¹ Búrú w bǝ̀ yǝ̀ sã̀-nǝ̀byẽ̌ ò wẽ́ ce mó címsí bǝ̀ n'ê byẽ̀ bǝ̀ Pakɛ mɔ́ gǝ́ tú sǝ dǎl lyẽ̌ né, Yi jì y vwĩ̀-zwǝ́lnǝ bé yé né cìnǝ́ bé ǹdǝ́ Muyiisi nyǝ́ né byilnǝ bé y'à n'ê pyà bǝ̀ gǝ́ m'a tó né bǝ myìnì Yezu bǝ za, ǹdǝ́ lò lò yǝ̀l yé, sǝ bǝ gu mu. ² Bǝ̀ y'à zhe: «È bǝ̀k'a yǝ̀ címsí yù w nǝ́ la mɔ zal yé, mùnì ga cɔ w lyì bí bǝ̀k'a zɛ̃̀ búlǝ́ nǝ́ yó w yé.» ³ Yezu yà ń ŋwɛ́nɛ́ Shǝmɔ mɔ́ mɔ̀bɔ́ nɔ w y'à zhe mó sõ kɛ̀lɛ́ w Betǝni ní. Ń gǝ́ tú ń la kùjú jú yi ní, kɛ̃ mǝ̀dù já n zù bǝ̀ yó ǹdǝ́ kwǎl-byǐ náàcɛ̀nɛ́, è y'à sú ǹdǝ́ nwǝ̃̌ è ye y y'à cɛ̀ dɛ̃́dɛ̃́, è lwẽ́ ré j'à nyɛ̀. Wɔ́ cǒ òdù bǝ̀ n'ê byẽ̀ bǝ̀ náárɛ bǝ̀ y'à m'e wɛ̀rhɛ́ ya. N sǔr kwǎl-byǐ y nyí rí n ló nwǝ̃̌ y Yezu yó wǝ. ⁴ Lyì bí byɛ̀bɛ́ bǝ̀ y'à jě gàà mɔ́ jàlà lyimǝ zɛ̃̀ bǝ̀ n'ê zɔ̀m ǹdǝ́ dwã bǝ̀ zhe: «Byè yil ń nǝ́ ń zhìlì nwǝ̃̌ y è ye y cɛ̀ èta mɔ́ nánfò? ⁵ Bǝ̀ y'à wɔ̌ bǝ̀ yè y kɔn lyɛ̃ dwã zwã̌-àtɔ̀ tum wársɛ, bǝ m'e sɛ̃ nǝ̀mwà nɛ̀.» Sǝ bǝ̀ y'à n'ê zɔ̀m kɛ̃ mɔ́ sõ. ⁶ Yezu zɛ̃̀ n wɔ̀ bɛ: «Byè yil á n'á zhìlì kɛ̃ mɔ́ wu ni? Yẽ̌-nǝ mo. Dɛ̀bɛ́ ń wɛ̀rhɛ́ à yil mó wɔ́ kɔn dɛ̀bɛ́ rǝ̀ càn. ⁷ Nyǐ-nǝ nǝ̀mwà m'a yǝ̀ nɛ́ ǹd'ába twéé twéé. Á wɔ̌ á wɛ̀rhɛ́ bɛ cɛ̀nɛ̀ ǹdǝ á gǝ́ n'á yǎl nɛ́. Sǝ è gǝ wɔ́ àmyɛ́ yilǝ, á t'á la nɛ nɔ dɛ̃ gakó yé. ⁸ Kɛ̃ mɔ́ wɛ̀rhɛ́ kɔn dɛ̀bɛ́ ń wɔ̌, ǹdǝ́ nwǝ̃̌ y ń ló à yó mó. Ń dámǎ n tɛnɛ à yala nɛ́ lú-bɔ̀l w co yilǝ. ⁹ Zhǝ̀nà, à n'â wǝ̀l ába: bǝ̀ gǝ́ la yò-ècɔ̀nɔ̀ nyí rí bwǝ̌l mǝ̀gã̌ mǝ̀gã̌ gakó, bǝ̀ m'a byili kɔn rɛ́ tɛ̀bɛ́ kɛ̃ mɔ́ wɛ̀rhɛ́ mɔ́ myɛ, bǝ m'e lyǐrh ń yò.» ¹⁰ Rǝ̀myɛ́ yó, Yezu kwã-lyì bí shí ǹdǝ́ bǝ̀lyè y mǝ̀dù, ń yíl Zhidǝ Esǝkarǝyɔtɛ, zhǝ̀l n wɔ̀ Yi jì y vwĩ̀-zwǝ́lnǝ bé yé né cìnǝ́ bé ne, bǝ̀ ń mà n byili bi bǝ̀ gǝ́ m'a tó né bǝ zǝ Yezu. ¹¹ Bǝ̀ gǝ́ cili ń zɔ̀mɛ̀ rɛ́, bǝ̀ wun yǝ̀ nyɛ̀n dɛ̃́dɛ̃́, bǝ zɛ̃̀ bǝ bwǝl mo nyí bǝ̀ bǝ̀ m'a pɔ̃ sǝ̀byǐ. N zɛ̃̀ n ji kùr ń nǝ́ ń pyà ń gǝ́ mà n tó né n myìnì Yezu n pǝ bǝ za. ¹² Búrú w bǝ̀ yǝ̀ sã̀-nǝ̀byẽ̌ ò wẽ́ ce mó címsí dɛ̃ rɛ́ nã́yéé ré, dɛ̃ rɛ́ tɛ̀bɛ́ bǝ̀ n'ê gwi pyì-bwǎlsɛ́ Pakɛ y címsí jú yil mó yùwǝ̀, Yezu kwã-lyì bí bwǝ̀rh mò bǝ wɔ̀: «Yẽ̀ ǹ nǝ́ ǹ yǎl bǝ̀ nǝ́ zhǝl nǝ́ tɛnɛ Pakɛ y címsí kùjú w ní nǝ́ pɔ̃́?» ¹³ N zɛ̃̀ n vùr lyì bǝ̀lyè bǝ̀ wẽ́ n twĩ̀, n wɔ̀ bɛ: «Zhǝl-nǝ cɔ w wa. Á m'ǎ nǝ bal mǝ̀dù ń zhĩ nɛ̃̌ kɔ̀lɔ́, s'á tó ń kùrǝ̀. ¹⁴ Kɛ̀lɛ́ y kɛ̀bɛ́ ń la è wẽ́ zú mú, s'á wɔ̀ è cǝ́bal mɔ́ nɛ: ‹Nǝ́ yó-cǝ́bal mɔ́ wò bǝ̀ nǝ́ bwǝ̌rh mó bǝ̀ wɔ́ yẽ̀ jì y ńmyɛ̌ ǹdǝ́ ń kwã-lyì bí la Pakɛ y címsí ní jú mú ŋwɛ́nɛ́?› ¹⁵ S'á yẽ̌ bǝ̀ ń mà n byili ába dɛ̃̌-yó jì nánfwɛ̀lɛ̀. Kɔn dɛ̀bɛ́ gakó á zhe rǝ̀ tum kùjú w tɔnɔ yil mó ŋwɛ́nɛ́ è wẽ́. Wɔ́ gàà á m'ǎ tɛnɛ címsí kùjú w ní á pǝ nǝ́ba.» ¹⁶ Bǝ zhǐr bǝ vò cɔ w wa, bǝ nǝ kɔn gakó ǹdǝ Yezu gǝ́ byili bi ní, bǝ tɛnɛ Pakɛ y címsí kùjú wǝ́. ¹⁷ Dǝ̀dɛ̀nɛ́ y yi gǝ́ yúwǝ́, ńmyɛ̌ ǹdǝ́ ń kwã-lyì bí shí ǹdǝ́ bǝ̀lyè y zɛ̃̀ bǝ vò. ¹⁸ Bǝ̀ gǝ́ tú bǝ̀ n'ê jí kùjú w yi ní, ń wò bè: «Zhǝ̀nà, à n'â wǝ̀l ába: ámyɛ̌ mǝ̀dù la nɛ myìnù n pǝ bǝ za. E jà wɔ́ mɔ̀bɔ́ ń nǝ́ ń tó ne ń jí mú.» ¹⁹ Bǝ̀ gakó wun zhìlì kókó, bǝ zɛ̃̀ bǝ̀ n'ê bwǝ̀rh mò mǝ̀dù mǝ̀dù bǝ̀ zhe: «È wírí è dǝ̀ àmyɛ́ myɛ̌ yé?» ²⁰ N wɔ̀ bɛ: “Wɔ́ ámyɛ̌ shí ǹdə́ bə̀lyè y mə̀dù, mɔ̀bɔ́ ń nə́ ń tó ne ń ce ń jɛ̃̀ y nə̀zhĩ̌ y wẽ́ mó. ²¹ Zhə̀nà, Numbyíní Byǐ nə́ ń zhǐr ǹdə Yi zɔ̀mɛ̀ rɛ́ sɛ́bɛ́ rɛ́ gə́ nʼê byili ní ń shò-kwã nɛ́. Sə zwini mʼa zə lò mó mɔ̀bɔ́ ń la mɔ myìnù n pə bə zə mɔ́! Bə̀ gə yʼà yə̀ lò mó ńmyɛ̌ mɔ́ lùl yʼà cɔ̃̀.” ²² Bǝ̀ gǝ́ tú bǝ̀ n'ê jí kùjú w yi ní, Yezu kwè búrú n ce Yi nǝ̀báná, n kǝ́ w dwã wa, n pǝ ń kwã-lyì bí ni n wɔ̀: «Zwẽ-nǝ. Tɛ̀bɛ́ wɔ́ àmyɛ́ yala.» ²³ N zɛ̃̀ n kwè kǎ-zɔ̌m ǹdǝ́ sɛ̃́ mǝ̀ wẽ́, n ce Yi nǝ̀báná, n pǝ bǝ̀ gakó ne bǝ nyɔ̀. ²⁴ N zɛ̃̀ n wɔ̀ bɛ: «Mɔ̀bɔ́ wɔ́ àmyɛ́ jal, sǝ mǝ̀ n'ê byili bǝ̀ Yi dɔbrɛ́ wɔ́ zhǝ̀nà. Jal mɔ́ mǝ̀myɛ́ la tɛ̃́ ló lyì nánzhǝzhɔ̌ yilǝ. ²⁵ Zhǝ̀nà, à n'â wǝ̀l ába: à k'â t'â la sɛ̃́-cǒ byǎ nɛ̃̌ nyɔ́ gaga yé, kɔn m'e yí dɛ̃ rɛ́ tɛ̀bɛ́ à m'a k'a nyɔ̀ mǝ̀ dõ nándùl Yi tǝnà y wẽ́ mó.» ²⁶ Rə̀myɛ́ kwã nɛ́, bə nún bə cèrhé Yi, bə zɛ̃̀ bə shə́r bə vò Olyivyəəré pyɔ̀ w yó. ²⁷ Yezu wɔ̀ ń kwã-lyì bí ni: “Á gakó mʼǎ dùr á yẽ̌ ne. Bə̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bə wɔ̀: ‘À mʼa gu vwã̌-ènɔ̀n mɔ́, sə ń pyììsí mʼa làà dwã nɛ.’ ” ²⁸ Yezu súlí n wɔ̀: “Sə à gə tú à bwìrhì, à mʼa tó yé a vò a dɛ̃̀ ába Gəlile né.” ²⁹ Pyɛɛrɛ zɛ̃̀ n wɔ̀ mɔ̀: “Bá bə̀ gakó gə la dǔr bə yẽ̌ mó myɛ, àmyɛ́ tʼâ la dǔr yé.” ³⁰ Yezu wɔ̀ mɔ̀: “Zhə̀nà, à nʼâ wə̀l mó: zà cəcɛ̃ y cìcì, cə́-bya mʼà la mʼe kúrh twər rə̀lyè, ǹdə́ ǹ wò twər rə̀tɔ̀ bə̀ ǹ yə̀l à pár yé.” ³¹ Pyɛɛrɛ kwɛrhɛ n mà nyə̀-pɔ̌ dwini shãã ga n wɔ̀: “Bá à gə mʼa tó mó a cì myɛ, à tʼâ la wál bʼà yə̀l ǹ pár gaga yé.” Ń tó-dwã bɛ́ gakó myɛ wɔ̀ èta. ³² Yezu ǹdə́ ń kwã-lyì bí zɛ̃̀ bə vò jàà èdù wẽ́, bə̀ nʼê byẽ̀ jàà y èmyɛ́ bə̀ Zhətəsəməni. N wɔ̀ bɛ: “Jǒm-nə nyɔ̀nɔ̀, à la vò a ce Yi.” ³³ N zə Pyɛɛrɛ ǹdə́ Zhakɛ ǹdə́ Zhã n mə n zhǐr. Ywẽ zɛ̃̀ rə̀ zhe mo. Ń wu ji kùr ò nʼô zɛ̃̀ dɛ̃́dɛ̃́, ³⁴ n zɛ̃̀ n wɔ̀ bɛ: “Wu-zhìlù nánfɔ̀lɔ̀ zhe ne, à nʼâ yǎl a cì. Mɛ̃-na nyɔ̀nɔ̀, sʼá zə á yírhə́.” ³⁵ N twẽ̌ n vò yé né námpɔ́lɛ́, n tu tɛ̃́, ń nǝ́ ń lwǝ̀l Yi mùnì ga, ǹdǝ́ kɔn gǝ wɔ̌, sǝ nɔ̀nɔ̀ w kɔ̀bɔ́ bǝ̀k'a zǝ mɔ yé. ³⁶ Ń yà ń nǝ́ ń wǝ̀lǝ̀: «À Da, ǹ wɔ̌ kɔn gakó. Ce nɔ̀nɔ̀ w kɔ̀bɔ́ vò kwã nɛ́, ò bǝ̀k'a yí ni yé. Sǝ zhǝ̀n zhǝ̀nà, è bǝ̀k'a yǝ̀ ǹdǝ àmyɛ́ gǝ́ n'â yǎl nɛ́ yé. È yál ǹdǝ ǹmyɛ́ gǝ́ nǝ́ ǹ yǎl nɛ́.» ³⁷ N zɛ̃̀ n kwɛ̃̀ n vò ń kwã-lyì bí bə̀tɔ̀ y sõ, n pwírí bə̀ dɛ̌. N wɔ̀ Pyɛɛrɛ nɛ: “Shəmɔ, ǹ dɛ̌? Ǹ yə̀ ŋwɛ̀nɛ́ ń zə ǹ yírhə́ námpɔ́lɛ́ myɛ cìcì? ³⁸ Za-na á yírhə́, sʼá lwə̀l Yi, mùnì Shətana bə̀kʼa ŋwɛ̀nɛ́ e swèlè ába yé. Numbyíní wu w nʼô yàlá, sə è yala nɛ́ jàn rɛ́ yə̀ yí yé.” ³⁹ N kə́ n vò, n lwə̀l Yi ǹdə ń gə́ yà ń zɔ̀m nɛ́. ⁴⁰ N kǝ́ n kwẽ̀ n vò n pwírí ń kwã-lyì bí dɛ̌. Jan rɛ́ y'à zù bì dɛ̃́dɛ̃́. Bǝ zɛ̃̀ bǝ̀ yǝ̀l bǝ̀ gǝ́ m'a lyár mɔ nɛ́ yé. ⁴¹ N kǝ́ n vò. Ń gǝ́ ká n bǝ̀ ń twǝr rǝ̀tɔ̀ nyǎn rɛ́ yó, n wɔ̀ bɛ: «Á gwẽ̌ dɛ̌, á n'á shìrhǝ́? Kɔn mǎ. Kɔn yú èlǎsɛ̃́. Bǝ̀ la Numbyíní Byǐ zal bǝ pǝ lyì byɛ̀bɛ́ bǝ̀ t'â zwẽ Yi nyǝ́ né ne. ⁴² Zɛ̃̀-nà dɛ̃̌ nǝ́ vò. Nyǐ mɔ̀bɔ́ ń la nɛ myìnù mú bwǝlse.» ⁴³ Yezu gə́ yà ń gwẽ̌ nə́ ń zɔ̀m yi ní, ń kwã-lyì bí shí ǹdə́ bə̀lyè y mə̀dù já n du, mɔ̀bɔ́ ń yíl Zhidə mó, ńmyɛ̌ ǹdə́ lyì nánjə̀jóló bə̀ yʼà zɔ shìmì, bə pyɛ̀lɛ́ màngwə̂rh bə̀ mʼê bàn Yezu ni. Wɔ́ Yi jì y vwĩ̀-zwə́lnə bé yé né cìnə́ bé, ǹdə́ Muyiisi nyə́ né byilnə bé, ǹdə́ náncɛsɛ́ bə̀ yʼà twĩ̀ bì. ⁴⁴ Myìnù cə́bal mɔ́ yà ń zɔ̀m n cĩ́ ǹdə́ bɛ n wɔ̀: “Mɔ̀bɔ́ à la yí a kwə̀ə̀lè mó, wɔ́ ńmyɛ̌. Á gə zɔ mɔ, sʼá yìlì mù cɛ̀nɛ̀, ń bə̀ká n vwǎrh yé.” ⁴⁵ N já n yí Yezu nyí ni n wɔ̀ mɔ̀: “Yó-cə́bal.” N zɛ̃̀ n kwə̀ə̀lè mò. ⁴⁶ Lyì-zhǎ bɛ́ jʼa yí bə zə Yezu. ⁴⁷ Byɛ̀bɛ́ bǝ̀ y'à ŋwɛ́nɛ́ gàà mɔ́ mǝ̀dù já n fwǝ̌rh shù, n za vwĩ̀-zwǝ́lnǝ bé yé né cìnǝ́ bé gakó náncɛ y kɛ̀lɛ́ y tùntùnnǝ̀ mǝ̀dù zhɛ̃̌ n pyir. ⁴⁸ Yezu zɛ̃̀ n wɔ̀ bɛ: «Á zɔ shìmì ǹdǝ́ màngwǝ̌rh á m'á bàn nɛ̀ zal ǹdǝ ŋwɔ̀l-bal ta? ⁴⁹ E jà dɛ̃ gakó, à y'à tó ába à ŋwɛ́nɛ́ Yi jì y kɔ̀nɔ́ w wa, à n'â cèrhè kàrmɔ̀, sǝ á yǝ̀ nɛ zal yé. Kɔn mǝ̌ sǝ rǝ tó èta, mùnì kɔn rɛ́ tɛ̀bɛ́ rǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó pyìrh.» ⁵⁰ Rǝ̀myɛ́ yó, ń kwã-lyì bí gakó dùr bǝ yẽ̌ mo. ⁵¹ Ébɔ́-dǎl mǝ̀dù yà ń pú ń kùrǝ̀. Ń yà ń dul gàmǝ̀-lyɔ̀nɔ̀ dúdú. Bǝ̀ la mɔ zal, ⁵² 52 n vwǎrh n dùr nánlwè n yẽ̌ gàmǝ̀-lyɔ̀nɔ̀ w nɛ. ⁵³ Bǝ zǝ Yezu bǝ vò Yi jì y vwĩ̀-zwǝ́lnǝ bé yé né cìnǝ́ bé gakó náncɛ y sono. Vwĩ̀-zwǝ́lnǝ bé yé né cìnǝ́ bé gakó ǹdǝ́ náncɛsɛ́ ǹdǝ́ Muyiisi nyǝ́ né byilnǝ bé bà, bǝ jòm dwã yó. ⁵⁴ Bǝ̀ gǝ́ y'à zɔ mɔ bǝ̀ la gàà yi ní, Pyɛɛrɛ yà ń ŋwɛ́nɛ́ kwã nɛ́ kwã nɛ́, n mǝ n tó n yí n zù vwĩ̀-zwǝ́lnǝ bé yé né cìnǝ́ bé gakó náncɛ y sõ kɛ̀lɛ́ wa, n tó Yi jì y yìlnǝ̀ bé ne ń jě tɛ̃́ ń nǝ́ ń ywǝ̀l myǐn. ⁵⁵ Vwĩ̀-zwǝ́lnǝ bé yé né cìnǝ́ bé ǹdǝ́ bùr-kárna bɛ́ gùlú w lyì bí gakó y'à n'ê pyà yò bǝ̀ la Yezu yó w cṹ, mùnì bǝ gu mu, sǝ bǝ̀ yǝ̀ nɛ yé. ⁵⁶ Lyì nánzhǝzhɔ̌ y'à n'ê gòm kɔma bǝ̀ ce ń nyí ni, sǝ bǝ̀ zɔ̀mà nɛ́ y'à t'â tó dwã yé. ⁵⁷ Rə̀myɛ́ yó, bə̀ jàlà zɛ̃̀ bə gõ kɔma bə̀ nʼê yâl bə cĩ́ yò ń yó wə, bə wɔ̀: ⁵⁸ “Nə́ nyɛ̀ɛ̀ ń nyú wə. Ń wò bə̀ ń mà n wǔr Yi jì y kɛ̀bɛ́ numbyínə́ lù mú, sə dwã nə̀tɔ̀ wẽ́, ń mà n ká n lù è dõ, kɛ̀bɛ́ numbyínə́ jɛ̀rh yə̀ lwì mú.” ⁵⁹ Sə ǹdə́ rə̀myɛ́ ga, bə̀ zɔ̀mà nɛ́ yʼà tʼâ tó dwã yé. ⁶⁰ Rǝ̀myɛ́ yó, Yi jì y vwĩ̀-zwǝ́lnǝ bé yé né cìnǝ́ bé gakó náncɛ y zɛ̃̀ n zhì dɛ̃̌ bǝ̀ gakó yé né, n bwǝ̀rh Yezu n wɔ̀: «Ǹ tá ǹ lyár bǝ̀ kaka? Bǝ̀kɔ́n yil lyì bí byɛ̀bɛ́ n'ê ce yò ǹ nyí ni?» ⁶¹ Sǝ Yezu shĩ̌ ń nyí, ń yǝ̀ lyár bǝ̀ kaka yé. Vwĩ̀-zwǝ́lnǝ bé yé né cìnǝ́ bé gakó náncɛ y kǝ́ n bwǝ̀rh mò n wɔ̀: «Ǹmyɛ́ ǹ wɔ́ Kristǝ, Yi rí tɛ̀bɛ́ rǝ̀ mǝ̌ ǹdǝ́ còrhó mó Byǐ mú?» ⁶² Yezu wɔ̀: «Wɔ́ àmyɛ́, sǝ á m'ǎ nǝ Numbyíní Byǐ ń jě Yi jàn cǝ́bal mɔ́ jǝ̀jĩ́ ni. Á m'ǎ nǝ mɔ myɛ ń wɔ bǝ́ban wẽ́ ń bànà.» ⁶³ Vwĩ̀-zwǝ́lnǝ bé yé né cìnǝ́ bé gakó náncɛ y lyim zɛ̃̀, n kǎr ń gàndɛ́ n wɔ̀ bùrsí gùlú w lyì bí ni: «Nǝ́ k'é bǝ zhǝ̀n-cìnǝ́ tum zhe kǝ́dò yé. ⁶⁴ Á cìcì nyɛ̀ɛ̀ ń gǝ́ tùrh Yi ní. Bǝ̀kɔ́n á n'á bùlǝ̀?» Bǝ̀ gakó tó dwã bǝ̀ wɔ̀ bǝ̀ ń mǝ̌ dwã ǹdǝ́ gu. ⁶⁵ Bǝ̀ jàlà y'à n'ê pùrh tǝ̀tàr ń yó, bǝ̀ n'ê pyi ń yé y ne bǝ̀ mà mɔ̀ ǹdǝ́ jǝ̀-gúlǝ́, bǝ̀ zhe: «Lwar lò mɔ̌ ná-yil ń mà mɔ́!» Yi jì y yìlnǝ̀ bé myɛ y'à n'ê mà mɔ̀ jǝ̀-sǝ̌rh. ⁶⁶ Bǝ̀ gǝ́ y'à n'ê bwǝ̀rh Yezu yi ní, ǹdǝ́ Pyɛɛrɛ yà ń ŋwɛ́nɛ́ kɛ̀lɛ́ y wu w wẽ́. Kɛ̃-byǐ èdù è wɔ́ Yi jì y vwĩ̀-zwǝ́lnǝ bé yé né cìnǝ́ bé gakó náncɛ y tùntùnnǝ̀, èmyɛ́ mɔ́ zɛ̃̀ e yí, ⁶⁷ e nǝ Pyɛɛrɛ ń jě tɛ̃́ ń nǝ́ ń ywǝ̀l myǐn, e nyǐ mu shɛ́shɛ́, e wɔ̀ mɔ̀: «Ǹmyɛ yà ǹ nǝ́ ǹ tó Nazarɛtɛ lyì bal Yezu mú ni.» ⁶⁸ Pyɛɛrɛ mà nyǝ̀-pɔ̌ n wɔ̀: «Àmyɛ́ gaga mɔ́ búl à yǝ̀l tɛ̀bɛ́ ǹ nǝ́ ǹ zɔ̀m mɔ́ kùr yé.» N zɛ̃̀ n vò bwǝ̀r-zɔ́nɔ́ w wa. [Rǝ̀myɛ́ yó, cǝ́-bya kúrh.] ⁶⁹ Kɛ̃-byǐ y kʼe nə mɔ, e zɛ̃̀ e wɔ̀ lyì bí byɛ̀bɛ́ bə̀ yʼà zhǐ gàà mɔ́ nɛ: “Mɔ̀bɔ́ èta mɔ́ wɔ́ Yezu mú kwã-lò.” ⁷⁰ Pyɛɛrɛ kə́ n mà nyə̀-pɔ̌. Kɔn yə̀ námpɔ́lɛ́ rə̀myɛ́ kwã nɛ́, byɛ̀bɛ́ bə̀ yʼà zhǐ gàà mɔ́ myɛ wɔ̀ mɔ̀: “Ǹ wɔ́ Gəlile lò zhə̀n zhə̀nà. Sə rə̀myɛ́ nʼê byili bə̀ ǹmyɛ wɔ́ Yezu mú kwã-lò.” ⁷¹ Pyɛɛrɛ zɛ̃̀ ń nə́ ń mà nyə̀-pɔ̌ ń mə́ ń dùl Yi ń zhe: “À yə̀l bal mɔ́ mɔ̀bɔ́ á nʼá zɔ̀m ń yò w mó pár yé.” ⁷² Rə̀myɛ́ yi ní cìcì, cə́-bya kúrh twər rə̀lyè nyǎn rɛ́. Pyɛɛrɛ zɛ̃̀ n lyǐrh bə̀ Yezu yà ń wò mò: “Cə́-bya mʼà la mʼe kúrh twər rə̀lyè, ǹdə́ ǹ wò twər rə̀tɔ̀ bə̀ ǹ yə̀l à pár yé.” N zɛ̃̀ ń nə́ ń kúrhə́.