koussoube-marc-lee_act_text

Kǝ̀kàl-fwɛ̀lɛ̀ 9

¹ Swǝǝ yà ń wɔ́ Cǐnnǝ mó kwã-lyì bí nɔ̀nɔ̀ ǹdǝ́ bǝ̀ gu bùlǝ̀ nǝ̀ y'à ŋwɛ́nɛ́ ń wẽ́, n zɛ̃ n vò n nǝ Yi jì y yé né cìnǝ́ bé gakó náncɛ yá, ² n lwǝ̀l mo sɛ́bɛ́ ń mǝ́ ń la Zhwifubá dwã-gùúlí jìsí sǝ̀ ŋwɛ́nɛ́ Damaasɛ nɛ́ mɔ́ wẽ́, ń gǝ yú ń gǝ nɔ lyì bǝ̀ n'ê tó Yezu Kristǝ sɔ́má yá, è gǝ wɔ́ bala, è wɔ́ kana myɛ, sǝ n zǝ bɛ n lyẽ n ká n mǝ n bǝ̀ Zhǝrǝzalam. ³ Ń yà ń wɔ sɔ́má yó ń la Samaasɛ. Ń gǝ́ tú n bwǝlse, pwẽ̀ shí dɛ̃̌ rǝ yǝ̌r rǝ kǝ́kɛ́lɛ́ mɔ. ⁴ N tu tɛ̃́, n zɛ̃̀ n nyɛ̀è cǝl rǝ̀ n'ê wǝ̀l mo: Swǝǝ, Swǝǝ, byè yil ǹ nǝ́ ǹ nwɛ̀nɛ̀ nɛ? ⁵ Swǝǝ bwǝ̀rh n wɔ̀: Ǹmyɛ́ wɔ́ mɔ̌ lò yó-cǝ́bal: Cǝl ré wɔ̀ mɔ: Àmyɛ́ wɔ́ Yezu, mɔ̀bɔ́ ǹ nǝ́ ǹ nwɛ̀nɛ̀ mɔ́. ⁶ Zɛ̃̀ ń zù cɔ w wẽ́. Ǹ gǝ yúwǝ́, bǝ̀ m'a byili mú kɔn tɛ̀bɛ́ ǹ mǝ̌ sǝ́ wɛ̀rhɛ́. ⁷ Byɛ̀bɛ́ bǝ̀ y'à tó mo bǝ̀ la mɔ́ zhǐ bǝ̀ nyǝ́ dɛ̃, bǝ̀ yǝ̀ kaka wǝ̀l yé. Bǝ̀ y'à nyɛ̌ cǝl ré, sǝ bǝ̀ y'à bǝ lò lò nɛ yé. ⁸ Swǝǝ shí tɛ̃́ n zɛ̃̀, ń yírhǝ́ né y'à shǐrh, nǝ j'à bǝ nǝ́ nɛ yé. Bǝ zǝ ń jɛ̃̀ nɛ bǝ m'e vò Damaasɛ. ⁹ N jòm gàà mɔ́ dwã nǝ̀tɔ̀ ǹdǝ́ ń yírhǝ́ né bǝ nǝ́ nɛ yé.Ń yà ń tá ń jí kùjú ń tá ń nywɛ̀ nɛ̃̌ myɛ yé. ¹⁰ Kristǝ-lò mǝ̀dù myɛ yà ń ŋwɛ́nɛ́ Damaasɛ nɛ́ ń yíl Ananyaasɛ. Cǐnnǝ mó lyí mu, n wɔ̀ mɔ: Ananyaasɛ! N wɔ̀: Cǐnnǝ, nyǐ ni. ¹¹ Cǐnnǝ mó wɔ̀ mɔ: Zɛ̃̀ ń kwè sɔ́má y kɛ̀bɛ́ bǝ̀ n'ê byè bǝ̀ Sɔ́má cángá mɔ́, ń vò Zhide sõ kɛ̀lɛ́ wa. Nyǐ Tarsɛ lyì bal mǝ̀dù ŋwɛ́nɛ́ gàà ń yíl Swǝǝ, ń nǝ́ ń ce Yi. Ǹ gǝ yú sǝ́ bwǝ̀rh ń yò. ¹² À ce n nǝ bal mǝ̀dù ń Yi co wẽ́ ń yíl Ananyaasɛ ń nǝ́ ń zwì jù w ń la jɛ̀rh ń yó cṹ, mùnì ga ń yírhǝ́ né púr. ¹³ Anayaasɛ wɔ̀ : Cǐnnǝ, nyǐ lyì nánzhǝzhɔ̌ zɔ̀m bal mɔ́ ńmyɛ̌ mɔ́ yò ǹdǝ́ nɛ. Bǝ̀ byili ń gǝ́ nǝ́ ń nwɛ̀nɛ̀ ǹ kwã-lyì bí Zhǝrǝzalɛm nɛ́ mɔ́. ¹⁴ Wɔ́ Yi jì y vwì-zwǝ́lnǝ bé yé né cìnǝ́ bé bǝ̀ pɔ mɔ nyí bǝ̀ ń bǝ̀ nyɔ̀nɔ̀ n zǝ lyì bí byɛ̀bɛ́ gakó bǝ̀ n'ê cèrhé mó mó. ¹⁵ Cǐnnǝ mó zɛ̃̀ n wɔ̀ mɔ: Zhǝl, bǝ̀ wɔ́ àmyɛ́ cicì à cír bal mɔ́ ńmyɛ̌ à la ce n bwǝ̀l à yil ré n byili lũ w tǝnèsé dwã bɛ́ lyì bí ǹdǝ́ bǝ̀ pyǎ bɛ́, ǹdǝ́ Esǝrayɛl lyì bí ni. ¹⁶ Àmyɛ́ cìcì m'a byili mu ń gǝ́ mǝ̌ sǝ n nwɛ̀nɛ̀ à yil ré yil né. ¹⁷ N zɛ̃̀ n vò, n yí n zù kɛ̀lɛ́ wa, n cĩ́ ń jɛ̀rh Swǝǝ yó, n wɔ̀: Da-byǐ, Swǝǝ, wɔ́ Yezu mú mɔ̀bɔ́ ń lyí mú sɔ́má y yó ǹdǝ́ ǹ bàn mɔ́ ń twĩ̀ ni ǹ sõ, mùnì ga ǹ yírhǝ́ né púr, sǝ́ sú ǹdǝ́ Eshirhǝ náàcɛ̀nɛ́. ¹⁸ Rǝ̀myɛ́ yi ní cìcì, wẽ̀ shí Pwǝǝ yírhǝ́ né w ǹdǝ pùnǝ́ ta nǝ ló tɛ̃́. Ń yírhǝ́ né j'a púr, bǝ zɛ̃̀ bǝ mɔ́lɛ́ mɔ nɛ̃̌ mɔ́ wa. ¹⁹ Bǝ pɔ̃ kùjú n jí, ń yala nɛ́ k'a zhǐ kẽkẽ. N mɛ̃ Kristǝ kwã-lyì bí bǝ̀ ŋwɛ́nɛ́ Damaasɛ nɛ́ mɔ́ sõ n wɛ̀rhɛ́ dwã màngɛlɛ́. ²⁰ Swǝǝ já n zɛ̃̀ n ji kùr rǝ̀myɛ́ yi ní ń nǝ́ ń bwǝ̀l Zhwifubá dwã-gùúlí wẽ́, bǝ̀ Yezu wɔ́ Yi Byǐ, ²¹ sǝ kɔn jàr lyì bí byɛ̀bɛ́ gakó bǝ̀ y'à n'ê cili ń zɔ̀mà nɛ́ mɔ́ dɛ̃́dɛ̃́. Bǝ zɛ̃̀ bǝ̀ zhe: È dǝ̀ bal mɔ́ mɔ̀bɔ́ ń yà ń nǝ́ ń nwɛ̀nɛ̀ lyì bí byɛ̀bɛ́ bǝ̀ n'ê cèrhé Yezu Zhǝrǝzalɛm nɛ́ mɔ́ nà? È gǝ è dǝ̀ surhǝ ń wɛ̀rhɛ́ ń bǝ̀ nyɔ̀nɔ̀ ń la bɛ zal n mǝ n vò n pǝ Yi jì y vwĩ̀-zwǝ́l-nǝ bé yé né cìnǝ́ bé ne? ²² Sǝ Swǝǝ cǝ̀ǝ̀le ń nǝ́ ń bwǝ̀l nyí rí ǹdǝ́ wu-nyɔ̃̀. Ń nǝ́ ń byili Zhwifubá byɛ̀bɛ́ bǝ̀ y'à ŋwɛ́nɛ́ Damaasɛ nɛ́ mɔ́ nɛ bǝ̀ Yezu wɔ́ Kristǝ mó zhǝ̀nà, sǝ bǝ̀ y'à k'é yǝ̀l bǝ̀ gǝ́ m'a lyár mɔ nɛ yé. ²³ Dwã màngɛlɛ́ rǝ̀myɛ́ kwã nɛ́, Zhwifubá zɛ̃̀ bǝ̀ n'ê pyà Swǝǝ gu, ²⁴ sǝ ń lwar. Bǝ zɛ̃̀ bǝ̀ n'ê yìlì cɔ w kɔ̀nɔ́ w nyí rí ni cǝcɛ̃ ǹdǝ́ nǝ̀nyɔ́nɔ́ ga, mùnì ga bǝ ŋwɛ̀nɛ́ bǝ zǝ mɔ bǝ gu. ²⁵ Ń kwã-lyì bí zɛ̃̀ bǝ tó cǝcɛ̃ nɛ bǝ kwè mo bǝ ce sǝ́yǎ wa; bǝ tó byílí kwã nɛ́ bǝ cĩ́ pwẽ̀ ne. ²⁶ Swǝǝ lyɛ̃ n vò Zhǝrǝzalɛm. Ń gǝ́ yú gàà, ń yà ń nǝ́ ń yǎl n zù Kristǝ kwã-lyì bí wẽ́, sǝ bǝ̀ gakó y'à n'ê dùr ywẽ. Bǝ̀ y'à t'â zwẽ nyí bǝ̀ ń jǐrh kristǝ-lò zhǝ̀n ga yé, ²⁷ sǝ Barnabaasɛ zɛ̃̀ n zǝ mɔ n vò Ktistǝ tùntúmǝ́ bé sõ. N yí n byili bi Swǝǝ gǝ́ nɔ Cǐnnǝ mó sɔ́má y yó né, ǹdǝ́ Cǐnnǝ mó gǝ́ zɔ̀m ǹdǝ́ mɔ nɛ́. N byili myɛ, bǝ̀ Swǝǝ bwǝ̀l yò-ècɔ̀nɔ̀ nyí rí Damaasɛ nɛ́ ǹdǝ́ wu-jɔ̀ Yezu yil ré yilǝ. ²⁸ Kɔn zhí rǝ̀myɛ́ yi ní, Swǝǝ já n mɛ̃ tùntúmǝ́ bé sõ Zhǝrǝzalɛm nɛ́. Ń yà ń nǝ́ ń tó ń zhǝ̀l ń bwǝ̀l yò-ècɔ̀nɔ̀ nyí rí ǹdǝ́ wu-jɔ̀, Cǐnnǝ mó yil ré yilǝ. ²⁹ Ń yà ń nǝ́ ń zhǝ̀l Zhwifubá byɛ̀bɛ́ bǝ̀ n'ê zɔ̀m gǝ̀rǝ́kɛ mɔ́ sõ, ń nǝ́ ń zɔ̀m ǹdǝ́ bɛ, sǝ bǝ̀ y'à n'ê yǎl bǝ gu mu. ³⁰ Kristǝ-lyì bí gǝ́ lwar rǝ̀myɛ́, bǝ zǝ mɔ bǝ vò Sǝzarɛ, bǝ ce n lyɛ̃ n vò Tarsɛ. ³¹ Yǝ̀-zùlǝ́ y'à zɛ̃̀ nǝ̀ zhe Kristǝ-lyì bí gùlú w Zhide púlǝ́púlǝ́ ǹdǝ́ Gǝlile ǹdǝ́ Samarɛ tǝnèsé wẽ́ mó, sǝ ò lyì bí jàn y'à n'ê súlí, bǝ̀ n'ê nyàm Cǐnnǝ mó ǹdǝ́ bǝ̀ wun gakó, sǝ byɛ̀bɛ́ bǝ̀ zù Kristǝ y'à n'ê pùl ǹdǝ́ Eshirhǝ náàcɛ̀nɛ́ jàn. ³² Pyɛɛrɛ yà ń nǝ́ ń byɛ́lɛ́ cɛmɛ nɛ́ gakó. N byɛ́lɛ́ byɛ́lɛ́ n bǝ̀ n yí cɔ w kɔ̀bɔ́ bǝ̀ n'ê byẽ̀ bǝ̀ Lyidǝ mó kristǝ-lyì bí sõ. ³³ N nǝ bal mǝ̀dù ń yíl Ene, ń nèsé y'à cùwǝ̀, n wɛ̀rhɛ́ byinǝ lyɛlɛ ǹdǝ́ wɔ́ tɛ̃́ ń pyě né. ³⁴ Pyɛɛrɛ wɔ̀ mɔ: Ene, Yezu Kristǝ wárh mɔ́. Zɛ̃̀ ń pyípyílí ń pyònò wǝ́. N já n shí tɛ̃́ n z:ẽ̀ rǝ̀myɛ́ yi ní cìcì. ³⁵ Lyidǝ lyì bí byɛ̀bɛ́ gakó ǹdǝ́ byɛ̀bɛ́ bǝ̀ ŋwɛ́nɛ́ Sarɔ̃ cɛmɛ nɛ́ púlǝ́púlǝ́ wẽ́ mó gǝ́ nɔ yò w òmyɛ́, bǝ pyìrhí bǝ̀ wun bǝ zù Cǐnnǝ mó ³⁶ Kɛ̃ mǝ̀dù yà ń ŋwɛ́nɛ́ Zhope né ń wɔ́ Kristǝ kwã-lò ń yíl Tabyǝta, rǝ̀ kùr ǹdǝ́ gǝ̀rɛ́kɛ wɔ́: Dɔrɛkaasɛ. Ń yà ń nǝ́ ń wɛ̀rhɛ́ cɛ̀nɛ̀ dɛ̃́dɛ̃́; ń nǝ́ ń sɛ̃ nǝ̀mwà nɛ. ³⁷ Sǝ ń tú n tu címí dwã nɛ́ nǝ̀myɛ́ wẽ́ n cì. Bǝ̀ gǝ́ shɛ mɔ nɛ̃̌ bǝ zhɛ̀, bǝ kwè mo bǝ vò bǝ cĩ́ dɛ̃̌-yó jì wǝ. ³⁸ Lyidǝ ǹdǝ́ Zhope bwǝ́l dwã nɛ. Rǝ̀myɛ́ ce Krist-lyì bí byɛ̀bɛ́ bǝ̀ y'à ŋwɛ́nɛ́ Zhope né mó lwar bǝ̀ Pyɛɛrɛ ŋwɛ́nɛ́ Lyidǝ né, bǝ zɛ̃̀ bǝ twĩ̀ lyì bǝ̀lyè ń sõ, bǝ wɔ̀ bǝ̀ ń bǝ̀ làlà. ³⁹ Pyɛɛrɛ já n zhǐr rǝ̀myɛ́ yi ní cìcì n tó be. ń gǝ́ tú n yí, bǝ zǝ mɔ bǝ vò dɛ̃̌-yó jì y wǝ. Ejǝ̀nǝ̀ bé gakó j'a twẽ̌ bǝ yí ń nyí ni ǹdǝ́ yǝ́-nàná, bǝ byili mu kàmǝ̀-zwǐsí shɛ̀bɛ́ dwí gakó Dɔrǝkaasɛ yà ń nyal ǹdǝ́ ń gwẽ̌ ŋwɛ́nɛ́ mɔ́. ⁴⁰ Pyɛɛrɛ ce lyì bí gakó du pwẽ̀ ne, n zɛ̃̀ n jòm ń nǝ̀dwǝ́nǝ́ yó n lwǝ̀l Yi. N zɛ̃̀ n pyìrhí ń yé n zǎ kɛ̃ mɔ́ ń cù mú, n wɔ̀ mɔ: Tabyǝta, zɛ̃̀ dɛ̃̌! Kɛ̃ mɔ́ púr ń yírhǝ́ n nǝ Pyɛɛrɛ, n zɛ̃̀ n jòm ń kùr yó. ⁴¹ Pyɛɛrɛ zǝ ń jɛ̃̀ nɛ, n zhẽ̌ mo dɛ̃̌. N zɛ̃̀ n byẽ̀ lyì bí ǹdǝ́ ejǝ̀nǝ̀ bé n byili bi kɛ̃ mɔ́ ń bwìrhì mú. ⁴² Cɔ w lyì bí gakó nyɛ̀ɛ̀ yò w òmyɛ́, bǝ̀ nánzhǝzhɔ̌ j'a zwẽ nyí bǝ zù Cǐnnǝ mó. ⁴³ Pyɛɛrɛ mɛ̃ Zhope né bal mǝ̀dù sõ kɔn dɛnɛ. Bal mɔ́ ńmyɛ̌ yà ń yíl Shǝmɔ. Ń yà ń nǝ́ ń twĩ̀ tàndɛ tum.