¹ Da-byǎ, wɔ́ Eshirhǝ náàcɛ̀nɛ́ è n'ê zǝ ába è zhǝ̀lǝ̀. Rǝ̀myɛ́ ce, á gǝ nɔ lò mɔ̀bɔ́ ń nǝ́ ń dwé, s'á k'á zǝ mɔ ǹdǝ́ wu-bɔ̀nɔ̀ á cĩ́ sɔ́má kɛ̀bɛ́ è càn yó. Sǝ à n'â wǝ̀l ámyɛ̌ cìcì mú mǝ̀dù mǝ̀dù gakó ne: á y'ǎ dɛ̃̀ á cìnǝ̀, bǝ̀ ǹ cìcì mú wɔ̌ ǹ twi sòlò wẽ́. ² Sɛ̃-na dwã nɛ á yò-cǝ̀ǝ̀le wẽ́. Á gǝ n'á wɛ̀rhɛ́ èta, wɔ́ Kristǝ nyǝ́ né á n'á zwẽ. ³ Lò mɔ̀bɔ́ ǹ nǝ́ ǹ bùl bǝ̀ ǹ kɔna, ń jà ǹ dǝ̀ kaka, wɔ́ ǹ cìn ǹ nǝ́ ǹ jǝ́jɛ̀rɛ́. ⁴ Lò gakó mǝ̌ sǝ́ nyǐ tɛ̀bɛ́ ǹ nǝ́ ǹ wɛ̀rhɛ́ mɔ́ cɛ̀nɛ̀. Rǝ̀ gǝ b'a pɔ̃́ wu-nyɔ̃̀, s'e yǝ̀ ǹ dúdú wẽ́, sǝ ǹ bǝ̀ká zǝ rɛ ń myɛrhɛ ǹ dõ nyǎn nɛ yé, ⁵ bǝ̀ lò gakó mǝ̌ sǝ́ cili ǹ cìcì nǝ̀ná nɛ́ sono. ⁶ Lò mɔ̀bɔ́ bǝ̀ n'ê cèrhè kàrmɔ̀, ń mǝ̌ sǝ n vùr ń jɛ̃̀-kɔn n pǝ mɔ̀bɔ́ ń nǝ́ ń cèrhè mò mó ne. ⁷ Á bǝ̀k'á jǝ́jɛ̀rɛ́ á cìn yé. Zhǝ̀nà, Yi bǝ shɛ̀ rǝ̀ mɔ̌n yò yé. Kɔn dɛ̀bɛ́ lò dùwǝ̀, wɔ́ rǝ̀myɛ́ ń la jǝ̌r. ⁸ Lò ǹ gǝ dù ǹ yala nɛ́ shilǝ né, wɔ́ ǹ yò zhìlù nǝ̀ b'a ce rǝ yǝ̀ ǹ lyààrɛ́ kɔn ń jǝ̀r. Sǝ ǹ gǝ dù tɛ̀bɛ́ rǝ̀ wɔ́ Eshirhǝ náàcɛ̀nɛ́ pùbùlǝ̀ mó, è m'a ce ń jǝ̀r nyǔ mǝ̀ t'â la zhɔ̌. ⁹ Bà-nà nǝ́ bǝ̀k'á ga lyààrɛ nɛ ǹdǝ́ cɛ̀nɛ̀ wɔ̀rhɔ́ yé. Zhǝ̀nà, nǝ́ gǝ pyɛ́nɛ́ dɛ̃ rɛ́ m'e yí, nǝ́ b'ǎ nǝ́ kwǎndɛ. ¹⁰ Rǝ̀myɛ́ ce, bà-nà nǝ́ zǝ bɔ̀l mɔ́ mɔ̀bɔ́ mǝ̀ dàl nǝ́ yil mó, nǝ́ m'é twĩ̀ cɛ̀nɛ̀ lyì bí gakó ne, sǝ kɔn du, nǝ́ twĩ̀ cɛ̀nɛ̀ byɛ̀bɛ́ bǝ̀ wɔ́ nǝ́ da-byǎ Kristǝ Kristǝ-lyì mú ni. ¹¹ Á gǝ la nyǔ èlǎsɛ̃́, á b'ǎ pwírí kǝkɛ̃ɛ̃ rɛ́ tɛ̀bɛ́ nyɛ̌ nánfwààlɛ, bǝ̀ wɔ́ àmyɛ́ cìcì à kɛ̃ rɛ. ¹² Byɛ̀bɛ́ bǝ̀ n'ê yǎl bǝ nyɛ́ɛ́ ába bǝ ce góm mó wẽ́ mó, wɔ́ cìn-byilu bǝ̀ n'ê yǎl bǝ tó numbyísí nyǝ̀ná nɛ́ dɛnnɛ bǝ wɛ̀rhɛ́. Tɛ̀bɛ́ bǝ̀ n'ê pyà mɔ́, wɔ́ bǝ̀ la cǝ̀r nɔ̀nɔ̀ w kɔ̀bɔ́ bǝ̀ la nɔ Kristǝ dǝ̀-jɔrhɔ́ w yil mó yé ne. ¹³ Bǝ̀myɛ́ byɛ̀bɛ́ bǝ̀ n'ê ce bǝ̀ gòm be mó cìcì t'â zwẽ Muyiisi nyǝ́ né yé. Bǝ̀ j'à n'ê yǎl sǝ gõ̀ ába, sǝ bǝ zɛ̃̀ bǝ zǝ rǝ̀myɛ́ bǝ m'e zhẽ̌ bǝ̀ cìn dɛ̃̌. ¹⁴ Sǝ è gǝ wɔ́ àmyɛ́ yilǝ, à zhe nǝ́ Cǐnnǝ Yezu Kristǝ dǝ̀-jɔrhɔ́ w zhǝ̀nà, bǝ̀ ò ce a zɛ̃̀ à n'â nyǐ lũ w ǹdǝ wɔ́ cú ò cù ta à yilǝ, ǹdǝ wɔ́ cú àmyɛ cù ta lũ w yilǝ. ¹⁵ Bǝ̀ gǝ gòm lò, bǝ̀ gǝ yǝ̀ mɔ gòm myɛ, rǝ̀myɛ́ dǝ̀ kaka yé. Tɛ̀bɛ́ rǝ̀ zhe kùr mó, wɔ́ ǹ gǝ jǐrh lyì-dul. ¹⁶ Yi b'a dùr byɛ̀bɛ́ bǝ̀ n'ê zwẽ nyí rí rǝ̀myɛ́ mɔ́, ǹdǝ́ rǝ̀ dwí rí púlǝ́púlǝ́ nɔ̀nɔ̀, sǝ rǝ̀ yǝ̀-zùlǝ́ né yǝ̀ nɛ́ ǹdǝ́ bɛ! ¹⁷ Sǝ kɔn zhí zà, lò bǝ̀ká n kǝ́ n bǝ̀ n nwɛ̀nɛ̀ nɛ yé, bǝ̀ Yezu nɔ̀nɔ̀ w dɛ̃ nɛ à m'â zhǝ̀lǝ̀. Sǝ rǝ̀myɛ́ n'ê byili b'à wɔ́ ń tùntùnnǝ. ¹⁸ Da-byǎ, nǝ́ Cǐnnǝ Yezu Kristǝ mà n cĩ́ bwǝl á yó! Amɛn!