¹ Rə̀myɛ́ kwã nɛ́, pyɔ̌ Zɛrzɛɛsɛ pɔ pyɛ̀lɛ̀ Amã nɛ. Amã wɔ́ Amədata byǐ, Agaagɛa dwí rí lò. Ń pɔ mɔ pyɛ̀lɛ̀ n ce n jǐrh ń shərnə náncɛ. ² Pyɔ̌ mɔ́ tùntùnnə bé byɛ̀bɛ́ gakó bə̀ y'à wɔ ń kɛ̀lɛ́ y bwə̀rə̀ w mó, y'à n'ê jòm bə̀ nə̀dwə́nə́ yó bə̀ súlí bə̀ wùlì tɛ̃́ Amã yé né. Wɔ́ pyɔ̌ mɔ́ ń yà ń pɔ nyí rí rə̀myɛ́. Sə Mərədoshe cẽ nə̀dwə́nə́ yó jǒm ǹdə́ tɛ̃́ wùlù mú yò. ³ Pyɔ̌ mɔ́ tùntùnnə bé zɛ̃̀ bə bwə̀rh Mərədoshe bə wɔ̀: Bə̀kɔ́n yil ǹ nə́ ǹ cẽ pyɔ̌ mɔ́ nyí rí zõ? ⁴ Dɛ̃ gakó bə̀ y'à n'ê càrhh bə̀ bwə̀rhə́ y né, sə Mərədoshe yà ń tá ń nyǐ bə̀ sõ yé. Rə̀myɛ́ yó, bə zɛ̃̀ bə vò bə cĩ́ Amã nɛ, bə la m'e nyǐ ǹdə́ Mərədoshe gə gwẽ̌ mà n zhì n wɔ̀ bə̀ ń tá ń la ń nə̀dwə́nə́ yó jǒm sə n wùlì tɛ̃́ ń gə́ wɔ́ Zhwifu mú yilə. ⁵ Amã gə́ púrí Mərədoshe tá ń jòm ń nə̀dwə́nə́ yó, s'e m'e zɔ̀m n wùlì tɛ̃́ ń yé né zɔ̀mà, ń lyim j'a zɛ̃̀. ⁶ Bə̀ gə́ ce n lwar Mərədoshe dwí rí pár mɔ́ ce, ń yə̀ pyà sə n pə còrhò-tum Mərədoshe dúdú ne yé. Amã pyà sə n ce Mərədoshe dwí rí, è n'ê yǎl e wɔ̀ Zhwifubá byɛ̀bɛ́ gakó bə̀ ŋwɛ́nɛ́ pyɔ̌ Zɛrzɛɛsɛ tənà y wẽ́ mó jé tɛ̃́. ⁷ Pyɔ̌ Zɛrzɛɛsɛ pyɛ̀lɛ̀ rɛ́ byinə shí ǹdə́ nə̀lyè nyǎn rɛ́, cànà nã́yéé y bə̀ n'ê byẽ̀ bə̀ Nəsã mɔ́ wẽ́, Amã ce bə tə́ tántɛ́ɛ́. Bə̀ n'ê byẽ̀ tántɛ́ɛ́ èmyɛ́ bə̀ «Purim». Èta sə bə m'e lwar cànà kɛ̀bɛ́ ǹdə́ dɛ̃ tɛ̀bɛ́ rə̀ m'a myɛrhɛ ǹdə́ yò w tũ̌. Sə tántɛ́ɛ́ y èmyɛ́ tu cànsɛ̀ shí ǹdə́ sə̀lyè nyǎ yá, Adaarɛ cànàb y yó. ⁸ Amã wɔ̀ pyɔ̌ Zɛrzɛɛsɛ nɛ: «Pyɔ̌, dwí rə̀dù ŋwɛ́nɛ́ rə̀ làà tɛ̃́ ǹ tənà y kə̀kàlsɛ́ lyì bí gakó cəcəl wə e jà rə̀ jě jě rə̀ nyí. Rə̀ nyə́ né ǹdə́ dwə́ né dwã bɛ́ nyə̀ná nɛ́ də̀ rə̀dù yé. Rə̀ t'â shɛ̀nɛ́ rə̀ tó pyɔ̌ mɔ́ nyə́ né ne yé: Pyɔ̌ gə yě sə n dámǎ n nyǐ rə̀ yò. ⁹ Kɔn gə wɔ́ pyɔ̌ pùbùlə̀, sə bə kɛ̃ sɛ́bɛ́ bə pə nyí bə̀ bə̀ ce bə jé tɛ̃́. À m'a zɛ̃̀ a gə̀ wár-kùlsì mɔ̀ɔ̀rhɛ̀ shíc a ce pyɔ̌ tùntùnnə bé jɔ̃̀ w bə ló pyɔ̌ nə̀cɛ̀ndɛ́ jì y wə.» ¹⁰ Rə̀myɛ́ yó pyɔ̌ mɔ́ vùr ń jə̀fɔ́lɛ́-cə̀-byǐ y ń mə́ ń cĩ́ ń ŋwɔ̀nɔ́ w myɔrhɔ nyə́ né ń nə́ ń pɛ mɔ́ sábá nɛ́ yó mó ń jə̀fɔ́lɛ́ nɛ n pə Zhwifubá zù-bal Amã nɛ. Amã yà ń wɔ́ Amədata byǐ, Agaagɛ dwí rí lò. ¹¹ Pyɔ̌ mɔ́ zɛ̃̀ n wɔ̀ Amã nɛ: «Yẽ̌ ǹ wársɛ́ nɛ; sə́ wɛ̀rhɛ́ dwí rí rə̀myɛ́ mɔ́ ǹdə ǹ gə́ nə́ ǹ yǎl nɛ́.» ¹² Cànà y nã́yéé y dwã shí ǹdə́ nə̀tɔ̀ yùwə̀, bə byẽ̀ pyɔ̌ sá-kanna bɛ́ dwã yó. Bə kɛ̃ Amã nyə́ né cìcì mú nə̀ kɔn gakó wẽ́, bə pə pyɔ̌ shərnə náncɛsɛ́ nɛ ǹdə́ tənà y kə̀kàlsɛ́ yé né cìnǝ́ bé ne e súlí dwí gakó yé né cìnə́ bé ne. Bə kɛ̃ rɛ bə pə tənà y kə̀kàlà gakó ne è kəkɛ̃ɛ̃ rɛ́ wẽ́ ǹdə́ dwí gakó ne rə̀ zɔ̀mà nɛ́ wẽ́. Bə kɛ̃ rɛ pyɔ̌ Zɛrzɛɛsɛ yil yilə bə zɛ̃̀ bə cĩ́ ń ŋwɔ̀nɔ́ w myɔrhɔ w nɛ́ ǹdə́ ń jə̀fɔ́lɛ́ cə̀-byǐ yə́. ¹³ Bə vùr lyì bə pə sábá nɛ́ pyə̀-tənà y kə̀kàlsɛ́ gakó wẽ́. Sábá nə̀myɛ́ y'à n'ê pɛ nyí bə̀ bə̀ gwirhi Zhwifubá dwí rí lyə́m lyə́m, bə̀ bə̀ gu bi, bə̀ bə̀ ce bə jé tɛ̃́, bə̀ bə̀sɔ́ná ǹdə́ bə̀ náncɛrh ga, bə̀ kana ǹdə́ bə̀ byǎ ga, sə bə bubu bə̀ jɛ̃̀-kɔn rɛ́. Bə vùr dɛ̃ yò òmyɛ́ tũ̌ yilə, sə è y'à wɔ́ cànsɛ́ shí ǹdə́ sə̀lyè nyǎ yá, Adaarɛ cànà y dwã shí ǹdə́ nə̀tɔ̀ yùwə̀. ¹⁴ Nyí rí sɛ́bɛ́ rɛ́ y'à mə̌ dwã sə rə yí tənà y kə̀kàlsɛ́ gakó wẽ́ sə bə súlí bə bwə̀l bə byili dwə́ né gakó ne mùnì nə tɛnɛ nə̀ cìn dɛ̃ rɛ́ rə̀myɛ́ mɔ́ yilə. ¹⁵ Pyɔ̌ mɔ́ ce byɛ̀bɛ́ bə̀ n'ê pɛ sábá nɛ́ mɔ́ du làlà bə ce ń nyí rí sɛ́bɛ́ rɛ́ j'a yí Suuzi pyɔ̌-dǒ wə. Pyɔ̌ mɔ́ ǹdə́ Amã y'à zɛ̃̀ bə jě bə̀ n'ê nywɛ̀. Rə̀myɛ́ yi ní ǹdə́ Suuzi lyì bí y'à n'ê yə́yɛ́lɛ́ tɛ̃́.