¹ Tùntúmǝ́ bé ǹdǝ́ Kristǝ-lyì bí dwã bɛ́ byɛ̀bɛ́ bǝ̀ y'à ŋwɛ́nɛ́ Zhide né mó nyɛ̀ɛ̀ bǝ̀ lyì byɛ̀bɛ́ bǝ̀ dǝ̀ Zhwifubá myɛ zwẽ Yi zɔ̀mɛ̀ rɛ́. ² Pyɛɛrɛ gǝ́ ká n bǝ̀ Zhǝrǝzalɛm, Kristǝ-lyì bí byɛ̀bɛ́ bǝ̀ wɔ́ Zhwifubá mó zɛ̃̀ bǝ̀ n'ê bwí mu bǝ̀ zhe: ³ «Byè yil ǹ shɛ̀nɛ́ ń vò ń zù lyì byɛ̀bɛ́ bǝ̀ dǝ̀ Zhwifubá sõ kɛ̀lɛ́ w ń tó be ń jí kùjú?» ⁴ Pyɛɛrɛ zɛ̃̀ n byili bi kɔn gǝ́ tó né mó gakó, n wɔ̀: ⁵ «À y'à zhǝ̀l Zhope, sǝ dɛ̃ rǝ̀dù, à y'à n'â wɛ̀rhɛ́ Yi-co. Kɔn j'a wɛ̀rhɛ́ nɛ ǹdǝ dàrhà ta. A nǝ ku òdù ò nyɛ̌ ǹdǝ kàmǝ̀-jɛ̃̀ nánfwɛ̀lɛ̀ ta, ò shí dɛ̃̌ yi w ò bàn à sǝta. Ò nyǝ́ né nǝ̀na y ga lyẽ dwã nɛ. Ò gǝ́ tú o yí à nyí ni, ⁶ a nyǐ ò wẽ́ shɛ́shɛ́, a pwírí wɔ́ vwàmá dwí gakó ǹdǝ́ dɔma ǹdǝ́ dɛ̃̌ kúmsi sǝ̀ ŋwɛ́nɛ́ ò wẽ́. ⁷ A zɛ̃̀ a nyɛ̀ɛ̀ cǝl rǝ̀ wò nè: ‹Pyɛɛrɛ, zɛ̃̀ dɛ̃̌ ń gu wẽ̀ ré tɛ̀bɛ́ èta mɔ́ ń shɛ̃̀ ń dɔ̃̀.› ⁸ A wɔ̀: ‹Cinnǝ, ɔ̃́'ɔ̃, à gwẽ̌ yǝ̀ kùjú kɔ̀bɔ́ ò súl ǹdǝ́ jú, o jà ò n'ô pɛ jìmdì mú à nyú w ce gaga yé.› ⁹ Cǝl ré k'e wɔ̀ nɛ̀: ‹Kɔn dɛ̀bɛ́ Yi zǝ rǝ yǝ̀ kɔ̀-ècɛ̀nɛ́, sǝ ǹmyɛ́ bǝ̀ká wɔ̀ bǝ̀ rǝ̀ wɔ́ kɔn dɛ̀bɛ́ rǝ̀ n'ê pɛ jìmdì yé.› ¹⁰ Kɔn wɛ̀rhɛ́ èta twǝr rǝ̀tɔ̀. Rǝ̀ gakó j'a k'a vò dɛ̃̌. ¹¹ Rǝ̀myɛ́ yi ní cìcì, ǹdǝ́ bǝ̀ twĩ̀ lyì bǝ̀tɔ̀ bǝ shí Sǝzarɛ bǝ bǝ̀ bǝ̀ zhǐ kɛ̀lɛ́ y à y'à ŋwɛ́nɛ́ è wẽ́ mó bwǝ̀rǝ̀ y nyí ní. ¹² Eshirhǝ náàcɛ̀nɛ́ wɔ̀ nɛ̀: ‹Tó be ń vò, bǝ̀ká ce tǝ́tɔ̀ná yé.› Nǝ́ da-byǎ bɛ́ byɛ̀bɛ́ bwǝ̀ldù y à zǝ a bǝ̀ èta mɔ́ y'à tó ne bǝ vò Sǝzarɛ, nǝ́ lyɛ̃ nǝ́ vò Kɔrnɛɛ sõ kɛ̀lɛ́ wa. ¹³ Sǝ Kɔrnɛɛ byili nǝ́ba bǝ̀ màlɛ́ka tú e lyí mu ń sõ kɛ̀lɛ́ w e wɔ̀ mɔ̀ bǝ̀ ń twĩ̌ lyì Zhope né, bǝ̀ lò mǝ̀dù ŋwɛ́nɛ́ gàà ń yíl Shǝmɔ Pyɛɛrɛ, bǝ wɔ̀ mɔ̀ bǝ̀ ń bà, ¹⁴ bǝ̀ ńmyɛ̌ gǝ túwǝ́, ń mà n byili mu zɔ̀mà nyɛ̀bɛ́ nǝ̀ b'a ce ńmyɛ̌ ǹdǝ́ ń kɛ̀lɛ́ y lyì bí gakó nǝ bǝ̀ cìn vwǎrh. ¹⁵ Kɔrnɛɛ gǝ́ zɔ̀m n zhɛ̀, a zɛ̃̀ a ji kùr à n'â zɔ̀m ǹdǝ́ bɛ. Eshirhǝ náàcɛ̀nɛ́ j'a só bǝ̀ yó ǹdǝ è gǝ́ ju kùr e só nǝ́myɛ yó né. ¹⁶ A zɛ̃̀ a lyǐrh kɔn rɛ́ dɛ̀bɛ́ Cinnǝ mú yà ń byili mú. Ń yà ń wòwǝ̀: ‹Zhã wɔ́ nɛ̃̌ w ń yà ń mɔ́lɛ́ ába nɛ́, sǝ ámyɛ̌ wɔ́ Eshirhǝ náàcɛ̀nɛ́ wẽ́ á b'ǎ mɔ́lɛ́ nɛ́. ¹⁷ Yi pɔ bɛ pɛnɛ́ y kɛ̀bɛ́ rǝ̀ pɔ nǝ́myɛ nɛ nǝ́ gǝ́ zù Cinnǝ Yezu Kristǝ yi ní mú. Àmyɛ́ nǝ wɔ̌ à b'a cǝ̀r Yi tum rí?» ¹⁸ Pyɛɛrɛ gǝ́ wò èta, byɛ̀bɛ́ bǝ̀ y'à n'ê cili ń zɔ̀mà nɛ́ mɔ́ k'ê yǝ̀ kaka wǝ̀l yé. Bǝ zɛ̃̀ bǝ cèrhé Yi bǝ wɔ̀: «Zhǝ̀nà, rǝ̀ pɔ sɔ́má byɛ̀bɛ́ bǝ̀ dǝ̀ Zhwifubá mó myɛ nɛ, bǝ̀ wɔ̌ bǝ̀ pyìrhí bǝ̀ wun bǝ zù nyǔ nántwǝ̌ wẽ́.» ¹⁹ Ecẽẽ gu mú kwã nɛ́, bǝ̀ y'à ji kùr bǝ̀ n'ê nwɛ̀nɛ̀ Kristǝ-lyì bí. Bǝ̀ làà dwã nɛ, jàlà vò Fenishi, jàlà vò Shipiri, jàlà vò Ancɔɔsɛ, Siri tǝnà y wa. Sǝ bǝ̀ y'à n'ê bwǝ̀l Yi zɔ̀mɛ̀ rɛ́ bǝ̀ byili Zhwifubá dúdú ni. ²⁰ 20 Kristǝ-lyì dwã y'à ŋwɛ́nɛ́ bǝ̀ wẽ́, bǝ̀myɛ́ y'à wɔ́ Shipiri ǹdǝ́ Shǝrɛnɛ lyì. Bǝ̀myɛ́ jàlà vò Ancɔɔsɛ, bǝ̀ n'ê bwǝ̀l Cinnǝ Yezu yò-ècɔ̀nɔ̀ nyí rí bǝ̀ byili lyì byɛ̀bɛ́ bǝ̀ dǝ̀ Zhwifubá ne myɛ. ²¹ 21 Cinnǝ mú jàn rɛ́ y'à ŋwɛ́nɛ́ ǹdǝ́ bɛ, sǝ lyì nánzhǝzhɔ̌ zwẽ nyí bǝ pyìrhí bǝ̀ wun bǝ zù mù. ²² Zhǝrǝzalɛm Kristǝ-lyì lyì bí gǝ́ nyɛ̀ɛ̀ rǝ̀myɛ́, bǝ zɛ̃̀ bǝ twĩ̀ Barnabaasɛ Ancɔɔsɛ nɛ́. ²³ Ń gǝ́ yú n pwírí Yi twĩ̀ rǝ̀ sónó tum rí ǹdǝ́ Ancɔɔsɛ Kristǝ-lyì bí èta, ń wu yǝ̀ nyɛ̀n. N cící bǝ̀ gakó bǝ̀ bǝ̀ j'a zhì bǝ̀ nà y yó bǝ zhí Cinnǝ mú ni kẽkẽ. ²⁴ Barnabaasɛ cìcì mú yà ń wɔ́ lyì-twǝ̌, ń sú ǹdǝ́ Eshirhǝ náàcɛ̀nɛ́, n jà n zhí Cinnǝ mú ni ǹdǝ́ ń wu gakó. Sǝ lyì nánzhǝzhɔ̌ zù Cinnǝ mú. ²⁵ Rǝ̀myɛ́ kwã nɛ́, Barnabaasɛ lyɛ̃ n vò Swǝǝ kwã nɛ́ Tarsɛ nɛ́. ²⁶ Ń gǝ́ yú n nǝ mɔ, n ká n zǝ mɔ n bǝ̀ Ancɔɔsɛ. Bǝ wɛ̀rhɛ́ byin námpúm gàà, Kristǝ-lyì gùlú w wẽ́, sǝ bǝ̀ byili Yi zɔ̀mɛ̀ rɛ́ lyì nánzhǝzhɔ̌ nɛ. Wɔ́ gàà bǝ̀ ju kùr bǝ byẽ̀ Yezu kwã-lyì bí, bǝ̀ Kristǝ-lyì mú. ²⁷ Dɛ̃ rǝ̀dù, Yi nyì-zwennǝ jàlà shí Zhǝrǝzalɛm bǝ bǝ̀ Ancɔɔsɛ. ²⁸ Mǝ̀dù zɛ̃̀ n zhì dɛ̃̌, ń yíl Agǝbuusi. Eshirhǝ náàcɛ̀nɛ́ ce n wɔ̀ bǝ̀ nɔrh b'a yǝ̀ lũ w púlǝ́púlǝ́ wẽ́. Sǝ zhǝ̀n ga, nɔrh mɔ́ mǝ̀myɛ́ mɔ́ yàl nɛ́ Orɔm pyɔ̌ Kolote pyɛ̀lɛ̀ rɛ́ yi ní. ²⁹ Kristǝ kwã-lyì bí zɛ̃̀ bǝ wɔ̀ bǝ̀ lò gakó sǝ́ pǝ ǹ jɛ̃̀-kɔn ǹdǝ ǹ gǝ́ zhe né, mùnì ga bǝ pǝ rǝ vò bǝ̀ da-byǎ bɛ́ bǝ̀ ŋwɛ́nɛ́ Zhide tǝnà y wẽ́ mó sõ bǝ m'e sɛ̃ bɛ. ³⁰ Sǝ zhǝ̀n ga bǝ̀ pɔ bǝ̀ sɛ̃ɛ̃́ y Barnabaasɛ ǹdǝ́ Swǝǝ ne bǝ vò bǝ pǝ Kristǝ-lyì gùúlí yé né cìnǝ́ bé ne.