¹ Bə̀sɔ́bwɛ̀lɛ́ gə gwẽ̌ yə̀ yí è da jɛ̃̀-kɔn cìnú, àmyɛ́ n'â bùl bə̀ è də̀ kaka yé, è nyɛ̌ ǹdə jì-bɔ̃̀ɔ̃́ ta, e jà wɔ́ èmyɛ́ è la b'e cìní kɔn gakó lyə́m lyə́m. ² È mə̌ s'e zwẽ lyì byɛ̀bɛ́ bə̀ ń'ê nyǐ èmyɛ́ ǹdə́ è da kɔn rɛ́ yò mó nyí ni, kɔn la m'e yí dɛ̃ rɛ́ tɛ̀bɛ́ è da byili mú. ³ Nə́myɛ y'ǎ wɔ́ èta shãã ga , ǹdə́ nə́ gə́ y'ǎ gwẽ̌ wɔ́ ǹdə bə̀sɔ́ná ta yi ní, nə́ y'ǎ wɔ́ lũ w wẽ̀ ré námmársɛ́ yómə́ ; ⁴ sə yi rí gə́ tú rə yí rə zhɛ̀, Yi twĩ̀ rə̀ Byǐ mú, bə̀ tó kɛ̃ dɛnnɛ bə lù mu nyə́ né wẽ́, ⁵ mùnì ga n vwǎrh lyì bí byɛ̀bɛ́ bə̀ y'à wɔ nyə́ né wẽ́ mó, mùni ga Yi ce nə́ jǐrh rə̀ byǎ. ⁶ Yi twĩ̀ rǝ̀ Byǐ mú Eshirhǝ y nǝ́ wun ní wẽ́, rǝ m'e byili b'ǎ wɔ́ rǝ̀ byǎ zhǝ̀nà, sǝ Eshirhǝ y ce nǝ́ r'é bya nǝ́ zhe: «Aba», rǝ̀ kùr wɔ́: «À Da». ⁷ Rǝ̀myɛ́ ce, ǹ kǝ́ ǹ dǝ̀ yóm yé. Ǹ wɔ́ Yi byǐ. Sǝ ǹ gǝ́ wɔ́ Yi byǐ mú ce, ǹ b'ǎ nǝ cǝl kɔn dɛ́ dɛ̀bɛ́ Yi tɛnɛ rǝ̀ byǎ bɛ́ yil mó wẽ́. ⁸ Á y'ǎ yǝ̀l Yi pár shãã ga yé. Á y'ǎ wɔ́ wẽ̀ dé tɛ̀bɛ́ yírhǝ́ bǝ nɛ, rǝ j'à dǝ̀ yǝ mó yómǝ́. ⁹ 9 Sǝ èlǎsɛ̃́, á lwar Yi párá. Kɔn du, Yi cìcì mú myɛ yě b'ǎ wɔ́ rǝ̀myɛ́ byǎ. Byè yil á nǝ zɛ̃̀ á k'á n'á yǎl á zù wẽ̀ dé rǝ̀myɛ́ tɛ̀bɛ́ rǝ̀ bǝ ŋwɔ̀nɔ́ zhe, rǝ j'à bǝ kùr zhe mó? E zɛ̃̀ wɔ́ yál á k'á n'á yǎl á jǐrh rǝ̀ yómǝ́, náá etǝra? ¹⁰ Á n'á zwẽ nyí bə̀ dwã ǹdə́ cànsɛ ǹdə́ byinə jàlà ŋwɛ́nɛ́ nə̀ du dwã ! ¹¹ Ywẽ zhe ne ǹdə́ è gə wɔ́ tum nánfò à twĩ̀ á sono ¹² Da-byǎ, à jǐrh ǹdǝ á ta. Rǝ̀myɛ́ ce, à n'â lwǝ̀l ába: wɛ̀rhɛ́-na ǹdǝ à ta. Á yǝ̀ nɛ lwɛlɛ dǝ́-byǐ wɛ̀rhɛ́ yé. ¹³ Á yě bǝ̀ à gǝ́ jɛ̀rɛ̀ a bwǝ̀l yò-ècɔ̀nɔ̀ nyí rí a byili ába mó, wɔ́ à gǝ́ y'à bǝ jàn zhe mó yi ní. ¹⁴ À yala nɛ́ gǝ́ y'à nyɛ̌ nɛ́ mɔ́ y'à wɔ̌ rǝ̀ b'a ce á nyɛ̃́ nɛ, ráá á dùr á yẽ̌ ne, sǝ á yǝ̀ èta wɛ̀rhɛ́ yé. Á zwẽ à zhǝǝlé ǹdǝ Yi màlɛ́ka ta. Á gaga mɔ́ zwẽ ne ǹdǝ Yezu Kristǝ ta. ¹⁵ È nə wɔ́ tɛ̌ rə̀ wɔ́ á wu-nyɔ̃̀ wá ? à n'â wə̀l ába, bə̀ ǹdə́ kɔn gə y'à wɔ̌ myɛ, á y'ǎ m'ǎ járh yírhə́ né á pɛ̃. ¹⁶ Á n'á bùl bə̀ à m'a zɛ̃̀ á jǐrh á zù-bal zhə̀n rɛ́ à zɔ̀m a byili ába mɔ́ yilǝ? ¹⁷ Lyì ŋwɛ́nɛ́ bǝ̀ n'ê wɛ̀rhɛ́ ǹdǝ wɔ́ só bǝ̀ só ába ta, e j'à wɔ́ kɔma. Wɔ́ yál bǝ̀ n'ê yǎl bǝ pɔr ába àmyɛ́ kwã nɛ́, á k'á tó bǝ̀myɛ́ nɛ. ¹⁸ 18 Á mǝ̌ s'á zǝ yǝ̀wǎl twéé twéé ǹdǝ́ cɛ̀nɛ̀ wɔ̀rhɔ́, sǝ è bǝ̀k'a yǝ̀ à gǝ ŋwɛ́nɛ́ á sõ yi ní dúdú yé. ¹⁹ À byǎ, zwini k'ê zhe ne dɛ̃́dɛ̃́ á yilǝ, ǹdǝ kɛ̃ pwǐ gǝ́ y'a yì ní, sǝ rǝ̀ n'ê nwɛ̀nɛ̀ nɛ̀ kɔn la m'e yí Kristǝ jòm á wẽ́ pamparɛ̃ɛ̃. ²⁰ À y'à só ǹdǝ́ à wu gakó s'a yǝ̀ á sõ a kwɛrhɛ a zɔ̀m ǹd'ába, b'à wu n'ô zɛ̃̀ á yilǝ. ²¹ Ámyɛ̌ byɛ̀bɛ́ á n'á yǎl á yə̀ nyə́ né yómə́ mó, byilinə rə̀myɛ́ àmyɛ́ nɛ a nyì : Á bə zɔ̀mɛ̀ rɛ́ tɛ̀bɛ́ bə̀ kɛ̃ nyə́ né sɛ́bɛ́ rɛ́ wẽ́ mó kùr nyɛ̌ nà ? ²² Rə̀ n'ê byili bə̀ Abərəham lùl bala-byǎ bə̀lyè. Bal-byǐ y èdù y wɔ́ Agaarɛ mɔ́ ń wɔ́ yóm-kɛ̃ mɔ́ nyǎ, ń dõ mó wɔ́ Abərəham kɛ̃ Sara nyǎ. ²³ Mɔ̀bɔ́ Agaarɛ lùl mó wɔ́ numbyíní pùbùlə̀ kɔna, sə mɔ̀bɔ́ Sara lùl mó wɔ́ Yi nyi-bwelé y kɔna. ²⁴ Rǝ̀myɛ́ n'ê byili nǝ́ba bǝ̀ kana bɛ́ bǝ̀lyè y n'ê myɛrhɛ dɔbrɛ́ kùrǝ̀ nǝ̀lyè yǝ́. Agaarɛ byǎ bɛ́ wɔ́ yómǝ́. Ń nǝ́ ń myɛrhɛ dɔbrɛ́ tɛ̀bɛ́ Yi zɔ Sǝnǝyi pyɔ̀ w yó mó. ²⁵ Pyɔ̀ w òmyɛ́ ŋwɛ́nɛ́ Arǝbyi ní, n jà ń nǝ́ ń myɛrhɛ Zhǝrǝzalɛm. Cɔ w òmyɛ́ ŋwɛ́nɛ́ zà zà, òmyɛ́ ǹdǝ́ ò lyì bí ga wɔ́ yómǝ́. ²⁶ Sə Zhərəzalɛm y è ŋwɛ́nɛ́ dɛ̃̌ mɔ́, wɔ́ cɔ w òmyɛ́ ò wɔ́ nə́ ná mɔ́. ²⁷ Eta bə̀ bə kɛ̃ bə wɔ̀ : «kɛ̃, ǹmyɛ́ mɔ̀bɔ́ ǹ yə̀ lùl mó, ce ǹ wu yə̀ nyɛ̀n. Ǹmyɛ́ mɔ̀bɔ́ ǹ yə̀ byǐ lul zúzúnú pár lwar mɔ́, búbwéé ǹdə́ wu-nyɔ̃̀ ; bə̀ kɛ̃ mɔ̀bɔ́ bə̀ yǎrh tɛ̃́, bə̀ t'â cili ń sõ, ń mà n nə bə̀sɔ́ná nánzhəzhɔ̌ du mɔ̀bɔ́ ń byal mɔ́ só mó« ²⁸ Da-byǎ, è gə wɔ́ ámyɛ̌ yilə, á wɔ́ Yi nyì-bwelé y byǎ ǹdə Yəzakɛ ta. ²⁹ Shãã ga byǐ mú mɔ̀bɔ́ bə y'à lùl ǹdə́ numbyíní pùbùlə̀ mó, yà ń nə́ ń nwɛ̀nɛ̀ mɔ̀bɔ́ ń yàl Yi Eshirhə y kɔn mɔ́, sə zà zà myɛ, kɔn gwẽ̌ wɔ́ èta. ³⁰ Wɔ́ bǝ̀kɔ́n Yi zɔ̀mɛ̀ rɛ́ sɛ́bɛ́ rɛ́ n'ê byili? Rǝ̀ wòwǝ̀: «Vǔr yǝ-kɛ̃ mɔ́ ǹdǝ́ ń byǐ mú ga ǹ sono, bǝ̀ yǝ-kɛ̃ mɔ́ byǐ mú bǝ mǝ̌ sǝ n zǝ cǝl ń da jɛ̃̀-kɔn rɛ́ wẽ́ yé. Wɔ́ da mɔ́ kɛ̃ mɔ́ páá mɔ́ byǐ mú ń mǝ̌ sǝ n cìní ri.» ³¹ Da-byǎ, nǝ́ dǝ̀ yǝ-kɛ̃ mɔ́ byǎ yé. Nǝ́ wɔ́ kɛ̃ mɔ́ páá mɔ́ byǎ.