¹ Yezu shí Yi jì y kɔ̀nɔ́ w wẽ́ n du, n yí yé né námpɔ́lɛ́. Ń kwã-lyì bí mə̀dù wɔ̀ mɔ̀: “Yó-cə́bal, nyǐ nə́kulə náncɛ̀cɛ̀nà nyɛ̀bɛ́ ma bə̀ mʼe lù Yi jì yə́, sə́ nyǐ è lùlwìrì rí myɛ gə́ càn nɛ́.” ² Yezu wɔ̀ mɔ̀: “Ǹ nə nə́kulə né nánfwààlɛ́ tɛ̀bɛ́ èta mɔ́? Nə́kulu òdù ga tʼâ la ò dõ yó mãɔ̃ yé. Bə̀ mʼa wǔr nə̀ gakó bə ló tɛ̃´.” ³ Yezu zɛ̃̀ n vò Olyivyǝǝré pyɔ̀ w yó, n jòm tɛ̃́, n zǝ ń yé n zǎ Yi jì yǝ́. Rǝ̀myɛ́ yó, ǹdǝ́ è y'à wɔ́ Pyɛɛrɛ ǹdǝ́ Zhakɛ ǹdǝ́ Zhã ǹdǝ́ Andǝrɛ dúdú bǝ̀ y'à ŋwɛ́nɛ́ ń sono gàà. Bǝ zɛ̃̀ bǝ wɔ̀ mɔ̀: ⁴ «Byili nǝ́ba yi rí tɛ̀bɛ́ rǝ̀myɛ́ la wɔ̀rhɔ́ mɔ́. Sǝ́ byili nǝ́ba myɔrhɔ w kɔ̀bɔ́ ò m'a byili dɛ̃ rɛ́ tɛ̀bɛ́ rǝ̀myɛ́ la wɔ̀rhɔ́ mɔ́.» ⁵ Yezu zɛ̃̀ n ji kùr n wɔ̀ bɛ: “Dɛ̃̌-na á cìnə̀. Á bə̀kʼá yẽ̌ bə jə́jɛ̀rɛ́ ába yé. ⁶ Lyì nánzhəzhɔ̌ mʼa bə̀ ǹdə́ àmyɛ́ yil ré, sə lò gakó mà n wɔ̀ bə̀ wɔ́ ńmyɛ̌ ń wɔ́ Kristə mó, sə bə̀ mʼa jə́jɛ̀rɛ́ lyì nánzhəzhɔ̌. ⁷ Bǝ̀ m'a zɔ̀m jààsɛ̀ shɛ̀bɛ́ sǝ̀ nyɛ búlǝ́ yò ǹd'ába. Á b'ǎ nyɛ̀ɛ̀ búlǝ́ dweme bwǝ́lbwǝ́lǝǝ, s'á bǝ̀k'á dùr ywẽ yé, bǝ̀ kɔn wɔ́ nyɔ́ɔ́ sǝ rǝ̀myɛ́ gakó wɛ̀rhɛ́, sǝ è gwẽ̌ t'â la lũ zhɔ̌ yál yé. ⁸ Cɛmɛ b'a zɛ̃̀ búlǝ́ ǹdǝ́ dwã; tǝnǝ̀rh m'a zɛ̃̀ búlǝ́ ǹdǝ́ dwã; cɛ y m'a zhízhǐ jààsɛ̀ nánzhǝzhɔ̌ wa; nɔrh m'a yǝ̀ nɛ́. È m'a yǝ̀ ǹdǝ kɛ̃ pwǐ yin kùr-ju ta. ⁹ “Sə dɛ̃̌na á cìnə̀. Lyì bí mʼa zə ába bə vò bùrsì jàà wà. Bə̀ bʼa mà ába dwã-gùúlí jìsí wẽ́. Bə̀ mʼa zə ába bə vò cɛmɛ yó-cìnə́ ǹdə́ pyâ sono àmyɛ́ yilə. Sə rə̀myɛ́ yi ní, á mʼâ yə̀ à zhə̀n-cínnə bə̀ yilə. ¹⁰ Wɔ́ nyɔ́ɔ́ sə bə jɛ̀rɛ̀ bə bwə̀l yò-ècɔ̀nɔ̀ nyí rí bə byili lũ w lyì bí gakó ne. ¹¹ «Bǝ̀ gǝ tú bǝ zǝ ába bǝ̀ la bùrsí jàà wà, s'á bǝ̀k'á zɛ̃̀ á n'á tɛ́rɛ́ á wẽ́ á m'á pyà kɔn rɛ́ tɛ̀bɛ́ á la lyár mɔ́ yé, s'á lyár tɛ̀bɛ́ Yi la á wẽ́ co rǝ̀myɛ́ yi ní cìcì mú. È dǝ̀ ámyɛ̌ cìcì á la zɔ̌m yé. Wɔ́ Eshirhǝ náàcɛ̀nɛ́ è m'a tó á dɛnnɛ e zɔ̀m. ¹² Lyì m'a zǝ bǝ̀ da-byǎ bǝ pǝ bǝ gu. Dabá m'a zǝ bǝ̀ cìcì byǎ bǝ pǝ bǝ gu, sǝ byǎ myɛ m'a bú ǹdǝ́ bǝ̀ dabá bǝ ce bǝ gu bi. ¹³ Lyì bí gakó m'a jí zùùrì ǹd'ába àmyɛ́ yil ré yilǝ, sǝ lò mɔ̀bɔ́ ǹ pyɛ́nɛ́ ń zhì ǹ nà y yó kẽkẽ, ǹ m'ǎ nǝ vwǎrh.» ¹⁴ Yezu súlí n wɔ̀: «Á m'ǎ nǝ súsúlú kɔn rǝ̀ ŋwɛ́nɛ́ rǝ̀ gǝ́ y'à bǝ mǝ̌ sǝ rǝ yǝ̀ mǝ̀gã̌. (Mɔ̀bɔ́ ǹ nǝ́ ǹ kàrmǝ̀ rɛ̀, sǝ́ ce jàn nɛ́ ń lwar rǝ̀ kùrǝ̀.) Rǝ̀myɛ́ yi ní, lyì byɛ̀bɛ́ bǝ̀ ŋwɛ́nɛ́ Zhide tǝnà y wa, sǝ bǝ dùr bǝ vò pyàr rɛ́ wa. ¹⁵ Lò mɔ̀bɔ́ ǹ jě lyarh wa, sǝ ǹ bǝ̀ká pyà tɛ̃́ só ń zù jù w ń kwè ǹ wẽ̀ yé. ¹⁶ Lò mɔ̀bɔ́ ǹ ŋwɛ́nɛ́ gɔ nɛ́ ǹ kɛ́lɛ́ wa, sǝ ǹ bǝ̀ká pyà jè zhǝl ń kwè ǹ kàmǝ̀-zwǐ yé. ¹⁷ «Dwã nɛ́ nǝ̀myɛ́ wẽ́, zwini b'a zǝ kana byɛ̀bɛ́ bǝ̀ zhe pǔrh, ǹdǝ́ byɛ̀bɛ́ bǝ̀ n'ê ŋwɛ̀ byǎ mɔ́. ¹⁸ Lwǝ̌l-nǝ Yi, mùnì ga wẽ̀ ré rǝ̀myɛ́ bǝ̀k'a wɛ̀rhɛ́ wàr yi ni yé. ¹⁹ Dwã nɛ́ nǝ̀myɛ́ zwini rí m'a dwini tɛ̀bɛ́ rǝ̀ yàl nɛ́, Yi gǝ́ wɛ̀rhɛ́ kɔn gakó lũ w kùr-ju yi ní ga, kɔn m'e yí èlǎsɛ̃́ mɔ́. Zwini rí rǝ̀myɛ́ dwí rí k'ê t'â bàn gaga yé. ²⁰ Cinnǝ mú gǝ yà ń yǝ̀ dwã nɛ́ nǝ̀myɛ́ mɔ́ bɔ̀, lò mǝ̀dù ga yà ń tá ń la lú yé. Sǝ ń bɔ̀ nɛ̀, lyì bí byɛ̀bɛ́ ń cír mó yilǝ. ²¹ «Rǝ̀myɛ́ yi ní, lò gǝ wò ába bǝ̀ nyǐ Kristǝ mó ŋwɛ́nɛ́ nyɔ̀nɔ̀, ráá jàà dõ wǝ, s'á bǝ̀k'á zwẽ nyí yé. ²² Lyì m'a fwĩ́ tɛ̃́ bǝ̀ n'ê jǝ́jɛ̀rɛ́ lyì bí, jàlà wɔ̀ bǝ̀ bǝ̀ wɔ́ Kristǝ mó, jàlà wɔ̀ bǝ̀ bǝ̀ wɔ́ Yi nyì-zwennǝ. Bǝ̀ m'a wɛ̀rhɛ́ màmyaarhɛ ǹdǝ́ wò-jààrɛ̀, bǝ̀ m'ê jǝ́jɛ̀rɛ́ lyì bí. Kɔn gǝ wɔ̌ myɛ, sǝ bǝ jǝ́jɛ̀rɛ́ byɛ̀bɛ́ Yi cír mó, ²³ s'á dɛ̃̀ á cìnǝ̀. À dámǎ a byili ába kɔn gakó.» ²⁴ Yezu súlí n wɔ̀: “Dwã nɛ́ nə̀myɛ́ wẽ́, zúzúnú yi rí rə̀myɛ́ gə tú è lyɛ̃, nə̀nyɔ́nɔ́ w pwẽ̀ ré mʼa jé; cànà pwẽ̀ kʼê tʼâ la nɛ́ yál yé; ²⁵ cã̀mə́sɔ̌rh mʼa shí dɛ̃̌ sə ló tɛ̃´. Kɔn dɛ̀bɛ́ gakó rə̀ ŋwɛ́nɛ́ dɛ̃̌ yi w mú bʼa zhízhǐ. ²⁶ Sə rə̀myɛ́ yó, bə̀ mʼa nə Numbyíní Byǐ ń ŋwɛ́nɛ́ bə́ban wẽ́ ń bàn ǹdə́ jàn nánfɔ̀lɔ̀, ǹdə́ zùwə́. ²⁷ Ń mà n twĩ̀ màlɛ́kabá lũ w cə-yala gakó, kɔn zhí yi-pwírhí e mʼe yí yi-zùr, bə byẽ̀ lyì bí byɛ̀bɛ́ ń cír mó bə cĩ́ dwã yó. ²⁸ “Nyǐ-nə myɔrhɔ òdù, sʼá lwar ò kùrə̀: á gə nɔ épyìlú ò jɛ̀sɛ́ nʼê tò, ò vɔɔrɛ́ nʼê púrhə́, á jʼá yě bə̀ shí rí bwəlse. ²⁹ Èta myɛ, á gə tú á nɔ ywẽ̀ né nə̀myɛ́ nə̀ nʼê wɛ̀rhɛ́, sʼá lwar bə̀ Numbyíní Byǐ twírí y bwəlse, ń ŋwɛ́nɛ́ bwə̀rə̀ y nyí ni. ³⁰ Zhə̀nà, à nʼâ wə̀l ába: zà zà lũ w lyì bí tʼâ la lyɔ̃ ǹdə́ rə̀myɛ́ gakó yə̀ wɛ̀rhɛ́ yé. ³¹ Dɛ̃̌ ǹdə́ cɛ y mʼa lyɛ̃, sə àmyɛ́ zɔ̀mà nɛ́ tʼâ la lyɔ̃ gaga yé. ³² “Lò lò yə̀l dɛ̃ rɛ́, ráá yi rí rə̀myɛ́ yé. Arəzana màlɛ́kabá myɛ yə̀l yé. Yi Byǐ mú myɛ cìcì yə̀l yé. Wɔ́ Da mɔ́ dúdú ń yě. ³³ Zǝ-na á yírhǝ́, á bǝ̀k'á dɛ̀ɛ̀ yé, b'ǎ yǝ̀l dɛ̃ rɛ́ tɛ̀bɛ́ rǝ̀myɛ́ bàn mɔ́ yé. ³⁴ «Kɔn nyɛ̌ dwã ǹdǝ kɛ̀lɛ́ cǝ́bal gǝ́ ya ń la ń sɔ́má, n zɛ̃̀ n yẽ̌ ń kɛ̀lɛ́ y nɛ n ce ń kɛ̀lɛ́ y tùntùnnǝ̀ bé jɔ̃̀ w ta. N pǝ lò gakó ń tum, n zɛ̃̀ n pǝ nyí bwǝ̀rǝ̀ y yìlnǝ̀ mó ne bǝ̀ ń yìlì bwǝ̀rǝ̀ y cɛ̀nɛ̀, sǝ n zǝ ń yírhǝ́. ³⁵ Rǝ̀myɛ́ yilǝ, zǝ-na á yírhǝ́, b'ǎ yǝ̀l dɛ̃ rɛ́ tɛ̀bɛ́ kɛ̀lɛ́ y cǝ́bal mɔ́ mà n ká n bǝ̀ mɔ́ yé. È gǝ wɔ́ dǝ̀dɛ̀nɛ́ ń ká ń bànà, ráá cǝcɛ̃-swélé ne, ráá cǝ́-byǝ-cǐl ne, ráá cǝ-lár bɔ̀l wà, á yǝ̀l yé. ³⁶ Ce-nǝ jàn nɛ́ , mùnì ga ń gǝ ká ń jàr jàr ń túwǝ́, sǝ ń bǝ̀ká n bǝ̀ n pwírí á dɛ̌ yé. ³⁷ Kɔn rɛ́ tɛ̀bɛ́ à n'â byili ába mɔ́, wɔ́ lyì bí gakó ne à n'â byili ri: zǝ-na á yírhǝ́.»