bǝ̀ y'à ŋwɛ́nɛ́ gàà mɔ́ jàlà y'à n'ê yǎl bǝ cĩ́ yò Yezu yó wǝ. Bǝ zɛ̃̀ bǝ̀ n'ê myǝ̀lɛ́ mɔ, bǝ̀ la nyǐ ǹdǝ́ ń gǝ mà n wárh bal mɔ́ shìrhǝ́ dɛ̃ rɛ́ yùwǝ̀. ³ Yezu wɔ̀ bal mɔ́ ń jɛ̃̀ y cù mú ni: Zɛ̃̀ ń zhì dɛ̃̌ lyì bí gakó yé né. ⁴ N zɛ̃̀ n bwǝ̀rh lyì bí n wɔ̀: Shìrhí dɛ̃ rɛ́ yùwǝ̀, lò zhe sɔ́má ń wɛ̀rhɛ́ cɛ̀nɛ̀ ráá lwɛlɛ? Ń wɔ̌ ń vwǎrh numbyíní myǝ̌l, ráá ń jǝr è myǝ̌l? Sǝ bǝ̀ yǝ̀ mɔ lyár bǝ̀ kaka yé. ⁵ N zɛ̃̀ n nyǐ bǝ̀ gakó. Ń lyim zɛ̃̀, ń wu zhìlì dɛ̃́dɛ̃́, bǝ̀ wu-kùùlí yilǝ. N zɛ̃̀ n wɔ̀ bal mɔ́ nɛ: Cèlè ǹ jɛ̃̀ yá. N cèlè yǝ̀, e j'a k'a bǝ̀ è jàà wa. ⁶ Farɛzhɛ̃ɛ̃bá zɛ̃̀ bǝ du pwẽ̀ ne, làlà ǹdǝ́ bǝ̀ zhǝ̀l bǝ nǝ Erɔɔdɛ lyì bí, bǝ̀ la pyà bǝ̀ gǝ́ m'a tó né bǝ zǝ Yezu bǝ gu. ⁷ Yezu ǹdǝ́ ń kwã-lyì bí zhǐr bǝ vò Gǝlile mwǝ̃̌ y yó, sǝ lyì nánjǝ̀jóló y'à shí Gǝlile ǹdǝ́ Zhide ⁸ ǹdǝ́ Zhǝrǝzalɛm ǹdǝ́ Yidume ǹdǝ́ cɛmɛ nɛ́ nyɛ̀bɛ́ nǝ̀ ŋwɛ́nɛ́ Zhɔrdɛ̃ bwǐ y èpákɛ̀ mɔ́, ǹdǝ́ nyɛ̀bɛ́ nǝ̀ ŋwɛ́nɛ́ Tiiri ǹdǝ́ Sǝdɔ̃ sarh nɛ mɔ́ wẽ́, bǝ du bǝ tó mo. Bǝ̀myɛ́ gakó y'à nyɛ̀ɛ̀ tɛ̀bɛ́ ń nǝ́ ń wɛ̀rhɛ́ mɔ́ yò. Wɔ́ rǝ̀myɛ́ è ce, bǝ zɛ̃̀ bǝ bǝ̀ ń sono. ⁹ N wɔ̀ ń kwã-lyì bí ni bǝ̀ bǝ̀ tɛnɛ bǔ-bwǝl rǝ̀dù bǝ pɔ̃, mùnì ga lyì bí bǝ̀k'a pyɛ́nɛ́ mɔ yé. ¹⁰ Ń gǝ́ yà ń nǝ́ ń wárh lyì nánzhǝzhɔ̌ mɔ́ ce, lyì bí byɛ̀bɛ́ gakó bǝ̀ y'à wɔ́ nǝ̀bwànà mɔ́ y'à n'ê jɛ̀nɛ̀ dwã, mùnì ga bǝ dwǝ̀rh mò. ¹¹ Nǝ̀cílsí námmǝlwǎlsɛ́ gǝ́ nɔ mɔ, sǝ tu ń yé né sǝ̀ n'ê wǔrh sǝ zhe: Ǹ wɔ́ Yi Byǐ. ¹² Sǝ Yezu yà ń nǝ́ ń ji si búlǝ́, ń nǝ́ ń pɛ sɛ nyí bǝ̀ sǝ̀ bǝ̀k'a ce bǝ lwar ń gǝ́ wɔ́ nɛ́ yé. ¹³ Yezu zɛ̃̀ n jì pyɔ̀ w yó, n byẽ̀ lyì bí byɛ̀bɛ́ ń nǝ́ ń yǎl mɔ́ bǝ bǝ̀ ń yala nɛ. ¹⁴ N zɛ̃̀ n cír lyì shí ǹdǝ́ bǝ̀lyè bǝ̀ wẽ́ n ce bǝ jǐrh ń tùntúmǝ́. Ń cǐr be mùnì ga bǝ yǝ̀ nɛ́ ǹdǝ́ mɔ, sǝ n twĩ̀ bì bǝ bwǝ̀l yò-ècɔ̀nɔ̀ nyí rí, ¹⁵ n pǝ bɛ ŋwɔ̀nɔ́ mùnì bǝ jì nǝ̀cílsi námmǝlwǎlsɛ. ¹⁶ Nyǐ-nǝ byɛ̀bɛ́ ń cír mó yilǝ né: Shɔmɔ mɔ́ mɔ̀bɔ́ Yezu co ń yil bǝ̀ Pyɛɛrɛ mɔ́, ¹⁷ ǹdǝ́ Zebede byǎ bɛ́ Zhakɛ ǹdǝ́ zhã (Yezu co bǝ̀ yi-lyǝ́rsé bǝ̀ Bwanɛzhɛ; rǝ̀myɛ́ n'ê yǎl e byili bǝ̀ bǝ̀ nyɛ̌ ǹdǝ dwȧgùlú ta), ¹⁸ e súlí Andɛrɛ ǹdǝ́ Shilipu, ǹdǝ́ Bǝtǝlǝmyi, ǹdǝ́ Mǝco, ǹdǝ́ Tɔma, ǹdǝ́ Alǝfɛ byǐ Zhakɛ, ǹdǝ́ Tadɛ, ǹdǝ́ yǝ̀wǎl cìná bé gùlú w lò mǝ̀dù ń yíl Shǝmɔ, ¹⁹ e súlí Zhidǝ Esǝkarǝyɔtɛ, mɔ̀bɔ́ ń myiìnì Yezu n pǝ bǝ zǝ mɔ́. ²⁰ Rǝ̀myɛ́ kwã nɛ́, Yezu zɛ̃̀ n vò kɛ̀lɛ́ wa. Lyì nánzhǝzhɔ̌ k'e bǝ̀ dwã yó. Rǝ̀myɛ́ ce ńmyɛ̌ ǹdǝ́ ń kwã-lyì bí k'ê bǝ yé zhe sǝ bǝ jí kùjú cìcì yé. ²¹ Ń dwí lyì bí gǝ́ nyɛ̀ɛ̀ rǝ̀myɛ́, bǝ wɔ̀: Dɛ̀ga wɔ́ ń yó ò n'ô yǎl o zhǐr. Bǝ zɛ̃̀ bǝ bà, bǝ̀ la mɔ zal bǝ m'e vò kwã nɛ́. ²² Muyiisi nyǝ́ né byilnǝ bé bǝ̀ y'à shí Zhǝrǝzalɛm bǝ bǝ̀ cɔ w wẽ́ gàà mɔ́ y'à n'ê wǝ̀l bǝ̀ wɔ́ nǝ̀cílsí námmǝlwǎlsɛ́ pyɔ̌ Bǝzǝbuli ń zhe mo. Jàlà myɛ y'à n'ê wǝ̀l bǝ̀ wɔ́ nǝ̀cílsí pyɔ̌ mɔ́ jàn ń mǝ́ ń nǝ́ ń jì sì. ²³ N zɛ̃̀ n byẽ̀ be, n ji sǝswalá n pɛ bɛ n wɔ̀: Shatana m'a wɛ̀rhɛ́ etǝr e jì Shǝtana? ²⁴ tǝnà èdù lyì gǝ pɔr dwã nɛ bǝ̀ n'ê bwí dwã, tǝnà y èmyɛ́ t'â la zhǔ e yǝ̀ tǝnà yé. ²⁵ Eta myɛ, kɛ̀lɛ́ èdù lyì gǝ pɔr dwã nɛ, bǝ̀ n'ê bwí dwã, kɛ̀lɛ́ èmyɛ́ t'â la zhǔ è yǝ̀ kɛ̀lɛ̀ yé. ²⁶ Shǝtana gǝ zɛ̃̀ è k'â n'ê bwí ǹdǝ́ è cìcì, èmyɛ́ yò zhìlì; è pyɛ̀lɛ̀ rɛ́ t'â la zhǔ yé. ²⁷ Lò wàr ń mà n zù nǝ̀jàl-bal sõ kɛ̀lɛ́ wa, ń pwà ń jɛ̃̀-kɔn rɛ́, ǹdǝ́ ǹ yǝ̀ jɛ̀rɛ̀ ń lyẽ mo n cĩ́ yé. Sǝ ǹ gǝ lyẽ mo ǹ zhɛ̀, ǹ wɔ̌ ǹ m'ǎ pwà ń jɛ̃̀-kɔn rɛ́ gakó. ²⁸ Yezu kǝ́ n súlí n wɔ̀: Zhǝ̀nà, à n'â wǝ̀l ába: lyì bí wɔ̌ bǝ̀ m'a nǝ bǝ̀ dwǝ́ǝ́ré ǹdǝ́ bǝ̀ tùùrhí tɛ̀bɛ́ gakó bǝ̀ n'ê Yi mú sǔbri. ²⁹ Sǝ lò mɔ̀bɔ́ ǹ tùrh Ehirhǝ́ náàcɛ̀nɛ́, ǹ wɛ̀rhɛ́ yǝ̀-bǝlɔ̀lɔ́ kɔ̀bɔ́ ò bǝ sǔbri zhe gaga, sǝ yǝ̀-bǝlɔ̀lɔ́ w òmyɛ́ b'a mɛ̃ ń yó w dɛ̃ gakó. ³⁰ Wɔ́ bǝ̀ gǝ́ wò bǝ̀ wɔ́ nǝ̀cílí námmǝlwɛ̀lɛ́ è zhe mo mó è ce n zɔ̀m èta. ³¹ Yezu da-byǎ bɛ́ ǹdǝ́ ń ná zɛ̃̀ bǝ bà. Bǝ zhì pwẽ̀ nè, bǝ twĩ̀ lò bǝ̀ ń byẽ̌ mo n pǝ bɛ. ³² N yí ǹdǝ́ lyì-zhǎ bɛ́ jě bǝ kǝ́kɛ́lɛ́ mɔ, n wɔ̀ mɔ̀: Nyǐ à ná ǹdǝ́ ǹ da-byǎ bɛ́ zhǐ pwẽ̀ bǝ̀ n'ê yǎl mɔ́. ³³ Yezu lyár. N zɛ̃̀ n wɔ̀ bɛ: Mɔ̌ ń wɔ́ nà mɔ́? Byɛ̌ bǝ̀ wɔ́ à da-byǎ bɛ́. ³⁴ N zɛ̃̀ n pyìrhí n byili lyì bí byɛ̀bɛ́ bǝ̀ jě bǝ kǝ́kɛ́lɛ́ mɔ mɔ́ nɛ wɔ̀: Nyǐ à ná mɔ́ ǹdǝ́ à da-byǎ bɛ́. ³⁵ Lwar-na bǝ̀ lò mɔ̀bɔ́ gakó ǹ nǝ́ ǹ wɛ̀rhɛ́ Yi pùbùlǝ̀, wɔ́ ǹmyɛ́ ǹ wɔ́ à da-byǐ, ǹ wɔ́ à nǝkɔ́, ǹ wɔ́ à ná