¹ Pyɔ̌ mɔ́ ǹdə́ Mərədoshe lyɛ̃ bə vò pyə̀-kɛ̃ Esətɛɛrɛ sõ bə̀ la vò bə jí címsí. ² Címsí twər rə̀lyè nyɛ̌sɛ́ dɛ̃ rɛ́, bə̀ gə́ tú bə̀ n'ê nywɛ̀ də̀vɛ̃́ y yi ní, pyɔ̌ mɔ́ kə́ n bwə̀rh Esətɛɛrɛ n wɔ̀: «Bə̀kɔ́n ǹ nə́ ǹ lwə̀lə̀? À m'a pɔ̃́ rɛ! Bə̀kɔ́n ǹ nə́ ǹ yàlá? È gə wɔ́ à tənà y kə̀kàlà myɛ, à m'à pɔ̃́ ya.» ³ Pyə̀-kɛ̃ Esətɛɛrɛ lyár mɔ n wɔ̀: «Pyɔ̌ gə zhe wu-bɔ̀nɔ̀ ǹdə́ nɛ, kɔn gə wɔ́ ń pùbùlə̀ sə n zwẽ ne, wɔ́ rə̀myɛ́ à n'â lwə̀l mo; sə n súlí n zwẽ à dwí rí myɛ, wɔ́ rə̀myɛ́ à n'â yǎl mɔ́. ⁴ Nyǐ bə̀ yè àmyɛ́ ǹd'â dwí rí bə̀ la gurhu lyə́m lyə́m, bə la nə́ba gu, bə la ce nə́ jé tɛ̃́. È gə y'à wɔ́ yé bə̀ yè nə́ba, nə́ bala ǹdə́ nə́ kana ga, nə́ la m'é yə̀ yómə́ dúdú myɛ cìcì, à y'à m'a shĩ̌ à nyí, bə̀ nɔ̀nɔ̀ w òmyɛ́ dwí rí yə̀ yí sə bə lyɛ̀ɛ̀ pyɔ̌ ò yil yé. ⁵ Pyɔ̌ mɔ́ zɛ̃̀ n bwə̀rh pyə̀-kɛ̃ Esətɛɛrɛ n wɔ̀: «Mɔ̌ cìcì ń bùl yò w kɔ̀bɔ́? Yẽ̀ ń ŋwɛ́nɛ́?» ⁶ Esətɛɛrɛ lyár mɔ n wɔ̀: «Lò mó mɔ̀bɔ́ ń nə́ ń nwɛ̀nɛ̀ nə́ba n jà ń wɔ́ nə́ zù-bal mɔ́, wɔ́ Amã, lyì bə-lwɛ̀lɛ́ y kɛ̀bɛ́!» Ywẽ nánfɔ̀lɔ̀ zə Amã n zɛ̃̀ n nə́ ń kəkə pyɔ̌ mɔ́ ǹdə́ pyə̀-kɛ̃ mɔ́ yé né. ⁷ Pyɔ̌ mɔ́ lyim zɛ̃̀ dɛ̃́dɛ̃́, n zɛ̃̀ n yẽ̌ ń də̀vɛ̃̀ y nɛ, n du n vò ń kɛ̀lɛ́ y bɔ́ɔ́ w wẽ́. Amã lwar bə̀ pyɔ̌ mɔ́ gu ń wẽ́ ń la mɔ lwɛlɛ wɔ̀rhɔ́, n zɛ̃̀ n mɛ̃ pyə̀-kɛ̃ mɔ́ yala nɛ ń la mə n lwə̀l mo bə̀ ń zwẽ mo. ⁸ Wu-zhùlù w ce n dwĩ̀ ń cìn ni n tu pal rɛ́ Esətɛɛrɛ yà ń jě rə̀ yó mó yó ń jě. Rə̀myɛ́ yó ǹdə́ pyɔ̌ mɔ́ ká n shí ń kɛ̀lɛ́ y bɔ́ɔ́ wa ń nə́ ń zwì címsí jì y wə. Pyɔ̌ já n cǎrh n wɔ̀: «Ń súlí ń nə́ ń zwí pyə̀-kɛ̃ mɔ́ à yírh wə, à sõ jù wə!» Pyɔ̌ nyí yə̀ gwi ǹdə́ ń tùntùnnə bé zə ku bə̀ m'e pyípyílí Amã yé yə́.a ⁹ Arəbɔna, pyɔ̌ tùm-byǐ mə̀dù, já n zhì pyɔ̌ yé né n wɔ̀ mɔ: «Amã gaga mɔ́ tɛnɛ də̀-jɔrhɔ́ bə̀ yà la m'e tɔ̌r Mərədoshe né, mɔ̀bɔ́ ń zɔ̀mɛ̀ rɛ́ zwẽ pyɔ̌ mɔ́. Də̀-jɔrhɔ́ òmyɛ́ cìì tɛ̃́ Amã sõ kɛ̀lɛ́ wa, ò dwɛ̀lɛ̀ rɛ́ yú jə̀-tóró yírhə́ shí-ènu.» Pyɔ̌ já n wɔ̀: «Tɔ̌r-na mɔ gàà» ¹⁰ Bə tɔ̌r Amã də̀-jɔrhɔ́ w ń yà ń tɛnɛ Mərədoshe yil mú ne. Rə̀myɛ́ yó pyɔ̌ mɔ́ lyim zɛ̃̀ rə tu.