¹ Rǝ̀myɛ́ yi ní, pyɔ̌ Erɔɔdɛ zɛ̃̀ n ji kùr n ce bǝ̀ n'ê nwɛ̀nɛ̀ Kristǝ-lyì gùlú w lyì bí jàlà. ² N ce bǝ gu Zhã zhǝ̀m-bal Zhakɛ ǹdǝ́ shù. ³ N pwírí rǝ̀myɛ́ yàl Zhwifubá wu-nyɔ̃̀, n ce bǝ zǝ Pyɛɛrɛ myɛ. È y'à wɔ́ búrú w bǝ̀ yǝ̀ sã̀-nǝ̀byẽ̌ ò wẽ́ ce mó címsí yùwǝ̀. ⁴ Bǝ̀ gǝ́ zɔ Pyɛɛrɛ bǝ zhɛ̀, n ce bǝ ce mo byǝ̀nǝ́-jù wǝ̀. N ce shǝ̀dɛ́ɛ́sɛ sǝ̀na sǝ̀na kùrǝ̀ nǝ̀na n'ê yìlì mù. Ń yà ń nǝ́ ń yǎl sǝ Pakɛ y gǝ lyɛ̃, sǝ n bùr ń bùrsì lyì bí gakó yé né. ⁶ Pyɛɛrɛ gǝ́ yà ń ŋwɛ́nɛ́ byǝ̀nǝ́-jù w yi ní, Kristǝ-lyì bí y'à n'ê lwǝ̀l Yi ń yil twéé twéé ǹdǝ́ bǝ̀ wun gakó. ⁵ Dɛ̃ rɛ́ tɛ̀bɛ́ Erɔɔdɛ yà ń nǝ́ ń yǎl n bùr Pyɛɛrɛ bùrsí mú gǝ́ tú e dǎl nǝkɔla, bǝ̀ y'à zǝ nyáná nǝ̀lyè bǝ lyẽ Pyɛɛrɛ. Bǝ cĩ́ lyì byǝ̀nǝ́-jì y nyí ni bǝ̀ n'ê yìlì. Cɛ y gǝ́ tú e yìì, Pyɛɛrɛ zɛ̃̀ ń pyě tɛ̃́ shǝ̀dɛ́ɛ́sɛ sǝ̀lyè cǝcǝl w ń dɛ̌. ⁷ Rǝ̀myɛ́ yó, Cinnǝ mú màlɛ́ka j'a du. Pwẽ̀ yǝ̌r rǝ sú jì y kɛ̀bɛ́ ń yà ń ŋwɛ́nɛ́ è wẽ́ mó. Màlɛ́ka y yí e dwǝ̀rh ń sǝ́pún ni, e zhàrh mɔ̀, e wɔ̀ mɔ̀: «Zɛ̃̀ tɛ̃́ làlà.» Nyáná nɛ́ j'a sá ń jɛ̀rh nɛ́ rǝ̀myɛ́ yi ní cìcì nǝ ló tɛ̃́. ⁸ Màlɛ́ka y wɔ̀ mɔ̀: «Kwě ǹ cã̌-tɔ̀nɔ̀ w ń lyẽ ǹ cã̌ nɛ́, sǝ́ ce ǹ nǝ̀cìlǝ̀ né ǹ nǝ̀rh né.» Pyɛɛrɛ zwẽ nyí. E k'e wɔ̀ mɔ̀: «Kwě ǹ kàmǝ̀-zwǐ y ń zù, sǝ́ tó à kùrǝ̀.» ⁹ Pyɛɛrɛ zhǐr n tó màlɛ́ka y nɛ n du byǝ̀nǝ́-jì y wǝ, sǝ ń yà ń tá ń bùl bǝ̀ tɛ̀bɛ́ màlɛ́ka y n'ê wɛ̀rhɛ́ mɔ́ wɔ́ zhǝ̀n ga yé. Ń yà ń nǝ́ ń bùl bǝ̀ wɔ́ dàrhà. ¹⁰ Bǝ yí bǝ tó byɛ̀bɛ́ bǝ̀ n'ê yìlì byǝ̀nǝ́-jì y mú kùr rǝ̀dù nyí ni bǝ lyɛ̃. Bǝ vò bǝ yí bǝ tó bǝ̀ dwã myɛ nyí ni bǝ lyɛ̃. Bǝ yí bwǝ̀rǝ̀ èdù è zǎ cɔ w wa. Bǝ̀ co cɔ̀bɔ́ bòlò né, sǝ ò pul ò cìcì nì. Bǝ du, bǝ vò vò bǝ yí sɔ́má èdù yó, màlɛ́ka y j'a jé Pyɛɛrɛ yé né. ¹¹ Pyɛɛrɛ zɛ̃̀ n lwar kɔn rɛ́ dɛ̀bɛ́ rǝ̀ wɛ̀rhɛ́ èta mɔ́ kùrǝ̀. N wɔ̀: «Èlǎsɛ̃́, à lwar bǝ̀ wɔ́ Cinnǝ mú ń twĩ̀ màlɛ́ka e b'e zwẽ ne Erɔɔdɛ jɔ̃̀ wà, ǹdǝ́ lwɛlɛ rɛ́ tɛ̀bɛ́ gakó Zhwifubá y'à n'ê pyà bǝ̀ la nɛ wɔ̀rhɔ́ mɔ́ yẽ́.» ¹² Ń gǝ́ lwar rǝ̀ kùrǝ̀, n zhǐr n vò n zù Zhã-Markɛ ná Marɛ sõ kɛ̀lɛ́ wa. Sǝ́ nyǐ lyì nánzhǝzhɔ̌ jě dwã yó gàà bǝ̀ n'ê lwǝ̀l Yi. ¹³ N yí n kɔ́kwá bòlò wǝ́. Kɛ̃-byǐ èdù è y'à wɔ́ kɛ̀lɛ́ y tùntùnnǝ̀, è yíl Oroode, èmyɛ́ mɔ́ twẽ̌ e yí bòlò w nyí ni, e bwǝ̀rh bǝ̀ wɔ́ mɔ̌ ń nǝ́ ń kɔ́kwá bòlò wǝ́? ¹⁴ È gǝ́ lwar bǝ̀ wɔ́ Pyɛɛrɛ, è wu yǝ̀ nyɛ̀n dɛ̃́dɛ̃́. E swě bòlò w pul mó yò, e k'a kwɛ̃̀ e vò e byili lyì bí dwã bɛ́ kɛ̀lɛ́ w mɔ́ nɛ bǝ̀ wɔ́ Pyɛɛrɛ ń ŋwɛ́nɛ́ pwẽ̀ nè. ¹⁵ Bǝ wɔ̀ yà: «Nyǝ̀nyààrɛ̀ zhe mó nà?» E kwɛrhɛ e byili bi bǝ̀ nyǐ wɔ́ zhǝ̀n è n'ê zɔ̀mà. Bǝ zɛ̃̀ bǝ wɔ̀: «Rǝ̀myɛ́ sǝ́ nyǐ wɔ́ ń màlɛ́ka.» ¹⁶ Sǝ rǝ̀myɛ́ yi ní, ǹdǝ́ Pyɛɛrɛ yà ń gwẽ̌ nǝ́ ń kɔ́kwá bòlò wǝ́. Bǝ zɛ̃̀ bǝ pul wǝ. Bǝ̀ gǝ́ nɔ mɔ, kɔn jàr bɛ̀ dɛ̃́dɛ̃́. ¹⁷ N zǝ ń jɛ̃̀ n yíyí bi bǝ̀ bǝ̀ zhǐ shɛ́ɛ́, n ji kùr n byili bi Cinnǝ mú gǝ́ tó né n vùr mò byǝ̀nǝ́-jì y wǝ. N zɛ̃̀ n pǝ bɛ nyí bǝ̀ bǝ̀ byili Zhakɛ ǹdǝ́ Kristǝ-lyì bí dwã bɛ́ nɛ. Rǝ̀myɛ́ kwã nɛ́, n ká n du n vò jàà dõ wǝ. ¹⁸ Cɛ y gǝ́ tú e lá, shǝ̀dɛ́ɛ́sɛ́ tà-kwã sǝ zɛ̃̀ sǝ̀ n'ê zhizhiri dɛ̃̌ byǝ̀nǝ́-jì y wǝ, sǝ̀ n'ê ce sɔ̀ sǝ̀ m'ê bwǝ̀rh Pyɛɛrɛ gǝ́ tó mǝ̀gã̌. ¹⁹ Erɔɔdɛ ce bǝ pyà pyà mɔ̀ bǝ ga. N ce bǝ bwǝ̀rh shǝ̀dɛ́ɛ́sɛ́ shɛ̀bɛ́ sǝ̀ n'ê yìlì byǝ̀nǝ́-jì y ni mú kɔn gǝ́ tó né Pyɛɛrɛ mǝ n du mú. N zɛ̃̀ n pǝ nyí shǝ̀dɛ́ɛ́sɛ dwã nɛ bǝ̀ sǝ̀ gu byɛ̀bɛ́ bǝ̀ y'à n'ê yìlì mù mú. Rǝ̀myɛ́ kwã nɛ́, Erɔɔdɛ zhǐr Zhide né n vò Sǝzarɛ, n mɛ̃ gàà. ²⁰ Zùùrì y'à ŋwɛ́nɛ́ Erɔɔdɛ ǹdǝ́ Tiiri ǹdǝ́ Shǝdɔ̃ lyì bí bwǝ̌l wǝ. E j'à wɔ́ Erɔɔdɛ tǝnà y wẽ́ bǝ̀ nyí kùjú y'à n'ê shí ní. Bǝ zɛ̃̀ bǝ wɛ̀rhɛ́ nyí rǝ̀dù bǝ̀ la vò bǝ nǝ Erɔɔdɛ mùnì ga bǝ ce dwã yó. Sǝ bǝ̀ gǝ́ yúwǝ́, bǝ̀ jɛ̀rɛ̀ bǝ zǝ dɔbrɛ ǹdǝ́ Erɔɔdɛ kɛ̀lɛ́ y yìlnǝ̀ mǝ̀dù ń yíl Bǝlǝsǝtuusi. ²¹ Bǝ zɛ̃̀ bǝ vùr dɛ̃. Sǝ dɛ̃ rɛ́ rǝ̀myɛ́ mɔ́ gǝ́ tú e yí, Erɔɔdɛ zù ń pyɛ̀lɛ̀ kàmǝ̀-zwǐ yǝ́, n jòm ń dǝ̀gwã́ y yó, n zɔ̀m ǹdǝ́ bɛ lyì bí gakó yé né. ²² Bǝ̀ gakó zɛ̃̀ bǝ bya bǝ wɔ̀: «Nyǐ wɔ́ Yi rǝ̀ n'ê zɔ̀m ǹdǝ́ nǝ́ba, sǝ è dǝ̀ numbyíní yé.» ²³ 23 Cinnǝ mú màlɛ́ka j'a mà mɔ̀ rǝ̀myɛ́ yi ní cìcì. Zǝ̀zɔ̀mɛ́ j'a zù ń wẽ́, nǝ dɔ̃̀ mɔ̀ nǝ gu, ń gǝ́ ce bǝ cèrhé mo ǹdǝ Yi ta mɔ́ yilǝ. ²⁴ Sǝ Yi zɔ̀mɛ̀ rɛ́ y'à j'â n'ê yí jààsɛ́ gakó wǝ. ²⁵ Barnabaasɛ ǹdǝ́ Swǝǝ gǝ́ twĩ̀ bǝ̀ tum rí tɛ̀bɛ́ bǝ̀ y'à twĩ̀ bì rǝ̀ yil Zhǝrǝzalɛm nɛ́ mɔ́ bǝ zhɛ̀, bǝ k'a kwɛ̃̀. Bǝ zǝ Zhã mɔ́ mɔ̀bɔ́ bǝ̀ y'à n'ê byẽ̀ bǝ̀ Markɛ mɔ́ myɛ n tó be.