¹ Cəcɛ̃ y èmyɛ́ mɔ́, pyɔ̌ mɔ́ yà ń wàr ń nə́ ń dɛ̀ɛ̀ yé. N zɛ̃̀ n ce bə kwè Tumə né sɛ́bɛ́ rɛ́, sɛ́bɛ́ rɛ́ tənà y ywẽ̀ ré kɛ̃ rə̀ wẽ́ mó bə bə̀, bə kàrmə̀ rɛ ń yé né. ² Bə kàrmə̀ jàà y kɛ̀bɛ́ Byəgətã ǹdə́ Tɛrɛshɛ, pyɔ̌ tùm-byǎ bɛ́ bə̀ y'à n'ê yìlì ń kɛ̀lɛ́ bwə̀rə̀ y mó gə́ y'à n'ê pyà pyɔ̌ Zɛrzɛɛsɛ gu mú, Mərədoshe zɛ̃̀ n jǐrh bə̀ kùrə̀ mó. ³ Pyɔ̌ mɔ́ zɛ̃̀ n bwə̀rh n wɔ̀: «Bə̀kɔ́n bə̀ wɛ̀rhɛ́ bə m'e zhẽ̌ Mərədoshe yó dɛ̃̌? Pyɛ̀lɛ̀ tɛ̌ bə̀ pɔ mɔ rə̀myɛ́ mɔ́ yilə?» Ń tùntùnnə bé lyár mɔ bə wɔ̀: «Bə̀ yə̀ mo pyɛ̀lɛ̀ də́-byǐ myɛ pɛ yé» ⁴ Pyɔ̌ mɔ́ zɛ̃̀ n bwə̀rh: «Mɔ̌ ń wɔ kɔ̀nɔ́ w wa? Rə̀myɛ́ yó ǹdə́ Amã nə́ ń yí pyɔ̌-kɛ̀lɛ́ y kɔ̀nɔ́ w yé y wə. Ń yà ń tú ń la ǹ lwə̀l pyɔ̌ nɛ bə̀ ń ce bə tɔ̌r Mərədoshe də̀-jɔrhɔ́ w ń tɛnɛ ń yil mú ne. ⁵ Tùntùnnə bé lyár mɔ bə wɔ̀: «Wɔ́ Amã ń wɔ kɔ̀nɔ́ w wa». Pyɔ̌ mɔ́ zɛ̃̀ n ce bə wɔ̀ mɔ bə̀ ń zwí. ⁶ Amã já n zù. Pyɔ̌ mɔ́ zɛ̃̀ n bwə̀rh mo n wɔ̀: «Bə̀kɔ́n bə̀ mə̌ sə bə wɛ̀rhɛ́ lò mɔ̀bɔ́ pyɔ̌ nə́ ń yǎl n zhẽ̌ ń yó dɛ̃̌ nɛ?» Amã wɔ̀ ń cìn ni: «Mɔ̌ dõ pyɔ̌ mà n yǎl n zhẽ̌ ń yó dɛ̃̌ ǹdə́ è gə də̀ àmyɛ́?» ⁷ Amã zɛ̃̀ n lyár pyɔ̌ n wɔ̀: «Pyɔ̌ gə nə́ ń yǎl n zhẽ̌ lò yó dɛ̃̌, ⁸ sə bə zù rə̀-ná-cí mú pyɛ̀lɛ̀ gɔ̀nɔ̀ kɔ̀bɔ́ pyɔ̌ cìcì zùwə̀, bə ce n jòm eshã kɛ̀bɛ́ pyɔ̌ jòm, bə zɛ̃̀ bə cĩ́ pyɛ̀lɛ̀ yə́-pú è yó wə. ⁹ Bə̀ m'a zɛ̃̀ bə pə gɔ̀nɔ̀ w ǹdə́ eshã y shərnə mɔ̀bɔ́ bə̀ n'ê nyàm mɔ́ nɛ. N zù gɔ̀nɔ̀ w mɔ̀bɔ́ pyɔ̌ nə́ ń yǎl n zhẽ̌ ń yó dɛ̃̌ mɔ́ nɛ, n ce n jòm eshã y n zɛ̃̀ n tu è yé né n nə́ ń vwɛ̃ n mə n kwè cɔ w sə-bya yá, ń mə́ ń bwə̀l ń zhe: ‹Nyǐ-nə pyɔ̌ gə́ ya n wɛ̀rhɛ́ lò mɔ̀bɔ́ ń nə́ ń yǎl n zhẽ̌ ń yó dɛ̃̌ nɛ́!› » ¹⁰ Rə̀myɛ́ yó, pyɔ̌ mɔ́ wɔ̀ Amã nɛ: «Kɔn càn, zhəl làlà ń vò ń kwè gɔ̀nɔ̀ w ǹdə́ eshã yá, sə́ vò ń wɛ̀rhɛ́ èta ǹdə́ Mərədoshe, Zhwifu mú ń jě à bwə̀rə̀ y w mó. Ǹ bə̀k'á dàl tɛ̀bɛ́ ǹ byili mú rə̀dù ga yé. ¹¹ Amã lyɛ̃ n vò n zə gɔ̀nɔ̀ w ǹdə́ eshã y n mə n bà. N zù gɔ̀nɔ̀ w Mərədoshe ne, n ce n jòm eshã y n zɛ̃̀ n tu è yé né ń nə́ ń vwɛ̃ n mə n tó cɔ w sə-bya yá, ń mə́ ń bwə̀l ń zhe: ‹Nyǐ-nə pyɔ̌ gə́ ya n wɛ̀rhɛ́ lò mɔ̀bɔ́ ń nə́ ń yǎl n zhẽ̌ ń yó dɛ̃̌ nɛ́!› » ¹² Rə̀myɛ́ kwã nɛ́, Mərədoshe kə́ n kwɛ̃̀ n vò pyɔ̌-kɛ̀lɛ́ y bwə̀rə̀ y wə, sə Amã kwɛ̃̀ n dùr làlà n vò jè ǹdə́ wu-zhùlù ǹdə́ cìzhìl nánfɔ̀lɔ̀. ¹³ Amã zɛ̃̀ n cĩ́ tɛ̀bɛ́ rə̀ yú mu mú ń kɛ̃ Zərɛshɛ ǹdə́ ń dɔwabá gakó ne. Ń cícírnə bé ǹdə́ ń kɛ̃ mɔ́ zɛ̃̀ bə wɔ̀ mɔ: «Mərədoshe mó mɔ̀bɔ́ ǹ ju kùr ǹ nə́ ń jí cìzhìl nánfɔ̀lɔ̀ w kɔ̀bɔ́ ń yé né mó gə wɔ́ Zhwifu, sə nyǐ ǹ bə ń yàlà zhe yé, ǹ cìzhìl ré m'a j'â n'ê súlí gaga ń yé né.» ¹⁴ pyɔ̌ tùm-byǎ j'a bə̀ ǹdə́ bə̀ gwẽ̌ n'ê zɔ̀mà. Bə wɛ̀rhɛ́ làlà bə zə Amã bə m'e vò címsí Esətɛɛrɛ yà ń tɛnɛ mɔ́ jàà wa.