¹ Nyì-lyõṍ dwã nɛ́ nə̀tɔ̀ dɛ̃ rɛ́ yùwə̀, Esətɛɛrɛ zù ń pyə̀-kɛ̃ gàndɛ́, n zɛ̃̀ n vò ń zhǐ pyɔ̌-kɛ̀lɛ́ y wu w wə, n zə ń yé n zǎ pyɔ̌ mɔ́ jì yə́. Rə̀myɛ́ yó ǹdə́ pyɔ̌ mɔ́ yà ń jě ń pyɛ̀lɛ̀ də̀gwã́ y yó, ń jì y wə, n zə ń yé n zǎ étwí-ènyí rí. ² Pyɔ̌ mɔ́ gə́ nɔ pyə̀-kɛ̃ Esətɛɛrɛ ń zhǐ kɛ̀lɛ́ y wu w wə, ń nyǐ mu ǹdə́ wu-bɔ̀nɔ̀. Pyɔ̌ mɔ́ zɛ̃̀ n kwè ń sánə́má pyɛ̀lɛ̀-də̀dɔ̀lɔ̀ w n cèlè ń səta. Esətɛɛrɛ bwəlse n dwə̀rh ò yó w ne. ³ Pyɔ̌ mɔ́ zɛ̃̀ n bwə̀rh mo n wɔ̀: «pyə̀-kɛ̃ Esətɛɛrɛ, bə̀kɔ́n rə̀ zhe mó? Bə̀kɔ́n ǹ nə́ ǹ yàlá? È gə wɔ́ à tənà y kə̀kàlà myɛ à m'a pɔ̃́ ya.» ⁴ Esətɛɛrɛ lyár pyɔ̌ mɔ́ n wɔ̀: «Kɔn gə wɔ́ pyɔ̌ pùbùlə̀, sə n zə Amã n bə̀ címsí à tɛnɛ ń yil mú jàà w zà.» ⁵ Pyɔ̌ mɔ́ já n wɔ̀: Ce-nə Amã bə̀ làlà n shɛ̀ Esətɛɛrɛ byə̀l ré. Pyɔ̌ mɔ́ ǹdə́ Amã zə dwã bə bə̀ Esətɛɛrɛ címsí ń tɛnɛ mɔ́ jàà wa. ⁶ Bə̀ gə́ tú bə̀ n'ê nywɛ̀ də̀vɛ̃́ y yi ní, pyɔ̌ mɔ́ bwə̀rh Esətɛɛrɛ n wɔ̀: «Bə̀kɔ́n ǹ nə́ ǹ lwə̀lə̀? À m'a pɔ̃́ rɛ! Bə̀kɔ́n ǹ nə́ ǹ yàlá? È gə wɔ́ à tənà y kə̀kàlà myɛ, à m'a pɔ̃́ ya. ⁷ Esətɛɛrɛ lyár n wɔ̀: kɔn rɛ́ tɛ̀bɛ́ à n'â lwə̀l mó...? Kɔn rɛ́ tɛ̀bɛ́ à n'â yǎl mɔ́...? ⁸ Pyɔ̌ gə zhe wu-bɔ̀nɔ̀ ǹdə́ nɛ, n zɛ̃̀ ń nə́ ń yǎl n pɛ̃ kɔn rɛ́ tɛ̀bɛ́ à la mɔ lwə̀l mó ǹdə́ kɔn rɛ́ tɛ̀bɛ́ à n'â yàlá, sə n kə́ n zə Amã n mə n bə̀ címsí à la tɔnɔ á yil nəkɔl mɔ́ jàà wa. Rə̀myɛ́ yi ní à m'a zɛ̃̀ a byili mu ri.» ⁹ Dɛ̃ rɛ́ rə̀myɛ́ Amã shə́r pyə̀-kɛ̃ mɔ́ sõ ǹdə́ wu-nyɔ̃̀, mɔ̀n y'à wɔ ń yé y wə. Ń gə́ yú pyɔ̌-kɛ̀lɛ́ bwə̀rə̀ y w n nə Mərədoshe gàà. Sə Mərədoshe yə̀ zɛ̃̀ n zhì dɛ̃̌ yé, n yə̀ kəkə ń yẽ́ myɛ cìcì yé. Rə̀myɛ́ ce Amã lyim zɛ̃̀ rə̀ n'ê yì Mərədoshe dɛ̃́dɛ̃́. ¹⁰ Sə ń zɔ ń cìnə̀, n lyɛ̃ n vò jè. Ń gə́ yú jè, n twĩ̀ bə byẽ̀ ń dɔwabá ǹdə́ ń kɛ̃ Zərɛshɛ n cĩ́ dwã yó. ¹¹ N zɛ̃̀ n byili bi n nə̀cɛ̀ndɛ́ jɛ́nɛ́ rɛ́ ǹdə́ ń bə̀sɔ́ná bɛ́ yó gə já nɛ́, n súlí n zɔ̀m kɔn rɛ́ tɛ̀bɛ́ gakó pyɔ̌ mɔ́ wɛ̀rhɛ́ n mə n zhẽ̌ ń yó w dɛ̃̌ mɔ́, n súlí n ce ń du shərnə bé ǹdə́ pyɔ̌-kɛ̀lɛ́ y tùntùnnə bé mó yò. ¹² Amã súlí n wɔ̀: «kɔn súlí myɛ wɔ́ àmyɛ́ dúdú pyə̀-kɛ̃ Esətɛɛrɛ byẽ̀ a tó pyɔ̌ mɔ́ nɛ a yə̀ ń címsí jàà wa. Ń k'á nə́ ń byẽ̀ ne b'à tó pyɔ̌ mɔ́ nɛ a bə̀ nəkɔla. ¹³ Sə à gə nɔ Mərədoshe, Zhwifu yə́, è jě pyɔ̌-kɛ̀lɛ́ y bwə̀rə̀ y w gakó, à k'â t'â nyǐ rə̀myɛ́ mɔ́ ǹdə kɔn dɛ̀bɛ́ rə̀ zhe kùr ta yé.» ¹⁴ Rə̀myɛ́ yó, ń kɛ̃ Zərɛshɛ ǹdə́ ń dɔwabá zɛ̃̀ bə wɔ̀ mɔ: «Ce bə wɛ̀rhɛ́ də̀-jɔrhɔ́ ò dwɛ̀lɛ̀ rɛ́ yí jə̀-tórhó yírhə́ shí-ènu. Nəkɔl nəkɔkɔ́lɛ́ y sə́ lwə̀l nyí pyɔ̌ nɛ bə̀ bə̀ tɔ̌r Mərədoshe ò nɛ; rə̀myɛ́ kwã nɛ́ ǹ m'ǎ zɛ̃̀ ń tó pyɔ̌ nɛ á vò címsí ǹdə́ wu-nyɔ̃̀.» Sə Amã swéné zɔ̀mɛ̀ rɛ́ rə̀myɛ́, n zɛ̃̀ n ce bə wɛ̀rhɛ́ də̀-jɔrhɔ́ wá.