¹ Bal mǝ̀dù yà ń ŋwɛ́nɛ́ Sǝzarɛ nɛ́ ń yíl Kɔrnɛɛ. Ń yà ń wɔ́ shǝ̀dɛ́ɛ́sɛ zɔ̌m yó-cǝ́bal, gùlú w kɔ̀bɔ́ bǝ̀ n'ê byẽ̀ bǝ̀ «Yitǝlyi shǝ̀dɛ́ɛ́sɛ» mɔ́ wẽ́. ² Ńmyɛ̌ ǹdǝ́ ń kɛ̀lɛ́ y lyì bí gakó y'à só Yi, bǝ̀ n'ê nyàm rɛ̀. Ń yà ń nǝ́ ń sɛ̃ Zhwifubá byɛ̀bɛ́ bǝ̀ y'à wɔ́ nǝ̀mwà mɔ́ nɛ. Ń yà ń nǝ́ ń ce Yi twéé twéé. ³ Dɛ̃ rǝ̀dù, n nǝ Yi màlɛ́ka pamparɛ̃ɛ̃ è tú e lyí mu ń sõ kɛ̀lɛ́ w yi-kár bɔ̀l wà, e byẽ̀ mò e wɔ̀: «Kɔrnɛɛ.» ⁴ N kwẽ̌ n nyǐ màlɛ́ka yá, ń wu zɛ̃̀, n wɔ̀: «Yó-cǝ́bal, wɔ́ bǝ̀kɔ́n yò?» Màlɛ́ka y wɔ̀ mɔ̀: «Yi zwẽ ǹ lwǝ̌l mó, sǝ ǹ sɛ̃ɛ̃́ y ǹ nǝ́ ǹ sɛ̃ nǝ̀mwà bɛ́ nɛ mɔ́ yú rǝ̀ bùlǝ̀, ce rǝ̀ t'â swě ǹ yò yé. ⁵ Sǝ twĩ̌ lyì Zhope né èlǎsɛ̃́, lò mǝ̀dù ŋwɛ́nɛ́ gàà ń yíl Shǝmɔ Pyɛɛrɛ, bǝ wɔ̀ mɔ̀ bǝ̀ ń bà. ⁶ Ń ŋwɛ́nɛ́ lò mǝ̀dù sõ, ńmyɛ yíl Shǝmɔ, sǝ ńmyɛ̌ mɔ́ nǝ́ ń twĩ̀ tàndɛ̀ tum. Ń kɛ̀lɛ́ y ŋwɛ́nɛ́ mwǝ̃́ y nyí ni.» ⁷ Màlɛ́ka y è y'à n'ê zɔ̀m ǹdǝ́ Kɔrnɛɛ mɔ́ gǝ́ zhǐr, n byẽ̀ ń tùntùnnǝ̀ bǝ̀lyè e súlí ń shǝ̀dáá èdù, è y'à zhe yǝ̀wǎl ǹdǝ́ ń tumǝ né, e j'à y'à só Yi, ⁸ n byili bi kɔn dɛ̀bɛ́ gakó rǝ̀ wɛ̀rhɛ́ mɔ́, n zɛ̃̀ n ce bǝ zhǐr bǝ̀ la Zhope yǝ́. ⁹ Bǝ vò vò bǝ zɔ̃̀ sɔ́má yó, bǝ dùlí bǝ̀ la m'e yí Zhope, ǹdǝ́ yi rí yú yǝ́-pɛ̀lɛ́ ecǝl wǝ. Rǝ̀myɛ́ yi ní, ǹdǝ́ Pyɛɛrɛ myɛ zɛ̃̀ n jì lyarh w ń la Yi co. ¹⁰ Nɔrh zɛ̃̀ mǝ̀ zhe mo, ń nǝ́ ń yǎl kùjú n jí. Kɛ̀lɛ́ y lyì bí zɛ̃̀ bǝ̀ n'ê tɛnɛ kùjú bǝ̀ la mɔ pɔ. Rǝ̀myɛ́ yi ní, kɔn j'a wɛ̀rhɛ́ mɔ. ¹¹ N nǝ dɛ̃̌ yi rí rǝ̀ pul, n pwírí ku òdù ò nyɛ̌ ǹdǝ kàmǝ̀-jɛ̃̀ nánfwɛ̀lɛ̀ ta, ò nyǝ́ né nǝ̀na y ga lyẽ dwã nɛ, ò shí dɛ̃̌ ò bàn tɛ̃́. ¹² Wẽ̀ dwí gakó y'à ŋwɛ́nɛ́ ò wẽ́: vwàmá ǹdǝ́ dɔma ǹdǝ́ dɛ̃̌ kúmsi. ¹³ N nyɛ̀ɛ̀ cǝl rǝ̀ wò mò: «Pyɛɛrɛ, zɛ̃̀ dɛ̃̌ ń gu wẽ̀ ré tɛ̀bɛ́ èta mɔ́ ń shɛ̃̀ ń dɔ̃̀.» ¹⁴ Pyɛɛrɛ wɔ̀: «Cinnǝ, ɔ̃́'ɔ̃, à gwẽ̌ yǝ̀ kùjú kɔ̀bɔ́ ò súl ǹdǝ́ jú, o jà ò n'ô pɛ jìmdì mú à nyú w ce gaga yé.» ¹⁵ Cǝl ré k'e wɔ̀ mɔ̀: «Kɔn dɛ̀bɛ́ Yi zǝ rǝ yǝ̀ kɔ̀-ècɛ̀nɛ́, sǝ ǹmyɛ́ bǝ̀ká wɔ̀ bǝ̀ rǝ̀ wɔ́ kɔn dɛ̀bɛ́ rǝ̀ n'ê pɛ jìmdì yé.» ¹⁶ Kɔn wɛ̀rhɛ́ èta twǝr rǝ̀tɔ̀, ku w j'a k'a vò dɛ̃̌. ¹⁷ Pyɛɛrɛ zɛ̃̀ ń nǝ́ ń tɛ́rɛ́ ń wẽ́, ń mǝ́ ń pyà kɔn rɛ́ dɛ̀bɛ́ ń nɔ èta mɔ́ kùrǝ̀. Rǝ̀myɛ́ yi ní, ǹdǝ́ lyì bí byɛ̀bɛ́ Kɔrnɛɛ twĩ̀ mú bwǝ̀rh bwǝ̀rh bǝ byili bi Shǝmɔ kɛ̀lɛ́ y shò, bǝ b'è zhǐ bwǝ̀rǝ̀ y wǝ. ¹⁸ Bǝ ce, bǝ zɛ̃̀ bǝ bwǝ̀rh bǝ̀ wɔ́ nyɔ̀nɔ̀ Shǝmɔ mɔ́ mɔ̀bɔ́ bǝ̀ n'ê byẽ̀ bǝ̀ Pyɛɛrɛ mɔ́ ŋwɛ́nɛ́? ¹⁹ Rǝ̀myɛ́ yi ní, ǹdǝ́ Pyɛɛrɛ yà ń gwẽ̌ nǝ́ ń tɛ́rɛ́ kɔn rɛ́ dɛ̀bɛ́ ń nɔ èta mɔ́ kùr ré, Eshirhǝ náàcɛ̀nɛ́ wɔ̀ mɔ̀: «Nyǐ lyì bǝ̀tɔ̀ tú bǝ̀ n'ê pyà mɔ́. ²⁰ Zɛ̃̀ ń só tɛ̃́ làlà ń tó be, ǹ bǝ̀ká ce tǝ́tɔ̀ná yé, bǝ̀ wɔ́ àmyɛ́ à twĩ̀ bì.» ²¹ Pyɛɛrɛ zɛ̃̀ n só tɛ̃́ n vò bǝ̀ sõ n wɔ̀ bɛ: «Wɔ́ àmyɛ́ á n'á pyà nà? Nyǐ-nǝ ne. Náncɔ̀nɔ̀ á n'á pyà nɛ̀?» ²² Bǝ zɛ̃̀ bǝ wɔ̀ mɔ̀: «Wɔ́ shǝ̀dɛ́ɛ́sɛ zɔ̌m yó-cǝ́bal mǝ̀dù ń yíl Kɔrnɛɛ ń twĩ̀ nǝ́ba. Ń wɔ́ wu-cángá cǝ́bal, ń nǝ́ ń nyàm Yi. Zhwifubá gakó n'ê zɔ̀m ń yil náàcɛ̀nɛ́. Yi màlɛ́ka tú e wɔ̀ mɔ̀ bǝ̀ ń byẽ̌ mó ń bǝ̀ ń sõ, sǝ n cili kɔn rɛ́ dɛ̀bɛ́ ǹ la mɔ byilu mú.» ²³ 23 Pyɛɛrɛ ce bǝ zù kɛ̀lɛ́ wa, n pǝ bɛ jàà bǝ zɔ̃̀. ²⁴ Bǝ vò vò bǝ zɔ̃̀ sɔ́má yó, bǝ dùlí bǝ yí Sǝzarɛ. Sǝ Kɔrnɛɛ yà ń byẽ̀ ń dwí lyì ǹdǝ́ ń dɔwabá byɛ̀bɛ́ ń só, bǝ b'è jě tɛ̃́ bǝ̀ n'ê dɛ̃̀ bɛ̀. ²⁵ Bǝ̀ gǝ́ tú bǝ̀ n'ê yí bwǝ̀rǝ̀ y wǝ, Kɔrnɛɛ zɛ̃̀ n jǝl Pyɛɛrɛ, n tu ń nǝ̀dwǝ́nǝ́ yó n wùlì ń yé né. ²⁶ Pyɛɛrɛ zhẽ̌ mo dɛ̃̌ n wɔ̀ mɔ̀: «Zɛ̃̀ dɛ̃̌, bǝ̀ àmyɛ wɔ́ numbyíní.» ²⁷ Bǝ zǝ dwã bǝ̀ n'ê zwì kɛ̀lɛ́ w ǹdǝ́ ń gwẽ̌ nǝ́ ń zɔ̀m ǹdǝ́ Kɔrnɛɛ. Bǝ̀ gǝ́ zù bǝ zhɛ̀, n pwírí lyì nánzhǝzhɔ̌ bǝ̀ jě dwã yó. ²⁸ N wɔ̀ bɛ: «Á yě bǝ̀ Zhwifubá nyǝ́ né wẽ́, Zhwifu bǝ sɔ́má zhe ń nǝ́ ń dɛ̃ lò mɔ̀bɔ́ ń dǝ̀ Zhwifu ni, ráá n zù ń sõ kɛ̀lɛ́ w yé; sǝ Yi byili àmyɛ́ nɛ b'à bǝ̀k'a nyǐ lò mǝ̀dù ga, a wɔ̀ bǝ̀ ń zhe jìmdì, à bǝ mǝ̌ s'a jí ǹdǝ́ mɔ yé. ²⁹ Wɔ́ rǝ̀myɛ́ è ce, á gǝ́ twĩ̀ bǝ byẽ̀ nè mó, à túwǝ́, à yǝ̀ tǝ́tɔ̀ná ce yé. A zɛ̃̀ à n'â yǎl s'á byili ni byǝ̀l ré kùrǝ̀.» ³⁰ Kɔrnɛɛ wɔ̀ mɔ̀: «À y'à ŋwɛ́nɛ́ à sõ jù w à n'â ce Yi, è zhe dwã nǝ̀tɔ̀ zà, e j'à y'à wɔ́ yi-kár nɛ ǹdǝ èlǎsɛ̃́ ta. Bal mǝ̀dù já n bǝ̀ n zhì à yé né, ń gàndɛ́ y'à n'ê jǝ́jɛ̀mɛ́, n wɔ̀: ³¹ ‹Kɔrnɛɛ, Yi zwẽ ǹ lwǝ̌l mó, sǝ rǝ̀ t'â swě ǹ sɛ̃ɛ̃́ y ǹ nǝ́ ǹ sɛ̃ nǝ̀mwà bɛ́ nɛ mɔ́ yò yé. ³² Sǝ twĩ̌ lyì Zhope né, bǝ vò e byẽ̀ Shǝmɔ mɔ́ mɔ̀bɔ́ bǝ̀ n'ê byẽ̀ bǝ̀ Pyɛɛrɛ mɔ́ n bà. Ń ŋwɛ́nɛ́ lò mǝ̀dù sõ, ńmyɛ yíl Shǝmɔ, sǝ ńmyɛ̌ mɔ́ nǝ́ ń twĩ̀ tàndɛ̀ tum. Ń kɛ̀lɛ́ y ŋwɛ́nɛ́ mwǝ̃́ y nyí ni.› ³³ A j'a zhízhílí a twĩ̀ lyì bí rǝ̀myɛ́ yi ní cìcì bǝ̀ bǝ̀ zhǝl bǝ byẽ̀ mó ń bà. Sǝ ǹ gǝ́ tú mú, ǹ wɛ̀rhɛ́ cɛ̀nɛ̀. Èlǎsɛ̃́, nǝ́ gakó zhǐ Yi yé né nǝ́ la kɔn rɛ́ dɛ̀bɛ́ Cinnǝ mú pɔ mɔ́ rǝ̀ nyí bǝ̀ ǹ byili nǝ́ba mó cilu.» ³⁴ Pyɛɛrɛ zɛ̃̀ n wɔ̀: «Zhǝ̀n zhǝ̀nà, à lwar bǝ̀ lyì bí gakó wɔ́ rǝ̀dù Yi yírh wǝ. ³⁵ Lò mɔ̀bɔ́ gakó ǹ nǝ́ ǹ nyàm Yi, ǹ tumǝ né j'à wɔ́ cángá, bá ǹ gǝ dǝ̀ Zhwifu myɛ, wɔ́ ǹmyɛ́ ǹ sú Yi yírhǝ́. ³⁶ Yi zɔ̀m ǹdǝ́ Esǝrayɛl lyì bí. Rǝ̀ tó Yezu Kristǝ dɛnnɛ rǝ bwǝ̀l yǝ̀-zùlǝ́ yò-ècɔ̀nɔ̀ nyí rí. Wɔ́ Yezu mú ńmyɛ̌ ń wɔ́ lyì bí gakó Cinnǝ mú. ³⁷ Á yě kɔn rɛ́ dɛ̀bɛ́ rǝ̀ wɛ̀rhɛ́ Zhide tǝnà y púlǝ́púlǝ́ w mó, sǝ kɔn rɛ́ rǝ̀myɛ́ mɔ́ wɔ́ Gǝlile tǝnà y wẽ́ rǝ̀ ju kùr né, Zhã gǝ́ yà ń nǝ́ ń bwǝ̀l ń byili lyì bí ni bǝ̀ bǝ̀ shɛ̀nɛ́ bǝ mɔ́lɛ́ bɛ́ nɛ̃̌ w mɔ́ kwã nɛ́. ³⁸ Á yě bǝ̀ Yi ce Eshirhǝ náàcɛ̀nɛ́ só Nazarɛtɛ lyì bal Yezu mú yó, e pɔ̃ jàn. Ń yà ń nǝ́ ń byɛ́lɛ́ cɛmɛ nɛ́ gakó, ń nǝ́ ń wɛ̀rhɛ́ cɛ̀nɛ̀, n jà ń nǝ́ ń wárh lyì bí byɛ̀bɛ́ gakó bǝ̀ y'à ŋwɛ́nɛ́ Shǝtana jɔ̃̀ w mɔ́, bǝ̀ Yi y'à ŋwɛ́nɛ́ ǹdǝ́ mɔ. ³⁹ Nǝ́myɛ̌ wɔ́ kɔn dɛ̀bɛ́ gakó ń wɛ̀rhɛ́ Zhǝrǝzalɛm nɛ́ ǹdǝ́ Zhwifubá cɛmɛ nɛ́ dwã bɛ́ wẽ́ mó zhǝ̀n-cínnǝ. Bǝ̀ pǝpa mɔ dǝ̀-jɔrhɔ́ yó bǝ gu, ⁴⁰ sǝ Yi k'a bwìrhì mù ń dwã nǝ̀tɔ̀ yùwǝ̀, rǝ ce n byili ń cìn lyì bí ni. ⁴¹ Sǝ è dǝ̀ lyì bí gakó ne ń byili ń cìn yé. Wɔ́ nǝ́myɛ̌ byɛ̀bɛ́ Yi jɛ̀rɛ̀ rǝ cír nǝ́ wɔ́ ń zhǝ̀n-cínnǝ mó ne ń byili ń cìnǝ̀. Nǝ́ tó mo nǝ́ jí, nǝ́ nyɔ̀, ń gǝ́ bwìrhì n zɛ̃̀ cùùrì wẽ́ mó kwã nɛ́. ⁴² Sǝ ń pɔ nǝ́ba nyí bǝ̀ nǝ́ bwǝ̌l nǝ́ byili Zhwifubá ne, bǝ̀ wɔ́ ńmyɛ̌ Yi cír rǝ pɔ̃ ŋwɔ̀nɔ́ bǝ̀ ń kǝ́ lyì-nyìrh ǹdǝ́ cùùrì bùrsì. ⁴³ Wɔ́ ńmyɛ̌ yò Yi nyì-zwennǝ bé gakó zɔ̀m bǝ byili, bǝ̀ lò mɔ̀bɔ́ gakó ǹ zwẽ ń zɔ̀mɛ̀ rɛ́, ǹ b'ǎ nǝ ǹ yǝ̀-bǝlwàálɛ́ sǔbri ńmyɛ̌ yil ré yilǝ.» ⁴⁴ Eshirhǝ náàcɛ̀nɛ́ só lyì bí byɛ̀bɛ́ gakó bǝ̀ y'à n'ê cili Pyɛɛrɛ zɔ̀mà nɛ́ mɔ́ yó ǹdǝ́ ń gwẽ̌ nǝ́ ń zɔ̀mà. ⁴⁵ Kristǝ-lyì bí byɛ̀bɛ́ bǝ̀ wɔ́ Zhwifubá, bǝ̀ tó Pyɛɛrɛ nɛ bǝ bǝ̀ mɔ́ gǝ́ pwírí Eshirhǝ náàcɛ̀nɛ́ y è n'ê shí Yi sõ mó só byɛ̀bɛ́ bǝ dǝ̀ Zhwifubá mó myɛ yó, kɔn jàr bɛ̀ dɛ̃́dɛ̃́, ⁴⁶ bǝ̀ bǝ̀ y'à nyɛ̌ zɔ̀mà dwí dwã bǝ̀ n'ê zɔ̀mà, bǝ̀ m'ê cèrhé Yi. ⁴⁷ Pyɛɛrɛ zɛ̃̀ n wɔ̀: «Byɛ̀bɛ́ èta Eshirhǝ náàcɛ̀nɛ́ só bǝ̀ yó ǹdǝ nǝ́ ta mɔ́, lò wɔ̌ ǹ b'ǎ cǝ̀r bǝ̀ nɛ̃̌-mɔ́lɔ́ mɔ́ yé ne?» ⁴⁸ N zɛ̃̀ n pǝ nyí bǝ̀ bǝ̀ pǝ bɛ mɔ́lɛ́ bɛ nɛ̃̌ w Yezu Kristǝ yil ré yilǝ. Bǝ zɛ̃̀ bǝ lwǝ̀l mò bǝ̀ ń mɛ̃ bǝ̀ sõ dwã màngɛlɛ́.