¹ Byinə shí ǹdə́ nə̀na rə̀myɛ́ kwã nɛ́, a k' a kwɛ̃̀ a vò Zhərəzalɛm, àmyɛ́ ǹdə́ Barnabaasɛ. A zə Titi a m'a súlí ; ² sə wɔ́ Yi rə̀ byili rə̀myɛ́, ce a zɛ̃̀ zə bɛ nə́ m'é vò, a yí a nə kristə-lyì bí gùlú yé nɛ́ bé dúdú, a byili yò-ècɔ̀nɔ̀ nyí rí à n'â bwə̀l à byili lyì bí byɛ̀bɛ́ bə̀ də̀ Zwifubá ne mó. Sə wɔ́ byɛ̀bɛ́ bə̀ lyì-fwààlɛ́ mɔ́ nɛ à bwə̀l re a byili mùní ga à bə̀k'a vò à la tũ̌ ráá a yí a twĩ̀ e yə̀ nánfò yé. ³ Titi ń yà ń tó ne mó yà ń wɔ́ Gərɛkɛ, ǹdə́ rə̀myɛ́ ga bə̀ yə̀ mɔ nyɛ́ɛ́ bə ce bə gõ̀ mo yé. ⁴ Sə da-byǎ nán-kɔ̀mrɛ tú bə zù nə́ wẽ́ bə̀ la nə́ba yǔr cìn-nɛrɛ́ y nə́ nɔ Yezu Kristə wẽ́ mó wẽ́, mùnì bə ce nə́ba yómre tumə wẽ́, ⁵ sə nə́ yə̀ yó pɛ námpɔ́lɛ́ dwí-byǐ myɛ cìcì yé, nə́ cẽ bə̀ nyə̀ná nɛ́ yò. Nə́ wɛ̀rhɛ́ èta, mùnì ga á zhì yò-ècɔ̀nɔ̀ nyí rí zhə̀n rɛ́ wẽ́, rǝ̀ bǝ̀k'a lyǝ́r yé ⁶ E gə wɔ́ byɛ̀bɛ́ bə̀ wɔ́ lyì-fwààlɛ mɔ́ yilə; bá ǹdə́ bə̀ gə́ y'à wɔ́ nɛ́ shãã ga mɔ́, rə̀myɛ́ mɔ́ yò yə̀ nɛ zwì yé : bə̀ Yi n'ê nyǐ lyì bí gakó ǹdə kɔn rə̀dù ta rə̀ yé né, byɛ̀bɛ́ bə̀ wɔ́ lyì-fwààlɛ mɔ́ t'â nyɛ́ɛ́ nɛ bə̀ à wɛ̀rhɛ́ kɔn dõ yé. ⁷ Bə̀ bə̀ lwar bə̀ wɔ́ Yi rə̀ pɔ nɛ nyí b'à bwə̌l yò-ècɔ̀nɔ̀ nyí rí a byili byɛ̀bɛ́ bə̀ də̀ Zhwǐfubá mó ne, ǹdə rə̀ gə́ pɔ nyí Pyɛɛrɛ myɛ nɛ bə̀ ń bwə̌l ré n byili Zhwǐfubá ne né. ⁸ Wɔ́ Yi rə̀ ce Pyɛɛrɛ jǐrh rə̀ tùntúm Zhwǐfubá yilə, wɔ́ rə̀myɛ́ myɛ rə̀ ce àmyɛ jǐrh rə̀ tùntúm lyì bí byɛ̀bɛ́ bə̀ də̀ Zhwǐfubá mó myɛ yilə. ⁹ Bə̀ y'à n'ê nyǐ Zhakɛ ǹdə́ Səfwaasɛ ǹdə́ Zhã ǹdə Kristə-lyì gùlú w jàn rɛ́ ta. Bə̀myɛ́ zɛ̃̀ bə lwar bə̀ wɔ́ Yi rə̀ pɔ nɛ́ rə̀ pɛnɛ́ yá, bə zɛ̃̀ bə zə àmyɛ́ ǹdə́ Barnabaasɛ nə́myɛ̌ ǹdə́ bə̀myɛ́ ga ce jɛ̃̀rh dwã w nə́ wɛ̀rhɛ́ nyí rə̀dù. Sə nə́myɛ̌ vò byɛ̀bɛ́ bə̀ də̀ Zhwǐfubá mó sono, sə bə̀myɛ́ vò Zhwǐfubá sono. ¹⁰ Bə̀ zɛ̃̀ bə lwə̀l nə́ba kɔn rə̀dù, bə̀ nə́ y'ǎ lyǐrh Zhwǐfubá nə̀mwà bɛ́ yò. È wɔ́ èta à y'à n'â wɛ̀rhɛ́ nɛ́ dwə́l. ¹¹ Sǝ Pyɛɛrɛ gǝ́ tú n yí Ancɔɔsɛ, à bú mu lyì bí gakó yé né, bǝ̀ ń yà ń dówǝ́. ¹² Ń yà ń ju kùr ń nǝ́ ń tó Kristǝ-lyì bí byɛ̀bɛ́ bǝ̀ dǝ̀ Zhwifubá mó ne ń jí. Rǝ̀myɛ́ kwã nɛ́, lyì dwã zɛ̃̀ bǝ shí Zhakɛ sono bǝ bà. Ywẽ zɛ̃̀ rǝ̀ zhe mo, ń kǝ́ ń bǝ shɛ̀ Kristǝ-lyì bí byɛ̀bɛ́ bǝ̀ dǝ̀ Zhwifubá mó ne tó n jí yé, bǝ̀ byɛ̀bɛ́ bǝ̀ y'à shí Zhakɛ sõ mó y'à n'ê nyɛ́ɛ́ byɛ̀bɛ́ bǝ̀ dǝ̀ Zhwifubá mó bǝ̀ bǝ̀ góm. ¹³ Kristǝ-lyì bí dwã bɛ́ byɛ̀bɛ́ bǝ̀ wɔ́ Zhwifubá mó gakó zɛ̃̀ bǝ̀myɛ tó bǝ zù tùntwǝ̃̀ǝ̃̀ né nyɛ̀bɛ́ nǝ̀ yǝ̀ tó ǹdǝ́ kɔn dɛ̀bɛ́ bǝ̀ yě bǝ̀ rǝ̀ wɔ́ zhǝ̀n mɔ́ nɛ yé. Rǝ̀myɛ́ ce Barnabaasɛ myɛ tó n zù bǝ̀ nyǝ̀ná nɛ́. ¹⁴ À gǝ́ pwírí bǝ̀ t'â zhǝ̀l zhǝ̀n sɔ́má y yó ǹdǝ yò-ècɔ̀nɔ̀ nyí rí gǝ́ n'ê byili ní mú, à wò Pyɛɛrɛ nɛ lyì bí gakó yé né: «Ǹmyɛ́ wɔ́ Zhwifu, sǝ ǹ jòm nyɔ̀nɔ̀ ǹdǝ lò mɔ̀bɔ́ ń dǝ̀ Zhwifu ta. Ǹ yǝ̀ wɛ̀rhɛ́ ǹdǝ Zhwifubá ta yé. Bǝ̀kɔ́n yil ǹ nǝ zɛ̃̀ ǹ nǝ́ ǹ yǎl ń nyɛ́ɛ́ byɛ̀bɛ́ bǝ̀ dǝ̀ Zhwifubá mó bǝ wɛ̀rhɛ́ ǹdǝ Zhwifubá ¹⁵ Nǝ́myɛ̌ wɔ́ Zhwifubá; nǝ́ dǝ̀ ǹdǝ lyì bí dwã bɛ́ byɛ̀bɛ́ bǝ̀ yǝ̀l Yi nyǝ́ né mó ta yé. ¹⁶ Sǝ ǹdǝ́ rǝ̀myɛ́ ga, nǝ́ yě b'è dǝ̀ Muyiisi nyǝ́ né zõ mó è b'a ce numbyíní cẽ dóó zal yé. Wɔ́ ǹ gǝ zhí Yezu Kristǝ ne dúdú, fòró Yi ce ǹ kǝ́ ǹ bǝ dóó zhe yé. Wɔ́ rǝ̀myɛ́ è ce, nǝ́myɛ zù Yezu Kristǝ, mùnì ga nǝ́ gǝ́ zhí mu, sǝ Yi ce nǝ́ bǝ̀k'á k'é zǝ dwǝ́ǝ́re yé; sǝ è dǝ̀ Muyiisi nyǝ́ né zõ è b'a ce yé, bǝ̀ nyǝ́ né nǝ̀myɛ́ zõ mó wàr è b'a ce lò cẽ dóó zal yé. ¹⁷ Sə nə́ gə n'é pyà, nə́ bə̀k'á zə dóó Kristə wẽ́, e jà nə̀myɛ̌ cìcì mú y'ǎ wɔ́ yə̀-bəlwàálɛ cìnə́, è nə́ wɔ́ Kristə ń ce yə̀-bəlɔ̀lɔ́ ŋwɛ́nɛ́ ? È də̀ èta gaga ! ¹⁸ À gə zɛ̃̀ à pwà wẽ̀ ré tɛ̀bɛ́ à wǔr a ló tɛ̃́ mɔ́, à k'â la lú, wɔ́ àmyɛ́ à k'â n'â dwé nyə́ né ne. ¹⁹ Bə̀ wɔ́ nyə́ né dɛnnɛ à tó né a cì nyə́ né yilə, a zɛ̃̀ à ŋwɛ́nɛ́ Yi yilə. ²⁰ Àmyɛ́ cìcì mú k'â tɛ̀nɛ́ yé. Wɔ́ Kristǝ ń ŋwɛ́nɛ́ à wẽ́. À gǝ́ ŋwɛ́nɛ́ cɛ yó èlǎsɛ̃́ mɔ́, wɔ́ Yi Byǐ mú ń swéné ne n pǝ ń myǝ̌l à yil mó ne à zhí. ²¹ À t'â yǎl a zhɛ̃̀ Yi sónó w yé. Zhǝ̀nà, Muyiisi nyǝ́ né zõ mó gǝ y'à wɔ̌ è ce lò cẽ dóó zal, sǝ́ nyǐ Kristǝ cu mú wɔ́ nánfò, mǝ̀ bǝ kùr zhe yé.