koussoube-marc-lee_act_text

Kǝ̀kàl-fwɛ̀lɛ̀ 7

¹ Yi jì y vwĩ̀-zwǝ́lnǝ bé yé né cìnǝ́ bé gakó náncɛ y zɛ̃̀ e bwǝ̀rh mò e wɔ̀: «Cà y kɛ̀bɛ́ bǝ̀ n'ê ce ǹ nyí ni mú gakó wɔ́ zhǝ̀nà?» ² Ecẽẽ wɔ̀: «À dabá ǹdǝ́ à da-byǎ, cili-nǝ kɔn dɛ̀bɛ́ à la ába byilu. Zùwǝ́ cǝ́bal Yi byili ń cìn nǝ́ nàmbal Abǝraham nɛ, ǹdǝ́ ń yà ń ŋwɛ́nɛ́ Mezopotǝmyi ní, fòró n zɛ̃̀ n vò n jòm Arã nɛ́. ³ Yi y'à wò mò: ‹Zhǐr ń yẽ̌ ǹ da-dǒ wǝ́, ǹdǝ́ ǹ dwí lyì bí ni, n vò cɔ w kɔ̀bɔ́ à la mɔ́ byilu mú wẽ́.› ⁴ N shɛ̀nɛ́ n zhǐr Kalǝdɛ lyì bí cɔ w wa, n vò n jòm Arã nɛ́. Ń da gǝ́ cùwǝ̀, rǝ̀myɛ́ kwã nɛ́, Yi ce n zhǐr Arã nɛ́ n bǝ̀ n jòm cɔ w kɔ̀bɔ́ á ŋwɛ́nɛ́ ò wẽ́ zà zà mɔ́ wa. ⁵ Sǝ Yi yǝ̀ mɔ̀ jàà pɛ cɔ w òmyɛ́ wẽ́ bá námpɔ́lɛ́ myɛ cìcì yé, sǝ rǝ̀ bwǝl mo nyí bǝ̀ rǝ̀ b'a pɔ̃ cɔ w òmyɛ́ púlǝ́púlǝ́ n cìní. Bá ń gǝ tú ń cù ń tɛ̀nɛ́ myɛ, ń byǎ b'a cìní wǝ. E jà rǝ̀myɛ́ yó, ǹdǝ́ ń yà ń gwẽ̌ bǝ bǝ̀sɔ́bwɛ̀lɛ́ zhe yé. ⁶ Rǝ̀ wò mò: ‹Ǹ nɛ̀mɛ́ nɛ́ b'a jòm cɔ kɔ̀bɔ́ ò dǝ̀ bǝ̀myɛ́ nyɔ̃̌ wẽ́, bǝ jǐrh yómǝ́ gàà mɔ́. Lyì m'a nwɛ̀nɛ̀ bɛ̀ byinǝ zwã̌-àna.› ⁷ Yi súlí rǝ wɔ̀: ‹À b'a kǝ́ cɔ w kɔ̀bɔ́ ò lyì bí la zǝ ǹ nɛ̀mɛ́ nɛ́ bǝ wɛ̀rhɛ́ yómǝ́ mó bùrsì, a pǝ w ò còrhò-tum. Sǝ rǝ̀myɛ́ kwã nɛ́, ǹ nɛ̀mɛ́ nɛ́ b'a k'a zhǐr gàà, bǝ b'e cèrhé ne nyɔ̀nɔ̀.› ⁸ «Rǝ̀myɛ́ yó, Yi zɔ dɔbrɛ ǹdǝ́ Abǝraham. Rǝ pɔ̃ nyí bǝ̀ ń góm ń byǎ bɛ́, e yǝ̀ dɔbrɛ́ rǝ̀myɛ́ myɔrhɔ. Abǝraham zɛ̃̀ n lù ń byǐ Yǝzakɛ, n gõ̀ mò ń dwã lyɛlɛ yùwǝ̀. Yǝzakɛ lù ń byǐ Zhakɔɔbɛ, n gõ̀ mò. Zhakɔɔbɛ lù ń byǎ bɛ́ shí ǹdǝ́ bǝ̀lyè y bǝ̀ wɔ́ nǝ́ nàmbala bɛ́ mɔ́, n gõ̀ bè. ⁹ Nǝ́ nàmbala bɛ́ dùr bǝ̀ nyɛ̃́ Zhozefu bwɛ̃̌, bǝ zǝ mɔ bǝ yè. Byɛ̀bɛ́ bǝ̀ yè mò mó zǝ mɔ bǝ vò Ezhibti yómde jè, sǝ Yi y'à ŋwɛ́nɛ́ ǹdǝ́ mɔ, ¹⁰ rǝ zwẽ mo ń nɔ̀nɔ̀ w wẽ́, rǝ ce n sú Ezhibti pyɔ̌ Faraɔ̃ yírh, rǝ pɔ̃ surhǝ ń mǝ́ ń zɔ̀m ǹdǝ́ mɔ. Faraɔ̃ pɔ̃ pyɛ̀lɛ̀, ń nǝ́ ń nyǐ Ezhibti púlǝ́púlǝ́ ǹdǝ́ ńmyɛ̌ Faraɔ̃ cìcì kɛ̀lɛ́ y ga yò. ¹¹ Sǝ nɔrh nánfɔ̀lɔ̀ tú mǝ tu Ezhibti ǹdǝ́ Kanãã tǝnèsé púlǝ́púlǝ́ wẽ́. Kɔn y'à zum dɛ̃́dɛ̃́, nǝ́ nàmbala bɛ́ y'à k'ê yír kaka bǝ̀ n'ê jí yé. ¹² Zhakɔɔbɛ zɛ̃̀ n nyɛ̀ɛ̀ bǝ̀ jíjí ŋwɛ́nɛ́ Ezhibti ní, n zɛ̃̀ n twĩ̀ nǝ́ nàmbala bɛ́ gàà. ¹³ Rǝ̀myɛ́ kwã nɛ́, n kǝ́ n twĩ̀ bì kǝ́dò. Zhozefu zɛ̃̀ n byili ń pár ń zhǝ̀m-má bɛ́ nɛ. Pyɔ̌ Faraɔ̃ zɛ̃̀ n lwar Zhozefu dwí rí párá. ¹⁴ Zhozefu ce bǝ zǝ ń da ǹdǝ́ ń byǎ bɛ́ púlǝ́púlǝ́ bǝ m'e bà, sǝ bǝ̀ gakó y'à wɔ́ shǝ́-shàlpyɛ̀ ǹdǝ́ bǝ̀nu. ¹⁵ Zhakɔɔbɛ zɛ̃̀ n bǝ̀ Ezhibti. Wɔ́ gàà ń cù ní. Nǝ́ nàmbala bɛ́ myɛ wɔ́ gàà bǝ̀ cù ní. ¹⁶ Sǝ bǝ̀ zɔ bɛ bǝ k'a m'e vò Shǝkɛm, bǝ ce be bɔ̀l mɔ́ mɔ̀bɔ́ Abǝraham yà ń yè ǹdǝ́ wársɛ Amɔɔrɛ byǎ bɛ́ sõ mó wẽ́. ¹⁷ Sǝ Yi nyí rí rǝ̀ y'à bwǝl Abǝraham nɛ mɔ́ pyǐrh mó yi gǝ́ tú e bwǝlse, nǝ́ dwí rí pùl dɛ̃́dɛ̃́ Ezhibti ní. ¹⁸ Rǝ̀myɛ́ kwã nɛ́, lò dõ tú n jǐrh Ezhibti pyɔ̌, sǝ ńmyɛ̌ mɔ́ yǝ̀ Zhozefu pár lwar yé. ¹⁹ Ń myìnì nǝ́ dwí rí, n nwɛ̀nɛ̀ nǝ́ nàmbala bɛ́. Ń yà ń nǝ́ ń nyɛ́ɛ́ bɛ ń ce bǝ̀ pwà bǝ̀ byì-shɛ̌msɛ́ bǝ̀ dwĩ̀, mùnì ga sǝ̀ bǝ̀k'a yǝ̀ nɛ́ yé. ²⁰ Wɔ́ rǝ̀myɛ́ yi ní bǝ̀ lùl Muyiisi. Ń yà ń wɔ́ ébɔ́, Yi y'à só mo, sǝ ń ná kɔ̀n mɔ̀ ń da sõ kɛ̀lɛ́ w cànsɛ̀ sǝ̀tɔ̀. ²¹ Rǝ̀myɛ́ kwã nɛ́, bǝ kwè mò bǝ vò e dwĩ̀, sǝ pyɔ̌ Faraɔ̃ bǝ̀kɔ́ nɔ mɔ n kwè, n vò n kɔ̃̀ ǹdǝ ń cìcì byǐ ta. ²² N lwar Ezhibti lyì bí tumǝ né gakó yé-shò, n jǐrh lyì-fɔ̀lɔ̀ ń zɔ̀mà nɛ́ ǹdǝ́ ń tumǝ né gakó wẽ́. ²³ «Muyiisi gǝ́ tú n yí byinǝ shǝ́-èna, dɛ̃ rǝ̀dù, n zɛ̃̀ n jòm tɛ̃́, n bù bǝ̀ ń mà n nyǐ ń da-byǎ bɛ́ yò. ²⁴ N zɛ̃̀ n nǝ Ezhibti lò mǝ̀dù ń nǝ́ ń nwɛ̀nɛ̀ Esǝrayɛl lò, n sɛ̃ Esǝrayɛl lò mó ne, sǝ ń gu Ezhibti lò mó. ²⁵ Ń yà ń nǝ́ ń bùl bǝ̀ Esǝrayɛl lyì bí m'a tó rǝ̀myɛ́ dɛnnɛ bǝ lwar bǝ̀ Yi n'ê yǎl rǝ tó ń dɛnnɛ rǝ vwǎrh bɛ, sǝ bǝ̀ yǝ̀ lwar yé. ²⁶ È zɛ̃̀ nǝkɔkɔ́lɛ́ y yùwǝ̀, ń nɔ Esǝrayɛl lyì bǝ̀lyè bǝ̀myɛ n'ê bwí dwã. N zɛ̃̀ ń la bɛ pɔr, sǝ bǝ nyɛ̀ɛ̀ dwã zɔ̀mà kùrǝ̀. N wɔ̀ bɛ: ‹À lyì, nyǐnǝ ámyɛ̌ wɔ́ da-byǎ wɛ̀, wɔ́ byè yil á zɛ̃̀ á n'á bwí dwã?› ²⁷ Sǝ mɔ̀bɔ́ ń yà ń nǝ́ ń nwɛ̀nɛ̀ ń dõ mó mó cìrh Muyiisi n ce kwã nɛ́, n wɔ̀: ‹Mɔ̌ ń pɔ mɔ́ nyí bǝ̀ ǹ yál nǝ́ pyɔ̌ ń kǝ́ nǝ́ bùrsì? ²⁸ Ǹ nǝ́ ǹ yǎl ń gu àmyɛ ǹdǝ ǹ gǝ́ gu Ezhibti lò mó dǝ̀lànɛ̀ nɛ́?› ²⁹ Muyiisi gǝ́ nyɛ̀ɛ̀ rǝ̀myɛ́, n dùr n vò cɔ òdù bǝ̀ n'ê byẽ̀ bǝ̀ Majã. N jòm gàà n lù byǎ bǝ̀lyè. ³⁰ «È byinǝ shǝ́-èna yó, màlɛ́ka b'e zhì sɔ̀lɔ̀ wẽ́ gɔ-elũ èpòlò w wǝ, Sǝnǝyi pyɔ̀ w sǝta, e lyí mu. E jà myǐn y'à zhe sɔ̀lɔ̀ w wẽ́. ³¹ Muyiisi gǝ́ nɔ rǝ̀myɛ́, ń wu zɛ̃̀, n twẽ̌ n bwǝlse ń la nyǔ, sǝ ń nyɛ̀ɛ̀ Cinnǝ mú cǝl rǝ̀ wò mò: ³² ‹À wɔ́ ǹ nàmbala bɛ́ Abǝraham ǹdǝ́ Yǝzakɛ ǹdǝ́ Zhakɔɔbɛ Yi.› Ywẽ zɛ̃̀ rǝ̀ zhe Muyiisi ń nǝ́ ń kǝkǝ, ń kǝ́ ń kwàl sǝ n nyǐ gàà yé. ³³ Cinnǝ mú wɔ̀ mɔ̀: ‹Vǔr ǹ nǝ̀cìlǝ̀ né, bǝ̀ jàà y kɛ̀bɛ́ ǹ zhǐ è wẽ́ mó wɔ́ àmyɛ́ jàà. ³⁴ Zhǝ̀nà, à nǝ à dwí rí nɔ̀nɔ̀ w rǝ̀ n'ê nwɛ̀nɛ̀ Ezhibti ní mú. À nyɛ̌ rǝ̀ wɔ́wɔ́lɔ́ mɔ́, sǝ à só tɛ̃́ à la rɛ zõ. Èlǎsɛ̃́ à la mɔ́ tũ̌ Ezhibti ní.› ³⁵ Wɔ́ Muyiisi mú mɔ̀bɔ́ Esǝrayɛl lyì bí y'à zhɔ̃̀, bǝ wɔ̀: ‹Wɔ́ mɔ̌ lò ń pɔ mɔ́ nyí bǝ̀ ǹ yál nǝ́ pyɔ̌ ń kǝ́ nǝ́ bùrsì?› Wɔ́ ńmyɛ̌ mɔ́ cìcì Yi tó màlɛ́ka y è tú e zhì sɔ̀lɔ̀ w wẽ́ e lyí mu mú dɛnnɛ rǝ zwẽ be. ³⁶ Wɔ́ ńmyɛ̌ ń vùr Esǝrayɛl lyì bí Ezhibti ní. Ń wɛ̀rhɛ́ màmyaarhɛ ǹdǝ́ wò-jààrɛ̀ Ezhibti ní, ǹdǝ́ mwǝ̃́ y nánshɔ̃̀ w wẽ́, ǹdǝ́ gɔ-elũ èpòlò w wǝ, byinǝ shǝ́-èna wẽ́. ³⁷ Wɔ́ ńmyɛ̌ mɔ́ gwẽ̌ ń wò Esǝrayɛl lyì bí ni: ‹Yi b'a cír lò mǝ̀dù á wẽ́ n jǐrh rǝ̀ nyì-zwennǝ ǹdǝ àmyɛ́ ta.› ³⁸ Esǝrayɛl lyì bí gǝ́ y'à zhǐ dwã yó gɔ-elũ èpòlò w wẽ́ yi ní, ń yà ń tó ń ŋwɛ́nɛ́. Wɔ́ ńmyɛ̌ dɛnnɛ màlɛ́ka y tó né e zɔ̀m ǹdǝ́ nǝ́ nàmbala bɛ́ Sǝnǝyi pyɔ̀ w yó. Wɔ́ èta ń tó né n mǝ n zwẽ Yi zɔ̀mà nɛ́ nǝ̀ n'ê pɛ nyǔ mú n byili nǝ́ba. ³⁹ «Sǝ nǝ́ nàmbala bɛ́ y'à cẽ, bǝ̀ k'ê t'â yǎl bǝ zwẽ ń nyí rí yé. Bǝ̀ k'â n'ê yǎl bǝ kwɛ̃̀ bǝ vò Ezhibti. ⁴⁰ Bǝ zɛ̃̀ bǝ wɔ̀ Arɔ̃ nɛ: ‹Zwìrhì wẽ̀ rǝ yǝ̀ ǹdǝ yǝ ta rǝ tó nǝ́ yé, bǝ̀ Muyiisi mú mɔ̀bɔ́ ń ce nǝ́ shǝ́r Ezhibti ní mú, nǝ́ yǝ̀l ń gǝ́ tó mǝ̀gã̌ yé.› ⁴¹ Bǝ zɛ̃̀ bǝ zǝ sánǝ́má bǝ zwìrhì ku ǹdǝ nũ̌-bwǝ̀lǝ̀ ta, bǝ m'e wɛ̀rhɛ́ bǝ̀ yi, bǝ zwǝ́l vwĩ̀ bǝ pǝ rɛ. Bǝ zɛ̃̀ bǝ fùù ǹdǝ́ wu-nyɔ̃̀, kɔn dɛ́ dɛ̀bɛ́ bǝ̀ cìcì wɛ̀rhɛ́ ǹdǝ́ bǝ̀ jɛ̀rh mɔ́ yilǝ. ⁴² Yi zɛ̃̀ rǝ pyìrhí rǝ̀ kwã rǝ m'e zǎ bɛ, rǝ yẽ̌ be bǝ̀ n'ê cèrhé cã̀mǝ́sɔ̌sɛ́ sǝ̀ ŋwɛ́nɛ́ dɛ̃̌ yi w mú. Bǝ̀ kɛ̃ Yi nyì-zwennǝ bé sɛ́bɛ́ rɛ́ wẽ́ bǝ wɔ̀: ‹Esǝrayɛl lyì, á pansɛ́ ǹd'á vwàmá nɛ́ á y'ǎ m'á zwǝ́l vwǝ̃̀ né gɔ-elũ èpòlò w wẽ́ byinǝ né shǝ́-èna y wẽ́ mó, wɔ́ àmyɛ́ nɛ á y'ǎ n'á zwǝ́l ne á pɛ nà? È dǝ̀ àmyɛ́ nɛ yé. ⁴³ Wɔ́ yi rí bǝ̀ y'à n'ê byẽ̀ bǝ̀ Mɔlɔkɛ mɔ́ nɛ á zwǝ́l vwǝ̃̀ né á pa. Wɔ́ rǝ̀myɛ́ kòrhó w á y'ǎ n'á zhĩ. Á y'ǎ n'á zhĩ á yi rí á n'á byẽ̀ bǝ̀ Erǝfã mɔ́ myɛ cã̀mǝ́sɔ̀wá yá. Rǝ̀myɛ́ gakó wɔ́ wẽ̀ á zwìrhì á n'á wùlì tɛ̃́ rǝ̀ yé né. Rǝ̀myɛ́ ce, à b'a ce lyì zǝ ába bǝ vò jàà kɛ̀bɛ́ è nyɛ du Babyǝlɔnɛ mɔ́ wẽ́.› ⁴⁴ Nǝ́ nàmbala bɛ́ y'à pú kòrhó gɔ-elũ èpòlò w wǝ. Muyiisi yà ń ce bǝ pú w ǹdǝ Yi gǝ́ y'à byili mu ní. Yi dɔbrɛ́ kùlkṍ w ŋwɛ́nɛ́ ò wẽ́. ⁴⁵ Nǝ́ nàmbala bɛ́ kwã nɛ́, wɔ́ bǝ̀ byǎ bɛ́ nɛ bǝ̀ yẽ̌ kòrhó w òmyɛ́ nɛ bǝ pa, Zhozwe yǝ̀ bǝ̀ yé né, bǝ zǝ w bǝ vò cɔ w kɔ̀bɔ́ Yi y'à bwǝl be ò nyí mú wẽ́. Sǝ Yi jì cɔ w òmyɛ́ mɔ́ lyì bí, rǝ̀ zwẽ bǝ̀ cɔ w rǝ pǝ nǝ́ nàmbala bɛ́ nɛ. Kòrhó w mɛ̃ gàà kɔn m'e yí Dǝvyidi pyɛ̀lɛ̀ rɛ́ jú. ⁴⁶ Dǝvyidi yà ń sú Yi yírh. N zɛ̃̀ n lwǝ̀l lè sɔ́má ń la jàà lú n pǝ Zhakɔɔbɛ Yi rí ni, ⁴⁷ sǝ wɔ́ Salǝmɔ ń tú n lù jì n pǝ rɛ. ⁴⁸ E jà Yi dɛ̃̌ cǝ́bal mɔ́ tá ń zwì jì kɛ̀bɛ́ numbyínsi lù ǹdǝ́ bǝ̀ jɛ̀rh mɔ́ wẽ́ yé. ⁴⁹ Rǝ̀ tó rǝ̀ nyì-zwennǝ mǝ̀dù dɛnnɛ rǝ wɔ̀: ‹Dɛ̃̌ yi rí wɔ́ à dǝ̀gwã́, cɛ y wɔ́ à nǝ̀rh cṹ jàà. Jì dwí tɛ̌ á wɔ̌ á la lú á pɛ̃? Wɔ́ jàà kɛ̌ è b'a yǝ̀ à jòmǝ́ jàà? ⁵⁰ È dǝ̀ àmyɛ́ à wɛ̀rhɛ́ rǝ̀myɛ́ gakó ǹdǝ́ à nà?›» ⁵¹ Ecẽẽ zɛ̃̀ n súlí n wɔ̀ bùrsí gùlú w lyì bí ni: «Á wɔ́ yó-kùùlì cìnǝ́. Á bǝ shɛ̀ Yi zɔ̀mɛ̀ rɛ́ cilu s'á zwẽ nyí yé. Twéé gakó á n'á cẽ Eshirhǝ náàcɛ̀nɛ́ nyí ni ǹdǝ á nàmbala bɛ́ ta. ⁵² Yi nyì-zwennǝ mǝ̀dù ga tɛ̀nɛ́ á nàmbala bɛ́ yǝ̀ nwɛ̀nɛ̀ yé. Bǝ̀ gaga mɔ́ gu byɛ̀bɛ́ bǝ̀ y'à dámǎ bǝ̀ n'ê bwǝ̀l wu-cángá cǝ́bal mɔ́ twírí y yò mó. Èlǎsɛ̃́, wɔ́ wu-cángá cǝ́bal mɔ́ ńmyɛ̌ á myìnì á gu. ⁵³ Yi tó màlɛ́kabá dɛnnɛ rǝ byili ába rǝ̀ nyǝ́ né, sǝ á yǝ̀ nɛ zwẽ yé.» ⁵⁴ Bùrsí gùlú w lyì bí gǝ́ nyɛ̀ɛ̀ rǝ̀myɛ́, bǝ̀ lyimǝ zɛ̃̀ ǹdǝ́ Ecẽẽ, bǝ zɛ̃̀ bǝ̀ n'ê pupwiri tɛ̃́ bǝ̀ m'ê dɔ̀m bǝ̀ yǝ́lǝ́ dwã nɛ. ⁵⁵ Ecẽẽ yà ń sú ǹdǝ́ Eshirhǝ náàcɛ̀nɛ́, n kwẽ̌ ń la dɛ̃̌ nyǔ, n nǝ Yi zùwǝ́ y ǹdǝ́ Yezu ń zhǐ rǝ̀ jǝ̀jĩ́ ni. Ecẽẽ bya n wɔ̀: ⁵⁶ «Nyǐ-nǝ à nǝ dɛ̃̌ yi rí rǝ̀ pul, sǝ à nǝ Numbyíní Byǐ ń zhǐ Yi jǝ̀jĩ́ ni.» ⁵⁷ Bǝ shĩ bǝ̀ zhã̌, bǝ zɛ̃̀ bǝ búbwéé, bǝ tó dwã bǝ dùr bǝ cĩ́ jɛ̃̀ ń yó, ⁵⁸ bǝ zǝ mɔ bǝ du cɔ w wa, bǝ zɛ̃̀ bǝ zǝ nǝ́kulǝ bǝ dul mo bǝ ji tɛ̃́. Sǝ byɛ̀bɛ́ bǝ̀ dul mo mó y'à vùr bǝ̀ gàndɛ́ bǝ cĩ́ tɛ̃́ ébɔ́-dǎl mǝ̀dù nyí ni, ń yíl Swǝǝ. ⁵⁹ Bǝ̀ gǝ́ y'à n'ê dul nǝ́kulǝ né yi ní, Ecẽẽ yà ń nǝ́ ń lwǝ̀l Yi ń zhe: «Cinu Yezu, zwẽ à ywǝ́lǝ́ y Arǝzana wa.» ⁶⁰ N zɛ̃̀ n tu ń nǝ̀dwǝ́nǝ́ yó, n bya n wɔ̀: «Cinu, bǝ̀ká nyǐ lwɛlɛ rɛ́ tɛ̀bɛ́ bǝ̀ n'ê wɛ̀rhɛ́ èta mɔ́ ǹdǝ yò ta yé.» Ń gǝ́ zɔ̀m rǝ̀myɛ́, ń shíshìrhǝ́ né j'á gu.