¹ Cànsɛ̀ shí ǹdə́ sə̀lyè nyǎ yá, è n'ê yǎl e wɔ̀ Adaarɛ cànà yá, dwã shí ǹdə́ nə̀tɔ̀ dɛ̃ rɛ́ yùwə̀, bə̀ gə́ y'à mǎ sə bə pyìrh nyí rí tɛ̀bɛ́ pyɔ̌ yà ń vùr n zɛ̃̀ n ce bə bwə̀l mó dɛ̃ rɛ́, Zhwifubá zwə̀ bé y'à n'ê bùl bə̀ bə̀ b'a ŋwɛ̀nɛ́ bɛ dɛ̃ rɛ́ rə̀myɛ́ mɔ́ yùwə̀. Sə kɔn yə̀ yàl èta yé. Wɔ́ Zhwifubá bə̀ k'á jí bɛlɛ bə̀ zwə̀ bé yó wə. ² 2Pyɔ̌ Zɛrzɛɛsɛ pyə̀-tənà y kə̀kàlsɛ́ gakó wẽ́, bə̀ y'à n'ê twí bə̀ mwì dwã nɛ bə̀ cɛmɛ nɛ́ ga wẽ́, bə m'ê bwí ǹdə́ byɛ̀bɛ́ bə̀ y'à n'ê pyà bɛ lwɛlɛ wɔ̀rhɔ́ mɔ́. Lò mə̀dù ga yə̀ ŋwɛ̀nɛ́ n zhì bə̀ yé né yé, bə̀ Zhwifubá ywẽ y'à zhe lyì bí gakó dɛ̃́dɛ̃́. ³ Sə tənà y kə̀kàlsɛ́ shərnə bé, sə̀ shərnə náncɛsɛ́, ǹdə́ tənà y kə̀kàlsɛ́ yé né cìnə́ bé ǹdə́ sə̀ tùntùnnə bé kwè bə̀ nyí bə ce Zhwifubá kwã, bə̀ bə̀ y'à n'ê dùr Mərədoshe ywẽ dɛ̃́dɛ̃́. ⁴ Mərədoshe yà ń jǐrh lyì-fɔ̀lɔ̀ pyɔ̌-kɛ̀lɛ́ y wẽ́, ń yil ré myɛ y'à ju kùr rə̀ n'ê dwi tənà y kə̀kàlsɛ́ gakó wẽ́: Mərədoshe zhə̀n ga yà ń já ń nə́ ń jǐrh lyì-fɔ̀lɔ́ ń súlí. ⁵ Zhwifubá twĩ̀ bə̀ zwə̀ bé tum ǹdə bə̀ gə́ n'ê yǎl nɛ́. Bə gu bi ǹdə́ búlə́ shìmì, bə ce bə jé tɛ̃́. ⁶ Bə gu nunə zwã̌-ànu Suuzi pyɔ̌-dǒ w dúdú wẽ́, bǝ jé tɛ̃́; ⁷ bǝ zwǝ́l Amədata byǐ Amã, Zhwifubá zù-bal mɔ́, bǝ zwǝ́l bala byǎ shiyə́ bǝ súlí è yàl: ⁸ Parəshanədata ǹdə́ Daləfɔ̃ ǹdə́ Asəpata ǹdə́ Pɔrata ǹdə́ Adaləya ǹdə́ Arədata ǹdə́ ⁹ Parəmashəta ǹdə́ Arəsəyi ǹdə́ Arədəyi ǹdə́ Vayəzata. ¹⁰ Amã byǎ bɛ́ shí yá, Amamǝdata nɛ̀mɛ́ nɛ́, Zhwifubá zwǝ̀ bé. Sə bə̀ yə̀ pyà bə̀ la dwə̀rh bə̀ jɛ̃̀-kɔn rɛ́ nɛ yé. ¹¹ Dɛ̃ rɛ́ rə̀myɛ́ yù w cìcì, bə byili nunə byɛ̀bɛ́ bə̀ cu Suuzi pyɔ̌-dǒ w mó yó pyɔ̌ mɔ́ nɛ. ¹² Pyɔ̌ mɔ́ zɛ̃̀ n wɔ̀ pyə̀-kɛ̃ Esətɛɛrɛ nɛ: «Suuzi pyɔ̌-dǒ w dúdú wẽ́, Zhwifubá gu bala zwã̌-ànu e súlí Amã byǎ bɛ́ shí yə́, bə ce bə jé tɛ̃́. Kɔn gə yàl èta nyɔ̀nɔ̀ dúdú, eter kɔn la nɛ́ yál tənà y kə̀kàlsɛ́ dwã bɛ́ wẽ́? Sə ǹdə́ rə̀myɛ́ ga, bə̀kɔ́n ǹ nə́ ǹ lwə̀lə̀? À m'a pɔ̃́ rɛ! Bə̀kɔ́n ǹ nə́ ǹ yàlá? Ǹ mà ń nə rɛ́! ¹³ Esətɛɛrɛ lyár pyɔ̌ mɔ́ n wɔ̀: «Kɔn gə wɔ́ ǹ pùbùlə̀, pyɔ̌, sə Zhwifubá bə̀ wɔ Suuzi ni mú myɛ k'e nə sɔ́má nəkɔla bə twĩ̀ ǹdə zà mɔ́ nɛ, sə bə jele Amã bala byǎ bɛ́ shí y cùùrí də̀-jɔrhɔ́ w nɛ.» ¹⁴ Pyɔ̌ mɔ́ zɛ̃̀ n wɔ̀: «Kɔn yál èta». Bə zɛ̃̀ bə ce pyɔ̌ mɔ́ nyí rí sɛ́bɛ́ rɛ́ yí Suuzi púlə́púlə́ wẽ́. Bə jele Amã bala byǎ bɛ́ shí y cùùrí də̀-jɔrhɔ́ w nɛ. ¹⁵ Zhwifubá bə̀ wɔ Suuzi ni mú k'e bə̀ bə mù dwã nɛ Adaarɛ cànà y dwã shí ǹdə́ nə̀na yùwə̀. Bə gu bala zwã̌-ètɔ̀ cɔ w òmyɛ́ wẽ́, sə bə̀ yə̀ pyà bə̀ la dwə̀rh bə̀ jɛ̃̀-kɔn rɛ́ nɛ yé. ¹⁶ Zhwifubá dwã bɛ́ bə̀ y'à wɔ pyə̀-tənà y kə̀kàlsɛ́ dwã bɛ́ w mɔ́ myɛ mù dwã nɛ mùnì bə bú bə zwẽ bə̀ cìn bə̀ zwə̀ bé jɔ̀ wa. Bə gu bə̀ zwə̀ bé nunə mɔ̀ɔ̀rhɛ̀ shə́-shàlpyɛ̀ ǹdə́ rə̀nù, sə bə̀ yə̀ pyà bə la dwə̀rh bə̀ jɛ̃̀-kɔn rɛ́ nɛ yé. ¹⁷ È yàl Adaarɛ cànà y dwã shí ǹdə́ nə̀tɔ̀ yùwə̀. Bə̀ shǐrh è dwã shí ǹdə́ nə̀nà y yùwə̀, bə jí címsi, bə wɛ̀rhɛ́ wu-nyɔ̃̀ rə̀myɛ́ yùwə̀. ¹⁸ Sə è gə wɔ́ Zhwifubá byɛ̀bɛ́ bə̀ y'à wɔ Suuzi ni mú, bə̀ y'à mù dwã nɛ Adaarɛ cànà y dwã shí ǹdə́ nə̀tɔ̀ w ǹdə́ è shí ǹdə́ nə̀na y dɛ̃ rɛ́, bə̀ la m'e cĩ́ bə̀ jim bə̀ zwə̀ bé yó mó, bə̀myɛ́ shǐrh è dwã shí ǹdə́ nə̀nu yùwə̀, bə jí címsi, bə wɛ̀rhɛ́ wu-nyɔ̃̀ rə̀myɛ́ yùwə̀. ¹⁹ Wɔ́ rə̀myɛ́ rə̀ ce Zhwifubá byɛ̀bɛ́ bə̀ wɔ go sõ cə-bwǎlsɛ́ wẽ́ mó, n'ê jí címsi, bə̀ wɛ̀rhɛ́ wu-nyɔ̃̀ Adaarɛ cànà y dwã shí ǹdə́ nə̀na dɛ̃ rɛ́; bə̀ n'ê pɛ pansɛ dwã nɛ. ²⁰ Mərədoshe kɛ̃ ywẽ̀ né nə̀myɛ́ sábá wẽ́ n pə Zhwifubá byɛ̀bɛ́ gakó bə̀ y'à wɔ pyɔ̌ Zɛrzɛɛsɛ tənà y kə̀kàlsɛ́ gakó wẽ́ mó ne, shɛ̀bɛ́ sə nyɛ ǹdə́ shɛ̀bɛ́ sə̀ bwə́l mó ga wẽ́. ²¹ N pə nyí bə̀ byin byin gakó sə bə jí címsí Adaarɛ cànà y dwã shí ǹdə́ nə̀na y ǹdə́ è dwã shí ǹdə́ nə̀nu y yùwə̀. ²² Bə̀ la wɛ̀rhɛ́ èta bə m'e lyǐrh bə̀ wɔ́ dwã nɛ́ nə̀myɛ́ yù w Zhwifubá bú bə zwẽ bə̀ cìn bə̀ zwə̀ bé jɔ̃̀ wa; sə bə lyǐrh bə̀ ywẽ̀ né pyìrhí bə̀ yil cànà èmyɛ́ mɔ́ wẽ́, bə̀ wu-zɛ̃̀ɛ̃́ nánfɔ̀lɔ̀ w jǐrh wu-nyɔ̃̀, bə̀ cu wu-zhùlù w jǐrh címsi wu-nyɔ̃̀. Bə̀ mə̌ sə bə ce dwã nɛ́ nə̀myɛ́ yə̀ címsi jú ǹdə́ wu-nyɔ̃̀ dwã, sə bə tə kùjú w ǹdə́ dwã, sə bə pə pansɛ nə̀mwà bɛ́ nɛ. ²³ Zhwifubá j'a ce tɛ̀bɛ́ bə ju rə̀ kùr mú ǹdə́ kɔn tɛ̀bɛ́ Mərədoshe kɛ̃ n pə bɛ mɔ́ j'a jǐrh bə̀ lùl-e-pwírhí. ²⁴ Ń yà ń kɛ̃ n wɔ̀: Agaagɛ dwí lò Amədata byǐ Amã, Zhwifubá zù-bal mɔ́, yà ń pyà sə n ce Zhwifubá jé tɛ̃́. Ń tó tántɛ́ɛ́ dwí bə̀ n'ê byẽ̀ bə̀ «Purim» dɛnnɛ n ce bə̀ wun zhizhiri sə n zɛ̃̀ n tó rə̀ dɛnnɛ n ce bə jé tɛ̃́. ²⁵ Sə yò w gə́ yú pyɔ̌ yé né, n kɛ̃ sɛ́bɛ́ n wɔ̀ bə̀ lwɛlɛ rɛ́ tɛ̀bɛ́ Amã yà ń tɛnɛ Zhwifubá yil mú m'a nyɔ̀ ń cìcì yó wə, n súlí n pə nyí bə̀ bə̀ tɔ̌r ńmyɛ̌ ǹdə́ ń byǎ bɛ́ ga də̀-jɔrhɔ́ w nɛ. ²⁶ Mərədoshe sɛ́bɛ́ rɛ́ zɔ̀mà nɛ́ ǹdə́ kɔn dɛ̀bɛ́ bə̀ nɔ rə̀ shò kwã nɛ́ e súlí kɔn dɛ̀bɛ́ rə̀ yú bi mú ce bə̀ n'ê byẽ̀ címsí dwã nɛ́ nə̀myɛ́ bə̀ Purim, Puur zɔ̃̀-byǐ. Puur kùr wɔ́ «tántɛ́ɛ́ tɔ́ ká». ²⁷ Èta, Zhwifubá ce rə̀myɛ́ jǐrh lùl-e-púrí, bə shɛ̀nɛ́ è yò, bə̀myɛ́ ǹdə́ bə̀ byǎ bɛ́ ǹdə́ byɛ̀bɛ́ bə̀ co bə̀ cìn bə̀ wẽ́ mó gakó yilə: Byin byin gakó, bə̀ m'a jí címsi dwã nə̀myɛ́ nə̀lyè y wẽ́ kɔn tó nyə́ né ǹdə́ dwã nɛ́ nyɛ̀bɛ́ nə̀ vùr nə̀ shò kwã nɛ́ mɔ́ nɛ. ²⁸ Bə̀ mə̌ sə bə lyǐrh dwã nɛ́ nə̀myɛ́ yò bə̀myɛ́ ǹdə́ bə̀ byǎ bɛ́ bə̀ pú pú bi mú dwə́ né wẽ́, jì gakó wẽ́, tənà y kə̀kàlà gakó wẽ́, cə-fɔ̀lɔ̀ gakó wẽ́. Purim y dwã nə̀myɛ́ t'â la jó Zhwifubá cəcəl w yé, sə nə̀ címsí jú mú m'a j'â ŋwɛ́nɛ́ gaga bə̀ dwí rí yilə. ²⁹ Pyə̀-kɛ̃ Esətɛɛrɛ, Abyəyəyil bə̀kɔ́ mɔ́, kɛ̃ sɛ́bɛ́, rə̀lyè nyǎn rɛ́, ńmyɛ̌ ǹdə́ Mərədoshe, Zhwifu mú, ǹdə́ bə̀ ŋwɔ̀nɔ́ w gakó bə m'e pə zhə̀n sɛ́bɛ́ rɛ́ tɛ̀bɛ́ rə̀ n'ê zɔ̀m Purim yò mó shò kwã nɛ́. ³⁰ Bə zɛ̃̀ bə pə sábá nɛ́ Zhwifubá byɛ̀bɛ́ gakó bə wɔ pyɔ̌ Zɛrzɛɛsɛ tənà y kə̀kàlsɛ́ zɔ̌m ǹdə́ shí-èlyè ǹdə́ shyàlpyɛ̀ y wẽ́ mó ne. Sábá nɛ́ y'à n'ê zɔ̀m yə̀-zùlə́ ǹdə́ e zhì è nà yó zɔ̀mà; ³¹ nə̀ y'à n'ê byili bə̀ dwã nɛ́ nyɛ̀bɛ́ Mərədoshe, Zhwifu mú ǹdə́ pyə̀-kɛ̃ Esther vùr bə̀myɛ́ ǹdə́ bə̀ byǎ bɛ́ yilə, Purim y shò kwã nɛ́ mɔ́, m'a zhì nə̀ dwã nɛ́ gaga yilə. Sə bə̀ m'a lyẽ bə̀ nyí cìlə́ wẽ́. ³² Purim nyə́ né shí nyí rí tɛ̀bɛ́ Esətɛɛrɛ yà ń pɔ Purim sho-kwã nɛ́ mɔ́ wẽ́. Sə bə̀ kɛ̃ rɛ sɛ́bɛ́ rə̀dù wẽ́.