¹ Rə̀myɛ́ kwã nɛ́, pyɔ̌ Zɛrzɛɛsɛ lyim rí tú rə b'e tu. N zɛ̃̀ n kə́ n lyǐrh Vəsəti yò w yò, ń gə́ wɛ̀rhɛ́ nɛ́ mɔ́, e súlí nyí rí tɛ̀bɛ́ bə̀ y'à vùr ń shò kwã nɛ́ mɔ́ yò. ² Ń tùntùnnə bé zɛ̃̀ bə wɔ̀ mɔ: «Pyɔ̌, kɔn mə̌ bə̀ bə̀ pyǎ kana-byǎ byɛ̀bɛ́ bə̀ yə̀l bal párá, bə j'à càn dɛ̃́dɛ̃́ bə pɔ̃́. ³ Cír lyì ǹ tənà y kə̀kàlsɛ́ gakó wẽ́ bə vò bə zə kana-byǎ bɛ́ byɛ̀bɛ́ bə̀ yə̀l bal párá, bə j'à càn dɛ̃́dɛ̃́ mɔ́ bə m'e bə̀ Suuzi pyɔ̌-dǒ w wə, kana kɛ̀lɛ́ y wẽ́. Ege, pyɔ̌ tùm-byǐ mú, ń kana bɛ́ yìlnə mó, mà n nyǐ bə̀ yò, n pə bɛ yala kɔrhɔ nǔrh bə tùr. ⁴ Sə kana-byǎ bɛ́ cìn-kɔrhɔ mɔ́ kwã, kɛ̃-byǐ kɛ̀bɛ́ è yú pyɔ̌ bùlə̀ sə e jǐrh pyə̀-kɛ̃ Vəsəti jàà y wa.» Sə pyɔ̌ mɔ́ swéné zɔ̀mɛ̀ rɛ́ rə̀myɛ́ n zɛ̃̀ n wɛ̀rhɛ́ èta. ⁵ Zhwifu mə̀dù yà ń wɔ Suuzi pyɔ̌-dǒ w wə, ń yà ń yíl Mərədoshe. Ń da mɔ́ yà ń yíl Yəyiiri, Yəyiiri yà ń wɔ́ Shəmeyi byǐ, Shəmeyi yà ń wɔ́ Ciishia byǐ. Ń yà ń wɔ́ Bɛ̃zhamɛ̃ kwálá y lò. ⁶ Ń yà ń wɔ́ byɛ̀bɛ́ Babyəlɔnɛ pyɔ̌ Nabəkɔdɔnɔzɔɔrɛ pwà n mə n shə́r Zhǝrǝzalɛm nɛ́ mɔ́ mə̀dù; Bə̀ y'à tó dwã bə zə bə̀myɛ́ ǹdə́ Zhəda pyɔ̌ Yǝkɔnǝya bə m'e bə̀ Babyəlɔnɛ. ⁷ Mərədoshe yà ń nə́ ń kɔ̀n ń da da-byǐ bə̀kɔ́ ń yà ń yíl Adasa; bə̀ y'à n'ê byẽ̀ mo myɛ bə̀ Esətɛɛrɛb. Bə̀kɔ́ ńmyɛ̌ yà ń kə́ ń bə da ǹdə́ ná zhe yé. Sə ń yà ń wɔ́ kɛ̃-byì-bóm ń càn dɛ̃́dɛ̃́, ń yé-zwã̌ y càn. Ń da mɔ́ ǹdə́ ń ná mɔ́ cu kwã nɛ́, Mərədoshe kwè mo n kɔ̃̀ ǹdə ń sə̀pwà bə̀kɔ́ ta. ⁸ Bə̀ gə́ byili pyɔ̌ mɔ́ nyí rí lyì bí gakó ne kwã nɛ́, bə̀ zɔ kana-byǎ nánzhɔ̌ bə m'e bə̀ Suuzi pyɔ̌-dǒ w wə. Sə Esətɛɛrɛ yà ń wɔ bə̀ wẽ́. Bə zə ńmyɛ̌ ǹdə́ ń dwã bɛ́ bə m'e vò pyɔ̌-dǒ. Ege, pyɔ̌ kana bɛ́ yìlnə mó, yà ń nə́ ń nyǐ bə̀ yò. ⁹ Ege swéné Esətɛɛrɛ yò n zɛ̃̀ ń nə́ ń nyǐ ń yò cɛ̀nɛ̀. N zɛ̃̀ yə̀wǎl yə̀wǎl, n pə nǔrh ń cìn kɔrhɔ yilə ǹdə́ kùjú kɔ̀bɔ́ ń mə̌ sə n jí mú gakó, n súlí n pɔ̃ pyɔ̌-dǒ kana-byǎ bɛ́ bwàlpyɛ̀ y byɛ̀bɛ́ bə̀ y'à sú yírh du bə̀ dwã bɛ́ mɔ́ bə̀ la yə̀ ǹdə́ mɔ. N zɛ̃̀ n vùr ńmyɛ̌ ǹdə́ kana-byǎ bɛ́ ga n ce jì y kɛ̀bɛ́ e càn du sə̀ ga kana kɛ̀lɛ́ y wẽ́ mó wə. ¹⁰ Esətɛɛrɛ yə̀ ce lòlò lwar ń dwí rí ráá ń lùlnə̀ bé pár yé. Mərədoshe yà ń nə́ ń cə̀r mo bə̀ ń bə̀ká n byili ri yé. ¹¹ Dɛ̃ gakó, Mərədoshe yà ń nə́ ń gúgwírhí tɛ̃́ kana kɛ̀lɛ́ y yé y wə, ń la mə n bwə̀rh Esətɛɛrɛ jàn yò, sə n lwar bə̀ gə́ zhe mo né. ¹² Kana-byǎ bɛ́ bə̀ wɔ kana kɛ̀lɛ́ y wẽ́ mó y'à mə̌ sə bə kwè byin námpúm bə m'e kwɛrhɛ bə̀ cìn kɔn tó kana cìn-kɔrhɔ nyí rí gə́ n'ê byili ní: cànsɛ́ shə̀ldù w nã́yésé bə̀ n'ê tùr myííri nwə̃̌; Sə̀ shə̀ldù w dwã bɛ́ bə zɛ̃̀ bə tùr cǝ́mǝ́ bǝ̀ lwẽ́ nã́nyǝ̀nyɛ̀lɛ́, e súlí kana bwẽ́ wẽ̀ dwã. Rə̀myɛ́ kwã nɛ́, kɛ̃-byǐ gakó y'à zhe è dɛ̃ è mə̌ sə e vò pyɔ̌ Zɛrzɛɛsɛ sõ. ¹³ E gə tú è n'ê shə́r kana bɛ́ kɛ̀lɛ́ y wẽ́ e la pyɔ̌ mɔ́ sõ yi ní, bə̀ y'à n'ê pɛ y tɛ̀bɛ́ gakó è y'à n'ê yǎl è m'ê la gàà mɔ́. ¹⁴ È y'à n'ê zhə̀l pyɔ̌ mɔ́ sõ də̀dɛ̀nɛ́. È zɛ̃̀ nǝkɔkɔ́lɛ́ cɛ-lár rɛ́, bə zɛ̃̀ bə zə y bə k'a vò kana bɛ́ kɛ̀lɛ́ y dõ wẽ́, sə̀lyè nyǎ yá. Wɔ́ Shaashəgazɛ, ń yà ń nə́ ń nyǐ kɛ̀lɛ́ y èmyɛ́ mɔ́ yò. Wɔ́ ńmyɛ̌ ń yà ń wɔ́ pyɔ̌ tùm-byǐ mú ń nə́ ń yìlì ń bwə̃́ə̃́ bé ne mó. Sə kɛ̃-byǐ y èmyɛ́ y'à k'ê t'â ji nà pyɔ̌ sõ ǹdə́ è gə də̀ pyɔ̌ ń nə́ ń yǎl y n zɛ̃̀ n byẽ̀ e yil bə̀ è bə̀ yé. ¹⁵ Sə Abyəyəyil bə̀kɔ́, Esətɛɛrɛ, ń da da-byǐ byǐ Mərədoshe kwè ń nə́ ń nyǐ ń yò ǹdə ń bə̀kɔ́ ta mɔ́, dɛ̃ rɛ́ gə́ tú rə yí ń la pyɔ̌ mɔ́ sõ, ń yə̀ kɔn dõ lwə̀l e súlí tɛ̀bɛ́ Ege, pyɔ̌ tùm-byǐ mú, ń kana bɛ́ yìlnə mó, yà ń byili mu mú yé. Lyì bí byɛ̀bɛ́ gakó bə̀ y'à n'ê nɛ Esətɛɛrɛ mɔ́ y'à só mo. ¹⁶ Bə zə Esətɛɛrɛ bə bə̀ pyɔ̌ Zɛrzɛɛsɛ sõ, ń pyɛ̀lɛ̀ jì y wẽ́, cànsɛ̀ shyí nyǎ y bə̀ n'ê byẽ̀ bə̀ Təbɛtɛ cànàc y wẽ́ ǹdə́ pyɔ̌ mɔ́ zhe byinə nyàlpyɛ̀ ń pyɛ̀lɛ̀ rɛ́ yó. ¹⁷ Pyɔ̌ mɔ́ swéné Esətɛɛrɛ dwini kana bɛ́ dwã bɛ́ gakó, n swéné ń yò dwini kana-byǎ bɛ́ dwã bɛ́. N zɛ̃̀ n pú mu pyɛ̀lɛ̀ yə́-pú, n ce n jǐrh pyə̀-kɛ̃ Vəsəti jàà y wa. ¹⁸ Pyɔ̌ mɔ́ zɛ̃̀ n tɛnɛ címsi nánfɔ̀lɔ̀ ń shərnə bé ǹdə́ ń tùntùnnə bé yilə, Esətɛɛrɛ yil yilə. Rə̀myɛ́ yó, n ce tənà y kə̀kàlsɛ́ yẽ̌ sə̀ myə̌l-kwǎndɛ́ pɔ mɔ nɛ, n zɛ̃̀ n yɛ sɛ ǹdə́ pansɛ ǹdə ń jàn gə́ wɔ̌ nɛ́. ¹⁹ 19 Bə̀ gə́ k'a bwérhé bə pwà kana-byǎ bɛ́ bə m'e vò pyɔ̌-dǒ wə, twər rə̀lyè nyǎn rɛ́ yó yi ní, ǹdə́ Mərədoshe yà ń jě pyɔ̌ mɔ́ kɛ̀lɛ́ bwə̀rə̀ y wə. ²⁰ Rə̀myɛ́ yó, ǹdə́ Esətɛɛrɛ yà ń gwẽ̌ yə̀ ń lùlnə̀ bé ǹdə́ ń dwí rí pár lòlò ne byili yé, ǹdə Mərədoshe gə́ yà ń pɔ mɔ nyí ní. Esətɛɛrɛ yà ń nə́ ń tó tɛ̀bɛ́ Mərədoshe yà ń nə́ ń byili mu mú ni ǹdə ń gə́ yà ń gwẽ̌ wɔ ń sõ mó ta. ²¹ Dɛ̃ rə̀dù, pyɔ̌ mɔ́ tùm-byǎ bə̀lyè pyà bə̀ gə́ m'a tó né bə gu pyɔ̌ Zɛrzɛɛsɛ, bə̀ bə̀ lyimə y'à n'ê yì mu dɛ̃́dɛ̃́. È y'à wɔ́ Byəgətã ǹdə́ Tɛrɛshɛ. Wɔ́ bə̀myɛ́ bə̀ y'à n'ê dɛ̃̀ pyɔ̌ mɔ́ kɛ̀lɛ́ y bwə̀rə̀ y ne. Rə̀myɛ́ yi ní, ǹdə́ Mərədoshe yà ń jě pyɔ̌-kɛ̀lɛ́ y yé y wə, ²² Sə ń gə́ lwar yò wə́, ń kwè w n vò n cĩ́ Esətɛɛrɛ nɛ. Esətɛɛrɛ myɛ zɛ̃̀ n kwè w n vò n cĩ́ pyɔ̌ mɔ́ nɛ, bə̀ wɔ́ Mərədoshe ń byili mu wə. ²³ Bə zɛ̃̀ bə twə́l yò w nə̀rh bə púrí wɔ́ zhə̀nà. Bə tɔ̌r tùntùnnə bé bə̀lyè y də̀-jɔrhɔ́ nɛ bə gu. Bə zɛ̃̀ bə kɛ̃ yò w tənà y ywẽ̀ ré sɛ́bɛ́ rɛ́ wẽ́, pyɔ̌ mɔ́ yírh wə.