¹ Yò w kɔ̀bɔ́ bə̀ n'ê zɔ̀m ò yò sɛ́bɛ́ rɛ́ tɛ̀bɛ́ wẽ́ mó yàl pyɔ̌ Zɛrzɛɛsɛa yi ní. Zɛrzɛɛsɛ ńmyɛ̌ mɔ́ gə́ yà ń cǐ má nyí rí y'à bɔ̀n kə̀kàlsɛ zɔ̌m ǹdə́ shí-èlyè ǹdə́ shàlpyɛ̀. È y'à zhì Ɛ̃ɛ̃dɛ e m'e vò Ecopyi. ² Ń gə́ tú n zwẽ ń pyɛ̀lɛ̀ rɛ́ yi ní, ń jòm ń pyɛ̀lɛ̀ də̀gwã́ y è y'à wɔ Suuzi pyɔ̌-dǒ w mó yó. ³ Ń gə́ wɛ̀rhɛ́ byinə nə̀tɔ̀ pyɛ̀lɛ̀ rɛ́ yó w kwã nɛ́, ń tɛnɛ címsi nánfɔ̀lɔ̀ ń shərnə bé ǹdə́ ń tùntùnnə bé gakó yilə. Pɛɛrəsɛ ǹdə́ Mədi shə̀dɛ́ɛ́sɛ́ yó-cìnə́ bé, tənà y kə̀kàlsɛ́ lyì-fwààlɛ́ ǹdə́ sə̀ shərnə bé bə̀ dwã yó ń sõ. ⁴ N kwè dwã nánzhɔ̌, dwã zɔ̌m ǹdə́ shə́-lyɛlɛ, n mə n byili bi ń tənà y nə̀candɛ́ ǹdə́ è cɛ̀nɛ̀ rɛ́ e súlí è jɛ́nɛ́ rɛ́ gə́ yú má. ⁵ Dwã nɛ́ nə̀myɛ́ gə́ lyɛ̃, pyɔ̌ mɔ́ tɛnɛ címsi dwã lyì byɛ̀bɛ́ gakó bə̀ y'à ŋwɛ́nɛ́ Suuzi pyɔ̌-dǒ w mó yilə, bə̀ nə̀cànà ǹdə́ bə̀ nə̀mwà ga yilə. Címsí jú pyɔ̌-kɛ̀lɛ́ y bɔ́ɔ́ w wẽ́ dwã nyàlpyɛ̀. ⁶ Gàndɛ̀ námpwẽ̀ námpɔ̀pɔ́ɔ́rhɛ y'à lyẽ sə̀byì-kùlì cìbyǐr ni, rə jele yə nyɛ̀bɛ́ nə̀ lù ǹdǝ́ nǝ́kuuli tɛ̀bɛ́ rǝ̀ n'ê jǝ́jɛ̀mɛ́ nɛ ǹdə́ nyínsi námpwə̀rh ǹdə́ nánshɛ̀rh. Bə̀ y'à cĩ́ sánə́má ǹdǝ́ sǝ̀byǐ pala tɛ̃́. Bə zə nə́kuuli nánshimdi, nánpwẽ̀ ǹdə́ námbyín bə mù dwã nɛ bə ló jàà y èmyɛ́. ⁷ Sánə́má kǎ-zɔ̀má dwí dwí bə̀ y'à pɔ bɛ bə̀ m'ê nywɛ̀. Pyɔ̌ mɔ́ yɛ bɛ ǹdə́ də̀vɛ̃́ y ǹdə ń jàn gə́ wɔ̌ nɛ́. ⁸ Lò gakó yà ń zhe sɔ́má ń nywɛ̀ ń gə́ nə́ ń yǎl nɛ́, bə̀ pyɔ̌ mɔ́ yà ń pɔ nyí ń kɛ̀lɛ́ y tùntùnnə bé ne bə̀ bə̀ wɛ̀rhɛ́ ǹdə lò gakó gə́ nə́ ń yǎl nɛ́ bə pɔ̃. ⁹ Rə̀myɛ́ yi ní ǹdə́ pyə̀-kɛ̃ Vəsətib myɛ yà ń tɛnɛ címsi kana bɛ́ yilə, pyɔ̌ Zɛrzɛɛsɛ sõ kɛ̀lɛ́ wa. ¹⁰ Címsí dwã nyàlpyɛ̀ dɛ̃ rɛ́ yùwə̀, pyɔ̌ Zɛrzɛɛsɛ nyɔ̃̀ də̀vɛ̃́ y n sú, ń wu zɛ̃̀ ò nyɛ̀. N zɛ̃̀ n byẽ̀ ń tùm-byǎc bwàlpyɛ̀ y bə̀ y'à ŋwɛ́nɛ́ ǹdə́ mɔ mɔ́: Məwumə̃, Bəzəta, Arəbɔna, Bəgəta, Abəgəta, Zətarɛ ǹdə́ Karəkasɛ. ¹¹ N pə bɛ́ nyí bə̀ bə̀ ce pyə̀-kɛ̃ Vəsəti bə̀ ń yé né, ǹdə́ pyɛ̀lɛ̀ yə́-pú w ń yó wə. Ń yà ń nə́ ń yǎl n byili ń cɛ̀nɛ̀ rɛ́ lyì bí ǹdə́ shərnə bé ne, bə̀ ń yà ń càn dɛ̃́dɛ̃́. ¹² Tùm-byǎ vò sə cĩ́ pyɔ̌ mɔ́ nyí rí pyə̀-kɛ̃ mɔ́ nɛ. Sə ń cẽ pyɔ̌ mɔ́ byə̀l ré shɔ̀. Rə̀myɛ́ ce pyɔ̌ mɔ́ lyim rí zɛ̃̀ rə̀ n'ê yì mu dɛ̃́dɛ̃́. ¹³ Rə̀myɛ́ yó, pyɔ̌ mɔ́ bwə̀rh lwarna bɛ́ n nyǐ ń gə́ mà n zə yò w n tó né; bə̀ pyɔ̌ mɔ́ yò gakó y'à wɔ́ lyì bí byɛ̀bɛ́ bə̀ n'ê nyǐ nyə́ né ǹdə́ lùl-e-púrsí yò mó bə̀ y'à mǎ dwã sə bə kwɛrhɛ wa. ¹⁴ Rə̀myɛ́ yi ní Pɛɛrəsɛ ǹdə́ Mədi shərnə bé bwàlpyɛ̀ y Karəshəna, Shətarɛ, Adəmata, Tərəshiisi, Mərɛsɛ, Marəsəna ǹdə́ Məmukə̃, bə̀ tó bə̀ n'ê kál tənà y mɔ́, y'à ŋwɛ́nɛ́ ń yala nɛ. Bə̀ y'à wɔ́ lwarna. ¹⁵ Pyɔ̌ mɔ́ bwə̀rh be n wɔ̀: «Àmyɛ́ pyɔ̌, à twĩ̀ à tùm-byǎ pyə̀-kɛ̃ Vəsəti sõ ǹdə́ à nyí n zɛ̃̀ n cẽ re. Wɔ́ còrhò-tum tɛ̌ nyə́ né n'ê byili bə̀ bə̀ mə̌ sə bə pɔ̃ rə̀myɛ́ mɔ́ yilə?». ¹⁶ Məmukə̃ zɛ̃̀ n kwè nyí pyɔ̌ mɔ́ ǹdə́ ń shərnə bé yé né n wɔ̀: «È də̀ pyɔ̌ mɔ́ dúdú pyə̀-kɛ̃ Vəsəti fuuli yé, ń súlí n fuuli shərnə bé ǹdə́ lyì bí byɛ̀bɛ́ gakó bə̀ wɔ pyɔ̌ Zɛrzɛɛsɛ tənà y kə̀kàlsɛ́ gakó wẽ́ mó. ¹⁷ Bə̀ kana bɛ́ gakó gə nyɛ̀ɛ̀ bə̀ pyə̀-kɛ̃ mɔ́ wɛ̀rhɛ́ èta, bə̀ m'a ji kùr bə̀ n'ê nyǐ bə̀ byə́nə́ bé bə̀ mùrì bə̀ m'ê wə̀lə̀: ‹Pyɔ̌ Zɛrzɛɛsɛ yà ń pɔ nyí bə̀ bə ce ń pyə̀-kɛ̃ Vəsəti bə̀ ń yé né sə ń cẽ ń yə̀ twí yé›. ¹⁸ Zà cìcì Pɛɛrəsɛ ǹdə́ Mədi shərnə bé kana bɛ́ bə̀ nyɛ̀ɛ̀ pyə̀-kɛ̃ mɔ́ gə́ wɛ̀rhɛ́ nɛ́ mɔ́, m'a zɛ̃̀ bə̀ n'ê wɛ̀rhɛ́ èta bə̀ byə́nə́ bé né. Fuulu mú mə̀myɛ́ la ce bə̀ lyimə zɛ̃̀. ¹⁹ 19 Rə̀myɛ́ ce, pyɔ̌ gə só sə n vùr nyí bə̀ pyə̀-kɛ̃ Vəsəti kə́ ń tá ń bàn ń yé né yé, sə wɔ́ kɛ̃ dõ, ń cɔ̃̀ mɔ, ń mà n yə̀ pyə̀-kɛ̃ ń jàà wa. Sə bə kɛ̃ rɛ Pɛɛrəsɛ ǹdə́ Mədi nyə́ né wẽ́, èta rə̀ tá la kwǎrh yé. ²⁰ Sə nyí rə̀myɛ́ gə yú tənà y è já mɔ́ nyí rí gakó wẽ́, kana bɛ́ gakó m'a nyàm bə̀ byə́nə́ bé, bə̀ lyì-fɔ̀lɔ̀ ǹdə́ bə̀ nə̀mɔ̀ ga.» ²¹ Zɔ̀mɛ̀ rə̀myɛ́ yə̀ nyàn ǹdə́ pyɔ̌ ǹdə́ ń shərnə bé, n zɛ̃̀ n wɛ̀rhɛ́ ǹdə Məmukə̃ gə́ byili ní. ²² N ce bə kɛ̃ sábá bə pə ń tənà y kə̀kàlsɛ́ gakó wẽ́, nə kɛ̃ tənà y kə̀kàlà gakó kəkɛ̃ɛ̃ rɛ́ wẽ́, dwí gakó rə̀ zɔ̀mà nɛ́ wẽ́. Sábá nə̀myɛ́ y'à n'ê byili bə̀ bal gakó mə̌ sə n cìní ń kɛ̀lɛ́ y sə n zɔ̀m ń dwí zɔ̀mà nɛ́.