¹ Dwã nɛ́ nə̀myɛ́ wẽ́ Kristə kwã-lyì bí yó w y'à n'ê súlí. Bə̀ zɛ̃̀ bə̀ gə n'ê tə̀l kùjú w dɛ̃ gakó, Zhwǐfubá byɛ̀bɛ́ bə̀ n'ê zɔ̀m Ebərə mó n'ê swě byɛ̀bɛ́ bə̀ n'ê zɔ̀m gə̀rɛ́kɛ mɔ́ ejə̀nə̀ bé yò. Rə̀myɛ́ ce bə zɛ̃̀ bə̀ n'ê ŋwúŋwùní. ² Rə̀myɛ́ ce, Tùntúmə́ bé zɛ̃̀ bə byẽ̀ Yezu kwã-lyì bí nánjə̀jóló dwã yó bə wɔ̀ bɛ : «Kɔn bə mə̌ sə nə́myɛ̌ yẽ̌ Yi zɔ̀mà rɛ́ bwə̌l ne nə̀k'á n'é tə̀l kùjú yé. ³ Rə̀myɛ́ ce, da-byǎ, cír-nə nunə bwàlpyɛ̀ byɛ̀bɛ́ bə̀ n'ê zɔ̀m bə̀ yil náàcɛ̀nɛ́, bə̀ zhe surhə, bə̀ sú ǹdə́ Eshirhə náàcɛ̀nɛ́, nə́ pə bɛ tum rí rə̀myɛ́, ⁴ sə nə́myɛ̌ zhílí ǹdə́ Yi-co w ǹdə́ Yi zɔ̀mɛ̀ rɛ́ bwə̌l tum rí. ⁵ Lyì bí gakó shɛ̀nɛ́ zɔ̀mɛ̀ rɛ́ tɛ̀bɛ́ tùntúmə́ bé byili mú ; rə̀myɛ́ yó, bə zɛ̃̀ bə cír Ecẽẽ, ń wɔ́ lò mɔ̀bɔ́ ń zhí Yi ni, ń sú ǹdə́ Eshirhə náàcɛ̀nɛ́, ǹdə́ Shilipu, ǹdə́ Pərəkɔrɛ, ǹdə́ Nəkanɔɔrɛ, ǹdə́ Təmɔ̃, ǹdə́ Nəkwəə, Ancɔɔsɛ lyì bal ń yà ń zù Zhwǐfubá Yi-sɔ̀má yá. ⁶ Bə zɛ̃̀ bə zhə bɛ bə bə̀ tùntúmə́ bé sono, bə ce Yi bə̀ yilə, bə zɛ̃̀ bə cĩ́ jɛ̀rh bə̀ yó. ⁷ Rə̀myɛ́ yi ní, dɛ̃ gakó Yi zɔ̀mɛ̀ rɛ́ j'á rə̀ n'ê yí jààsɛ́ gakó wə. Yezu kwã-lyì zɛ̃̀ bə̀ n'ê súlí dɛ̃́dɛ̃́ Zhərəzalɛm nɛ́, vwĩ̀-zwə́lnə nánjə̀jóló shɛ̀nɛ́ bə zwẽ nyí bə zù Kristə. ⁸ Yi y'à cĩ́ bwəl Ecẽẽ yó rə pɔ̃ jàn nánfɔ̀lɔ̀, ń nə́ wɛ̀rhɛ́ màmyaarhɛ ǹdə́ wò-jààrɛ dwí rí wẽ́. ⁹ Rə̀myɛ́ yó né, Zhwǐfubá dwã-gùlú w lyì jàlà byɛ̀bɛ́ bə̀ n'ê wə̀l bə̀ bə̀ nɔ bə̀ cìn-cìnú, bə̀ shí Shərɛnɛ ǹdə́ Alɛsãdəri, e súlí lyì byɛ̀bɛ́ bə̀ shí Shilisi ǹdə́ Azhi tənèsé w mó bə̀ n'ê mà nyə̀-pɔ̌ ǹdə́ mo. ¹⁰ Eshirhə náàcɛ̀nɛ́ gə̀ y'à n'ê pɛ mɔ surhə ń mə́ ń zɔ̀m mɔ́ ce, ń yà ń nə́ ń zɔ̀m ń ji bi tɛ̃́. ¹¹ Bǝ zɛ̃̀ bǝ kɔ̃̀ lyì. Lyì bí bǝ̀myɛ́ mɔ́ wɔ̀: Nǝ́ nyɛ̀ɛ̀ ń nyú w ń nǝ́ ń tùrh Muyiisi ǹdǝ́ Yi ga. ¹² Cɔ w lyì bí ǹdǝ́ náncɛsɛ́ ǹdǝ́ Muyiisi nyǝ́ né byilnǝ bé lyimǝ zɛ̃̀, bǝ zǝ mɔ bǝ m'e vò bùrsí gùlú w nánfɔ̀lɔ̀ w lyì bí yé né, ¹³ bǝ ce lyì dwã myɛ yí bǝ̀ n'ê gòm kɔma bǝ̀ ce ń nyí ni bǝ̀ zhe: Bal mɔ́ mɔ̀bɔ́ já ń nǝ́ ń fulsi Yi jì y ǹdǝ́ Muyiisi nyǝ́ né ga. ¹⁴ Nǝ́ nyɛ̀ɛ̀ ń nyú w ń zɔ̀m bǝ̀ Nazarɛtɛ lyì bal Yezu mà n wǔr Yi jì y n jà n lyǝ́r lùl-epwírí y nyǝ́ né nyɛ̀bɛ́ Muyiisi byili nǝ́ba mɔ́. ¹⁵ Rǝ̀myɛ́ yó, bùrsí gùlú w lyì bí gakó kwẽ̌ bǝ̀ n'ê nyǐ mu shɛ́shɛ́, bǝ pwírí ń yé y nyɛ̌ ǹdǝ màlɛ́ka yé ta.