¹ Dɛ̃ rɛ́ rə̀myɛ́ yù w cìcì, pyɔ̌ Zɛrzɛɛsɛ kwè Amã, Zhwifubá zù-bal mɔ́, kɛ̀lɛ́ y n pə pyə̀-kɛ̃ Esətɛɛrɛ nɛ. Esətɛɛrɛ byili pyɔ̌ nɛ Mərədoshe gə́ ŋwɛ̃̀ ǹdə́ mɔ nɛ́. Pyɔ̌ mɔ́ zɛ̃̀ n ce Mərədoshe bə̀ ń sõ. ² N zɛ̃̀ n vùr ń jə̀fɔ́lɛ́-cə̀-byǐa ń yà ń zwẽ Amã sõ mó n pə Mərədoshe ne. Esətɛɛrɛ myɛ ce Mərədoshe cìní Amã kɛ̀lɛ́ yá. ³ Esətɛɛrɛ kə́ n vò n zɔ̀m ǹdə́ pyɔ̌. N tu ń nə̀rh kùr w ǹdə́ cǐl, n lwə̀l mo bə̀ ń cə̌r lwɛlɛ tɛ̀bɛ́ Amã, Agaagɛ dwí rí lò mó, yà ń tɛnɛ Zhwifubá yil mú yé ne. ⁴ Pyɔ̌ mɔ́ zɛ̃̀ n cèlè ń sánə́má pyɛ̀lɛ̀-də̀dɔ̀lɔ̀ w n zǎ Esətɛɛrɛ. Rə̀myɛ́ yó Esətɛɛrɛ shí tɛ̃́ n zɛ̃̀ n zhì dɛ̃̌ pyɔ̌ yé né. ⁵ N zɛ̃̀ n wɔ̀: «Pyɔ̌, kɔn gə wɔ́ ǹ pùbùlə̀, ǹ gə zhe wu-bɔ̀nɔ̀ ǹdə́ nɛ, yò w gə nyɛ̀ ǹdə́ mɔ́, a j'a sú ǹ yírh, sə ce bə kɛ̃ sɛ́bɛ́ dõ bə m'e kwàr Agaagɛ dwí lò, Amədata byǐ Amã sábá nɛ́ ń kɛ̃ bə̀ bə̀ ce Zhwifubá bə̀ wɔ pyə̀-tənà y kə̀kàlsɛ́ gakó wẽ́ mó jé tɛ̃́. ⁶ Etər à nə m'a ŋwɛ́nɛ́ a pyɛ́nɛ́ a nyǐ zúzúnú kɔ̀bɔ́ ò la à dwí rí zal mɔ́ nɛ́? Etər à nə m'a ŋwɛ̀nɛ́ a pyɛ́nɛ́ a nyǐ bə gə la ce à dwí rí gakó jé tɛ̃́ nɛ́?» ⁷ Pyɔ̌ Zɛrzɛɛsɛ zɛ̃̀ n lyár pyə̀-kɛ̃ Esətɛɛrɛ ǹdə́ Mərədoshe, Zhwifu mú, n wɔ̀: «Cili-nə, à ce bə tɔ̌r Amã ń gə́ yà ń nə́ pyà Zhwifubá gu yilə. A zɛ̃̀ a kwè ń kɛ̀lɛ́ y a pɔ̃́, Esɛtɛɛrɛ. ⁸ Á cìcì mú wɔ̌ á kɛ̃ sábá, á ce kɔn dɛ̀bɛ́ á n'á bùl bə̀ rə̀ càn Zhwifubá yil mú né, à yil yilə, s'á cĩ́ à ŋwɔ̀nɔ́ w myɔrhɔ nə̀ yó ǹdə́ à jə̀fɔ́lɛ́ ci-byǐ yə́. Bə̀ sɛ́bɛ́ tɛ̀bɛ́ rə̀ kɛ̃ pyɔ̌ yil yilə bə súlí bə cĩ́ ń ŋwɔ̀nɔ́ w myɔrhɔ rə̀ yó ǹdə́ ń jə̀fɔ́lɛ́ cə̀-byǐ yə́ də̀ kɔn dɛ̀bɛ́ bə̀ wɔ̌ bə̀ kwàrh kə́dò yé.» ⁹ Dɛ̃ rɛ́ rə̀myɛ́ yù w cìcì, cànsɛ̀ sə̀tɔ̀ nyǎ yá, Səvã cànàb y dwã shí-èlyè ǹdə́ nə̀tɔ̀ dɛ̃ rɛ́ yùwə̀, bə̀ byẽ̀ pyɔ̌ sá-kanna bɛ́ gakó dwã yó. Bə kɛ̃ sábá nɛ́ nə tó nyə́ né Mərədoshe pɔ mɔ́ nɛ nə̀ kɔn gakó wẽ́. Bə pə pyə̀-tənà y kə̀kàlsɛ́ zɔ̌m ǹdə́ shí-èlyè ǹdə́ shàlpyɛ̀ y Zhwifubá nɛ, ǹdə́ pyɔ̌ shərnə náncɛsɛ́ ǹdə́ pyə̀-tənà y kə̀kàlsɛ́ yé né cìnə́ bé e súlí shərnə bé ne, kɔn zhì Ɛ̃ɛ̃dɛ e m'e vò Ecopyi. Bə kɛ̃ rɛ tənà y kə̀kàlà gakó kəkɛ̃ɛ̃ rɛ́ wẽ́ ǹdə́ dwí gakó zɔ̀mà nɛ́ wẽ́ ǹdə́ Zhwifuba kəkɛ̃ɛ̃ rɛ́ ǹdə́ bə̀ zɔ̀mà nɛ́ wẽ́. ¹⁰ Bə kɛ̃ sábá nɛ́ pyɔ̌ Zɛrzɛɛsɛ yil yilə, bə̀ zɛ̃̀ bə cĩ́ ń ŋwɔ̀nɔ́ w myɔrhɔ w nə̀ yó ǹdə́ ń jə̀fɔ́lɛ́ cə̀-byǐ yə́. Bə ce Eshə-jòmnə jòm pyɔ̌ eshərh shɛ̀bɛ́ bə̀ y'à cír sə̀ dwí rí sə̀ nyí ni mú, bə m'e vò bə pə rɛ. ¹¹ Nyǐ kɔn tɛ̀bɛ́ rə̀ y'à kɛ̃ sábá nɛ́ wẽ́: «Pyɔ̌ nə́ ń pɛ sɔ́má Zhwifubá byɛ̀bɛ́ bə̀ wɔ pyə̀-tə̀nà y cɔ kɔ̃̌kɔ̃̌ wẽ́ mó ne bə̀ bə̀ mú dwã nɛ bə bú bə zwẽ bə̀ cìnə̀; bə̀ bə̀ gwirhi kùkùl tɛ̀bɛ́ gakó rə̀ m'a shí dwí tɛ̃̌ tɛ̃̌ wẽ́ ráá tənà y kə̀kàlà kɛ̃̌ kɛ̃̌ wẽ́ rə bə̀ rə̀ la bú ǹdə́ bɛ mɔ́ lyə́m lyə́m; bə̀ bə̀ gu bi, bə̀ bə̀ ce bə jé tɛ̃́. Ń nə́ ń pɛ bɛ sɔ́má myɛ bə̀ bə̀ gu bə̀ byǎ bɛ́ ǹdə́ bə̀ kana bɛ́ sə bə bubu bə̀ jɛ̃̀-kɔn rɛ́. ¹² Sɔ́má y bə̀ y'à pɔ bɛ mɔ́ y'à wɔ́ dɛ̃ rə̀dù sá sá yilə, pyɔ̌ Zɛrzɛɛsɛ tənà y kə̀kàlsɛ́ gakó wẽ́; è y'à wɔ́ cànsɛ̀ shí ǹdə́ sə̀lyè nyǎ yá, Adaarɛ cànà y dwã shí ǹdə́ nə̀tɔ̀ yùwə̀. ¹³ Kɔn tɛ̀bɛ́ bə̀ kɛ̃ sɛ́bɛ́ rɛ́ wẽ́ mó y'à mə̌ dwã sə rə yí tənà y kə̀kàlsɛ́ gakó wẽ́ rə yə̀ pyɔ̌ nyí, sə bə ce dwə́ né gakó lwar rɛ, mùnì dɛ̃ rɛ́ tɛ̀bɛ́ bə̀ cír mú sə Zhwifubá tɛnɛ bə cĩ́ bə̀ jim bə̀ zwə̀ bé yó.» ¹⁴ Pyɔ̌ mɔ́ gə́ pɔ sɔ́má n zhɛ̀, byɛ̀bɛ́ bə̀ n'ê pɛ sábá nɛ́ mɔ́ jòm pyɔ̌ eshesé, bə vò yə̀wǎl yə̀wǎl bə pə rɛ. Nyí rí j'a yí Suuzi pyɔ̌-dǒ wə. ¹⁵ Mərədoshe shí pyɔ̌ sõ n du ǹdə́ ń pyɛ̀lɛ̀ kàmə̀zwǐ námpɔ̀pwɛ́rhɛ́, námpwã̀ ǹdə́ è dõ nánfwɛ̀lɛ̀ námpwã̀, nánshɛ̃̀ è yó ń cəl né ǹdə́ sánə́má pyɛ̀lɛ̀ yə́-pú nánfɔ̀lɔ̀ ń yó wə. Suuzi lyì bí zɛ̃̀ bə̀ n'ê kǎrh bə̀ m'ê fùù ǹdə́ wu-nyɔ̃̀. ¹⁶ È y'à wɔ́ pwẽ̀ ǹdə́ wu-nyɔ̃̀, fùwə́ ǹdə́ yó-dɛ̃̌ zhõ̌ Zhwifubá yilə. ¹⁷ Tənà y kə̀kàlà kɛ̀bɛ́ gakó ǹdə́ cɔ kɔ̀bɔ́ gakó pyɔ̌ mɔ́ nyí rí sɛ́bɛ́ rɛ́ y'à yú ní mú, è y'à wɔ́ wu-nyɔ̃̀ ǹdə́ fùwə́ Zhwifubá yilə. Bə tɛnɛ címsi nánfɔ̀lɔ̀. Dwə́ né dwã bɛ́ lyì nánzhɔ̌ j'a jǐrh Zhwifubá, bə̀ gə́ y'à n'ê dùr Zhwifubá ywẽ dɛ̃́dɛ̃́ mɔ́ yilə.