koussoube-marc-lee_act_text

Kǝ̀kàl-fwɛ̀lɛ̀ 8

¹ Kɔn zhí dɛ̃ rɛ́ rǝ̀myɛ́ yùwǝ̀, bǝ j'a zɛ̃̀ bǝ ji kùr bǝ̀ n'ê nwɛ̀nɛ̀ Zhǝrǝzalɛm Kristǝ-lyì gùlú w dɛ̃́dɛ̃́. Kristǝ-lyì bí gakó dùr bǝ làà dwã nɛ bǝ vò Zhide ǹdǝ́ Samarɛ tǝnèsé wẽ́; è gǝ dǝ̀ tùntúmǝ́ bé dúdú bǝ̀ mɛ̃. ² Lyì byɛ̀bɛ́ bǝ̀ wɔ́ Yi lyì mú jàlà kúrh Ecẽẽ ne dɛ̃́dɛ̃́, bǝ zɛ̃̀ bǝ kwè mò bǝ vò bǝ ce. ³ Sǝ è gǝ wɔ́ Swǝǝ myɛ̌ yilǝ, ń yà ń nǝ́ ń pyà Kristǝ-lyì gùlú w cɔ̌ ǹdǝ́ ń wu gakó. Ń nǝ́ ń tó kǎlsɛ́ wẽ́ ń pwà bala ǹdǝ́ kana byɛ̀bɛ́ bǝ̀ wɔ́ Kristǝ-lyì mú ń pɛ bǝ̀ ce byǝ̀nǝ́-jù wǝ̀. ⁴ Kristǝ-lyì bí byɛ̀bɛ́ bǝ̀ y'à dùr bǝ làà dwã nɛ mɔ́ zɛ̃̀ bǝ̀ n'ê zhǝ̀l jààsɛ́ gakó w bǝ̀ bwǝ̀l yò-ècɔ̀nɔ̀ nyí ri. ⁵ Shilipu myɛ̌ yà ń zhǝ̀l Samarɛ cǝ-fɔ̀lɔ̀ w wa, ń nǝ́ ń bwǝ̀l Kristǝ yò-ècɔ̀nɔ̀ nyí rí ń byili lyì bí ni. ⁶ Lyì bí gǝ́ nyɛ̀ɛ̀ bǝ̀ n'ê zɔ̀m màmyaarhɛ́ tɛ̀bɛ́ ń nǝ́ ń wɛ̀rhɛ́ mɔ́ yò, bǝ̀ cìcì yírhǝ́ j'à n'ê nɛ rɛ mɔ́ ce, bǝ̀ y'à n'ê twí dwã yó nánzhǝzhɔ̌, sǝ bǝ̀ y'à n'ê cili ń zɔ̀mà nɛ́ náàcɛ̀nɛ́. ⁷ Nǝ̀cílsi námmǝlwǎlsɛ́ y'à n'ê búbwéé nyí sǝ̀ dwi lyì nánzhǝzhɔ̌ wẽ́. Gwànsɛ ǹdǝ́ lyì byɛ̀bɛ́ bǝ̀ n'ê twi cǝ́ y'à n'ê wárhá. ⁸ Sǝ wu-nyɔ̃̀ nánfɔ̀lɔ̀ y'à ŋwɛ́nɛ́ cɔ w òmyɛ́ wẽ́ zhǝ̀n zhǝ̀nà. ⁹ Bal mǝ̀dù yà ń jɛ̀rɛ̀ ń ŋwɛ́nɛ́ cɔ w òmyɛ́ wẽ́ ń yíl Shǝmɔ. Ń yà ń nǝ́ ń wɛ̀rhɛ́ jǝ̀-myaárhɛ rǝ̀ jàr Samarɛ lyì bí, sǝ ń yà ń zhe bǝ̀ ńmyɛ̌ zhe jàn. ¹⁰ Lyì bí gakó, bǝ̀sɔ́ná ǹdǝ́ náncɛrh, y'à n'ê cili ń zɔ̀mà nɛ́ náàcɛ̀nɛ́, sǝ bǝ̀ y'à n'ê wǝ̀l bǝ̀ Yi jàn rɛ́ ŋwɛ́nɛ́ ǹdǝ́ mɔ, jàn rɛ̀ tɛ̀bɛ́ bǝ̀ n'ê byẽ̀ bǝ̀: Jàn nánfɔ̀lɔ̀ w mɔ́. ¹¹ Ń gǝ́ yà ń ŋwɛ́nɛ́ gàà ń nǝ́ ń jàr lyì bí ǹdǝ́ jǝ̀-myaárhɛ́ èta mɔ́ kɔn dɛnɛ mɔ́ ce, bǝ̀ y'à n'ê cili ń zɔ̀mà nɛ́ náàcɛ̀nɛ́. ¹² Sǝ Shilipu gǝ́ tú n bwǝ̀l Yezu Kristǝ yil ré ǹdǝ́ Yi pɛ̀lɛ̀ rɛ́ yò n byili bi mú, bala bɛ́ ǹdǝ́ kana bɛ́ ga zù Kristǝ, bǝ mɔ́lɛ́ bɛ nɛ̃̌ wa. ¹³ Shǝmɔ myɛ cìcì mú zwẽ nyí bǝ mɔ́lɛ́ mɔ nɛ̃̌ wa, n já n zɛ̃̀ ń ŋwɛ́nɛ́ ǹdǝ́ Shilipu twéé gakó, sǝ màmyaárhɛ́ ǹdǝ́ wò-jààrɛ́ tɛ̀bɛ́ ń yà ń nǝ́ ń nɛ Shilipu wɛ̀rhɛ́ mɔ́ y'à n'ê jàr mɔ dɛ̃́dɛ̃́. ¹⁴ Tùntúmǝ́ bé byɛ̀bɛ́ bǝ̀ y'à ŋwɛ́nɛ́ Zhǝrǝzalɛm nɛ́ mɔ́ gǝ́ nyɛ̀ɛ̀ bǝ̀ Samarɛ lyì bí zwẽ Yi zɔ̀mɛ̀ rɛ́, bǝ zɛ̃̀ bǝ twĩ̀ Pyɛɛrɛ ǹdǝ́ Zhã bǝ̀ sõ. ¹⁵ Pyɛɛrɛ ǹdǝ́ Zhã gǝ́ yú Samarɛ, bǝ lwǝ̀l Yi byɛ̀bɛ́ bǝ̀ zù Kristǝ mó yilǝ, mùnì Eshirhǝ náàcɛ̀nɛ́ só bǝ̀ yó, ¹⁶ bǝ̀ wɔ́ Cǐnnǝ Yezu yil ré dúdú bǝ̀ y'à m'e mɔ́lɛ́ bɛ nɛ̃̌ wa, sǝ Eshirhǝ náàcɛ̀nɛ́ y'à gwẽ̌ yǝ̀ bǝ̀myɛ́ mǝ̀dù ga yó swé yé. ¹⁷ Pyɛɛrɛ ǹdǝ́ Zhã zɛ̃̀ bǝ cĩ́ jɛ̀rh bǝ̀ yó. Eshirhǝ náàcɛ̀nɛ́ zɛ̃̀ e só bǝ̀ yó. ¹⁸ Shɔmɔ gǝ́ pwírí Eshirhǝ náàcɛ̀nɛ́ tó tùntúmǝ́ dɛnnɛ e só byɛ̀bɛ́ bǝ̀ zù Kristǝ mó yó, n vùr wársɛ ń nǝ́ ń pɛ bɛ, ¹⁹ n wɔ̀: Zwẽ-nǝ s'á pǝ ŋwɔ̀nɔ́ w òmyɛ́ àmyɛ nɛ, mùnì ga lò mɔ̀bɔ́ àmyɛ gǝ cĩ́ jɛ̃̀ ń yó, sǝ Eshirhǝ náàcɛ̀nɛ́ só ń yó ²⁰ Pyɛɛrɛ zɛ̃̀ n wɔ̀ mɔ: Yi m'a cɔ̀ ǹmyɛ́ ǹdǝ́ ǹ wársɛ́ ga, ǹ gǝ́ ǹ bùl bǝ̀ Yi paánsɛ́ wɔ̌ sǝ̀ yè mó yilǝ. ²¹ Ǹ twǝ́r tɛ̀nɛ́ yò w kɔ̀bɔ́ wẽ́ yé; ǹ bǝ cǝl zhe ò wẽ́ myɛ yé, bǝ̀ ǹ wu dǝ̀ cángá Yi yé né yé. ²² Rǝ̀myɛ ce, pyìrhí ǹ wu, ń lwǝ̀l Cǐnnǝ mó ne. Dǝ̀ga, ń mà n pɔ̃́ ǹ bùlǝ̀ námmǝlwǎlsɛ́ sǔbri, ²³ b'à pwírí lwɛlɛ rɛ́ wɔ̀rhɔ́ shil sú ǹ wu wǝ́, ǹ jǐrh rǝ̀ yóm. ²⁴ Shɔmɔ zɛ̃̀ n wɔ̀ Pyɛɛrɛ ǹdǝ́ Zhã nɛ: Ámyɛ̌ cìcì lwǝ̌l-nǝ Yi à yilǝ, mùnì tɛ̀bɛ́ á n'á byili èta mɔ́ rǝ̀dù ga bǝ̀k'a zǝ nɛ yé. ²⁵ Sǝ Pyɛɛrɛ ǹdǝ́ Zhã bwǝ̀l Cǐnnǝ mó zɔ̀mɛ̀ rɛ́ bǝ byili lyì bí ni. Rǝ̀myɛ́ kwã nɛ́, bǝ k'a kwɛ̃̀ bǝ̀ la Zhǝrǝzalɛm, sǝ bǝ̀ y'à n'ê bwǝ̀l yò-ècɔ̀nɔ̀ nyí rí Samarɛ tǝnà y cɛmɛ nɛ́ wẽ́ bǝ̀ m'ê la. ²⁶ Cǐnnǝ mó màlɛ́ka wɔ̀ Shilipu ni: Zɛ̃̀ ń kwè sɔ́má y kɛ̀bɛ́ è shí Zhǝrǝzalɛm e tó gɔ-elũ w e lyɛ̃ è la Gaza mɔ́ ń vò lũ jǝ̀jĩ́ sõ. ²⁷ Shilipu já n yǝ́yɛ́lɛ́ n lyɛ̃. Ń gǝ́ yú sɔ́má yó, n nǝ Ecopyi tǝnà y lò mǝ̀dù, ń yà ń wɔ́ lyì-fɔ̀lɔ̀. Wɔ́ ńmyɛ̌ ń yà ń nǝ́ ń yìlì Ecopyi pyǝ-kɛ̃ mɔ́ bǝ̀ n'ê byẽ̀ bǝ̀ Kandaasɛ mɔ́ jɛ̃̀-kɔn rɛ́ nɛ. Ń yà ń zhǝ̀l Zhǝrǝzalɛm n vò n cèrhé Yi, ²⁸ n zɛ̃̀ n ká n kwɛ̃̀ ń la jè. Ń yà ń jě ń shǝshǎ zhírǝ́ wẽ́, ń nǝ́ ń kàrmǝ Yi nyì-zwennǝ Ezǝyi sɛ́bɛ́ rɛ́ wẽ́. ²⁹ Eshirhǝ náàcɛ̀nɛ́ zɔ̀m ǹdǝ́ Shilipu e wɔ̀: Dǔr ń yí zhírǝ́ y kɛ̀bɛ́ èta mɔ́ nyí ni, ³⁰ Shilipu dùr n yí zhírǝ́ y nyí ni, n nyɛ̀ɛ̀ bal mɔ́ gǝ́ nǝ́ ń kàrmɔ Yi nyì-zwennǝ Ezǝyi sɛ́bɛ́ rɛ́ nɛ́. N zɛ̃̀ n bwǝ̀rh mo n wɔ̀: Ǹ nyɛ̌ kɔn dɛ̀bɛ́ ǹ nǝ́ ǹ kàrmɔ mɔ́ kùrǝ̀? ³¹ Bal mɔ́ wɔ̀ mɔ: Etǝr à b'a tó né a nyɛ̀ɛ̀ rǝ̀ kùr ǹdǝ́ lò gǝ yǝ̀ nɛ byili. N zɛ̃̀ n lwǝ̀l Shilipu ni bǝ̀ ń zú zhírǝ́ y wẽ́ n jòm ń yala nɛ. ³² Bǝ̀ y'à kɛ̃ sɛ́bɛ́ rɛ́ jàà y kɛ̀bɛ́ ń yà ń nǝ́ ń kàrmɔ mɔ́ wẽ́ bǝ wɔ̀: Bǝ̀ zɔ mɔ ǹdǝ pyìrhǝ́ kɛ̀bɛ́ bǝ zɔ bǝ̀ m'e la è gu jàà w ta. N shĩ̌ ń nyí ndǝ pyì-bwɛ̀lɛ́ kɛ̀bɛ́ bǝ̀ n'ê gɔrh è jà è t'â kúrh ta. ³³ Bǝ̀ yǝ̀ mɔ nyǐ ǹdǝ lò ta yé; bǝ̀ yǝ̀ mɔ bùrì pɛ yé. Bǝ̀ vùr ń myǝ̌l cɛ yó. Wɔ́ mɔ̌ lò ń mà n zɔ̀m ń dwí rí yò? ³⁴ Bal mɔ́ zɛ̃̀ n bwǝ̀rh Shilipu n wɔ̀: À n'â lwǝ̀l mó, wɔ́ mɔ̌ yò Yi nyì-zwennǝ mó nǝ́ ń zɔ̀mà? Wɔ́ ńmyɛ̌ cìcì yò ń nǝ́ ń zɔ̀m ráá wɔ́ lò dõ yò ń nǝ́ ń zɔ̀mà? ³⁵ Shilipu já n tó Yi zɔ̀mɛ̀ rɛ́ dɛnnɛ n bwǝ̀l Yezu yò-ècɔ̀nɔ̀ nyí rí n byili mu. ³⁶ Bǝ vò vò bǝ yí jàà èdù wǝ, bǝ nǝ bwǐ èdù, nɛ̃̌ y'à ŋwɛ́nɛ́ è wẽ́. Bal mɔ́ wɔ̀ Shilipu ni: Nyǐ nɛ̃̌, à wàr à m'a mɔ́lɛ́ nɛ̃̌ mɔ́ w nà? ³⁷ Shilipu wɔ̀ mɔ: Ǹ gǝ zwẽ nyí ń zù Kristǝ ǹdǝ́ ǹ wu gakó, ǹ wɔ̌ ǹ m'ǎ mɔ́lɛ́ nɛ̃̌ mɔ́ wa. Bal mɔ́ wɔ̀ mɔ: À zwẽ nyí bǝ̀ Yezu Kristǝ wɔ́ Yi Byǐ. ³⁸ N zɛ̃̀ n ce bǝ zǝ zhírǝ́ y e zhì. Ńmyɛ̌ Shilipu ga tó dwã bǝ só tɛ̃́ bǝ zù bwǐ y wǝ, Shilipu mɔ́lɛ́ mɔ nɛ̃̌ mɔ́ wa. ³⁹ Bǝ̀ gǝ́ k'a shí bwǐ y wẽ́ bǝ du, Cǐnnǝ mó Eshirhǝ y kwè Shilipu e m'e jé. Bal mɔ́ kǝ́ ń yǝ̀ mɔ nɛ yé, sǝ ń lyɛ̃ n súlí ń sɔ́má y ǹdǝ́ wu-nyɔ̃̀ nánfɔ̀lɔ̀. ⁴⁰ È gǝ wɔ́ Shilipu yilǝ, bǝ̀ k'a vò bǝ nǝ mɔ cɔ òdù bǝ̀ n'ê byẽ̀ bǝ̀ Azɔtɛ nɛ́, n lyɛ̃ ń nǝ́ ń tó cɛmɛ nɛ́ gakó wẽ́, ń nǝ́ ń bwǝ̀l yò-ècɔ̀nɔ̀ nyí rí ń mǝ́ ń la Sazarɛ.