¹ Cɛ y gə́ tú e lá, Yi jì y vwĩ̀-zwə́lnə bé yé né cìnə́ bé, ǹdə́ náncɛsɛ́, ǹdə́ Muyiisi nyə́ né byilnə bé, ǹdə́ bùr-kárna bɛ́ dwã bɛ́ gakó jòm dwã yó, bə ce bə zə Yezu bə lyẽ, bə zə mɔ bə vò e pə Pyəlatɛ nɛ. ² Pyəlatɛ bwə̀rh mò n wɔ̀: “Wɔ́ ǹmyɛ́ ǹ wɔ́ Zhwifubá pyɔ̌ mɔ́?” Yezu wɔ̀ mɔ̀: “Wɔ́ èta, ǹdə ǹ gə́ wò né.” ³ Yi jì y vwĩ̀-zwə́lnə bé yé né cìnə́ bé zɛ̃̀ bə̀ nʼê ce cə̀rh nánzhəzhɔ̌ ń nyí ni. ⁴ Pyəlatɛ kə́ n bwə̀rh mò n wɔ̀: “Ǹ tá ǹ lyár bə̀ kaka? Ǹ bə cèsé shɛ̀bɛ́ gakó bə̀ nʼê ce ǹ nyí ni mú nyɛ̌ nà?” ⁵ Sə Yezu kə́ ń yə̀ lyár bə̀ kaka yé. Rə̀myɛ́ jàr Pyəlatɛ dɛ̃́dɛ̃́. ⁶ Pakɛ címsi gakó, Pyəlatɛ ya n vùr byə̀nə́-jì lò mə̀dù, mɔ̀bɔ́ lyì bí lwə̀l mó. ⁷ E jà rə̀myɛ́ yi ní, ǹdə́ lò mə̀dù yà ń ŋwɛ́nɛ́ byə̀nə́-jù w ń yíl Barabaasɛ. Ńmyɛ̌ ǹdə́ ń tó-dwã yʼà ce zɔ̀mà jòm cɔ w wa, sə bə̀ yʼà gu lò. ⁸ Lyì-zhǎ bɛ́ yí Pyəlatɛ nyí ni, bə lwə̀l mò bə̀ ń wɛ̀rhɛ́ kɔn rɛ́ tɛ̀bɛ́ ń nə́ ń wɛ̀rhɛ́ byin byin gakó mó. ⁹ Pyǝlatɛ wɔ̀ bɛ: «Á n'á yǎl b'à dwĩ̀ Zhwifubá pyɔ̌ mɔ́ nɛ?» ¹⁰ Ń yà ń yě bǝ̀ wɔ́ bwɛ̃̌-dǔr è ce Yi jì y vwĩ̀-zwǝ́lnǝ bé yé né cìnǝ́ bé zǝ Yezu bǝ bǝ̀ ń sono. ¹¹ Bǝ cìrh lyì-zhǎ bɛ́ bǝ ce né bǝ̀ bǝ̀ lwǝ̌l Pyǝlatɛ nɛ bǝ̀ ń vǔr Barabaasɛ. ¹² Pyəlatɛ kə́ n bwə̀rh bè n wɔ̀: “Sə mɔ̀bɔ́ á nʼá byẽ̀ bə̀ Zhwifubá pyɔ̌ mɔ́, à wɛ̀rhɛ́ mɔ etəra?” ¹³ Bə kwɛrhɛ bə búbwéé bə wɔ̀: “Ce bə pəpa mɔ də̀-jɔrhɔ́ yó!” ¹⁴ Pyəlatɛ kə́ n bwə̀rh bè n wɔ̀: “Bə̀kɔ́n lwɛlɛ ń wɛ̀rhɛ́?” Bə zɛ̃̀ bə búbwéé dɛ̃̌ dɛ̃̌ bə wɔ̀: “Ce bə pəpa mɔ də̀-jɔrhɔ́ yó!” ¹⁵ Pyəlatɛ gə́ yà ń nə́ ń yǎl n swẽ́ lyì-zhǎ bɛ́ wun ni mú ce, n vùr Barabaasɛ, ǹdə bə̀ gə́ lwə̀l mò né, n ce bə mà Yezu ǹdə́ dànə̀shàárɛ, n zɛ̃̀ n pə nyí bə̀ bə̀ zhəl bə pəpa mɔ də̀-jɔrhɔ́ yó. ¹⁶ Shə̀dɛ́ɛ́sɛ́ zɛ̃̀ sə zə Yezu sə zù cɔ w cə́bal mɔ́ kɛ̀lɛ́ y wu w wẽ́, sə byẽ̀ sə̀ gùlú w lyì bí púlə́púlə́ bə bə̀ dwã yó. ¹⁷ Bə zù mù kàmə̀-zù-èdɔ̀lɔ̀ nánshɔ̃̀, bə jéé sɔr ǹdə pyɛ̀lɛ̀ yə́-pú ta bə pú ń yó wə, ¹⁸ bə zɛ̃̀ bə̀ zhe: “Nə́ rʼé ce mó Zhwifubá pyɔ̌!” ¹⁹ Bə zə eshɔ̀ bə mà mɔ̀, bə pùrh tə̀tàr ń yó, bə̀ nʼê jòm bə̀ nə̀dwə́nə́ yó, bə̀ mʼê wùlì ń yé né. ²⁰ Bə̀ gə́ fulsi mu èta bə zhɛ̀, bə vùr kàmə̀-zù-shɔ̃̀ w bə̀ yʼà mʼe zù mù mú, bə kʼa zù mù ń gàndɛ́, bə zɛ̃̀ bə zə mɔ bə du sə̀ la vò bə pəpa də̀-jɔrhɔ́ yó. ²¹ Shərɛnɛ lyì bal mə̀dù ń yíl Shəmɔ ń yà ń shí gɔ, n kwè sɔ́má y èmyɛ́. Wɔ́ ńmyɛ̌ ń lùl Alɛsãdərɛ ǹdə́ Orofyiisi. Bə̀ nyɛ́ɛ́ mɔ jàn n zhĩ Yezu də̀-jɔrhɔ́ wá. ²² Bə zə Yezu bə vò jàà èdù bə̀ nʼê byẽ̀ bə̀ “Gɔləgɔta”, rə̀ kùr wɔ́: “Yó-kóló jàà”. ²³ Bə zə cə́m bə̀ nʼê byẽ̀ bə̀ myííri bə gùlí sɛ̃́ nɛ bə̀ nʼê pɛ mɔ bə̀ ń zwẽ n nyɔ̀, sə ń yə̀ mɔ zwẽ yé. ²⁴ Bə zɛ̃̀ bə pəpa mɔ də̀-jɔrhɔ́ w yó, bə kwè ń gàndɛ́ bə tə́ tántɛ́ɛ́ mùnì ga bə lwar lò gakó gə́ mà n jí ní. ²⁵ È yʼà wɔ́ nəkɔkɔ́lɛ́ ǹdə́ yi rí tú dɛ̃̌. ²⁶ Bə̀ yʼà kɛ̃ bwèlè yó bə wɔ̀: “Zhwifubá pyɔ̌”, bə fwar bwèlè y də̀-jɔrhɔ́ w nɛ, bə mʼe byili ń cu mú kùrə̀. ²⁷ Bə̀ yʼà súlí bə pəpa vwârhna bə̀lyè də̀-jaárhɛ dwã yó Yezu yala nɛ, mə̀dù ń jə̀jĩ́ ni, mə̀dù ń jə̀gwã̀ nɛ̀. [ ²⁸ Èta, kɔn dɛ̀bɛ́ Yi zɔ̀mɛ̀ rɛ́ sɛ́bɛ́ rɛ́ byili mú pyìrh. Bə̀ kɛ̃ rə̀ wẽ́ bə wɔ̀: “Bə̀ wɛ̀rhɛ́ mɔ ǹdə lyì-bəlwɛ̀lɛ́ ta.”] ²⁹ Lyì bí byɛ̀bɛ́ bə̀ yʼà nʼê tó gàà bə̀ lyɛ̃ mɔ́ yʼà nʼê zhízhí bə̀ ywẽ́, bə̀ nʼê tùrh mò bə̀ zhe: “Hâyà, ǹmyɛ́ mɔ̀bɔ́ ǹ yà ǹ nə́ ǹ yâl ń wǔr Yi jì y ń ká lù y dwã nə̀tɔ̀ wẽ́ mó, ³⁰ zwẽ ǹ cìnə̀, ń só də̀-jɔrhɔ́ w yó nə́ nyì!” ³¹ Yi jì y vwĩ̀-zwə́lnə bé yé né cìnə́ bé ǹdə́ Muyiisi nyə́ né byilnə bé myɛ yʼà nʼê mɔ̀n mɔ̀. Bə̀ nʼê zɔ̀m ǹdə́ dwã bə̀ zhe: “Ń zwẽ lyì dwã, n jà ń wàr sə n zwẽ ń cìn yé. ³² Bə̀ Kristə mó, Esərayɛl lyì pyɔ̌ mɔ́, só tɛ̃´ də̀-jɔrhɔ́ w yó èlâsɛ̃´ nə́ nyì! Nə́ gə nɔ mɔ ń só tɛ̃́, nə́ mʼâ zwẽ nyí.” Byɛ̀bɛ́ bə̀ pəpa də̀-jaárhɛ́ yó ń yala nɛ mɔ́ myɛ yʼà nʼê tùrh mò. ³³ Yi rí gə́ tú e yí yə́-pɛ̀lɛ́ ecəl wə, cɛ y gakó jʼa zhìzhì e jǐrh námbyṹ, kɔn mʼe yí yi-kár nɛ. ³⁴ Rə̀myɛ́ yi ní, Yezu bya dɛ̃̌ dɛ̃̌, n wɔ̀: “Eloyi, Eloyi, lama sabakətanɛ?” Rə̀ kùr wɔ́: “À Yi, à Yi, byè yil ǹ yẽ̌ ne?” ³⁵ Lyì bí byɛ̀bɛ́ bə̀ yʼà zhǐ gàà mɔ́ jàlà gə́ nyɛ̀ɛ̀ rə̀myɛ́, bə wɔ̀: “Nyǐ-nə ń nə́ ń byẽ̀ Elyi!” ³⁶ Mǝ̀dù zɛ̃̀ n dùr n kwè ku ǹdǝ kàmǝ̀-jùrhú ta n mɔ́rh sɛ̃́ kárɛ́ wa, n cìì eshɔ̀ nɛ̀, ń nǝ́ ń pɛ mɔ bǝ̀ ń nywɛ́, n zɛ̃̀ n wɔ̀: «Yẽ̌-nǝ mo! Nǝ́ m'ǎ nyǐ ǹdǝ́ Elyi gǝ mà n bǝ̀ n só mo tɛ̃́ dǝ̀-jɔrhɔ́ w yó!» ³⁷ Yezu bya dɛ̃̌ dɛ̃̌, n já n cì. ³⁸ Gɔ̀nɔ̀ w ò y'à bɔ̀n Yi jì y dwã w mɔ́ j'a zhì dɛ̃̌ o kǎr o zhí tɛ̃́. ³⁹ Shǝ̀dɛ́ɛ́sɛ́ zɔ̌m yó-cǝ́bal mɔ́ yà ń zhǐ Yezu yé né. Ń gǝ́ nɔ ń gǝ́ cù ní mú, n wɔ̀: «Bal mɔ́ mɔ̀bɔ́ yà ń wɔ́ Yi Byǐ zhǝ̀nà.» ⁴⁰ Kana jàlà myɛ y'à ŋwɛ́nɛ́ gàà, bǝ̀ y'à zhǐ kwã nɛ́ bǝ̀ n'ê nyǐ. Sǝ Magǝdala lyì bǝ̀kɔ́ Marɛ, ǹdǝ́ Zhakɛ mɔ́ námpɔ́lɛ́ y ǹdǝ́ Zhoze ná Marɛ, ǹdǝ́ Salǝmɛ ga y'à ŋwɛ́nɛ́ kana bɛ́ bǝ̀myɛ́ mɔ́ wẽ́. ⁴¹ Bǝ̀ y'à n'ê tó Yezu ni Gǝlile né, sǝ bǝ̀ y'à n'ê sɛ̃ mɔ. Kana dwã nánzhǝzhɔ̌ myɛ y'à ŋwɛ́nɛ́ gàà, bǝ̀ y'à tó Yezu ni bǝ bǝ̀ Zhǝrǝzalɛm. ⁴² Dɛ̃ rɛ́ tɛ̀bɛ́ bǝ̀ y'à n'ê tɛnɛ shìrhǝ́ y dɛ̃ rɛ́, rǝ̀ y'à dǎl bǝ̀ nǝkɔl mɔ́, dǝ̀dɛ̀nɛ́ y gǝ́ tú e yí, ⁴³ Arǝmatɛ lyì bal mǝ̀dù bà, ń yíl Zhozefu. Ń yà ń wɔ́ lyì-fɔ̀lɔ̀ bùr-kárna bɛ́ gùlú w wẽ́; ńmyɛ yà ń nǝ́ ń dɛ̃̀ Yi pyɛ̀lɛ̀ rɛ́ twírí yǝ́. N zɛ̃̀ n kǝ̃̀ ń wu n vò Pyǝlatɛ sõ, n lwǝ̀l mò Yezu ń la kǒ n vò n ce. ⁴⁴ Pyǝlatɛ gǝ́ nyɛ̀ɛ̀ bǝ̀ Yezu cù làlà èta mɔ́, kɔn jàr mɔ̀. N zɛ̃̀ n byẽ̀ shǝ̀dɛ́ɛ́sɛ́ zɔ̌m yó-cǝ́bal mɔ́, ń la bwǝ̀rh mò n nyǐ Yezu gǝ́ cù mú dɛnɛ nà? ⁴⁵ Shǝ̀dɛ́ɛ́sɛ́ yó-cǝ́bal mɔ́ gǝ́ byili mu, n zɛ̃̀ n wɔ̀ Zhozefu ni bǝ̀ bǝ̀ m'a pɔ̃ Yezu. ⁴⁶ Zhozefu yè gɔ̀nɔ̀, n swàr Yezu dǝ̀-jɔrhɔ́ w yó, n zǝ gɔ̀nɔ̀ w n pyípyílí mu, n zɛ̃̀ n kwè mò n vò n ce lú-bɔ̀l wà. Bǝ̀ y'à kù lú-bɔ̀l mɔ́ mǝ̀myɛ́ pyɔ̀ wà. N zɛ̃̀ n byíbyílí nǝ́kulu nánfɔ̀lɔ̀ n mǝ n pyi bɔ̀l mɔ́ nyí ni. ⁴⁷ Magǝdala lyì bǝ̀kɔ́ Marɛ ǹdǝ́ Zhoze ná Marɛ y'à n'ê nyǐ bǝ̀ gǝ́ n'ê cĩ́ mu mǝ̀gã̌.