¹ Galǝshi lyì, bǝ surhǝ zhe cìnǝ́, wɔ́ mɔ̌ lò ń pyìrhí á surhǝ né èta mɔ́? E jà bǝ byili bǝ̀ gǝ́ pǝpa Yezu Kristǝ dǝ̀-jɔrhɔ́ w yó né mó pamparɛ̃ɛ̃ á gakó yé né á yírhǝ́ na. ² À n'â yǎl a bwǝ̀rh ába zɔ̀mɛ̀ rǝ̀dù sásá s'á lyár nɛ: wɔ́ Muyiisi nyǝ́ né zõ mó è ce Eshirhǝ náàcɛ̀nɛ́ só á yó wǝ, ráá yò-ècɔ̀nɔ̀ nyí rí á nyɛ̀ɛ̀ á zɛ̃̀ á zwẽ re mó è ce? ³ Surhǝ mwìrì ába nà? Á ji kùr ǹdǝ́ Eshirhǝ náàcɛ̀nɛ́ jàn, èlǎsɛ̃́ á zɛ̃̀ á n'á yǎl á báásɛ ǹd'á sǝ̀pwà jàn? ⁴ Kɔn rɛ́ tɛ̀bɛ́ Yi tó á dɛnnɛ rǝ wɛ̀rhɛ́ mɔ́ gakó b'a yǝ̀ nánfò? Rǝ̀ wàr rǝ̀ b'a yǝ̀ nánfò yé. ⁵ Yi gǝ́ n'ê ce rǝ̀ Eshirhǝ y swé á yó wǝ, rǝ j'à n'ê wɛ̀rhɛ́ màmyaarhɛ nánzhǝzhɔ̌ á sõ mó, wɔ́ byè yilǝ? Wɔ́ Muyiisi nyǝ́ né zõ mó è ce, ráá yò-ècɔ̀nɔ̀ nyí rí á nyɛ̀ɛ̀ á zɛ̃̀ á zwẽ re mó è ce? ⁶ Abǝraham myɛ yàl èta. Bǝ̀ zɔ̀m ń yò Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Ń zɔ Yi zhǝ̀nà. Rǝ zɛ̃̀ rǝ nyǐ mu ǹdǝ ń bǝ dóó zhe ta, ń gǝ́ zhí ri mú yilǝ.» ⁷ Lwar-na bǝ̀ wɔ́ byɛ̀bɛ́ bǝ̀ zhí Yi ni mú bǝ̀ wɔ́ Abǝraham nɛ̀mɛ́. ⁸ Bǝ̀ dámǎ bǝ byili Yi zɔ̀mɛ̀ rɛ́ sɛ́bɛ́ rɛ́ wẽ́ bǝ̀ byɛ̀bɛ́ bǝ̀ dǝ̀ Zhwifubá mó gǝ zù Yi, rǝ̀ b'a ce bǝ̀ k'ê t'â la dwǝ́ǝ́re zal yé. Wɔ́ rǝ̀myɛ́ è ce, rǝ̀ dámǎ rǝ byili yò-ècɔ̀nɔ̀ nyí rí Abǝraham nɛ. Rǝ̀ wò mò: «À b'a tó ǹmyɛ́ dɛnnɛ a cĩ́ bwǝl lũ w lyì bí gakó yó.» ⁹ Abǝraham gǝ́ yà ń zhí Yi ni mú ce rǝ̀ cĩ́ bwǝl ń yó. Èta, lò mɔ̀bɔ́ gakó ǹmyɛ zhí ri ǹdǝ Abǝraham ta, rǝ̀ b'a cĩ́ bwǝl ǹ yó ǹdǝ rǝ̀ gǝ́ cĩ́ bwǝl Abǝraham yó né. ¹⁰ Sǝ lò mɔ̀bɔ́ gakó ń nǝ́ ń bùl bǝ̀ Muyiisi nyǝ́ né zõ mó b'a ce n nǝ vwǎrh, rǝ̀-ná-cí yò zhìlì. Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Lò mɔ̀bɔ́ ǹ tá ǹ wɛ̀rhɛ́ ǹdǝ bǝ̀ gǝ́ byili nyǝ́ né sɛ́bɛ́ rɛ́ wẽ́ né dɛ̃ gakó, ǹ yò b'a zhìlì.» ¹¹ Bǝ̀ byili pamparɛ̃ɛ̃ bǝ̀ Muyiisi nyǝ́ né zõ mó wàr è b'a ce lò cẽ dóó zal yé. Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Lò mɔ̀bɔ́ ǹ zhí Yi ni, rǝ̀ b'a ce ǹ kǝ́ ǹ tá ǹ la dóó zal yé. Ǹ b'ǎ nǝ nyǔ.» ¹² Muyiisi nyǝ́ né zõ mó ǹdǝ́ Yi-ni-zhú mú dǝ̀ rǝ̀dù yé. Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Lò mɔ̀bɔ́ ǹ wɛ̀rhɛ́ kɔn dɛ̀bɛ́ gakó nyǝ́ né byili mú, ǹ b'ǎ zǝ nyǔ nyǝ́ né jàn yilǝ.» ¹³ Kristǝ lwǝ̌r nǝ́ba nyǝ́ né nǝ̀ y'à lyẽ nǝ́ba mó wẽ́. Ń zwẽ dɛ̀bɛ́ rǝ̀ y'à zhìlì nǝ́ yò mó n cĩ́ ń cìcì yó wǝ. Bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: «Lò mɔ̀bɔ́ ń tɔ̌r nyíní cǒ yó, ń yò zhìlì.» ¹⁴ Kɔn yàl èta mùnì ga byɛ̀bɛ́ bǝ̀ dǝ̀ Zhwifubá mó nǝ bwǝl ré Yi y'à bwǝl rǝ̀ nyí Abǝraham nɛ mɔ́ Yezu Kristǝ jàn yilǝ. Nǝ́ gǝ zhí Yi ni, nǝ́ b'ǎ nǝ kɔn rɛ́ tɛ̀bɛ́ Yi y'à bwǝl rǝ̀ nyí mú. ¹⁵ Da-byǎ, à b'a zǝ kɔn rǝ̀dù rǝ̀ ŋwɛ́nɛ́ nǝ́myɛ̌ numbyínǝ́ bé cìcì tùntwǝ̃̀ǝ̃̀ né wẽ́ a b'a myɛrhɛ: lwar-na bǝ̀ lò gǝ bwǝl nyí ǹdǝ nyǝ́ né gǝ́ n'ê byili ní, lò dõ wàr ń mà n shí kwã nɛ́ n cɔ̀ rɛ̀, ráá n súlí kɔn dõ né yé. ¹⁶ Èta myɛ, Yi bwǝl nyí bǝ̀ rǝ̀ la kɔn Abǝraham ǹdǝ́ ń nɔ̃̌ nɛ pɔ. Wɔ́ Abǝraham ǹdǝ́ ń nɔ̃̌ nɛ Yi bwǝl nyí rí. Bǝ̀ yǝ̀ kɛ̃ bǝ̀: «Abǝraham ǹdǝ́ ń nɛ̀mɛ́», ǹdǝ wɔ́ lyì nánzhǝzhɔ̌ yò bǝ̀ n'ê zɔ̀m ta yé. Bǝ̀ kɛ̃ bǝ̀: «Abǝraham ǹdǝ́ ń nɔ̃̌.» Rǝ̀myɛ́ n'ê byili bǝ̀ wɔ́ lò mǝ̀dù yò bǝ̀ zɔ̀m. Lwar-na bǝ̀ nɔ̃̌ w òmyɛ́ mɔ́ wɔ́ Kristǝ. ¹⁷ Wɔ́ yál à n'â yǎl a wɔ̀ bǝ̀ nyǐ Yi y'à bwǝl nyí, rǝ wɔ̀ bǝ̀ nyì-bwelé y èmyɛ́ t'â la kwǎrh gaga yé. Rǝ̀ pɔ rǝ̀ nyǝ́ né Muyiisi ni ǹdǝ́ rǝ̀ gǝ́ wɛ̀rhɛ́ rǝ̀ nyì-bwelé y mó zhe byinǝ zwã̌-àna ǹdǝ́ shǝ́-ètɔ̀. Nyǝ́ né nǝ̀myɛ́ wàr nǝ̀ b'a cɔ̀ rǝ̀ nyí rí rǝ̀ bwǝl mó rǝ jǐrh kɔn nánfò yé. ¹⁸ È gǝ wɔ́ nyǝ́ né dɛnnɛ lò mà n tó né n nǝ kɔn rɛ́ dɛ̀bɛ́ Yi y'à byili bǝ̀ rǝ̀ la rǝ̀ lyì bí ni pɔ mɔ́, sǝ́ nyǐ lò kǝ́ ń wàr ń mà n nǝ rɛ nyí rí rǝ̀ y'à bwǝl mó yil yé. E j'à wɔ́ nyí rí rǝ̀ bwǝl mó dɛnnɛ rǝ̀ tó né rǝ byili rǝ̀ sónó w Abǝraham nɛ. ¹⁹ Wɔ́ bǝ̀kɔ́n yil nyǝ́ né ŋwɛ́nɛ́? Nǝ̀myɛ́ wɔ́ súlí nǝ̀ súlí ní, mùnì ga nǝ sɛ̃ lyì bí ni bǝ lwar kɔn dɛ̀bɛ́ ná-dwí yil rǝ̀ dǝ̀ Yi pùbùlǝ̀, bǝ̀ m'ê dɛ̃̀ nɔ̃̌ w Yi bwǝl ò nyí Abǝraham nɛ mɔ́. È gǝ wɔ́ Yi nyǝ́ né yilǝ, wɔ́ màlɛ́kabá bǝ̀ tó numbyíní dɛnnɛ bǝ bǝ̀ e byili ni lyì bí ni. ²⁰ Sǝ è gǝ wɔ́ rǝ̀ nyì-bwelé y yilǝ, rǝ̀ yǝ̀ lò dɛnnɛ tó yé; wɔ́ rǝ̀ cìcì rǝ̀ zɔ̀m. ²¹ Rǝ̀myɛ́ nǝ zɛ̃̀ è n'ê yǎl e byili bǝ̀ Muyiisi nyǝ́ né n'ê cǝ̀r Yi nyì-bwelé yǝ́? È dǝ̀ èta yé. Nyǝ́ né bǝ̀ pɔ mɔ́ gǝ y'à wɔ̌ nǝ̀ n'ê pɛ nyǔ numbyíní ni, lyì bí y'à wɔ̌ bǝ̀ m'a tó nǝ̀ dɛnnɛ bǝ cẽ dwǝ́ǝ́re zal yé. ²² Yi zɔ̀mɛ̀ rɛ́ sɛ́bɛ́ rɛ́ byili bǝ̀ yǝ̀-bǝlɔ̀lɔ́ cǐ lũ w lyì bí gakó. Wɔ́ rǝ̀myɛ́ è ce, kɔn rɛ́ dɛ̀bɛ́ Yi bwǝl rǝ̀ nyí mú, rǝ̀ b'a pǝ rɛ byɛ̀bɛ́ bǝ̀ zù Kristǝ mó ne, bǝ̀ gǝ́ zhí mu mú yilǝ. ²³ Shãã ga, wɔ́ Muyiisi nyǝ́ né nǝ̀ y'à n'ê yìlì nǝ́ba ǹdǝ byǝ̀nǝ́-jì lyì ta, nǝ́ m'é dɛ̃̀ Yi-ni-zhú mú cǝ-kɔ́lɔ́ wá, mùnì ga, cǝ-kɔ́lɔ́ w òmyɛ́ gǝ yúwǝ́, sǝ Yi byili nǝ́ba nǝ́ gǝ́ b'ǎ zhí ri ní. ²⁴ Wɔ́ èta nyǝ́ né yìlì nǝ́ba né, kɔn b'e yí Kristǝ twírí yǝ́, mùnì ga Yi ce nǝ́ bǝ̀k'á k'é zǝ dwǝ́ǝ́re, nǝ́ gǝ́ zhí ri mú yilǝ. ²⁵ Sǝ èlǎsɛ̃́, Yi-ni-zhú mú cǝ-kɔ́lɔ́ w gǝ́ yú mú ce, nǝ́ k'é bǝ yìlnǝ̀ mó ńmyɛ̌ mɔ́ tum zhe yé. ²⁶ Ámyɛ̌ gakó wɔ́ á gǝ́ zù Yezu Kristǝ mó è ce, á wɔ́ Yi byǎ. ²⁷ Ámyɛ̌ byɛ̀bɛ́ gakó á zwẽ nɛ̃̌-mɔ́lɔ́ Yezu Kristǝ wẽ́ mó, wɔ́ zú á zù mù ǹdǝ kàmǝ̀-zwǐ ta. ²⁸ È k'ê bǝ zhe bǝ̀ mɔ̀bɔ́ wɔ́ Zhwifu, mɔ̀bɔ́ dǝ̀ Zhwifu yé; è bǝ zhe bǝ̀ mɔ̀bɔ́ wɔ́ yóm, mɔ̀bɔ́ cǐ ń cìn yé; è k'ê bǝ zhe bǝ̀ mɔ̀bɔ́ wɔ́ bal, mɔ̀bɔ́ wɔ́ kɛ̃ yé, b'ǎ gakó jǐrh kɔn rǝ̀dù sá Yezu Kristǝ wẽ́. ²⁹ Á gǝ́ wɔ́ Kristǝ lyì mú ce, á wɔ́ Abǝraham nɛ̀mɛ́, sǝ á b'ǎ nǝ cǝl kɔn rɛ́ dɛ̀bɛ́ Yi bwǝl nyí bǝ̀ rǝ̀ la Abǝraham nɛ pɔ mɔ́ wẽ́.