koussoube-marc-lee_mrk_text

Kǝ̀kàl-fwɛ̀lɛ̀ 2

¹ È dwã màngɛlɛ́, Yezu ká n bǝ̀ kapɛrnaɔm. Lyì bí lwar bǝ̀ ń ŋwɛ́nɛ́ kɛ̀lɛ́ wa, ² bǝ zɛ̃̀ bǝ bǝ̀ nánzhǝzhɔ̌ bǝ sú jì yǝ́, bǝ dàl bǝ̀ zhǐ pwẽ̀ nè. Bwǝ̌l y'à k'ê tɛ̀nɛ́ tútwí-ènyí rí ni yé. N zɛ̃̀ ń nǝ́ ń byili bi Yi zɔ̀mɛ̀ rɛ́. ³ Rǝ̀myɛ́ yó, lyì jàlà zɔ bal mǝ̀dù ń wɔ́ gwànà bǝ m'e bàn ń sono. È y'à wɔ́ nunǝ bǝ̀na bǝ̀ y'à zhĩ mu. ⁴ Lyì-zhǎ bɛ́ ce bǝ̀ y'à wàr bǝ̀ la zǝ mɔ bǝ yí Yezu yé né yé. Bǝ zɛ̃̀ bǝ lɔ̀rh bɔ̀l lyarh rɛ́ wa, bǝ tó gàà bǝ só mo tɛ̃́ Yezu gǝ́ zhǐ mǝ̀gã̌ mɔ́ ǹdǝ́ ń pyònò w ga. ⁵ Yezu gǝ́ pwírí bǝ̀ zhí mu, n zɛ̃̀ n wɔ̀ gwànà y nɛ: À byǐ, ǹ nɔ ǹ yǝ̀-bǝlwàálɛ́ sǔbri. ⁶ Muyiisi nyǝ́ né byilnǝ bé byɛ̀bɛ́ bǝ̀ y'à jě gàà mɔ́ zɛ̃̀ bǝ̀ n'ê bùl bǝ̀ wẽ́ bǝ̀ zhe: ⁷ Byè yil bal mɔ́ mɔ̀bɔ́ nǝ́ ń zɔ̀m èta, ń nǝ́ ń tùrh Yi. Lò wɔ̌ ń pɛ yǝ̀-bǝlwàálɛ sǔbri, ǹdǝ́ è dǝ̀ Yi dúdú? ⁸ Yezu lwar bǝ̀ wun bùlǝ̀ ń wẽ́, n zɛ̃̀ n wɔ̀ bɛ: Byè yil á n'á bùl rǝ̀myɛ́ á wẽ́? ⁹ À gǝ wò gwànà y nɛ b'e nɔ è yǝ̀-bǝlwàálɛ́ sǔbri, ráá à gǝ wò y b'è zɛ̃̀ e kwè è pyònò w e vò, wɔ̌ tɛ̌ rǝ̀ wɔ́ nàná du? ¹⁰ Sǝ èlǎsɛ̃́ á m'ǎ lwar bǝ̀ numbyíní byǐ zhe ŋwɔ̀nɔ́ cɛ yó, ń wɔ̌ ń pɛ yǝ̀-bǝlwàálɛ sǔbri. N zɛ̃̀ n zhízhílí n wɔ̀ gwànà y nɛ: ¹¹ A n'â wǝ̀l mó : zɛ̃̌ dɛ̃̌ ń kwè ǹ pyònò w ń vò jè. Kùr yó, ¹² bal mɔ́ shí tɛ̃́ n zɛ̃̀ n kwè ń pyònò w lyì bí gakó yírh wǝ, n zhǐr ń la jè. Kɔn jàr lyì bí gakó dɛ̃́dɛ̃́, bǝ zɛ̃̀ bǝ̀ n'ê cèrhé Yi bǝ̀ zhe: Nǝ́ gwẽ̌ yǝ̀ rǝ̀myɛ́ mɔ́ dwí rí nɛ gaga yé. ¹³ Yezu ká n vò Gǝlile mwǝ̃̌ y yó. Lyì-zhǎ bɛ́ y'à n'ê zhǝ̀l ń sono, n zɛ̃̀ ń nǝ́ ń cèrhè be kàrmɔ. ¹⁴ N zhǐr gàà ń nǝ́ ń lyɛ̃, n nǝ Alǝfɛ byǐ Levyi ń jě myǝ̌l-kwǎndɛ zõ jàà wa. N wɔ̀ mɔ: Zɛ̃̀ ń tó ne. Levyi shí tɛ̃́ n zɛ̃̀ n tó Yezu ni ¹⁵ Rǝ̀myɛ́ kwã nɛ́, Yezu zɛ̃̀ ń jě Levyi sõ ń nǝ́ ń jí kùkú. Mǝ̌l-kwǎnd:é zwennǝ nánzhǝzhɔ̌ ǹdǝ́ lyì byɛ̀bɛ́ bǝ̀ n'ê wɛ̀rhɛ́ yàà yàà bǝ̀ t'â zwẽ Yi nyǝ́ né y'à tú bǝ tó ńmyɛ̌ ǹdǝ́ kwã-lyì bí bǝ̀ n'ê jí. Bǝ̀ y'à já dɛ̃́dɛ̃́ bǝ̀ n'ê tó mo. ¹⁶ Farɛzhɛ̃ɛ̃bá byɛ̀bɛ́ bǝ̀ wɔ́ Muyiisi nyǝ́ né byilnǝ bé mó gǝ́ pwírí Yezu tó myǝ̌l-kwǎndɛ́ zwennǝ bé ǹdǝ́ byɛ̀bɛ́ bǝ̀ t'â zwẽ Yi nyǝ́ né mó ne ń nǝ́ ń jí kùjú, bǝ bwǝ̀rh ń kwã-lyì bí bǝ wɔ̀: Byè yil á yó-cǝ́bal mɔ́ nǝ́ ń tó myǝ̌l-kwǎndɛ́ zwennǝ bé ǹdǝ́ byɛ̀bɛ́ bǝ̀ t'â zwẽ Yi nyǝ́ né mó ne ń nǝ́ ń jí? ¹⁷ Yezu gǝ́ nyɛ̀ɛ̀ rǝ̀myɛ́, n wɔ̀ bɛ: Lyì bǝ̀ zhe bǝsàzùlí bǝ lyìtwǝ́r tum zhe yé. Wɔ́ nǝ̀bwànà bǝ̀ zhe ń tum. È dǝ̀ wu-cángá cìnǝ́ à tú byõ̌ yé. Wɔ́ yǝ̀-bǝlwàálɛ cìnǝ́ à tú byõ̌. ¹⁸ Dɛ̃ rǝ̀dù, Zhã kwã-lyì bí ǹdǝ́ Farɛzhɛ̃ɛ̃bá y'à lyẽ bǝ̀ nyí. Lyì zɛ̃̀ bǝ bà, bǝ bwǝ̀rh Yezu bǝ wɔ̀: Byè yil Zhã kwã-lyì bí ǹdǝ́ Farɛzhɛ̃ɛ̃bá kwã-lyì bí n'ê lyẽ bǝ̀ nyí, ǹmyɛ́ kwã-lyì bí zɛ̃̀ bǝ̀ t'â lyẽ bǝ̀ nyí? ¹⁹ Yezu n wɔ̀ bɛ: Á n'á bùl bǝ̀ lò kɛ̃-jú gǝ ŋwɛ́nɛ́, n zɛ̃̀ n byẽ̀ lyì, bǝ̀ wɔ̌ bǝ̀ b'a yí gàà bǝ lyẽ bǝ̀ nyí, kɛ̃ mɔ́ byal mɔ́ jà ń gwẽ̌ ŋwɛ̀nɛ́ ǹdǝ́ bɛ?, bǝ̀ wàr bǝ̀ b'a lyẽ bǝ̀ nyí yé. ²⁰ Sǝ dɛ̃ ŋwɛ́nɛ́ rǝ̀ bànà, bǝ̀ m'a vùr kɛ̃ mɔ́ byal mɔ́ bǝ̀ wẽ́. Rǝ̀myɛ́ yi ní, bǝ̀ m'a zɛ̃̀ bǝ lyẽ bǝ̀ nyí. ²¹ Bǝ̀ t'â kwè kàmǝ̀-jɛ̃̀ nándwǝ̃̀ bǝ̀ m'ê pwí gàn-dṍ yé. Bǝ̀ zɛ y bǝ̀ pú wǝ, kàmǝ̀-jɛ̃̀ y nándwǝ̃̀ y m'a vwɛ̃ gàn-dṍ w e kwɛrhɛ e kǎr w e dwini shãã ga. ²² Bǝ̀ t'â kwè sǝ̀-búlú bǝ̀ ce nǝ̀-bɔ̀lsɛ nándwǝ́rh wẽ́ yé. Bǝ̀ gǝ co w né, ò m'a púrh nǝ̀-bɔ̀lsɛ́, ò cìcì mú ló tɛ̃́, nǝ̀bɔ̀lsɛ́ myɛ j'a cɔ̀. Sǝ̀bùlú wɔ́ nǝ̀-bɔ̀lsɛ nándùrh wẽ́ bǝ̀ mǝ̌ sǝ bǝ ce w né. ²³ Shìrhǝ́ dɛ̃ rǝdù yùwǝ̀, Yezu ǹdǝ́ ń kwã-lyì bí y'à tó kálsɛ wẽ́ bǝ̀ n'ê lyɛ̃. E jà è y'à wɔ́ fɔ̀ yi. Ń kwã-lyì bí zɛ̃̀ bǝ̀ n'ê kɛ́ jíjí rí sɔ́má y nyí ni mú. ²⁴ Farɛzhɛ̃ɛ̃bá zɛ̃̀ bǝ wɔ̀ Yezu ni: wɔ́ byè yil ǹ kwà-lyì bí n'ê wɛ̀rhɛ́ kɔn dɛ̀bɛ́ lò bǝ sɔ́má zhe sǝ n wɛ̀rhɛ́ shrhǝ́ dɛ̃ yùwǝ̀? ²⁵ Yezu wɔ̀ bɛ: Á gwẽ̌ yǝ̀ kɔn rɛ́ dɛ̀bɛ́ Dǝvyidi wɛ̀rhɛ́ nɔrh mɔ́ gǝ́ y'à zhe ńmyɛ̌ ǹdǝ́ ń tó-dwã bɛ́, e jà kaka y'à tɛ̀nɛ́ bǝ̀ la jú mú kàrmɔ̀ gaga nà? ²⁶ Ń zù Yi jù wǝ̀, n kwè búrú w bǝ̀ y'à pɔ Yi ni mú n dɔ̃̀. E jà wɔ́ vwĩ̀-zwǝ́lnǝ bé dúdú bǝ̀ zhe sɔ́má bǝ̀ wɔ̌ bǝ̀ dɔ̀m wa. Wɔ́ Abyataarɛ ń yà ń wɔ́ vwĩ̀-zwǝ́lnǝ bé yé né cìnǝ́ bé gakó náncɛ rǝ̀myɛ́ yi ní Dǝvyidi kwè búrú w n dɔ̃̀, n dàl n pǝ ń tó-dwã bɛ́ nɛ bǝ̀myɛ dɔ̃̀. ²⁷ Yezu zɛ̃̀ n súlí n wɔ̀ bɛ: Yi wɛ̀rhɛ́ shìrhǝ́ dɛ̃ rɛ́ numbyíni yilǝ, sǝ rǝ̀ yǝ̀ numbyí wɛ̀rhɛ́ shìrhǝ́ dɛ̃ rɛ́ yil yé. ²⁸ Èta, Numbyíní Byǐ cǐ shìrhǝ́ dɛ̃ rɛ́ myɛ.