¹ Wɔ́ nə́ cìn-cìnú yil Kristə zwẽ nə́ba. Zhǐ-nə kẽkẽ, á bə̀k'á shɛ̀nɛ́ á ce á cìn yómde tumə wẽ́ kə́dò yé. ² Nyǐ-nə àmyɛ́ Pwəə, à n'â wə̀l ába; á gə n'á ce bə̀ gòm ába, sə́ nyǐ Kristə tum rí k'ê bə kùr zhe gaga á yil yé. ³ Sə à gwẽ̌ n'â bwérhé à byili ába bǝ̀ lò mɔ̀bɔ́ gakó ń nǝ́ ń ce bǝ̀ gòm mó, kɔn wɔ́ nyɔ́ɔ́ sǝ́ zwẽ Muyiisi nyǝ́ né gakó. ⁴ Ámyɛ̌ byɛ̀bɛ́ á n'á yǎl á zwẽ Muyiisi nyǝ́ né mùnì ga á bǝ̀k'á k'á zǝ dwǝ́ǝ́re mó, á pɔr Kristǝ kwã nɛ́, ce á k'á wàr á b'ǎ nǝ Yi pɛnɛ́ y nánfò w yé. ⁵ Sǝ è gǝ wɔ́ nǝ́myɛ̌ yilǝ, Yi b'a ce nǝ́ k'é t'á la dwǝ́ǝ́re zal yé. Wɔ́ rǝ̀myɛ́ nǝ́ r'é dɛ̃̀ ǹdǝ́ Eshirhǝ́ náàcɛ̀nɛ́ jàn, nǝ́ gǝ́ zhí Kristǝ ni mú yilǝ. ⁶ Lò ǹ gǝ zù Kristǝ, ǹ gòm ráá ǹ yǝ̀ gòm, rǝ̀myɛ́ dǝ̀ kaka yé. Tɛ̀bɛ́ rǝ̀ zhe kùr mú, wɔ́ ǹ gǝ zhí Yi ni ń zɛ̃̀ ǹ nǝ́ ǹ twĩ̀ sónó tumǝ. ⁷ Á ju kùr cɛ̀nɛ̀. È nǝ wɔ́ yẽ̀ lò ń ce á yẽ̌ zhǝ̀n rɛ́ zõ mó ne? ⁸ Bùlǝ̀ né nǝ̀myɛ́ yǝ̀ mɔ̀bɔ́ ń byẽ̀ ába mɔ́ sò shí yé. ⁹ Bǝ̀ y'a wɔ̀ bǝ̀ sã̀-nǝ̀byẽ̌ námpɔ́lɛ́ gǝ co mún wẽ́ mǝ̀ gakó n'ê zɛ̃̀. ¹⁰ Sǝ Cǐnnǝ mó jàn yil à zhe á zhǝ̀nà. Ń ce à yě pamparɛ̃ɛ̃ b'ǎ bùlǝ̀ né ǹdǝ́ à nyǝ̀ná nɛ́ ga wɔ́ rǝ̀dù. Sǝ è gǝ wɔ́ lò mó mɔ̀bɔ́ ń nǝ́ ń zhízhǐ á wun ní mú yilǝ, ń gǝ wɔ́ mámá myɛ, Yi b'a pɔ̃ còrhò-tum. ¹¹ Da-byǎ, lwar-na b'è gǝ wɔ́ àmyɛ́ cìcì mú yilǝ, à gǝ y'à gwẽ̌ n'â bwǝ̀l à byili lyì bí ni bǝ̀ kɔn wɔ́ nyɔ́ɔ́ sǝ bǝ gõ̀ bè, wɔ́ bǝ̀kɔ́n yil bǝ̀ y'à m'a cǝ̀ǝ̀lè bǝ̀ n'ê nwɛ̀nɛ̀ nɛ̀? À gǝ y'à n'â byili èta, Kristǝ dǝ̀-jɔrhɔ́ w nyǝ̀ná nɛ́ y'à k'ê t'â la yò yál lò lò sõ yé. ¹² Sǝ è gǝ wɔ́ lyì bí byɛ̀bɛ́ bǝ̀ ŋwɛ́nɛ́ á wẽ́ bǝ̀ n'ê zhizhiri á wun ní mú yilǝ, bǝ̀ mǝ̌ sǝ bǝ ce bǝ kɔkwa bɛ! ¹³ Da-byǎ, è gǝ wɔ́ ámyɛ̌ yilǝ, Yi byẽ̀ ába mùnì ga á cìní á cìnǝ̀, sǝ á bǝ mǝ̌ s'á zǝ á cìn-cìnú mú mǝ̀myɛ́ á b'á twĩ̀ á yala nɛ́ pùbùlǝ̀ yé. Zǝ-na rǝ̀myɛ́ á m'á sɛ̃ dwã nɛ ǹdǝ́ sónó. ¹⁴ Kɔn dɛ̀bɛ́ Muyiisi nyǝ́ né n'ê byili mú gakó ŋwɛ́nɛ́ zɔ̀mɛ̀ rǝ̀dù wẽ́. Zɔ̀mɛ̀ rɛ́ rǝ̀myɛ́ n'ê wǝ̀lǝ̀: Swéné ǹ dõ ǹdǝ ǹ cìcì ta. ¹⁵ Sǝ dɛ̃̌-na á cìnǝ̀. Á gǝ zɛ̃̀ á n'á vwar dwã ǹdǝ kǔlsi ta, á n'á nwɛ̀nɛ̀ dwã, á n'á cɛ̀mɛ̀ dwã, lwar-na b'ǎ m'ǎ zhìlì dwã yò. ¹⁶ Wɔ́ rǝ̀myɛ́ è ce, à n'â wǝ̀l ába: Yẽ̌-nǝ á cìn ni á ce Eshirhǝ náàcɛ̀nɛ́ jɔ̃̀ wa, e zǝ ába e vò. Èta, á k'á t'á la á yala nɛ́ shilǝ námmǝlwǎlsɛ́ pùbùlǝ̀ wɔ̀rhɔ́ yé. ¹⁷ Lwar-na bǝ̀ kɔn dɛ̀bɛ́ á yala nɛ́ shilǝ né n'ê yǎl mɔ́, Eshirhǝ náàcɛ̀nɛ́ t'â yǎl rɛ yé. Tɛ̀bɛ́ Eshirhǝ náàcɛ̀nɛ́ myɛ n'ê yǎl mɔ́, á yala nɛ́ shilǝ né myɛ t'â yǎl rɛ yé. Yala nɛ́ shilǝ né ǹdǝ́ Eshirhǝ náàcɛ̀nɛ́ n'ê bwí dwã. Wɔ́ rǝ̀myɛ́ è ce, cɛ̀nɛ̀ rɛ́ á n'á yǎl á wɛ̀rhɛ́ mɔ́, á wàr rɛ s'á wɛ̀rhɛ́ yé. ¹⁸ Sǝ è gǝ wɔ́ Eshirhǝ náàcɛ̀nɛ́ è n'ê zǝ ába è zhǝ̀lǝ̀, á k'á t'á la nyǝ́ né yómǝ́ yál yé. ¹⁹ Á cìcì mú yě kɔn ná-dwí yil yala nɛ́ shilǝ námmǝlwǎlsɛ́ n'ê ce lyì bí wɛ̀rhɛ́. Sǝ̀ n'ê ce bǝ̀ wɛ̀rhɛ́ fwǝ̌l tumǝ; bǝ̀ n'ê twĩ̀ tùntùm-bǝyààlɛ, bǝ̀ n'ê twĩ̀ ǹdǝ bǝ gǝ́ só né; ²⁰ bǝ̀ n'ê wùlì tɛ̃́ bǝ̀ cèrhé wẽ̀ tɛ̀bɛ́ rǝ̀ dǝ Yi; bǝ̀ n'ê wɛ̀rhɛ́ cǝ́mǝ́ námmǝlwǎlsɛ; bǝ̀ n'ê súl dwã, bǝ̀ n'ê bwí dwã, bǝ̀ n'ê dùr dwã bwɛ̃̌; bǝ̀ n'ê kwè lyimǝ ǹdǝ́ dwã; bǝ̀ n'ê yǎl bǝ̀ lyì bí gakó nǝ bɛ; bǝ̀ n'ê pɔr dwã nɛ kùkùl kùkùl, bǝ̀ gǝ́ bǝ dwã zɔ̀mà kùr nyɛ̌ mɔ́ yilǝ; ²¹ bǝ̀ n'ê dùr bǝ̀ dwã bɛ́ wẽ̀ ré bwɛ̃̌; bǝ̀ n'ê nywɛ̃̀ sɛ̃́ kɔn lyɛ̃ cɛ nɛ; bǝ̀ n'ê jí dɛ̃́dɛ̃́. Wẽ̀ ré rǝ̀myɛ́ dwí rí dwã̃ myɛ súlí rǝ̀ ŋwɛ́nɛ́ bǝ̀ n'ê wɛ̀rhɛ́. À k'â n'â byili ába, ǹdǝ à gǝ́ jɛ̀rɛ̀ a byili ába ní: Lyì bí byɛ̀bɛ́ bǝ̀ n'ê wɛ̀rhɛ́ tumǝ né nǝ̀myɛ́ dwí rí gakó t'â la jàà nɔ Yi tǝnà y wẽ́ yé. ²² Sǝ kɔn dɛ̀bɛ́ Eshirhǝ náàcɛ̀nɛ́ n'ê pɛ mɔ́, wɔ́ dwã sónó, wu-nyɔ̃̀, yǝ̇-zùlǝ́, yala nɛ zhìlù, cɛ̀nɛ̀ wɔ̀rhɔ́, dwã nɛ sãɔ̃, e zǝ dwã zhǝ̀nà, ²³ wu-bɔ̀nɔ̀, ǹdǝ́ cìn-zal. Muyiisi nyǝ́ né t'â cẽ rǝ̀myɛ́ yò yé. ²⁴ Byɛ̀bɛ́ bǝ̀ zù Kristǝ mó, bǝ̀ pǝpa bǝ̀ yala nɛ́ shilǝ námmǝlwǎlsɛ́ sǝ̀ n'ê zǝ bɛ sǝ̀ zhǝ̀l mó dǝ̀-jɔrhɔ́ yó. ²⁵ Wɔ́ Eshirhǝ náàcɛ̀nɛ́ è ce nǝ́ ŋwɛ́nɛ́. Rǝ̀myɛ́ ce, yẽ̌-nǝ e zǝ nǝ́ba e vò. ²⁶ Nǝ́ bǝ̀k'á yǝ̀ cìn-byiliu cìnǝ́ yé. Nǝ́ bǝ̀k'á bú dwã yé, sǝ nǝ́ bǝ̀k'á dùr dwã bwɛ̃̌ myɛ yé.