¹ Shìrhə́ dɛ̃ rɛ́ gə́ tú e lyɛ̃, Magədala lyì bə̀kɔ́ Marɛ, ǹdə́ Zhakɛ ná Marɛ, ǹdə́ Saləmɛ yè nǔrh sə̀ lwẽ́ nã́nyə̀nyɛ̀lɛ́, bə̀ la vò bə mʼe tùr Yezu. ² È zɛ̃̀ nəkɔkɔ́lɛ́ jə̀máásɛ́ yùwə̀, bə pyẽ̀ pyẽ̀ bə zɛ̃̀ ǹdə́ yi rí nʼê púrhə́, bə̀ la lú-bɔ̀l mɔ́ yó. ³ Bə̀ yʼà nʼê bwə̀rh dwã bə̀ zhe: “Mɔ̌ lò ń mà n byíbyílí lú-bɔ̀l mɔ́ nyí rí nə́kulu w n ce kwã nɛ́ n pə nə́ba?” ⁴ Bə̀ la nyǔ bə pwírí nə́kulu w byíbyílí ò pyě sarh nɛ, o jʼà yʼà já dɛ̃́dɛ̃́. ⁵ Bǝ yí bǝ zù lú-bɔ̀l mɔ́ wa, bǝ nǝ ébɔ́-dǎl mǝ̀dù ń zù kàmǝ̀-zù-èdɔ̀lɔ̀ námpõ̀ ń jě jǝ̀jĩ́ sõ. Ywẽ nánfɔ̀lɔ̀ zɛ̃̀ rǝ̀ zhe be. ⁶ Ébɔ́-dǎl mɔ́ wɔ̀ bɛ: «Á bǝ̀k'á dùr ywẽ yé. Wɔ́ Nazarɛtɛ lyì bal Yezu mú bǝ̀ pǝpa dǝ̀-jɔrhɔ́ w yó mó á n'á pyà. Ń tɛ̀nɛ́ nyɔ̀nɔ̀ yé. Ń bwìrhì. Nyǐ-nǝ bǝ̀ gǝ́ y'à cĩ́ mu mǝ̀gã̌. ⁷ Zhǝl-nǝ á byili Pyɛɛrɛ ǹdǝ́ Yezu kwã-lyì bí dwã bɛ́ nɛ bǝ̀ nyǐ ń tó yé n vò Gǝlile. Wɔ́ gàà bǝ̀ m'a nǝ mɔ nɛ́, ǹdǝ ń gǝ́ yà ń byili bi ní.» ⁸ Kana bɛ́ zɛ̃̀ bə shí lú-bɔ̀l mɔ́ w bə du, bə dùr. Bə̀ yʼà nʼê kəkə. Bə̀ kʼê yə̀l bə̀ gə́ nʼê wɛ̀rhɛ́ nɛ́ yé. Sə ywẽ ré gə́ yʼà zhe be mó ce, bə̀ yə̀ lò lò nè wə̀l bə̀ kaka yé. ⁹ [ Yezu bwìrhì shìrhə́ dɛ̃ rɛ́ zɛ̃̀ nəkɔkɔ́lɛ́ shãã shãã, n jɛ̀rɛ̀ n lyí Magədala lyì bə̀kɔ́ Marɛ. Wɔ́ ńmyɛ̌ nə̀cílsí námməlwâlsɛ́ shàlpyɛ̀ y yʼà zhe, Yezu zɛ̃̀ n jì sì mú. ¹⁰ Yezu tó-dwã bɛ́ wun yʼà zhìlì, bə̀ nʼê kúrhə́. Marɛ vò n byili bi kɔn dɛ̀bɛ́ rə̀ wɛ̀rhɛ́ mɔ́. ¹¹ Ń gə́ wò bè bə̀ Yezu bwìrhì, bə̀ ńmyɛ̌ nɔ mɔ, bə̀ yə̀ nyí zwẽ yé. ¹² Rə̀myɛ́ kwã nɛ́, Yezu lyə́r n kwè nyɔrhɔ dõ, n mə n lyí ń kwã-lyì bí bə̀lyè ǹdə́ bə̀ ŋwɛ́nɛ́ sɔ́má yó bə̀ la gɔ sono cə-byǐ èdù wẽ́. ¹³ Bə kʼa kwɛ̃̀ bə bʼe byili bə̀ dwã bɛ́ nɛ, sə bə̀ yə̀ bə̀myɛ zɔ̀mà nɛ́ zwẽ yé. ¹⁴ Yezu zɛ̃̀ n tà-kwã n lyí ń kwã-lyì bí shí ǹdə́ mə̀dù y ǹdə́ bə̀ nʼê jí kùjú. N ji bi búlə́, bə̀ gə́ yə̀ Yi ni zhí mú, ǹdə́ bə̀ gə́ yə̀ byɛ̀bɛ́ bə̀ nɔ mɔ ń bwìrhì mú zɔ̀mà nɛ́ zwẽ mó yilə. ¹⁵ N zɛ̃̀ n wɔ̀ bɛ: “Zhəl-nə lũ w púlə́púlə́ wə, á bwə̀l yò-ècɔ̀nɔ̀ nyí rí á byili lyì bí gakó ne. ¹⁶ Lò mɔ̀bɔ́ ń zwẽ nyí bə zɛ̃̀ bə mɔ́lɛ́ mɔ nɛ̃̌ wa, rə̀ ná-cí mà n nə ń cìn vwǎrh, sə lò mɔ̀bɔ́ ń yə̀ nyí zwẽ, bə̀ mʼa kə́ ń bùrsì bə pɔ̃ dóó. ¹⁷ Nyǐ-nǝ màmyaarhɛ́ tɛ̀bɛ́ byɛ̀bɛ́ bǝ̀ la nyí zõ mó b'a wɛ̀rhɛ́ mɔ́: bǝ̀ m'a jì nǝ̀cílsi námmǝlwǎlsɛ ǹdǝ́ àmyɛ́ yil ré. Bǝ̀ m'a zɔ̀m dwǝ́ dwã zɔ̀mà. ¹⁸ Bǝ̀ gǝ zɔ dɔma bǝ̀ jɛ̀rh w myɛ, dɔma bɛ́ t'â la bɛ kaka wɔ̀rhɔ́ yé. Bǝ̀ gǝ nyɔ̀ cǝ́m mɔ̀bɔ́ mǝ̀ n'ê gwi lò myɛ, mǝ̀ t'â la bɛ kaka wɔ̀rhɔ́ yé. Bǝ̀ gǝ cĩ́ bǝ̀ jɛ̀rh nǝ̀bwànà yó, nǝ̀bwànà bɛ́ m'a wárh.» ¹⁹ Cinnǝ Yezu gə́ zɔ̀m ǹdə́ ń kwã-lyì bí èta n zhɛ̀, Yi ce n zɛ̃̀ n vò dɛ̃̌ Arəzana wa, sə ń jě rə̀ jə̀jĩ́ ni. ²⁰ Ń kwã-lyì bí zhǐr bə vò bə bwə̀l yò-ècɔ̀nɔ̀ nyí rí jààsɛ́ gakó wə. Sə Cinnǝ mú yà ń nə́ ń sɛ̃ bɛ tum rí rə̀myɛ́ wẽ́, ń nə́ ń tó màmyaarhɛ́ bə̀ nʼê wɛ̀rhɛ́ mɔ́ dɛnnɛ ń byili bə̀ yò-ècɔ̀nɔ̀ nyí rí bə̀ nʼê bwə̀l mó wɔ́ zhə̀nà.]