¹ Mərədoshe gə́ nyɛ̀ɛ̀ kɔn dɛ̀bɛ́ bə̀ y'à n'ê tɛnɛ bə̀ yil mú nyí rí, n kǎr ń gàndɛ́, n zɛ̃̀ n zù gàndɛ rə̀ nyal ǹdə́ ywə́ə́le, n súlí n tɛ̃́ tɔ̀mɔ̀ n ló ń yó wəa. N zɛ̃̀ n du cɔ w wa, ń nə́ ń búbwéé wu-zhùlù búbwéé. ² Ń gə́ yú pyɔ̌-kɛ̀lɛ́ y bwə̀rə̀ y wə, n swə́rh n zhì gàà, bə̀ kɔn y'à súl sə lò zù yóló-gɔ̀nɔ̀ ń mə́ ń zù pyɔ̌ sõ kɛ̀lɛ́ wa. ³ Wu-zhùlù nánfɔ̀lɔ̀ y'à zhe Zhwifubá tənà y kə̀kàlà kɛ̀bɛ́ gakó pyɔ̌ mɔ́ nyí rí y'à yú è wẽ́ mó ǹdə wɔ́ lò ń cu ta: bə̀ y'à n'ê lyẽ bə̀ nyí, bə̀ n'ê kúrh yə́-nàná ǹdə́ zúzúnú cìlə́; bə̀ nánzhəzhɔ̌ y'à pyě ywə́ə́le gàndɛ ǹdə́ tɔ̀mɔ̀ yó. ⁴ Kana-byǎ bɛ́ bə̀ y'à ŋwɛ́nɛ́ ǹdə́ Esətɛɛrɛ mɔ́ e súlí ń tùm-byǎ bɛ́ zə yò w nyí rí bə yí mu, sə ò ce ń wu zhìlì dɛ̃́dɛ̃́. N zɛ̃̀ n pə gàndɛ bə̀ bə̀ pə Mərədoshe ne bə̀ ń lyə́r ń yóló-gɔ̀nɔ̀ wá, sə ń yə̀ shɛ̀nɛ́ yé. ⁵ Rə̀myɛ́ yó, Esətɛɛrɛ byẽ̀ Ataakɛ, pyɔ̌ tùm-byǎ bɛ́ ń yà ń ce bə̀ ŋwɛ́nɛ́ ń nyí ni mú mə̀dù, n twĩ̀ mu n vò n bwə̀rh Mərədoshe n nyǐ wɔ́ bə̀kɔ́n rə̀ zhe mo, sə n súlí n bwə̀rh mo kɔn dɛ̀bɛ́ rə̀ zhe mo mó kùrə̀. ⁶ Ataakɛ du n vò n nə Mərədoshe cɔ w pòpwə̀lə̀ y è zǎ pyɔ̌-kɛ̀lɛ́ y bwə̀rə̀ y mó wə. ⁷ Mərədoshe zɛ̃̀ n cĩ́ mu kɔn gə́ wɔ́ nɛ́ mɔ́ gakó; n súlí n cĩ́ mu wɛ́rɛ́ y kɛ̀bɛ́ Amã yà ń bwəl è nyí mú ń la n ce bə ló pyɔ̌ nə̀cɛ̀ndɛ́ yó mùnì sə n nə sɔ́má n mə n ce Zhwifubá jé tɛ̃́ mɔ́ nyí rí. ⁸ N vùr pyɔ̌ mɔ́ nyí rí bə̀ bwə̀l Suuzi ní bə̀ bə̀ ce Zhwifubá jé tɛ̃́ mɔ́ sɛ́bɛ́ rɛ́ n pɔ̃, bə̀ ń pɛ rɛ Esətɛɛrɛ nɛ mùnì ga n lwar kɔn rɛ́ tɛ̀bɛ́ rə̀ ŋwɛ́nɛ́ mɔ́, sə n súlí n pɔ̃ nyí bə̀ ń zhəl n vò n tu pyɔ̌ mɔ́ tɔ̀mɔ̀, sə n zə ń cã̌ nɛ ń dwí rí yilə. ⁹ Ataakɛ kə́ n zə Mərədoshe nyí rí n bə̀ cĩ́ Esətɛɛrɛ nɛ. ¹⁰ Esətɛɛrɛ zɛ̃̀ n kə́ n twĩ̀ Ataakɛ Mərədoshe sõ ǹdə́ nyí n wɔ̀: ¹¹ «Pyɔ̌ mɔ́ tùntùnnə bé ǹdə́ pyə̀-tənà y kə̀kàlsɛ́ lyì bí gakó yě nyí rí rə̀ n'ê byili bə̀ lò mɔ̌ mɔ̌, bal ráá kɛ̃, ǹ gə ju ǹ nà pyɔ̌ sõ n jà ń yə̀ mó byẽ̀ bə̀ n'ê gwi rə̀-ná-cí. Rə̀-ná-cí lú e zə myə̌l rə̀myɛ́ yi ní mú, wɔ́ pyɔ̌ mɔ́ gə zhẽ̌ ń sánə́má pyɛ̀lɛ̀-də̀dɔ̀lɔ̀ w n cèlè ń səta. Lò tá ń gar rɛ yé. Nyǐ è zhe dwã shɛ́-ètɔ̀ bə̀ gwẽ̌ yə̀ àmyɛ́ cìcì mú byẽ̀ b'à bə̀ pyɔ̌ sõ yé.» ¹² Bə bə̀ bə ce Mərədoshe lwar kɔn dɛ̀bɛ́ Esətɛɛrɛ byili mú. ¹³ Rə̀myɛ́ yó, Mərədoshe twĩ̀ bə vò bə wɔ̀ Esətɛɛrɛ nɛ: «Ǹ bə̀k'á bù bə̀ ǹ gə́ ŋwɛ́nɛ́ pyɔ̌-kɛ̀lɛ́ y wẽ́ mó ce, è wɔ́ ǹ dúdú ǹ m'ǎ lú tɛ̀bɛ́ bə̀ la Zhwifubá ne wɔ̀rhɔ́ mɔ́ yé né yé. ¹⁴ Ǹ gə pyɛ́nɛ́ ń shĩ̌ ǹ nyí, cìn nɛrɛ́ ǹdə́ vwǎrh m'a shí jàà dõ w Zhwifubá yilə, sə ǹmyɛ́ ǹdə́ ǹ da kɛ̀lɛ́ kùr m'a jé cɛ yó. Mɔ̌ ń nə yě sə è gə wɔ́ yò w kɔ̀bɔ́ kɔrhɔ yil ǹ jǐrh pyə̀-kɛ̃?» ¹⁵ Rə̀myɛ́ kwã nɛ́, Esətɛɛrɛ zɛ̃̀ n twĩ̀ bə pə nyí Mərədoshe ne n mə n lyár mɔ n wɔ̀: ¹⁶ «Zhəl ń vò ń kal Zhwifubá bə wɔ Suuzi ní mú gakó ń cĩ́ dwã yó, s'á lyẽ á nyí à yilə, á bə̀k'á jí s'á bə̀k'á nyɔ̀ myɛ yé, cəcɛ̃ ǹdə́ nə̀nyɔ́nɔ́ ga dwã nə̀tɔ̀ wẽ́. Àmyɛ m'a zə kana-byǎ bɛ́ bə̀ ŋwɛ́nɛ́ ǹdə́ nɛ mɔ́, nə́ lyẽ nə́ nyí.» Rə̀myɛ́ kwã, à m'a zɛ̃̀ a vò pyɔ̌ mɔ́ sono ǹdə́ kɔn súl ga; má è gə wɔ́ cu myɛ à m'a cì. ¹⁷ Rə̀myɛ́ yó, Mərədoshe zɛ̃̀ n lyɛ̃, n vò n wɛ̀rhɛ́ kɔn dɛ̀bɛ́ Esətɛɛrɛ yà ń pɔ mɔ rə̀ nyí mú cìcì.