¹ Bal mǝ̀dù yà ń ŋwɛ́nɛ́ bǝ̀ n'ê byẽ̀ bǝ̀ Ananyaasɛ, ǹdǝ́ ń kɛ̃ Safǝra. Ń yà ń zhe cɛ. Ńmyɛ̌ ǹdǝ́ ń kɛ̃ mɔ́ zɛ̃̀ bǝ zɔ̀m nyí rǝ̀dù n mǝ n yè yǝ̀. ² N bɔ̀n è wársɛ́ n cĩ́, n zɛ̃̀ n zǝ sǝ̀ kùr ré n vò n pǝ tùntúmǝ́ bé ne, sǝ ń kɛ̃ mɔ́ myɛ yà ń yě. ³ Pyɛɛrɛ bwǝ̀rh mò n wɔ̀: «Ananyaasɛ, bǝ̀kɔ́n yil ǹ yẽ̌ Shǝtana zù ǹ wẽ́, e ce ń bɔ̀n cɛ y wársɛ́ kǝ̀kàlà y ń cĩ́, ń zɛ̃̀ ń gõ̀ kɔma ń pǝ Eshirhǝ náàcɛ̀nɛ́ nɛ? ⁴ Ǹ yǝ̀l bǝ̀ ǹ cɛ y y'à wɔ́ ǹmyɛ́ nyǎ nà? Ǹ gǝ́ kǝ́ yè y mó, è wársɛ́ dǝ̀ ǹmyɛ́ ǹ cǐ si nà? Ǹ yà ǹ wɔ̌ ǹ zǝ sɛ ǹ wɛ̀rhɛ́ ǹdǝ ǹ gǝ́ nǝ́ ǹ yǎl nɛ́. È nǝ zɛ̃̀ wɔ́ etǝr ǹ tɛ́rɛ́ nɛ́ ǹ wẽ́ ń mǝ́ twĩ̀ èta mɔ́? Lwar b'è dǝ̀ numbyíní ni ǹ gòm kɔma bɛ́ ń pǝ yé. Wɔ́ Yi ni ǹ gòm ń pa.» ⁵ Ananyaasɛ gǝ́ nyɛ̀ɛ̀ zɔ̀mà nɛ́ nǝ̀myɛ́, n tu tɛ̃́ n cì. Sǝ ywẽ nánfɔ̀lɔ̀ zɔ lyì bí byɛ̀bɛ́ gakó bǝ̀ nyɛ̀ɛ̀ yò w òmyɛ́ mɔ́. ⁶ Ébwá-dàlá bǝ̀ bǝ kwè mò bǝ pyípyílí ǹdǝ́ gɔ̀nɔ̀ bǝ vò bǝ ce. ⁷ Kɔn dɛnɛ ǹdǝ lùr rǝ̀tɔ̀ ta, ń kɛ̃ mɔ́ myɛ bà. Sǝ ń yà ń yǝ̀l kɔn rɛ́ dɛ̀bɛ́ rǝ̀ wɛ̀rhɛ́ mɔ́ yé. ⁸ Pyɛɛrɛ bwǝ̀rh mò n wɔ̀: «Wɔ́ á cɛ y á yè mó wársɛ́ ga èta?» Kɛ̃ mɔ́ wɔ̀: «Wɔ́ sǝ̀ ga.» ⁹ Pyɛɛrɛ zɛ̃̀ n wɔ̀ mɔ̀: «Etǝr á tɛ́rɛ́ nɛ́ á wẽ́, á m'á wɛ̀rhɛ́ nyí rǝ̀dù á pyà Cinu Eshirhǝ y nyí? Lwar bǝ̀ lyì bí byɛ̀bɛ́ bǝ̀ kwè ǹ byal mɔ́ bǝ vò e ce mó zhǐ bwǝ̀rǝ̀ y nyí ni. Bǝ̀ m'a kwè ǹmyɛ bǝ vò bǝ ce.» ¹⁰ N já n tu Pyɛɛrɛ yé né rǝ̀myɛ́ yi ní cìcì n cì. Ébwá-dàlá bɛ́ zù kɛ̀lɛ́ wa, bǝ pwírí ń cùwǝ̀, bǝ kwè mò bǝ vò bǝ ce ń byal mɔ́ nyí ni. ¹¹ Ywẽ nánfɔ̀lɔ̀ zǝ Kristǝ-lyì gùlú w ǹdǝ́ byɛ̀bɛ́ gakó bǝ̀ nyɛ̀ɛ̀ yò w òmyɛ́ mɔ́. ¹² Tùntúmǝ́ bé y'à n'ê wɛ̀rhɛ́ màmyaarhɛ ǹdǝ́ wò-jààrɛ̀ nánzhǝzhɔ̌ lyì bí wẽ́. Sǝ byɛ̀bɛ́ bǝ̀ y'à zù Kristǝ mó gakó y'à n'ê gùlí dwã Yi jì y kɔ̀nɔ́ w wẽ́, Salǝmɔ zɔ́nɔ́ w wa. ¹³ Lò dõ yà ń kwàl bǝ̀ wẽ́ ń nǝ́ ń zwì ní yé, sǝ lyì bí gakó y'à n'ê cèrhé be dɛ̃́dɛ̃́. ¹⁴ Bala ǹdǝ́ kana nánzhǝzhɔ̌ y'à n'ê zwì Cinnǝ mú bǝ̀ súlí bi. ¹⁵ Lyì y'à n'ê zǝ nǝ̀bwànà bǝ̀ twí bǝ̀ cĩ́ sɔ́msɛ́ vɔ̃̀ nɛ̀ pala ǹdǝ́ pyǝ̀ndè wẽ́, mùnì Pyɛɛrɛ gǝ tú ń nǝ́ ń lyɛ̃, sǝ ń sǝ̀sǝ̃̌yùlú w myɛ cìcì círhí bǝ̀ jàlà. ¹⁶ Lyì nánzhǝzhɔ̌ y'à n'ê zǝ nǝ̀bwànà ǹdǝ́ lyì byɛ̀bɛ́ nǝ̀cílsi námmǝlwǎlsɛ zhe, bǝ̀ m'ê shí cɛmɛ nɛ́ nyɛ̀bɛ́ nǝ̀ bwǝ́l ǹdǝ́ Zhǝrǝzalɛm mɔ́ myɛ wẽ́ bǝ̀ twí, sǝ bǝ̀ gakó y'à n'ê wárhá. ¹⁷ Yi jì y vwĩ̀-zwǝ́lnǝ bé yé né cìnǝ́ bé gakó náncɛ y ǹdǝ́ ń kwã-lyì Sadǝsǝnyɛbá gakó zɛ̃̀ tùntúmǝ́ bé yó, bǝ̀ n'ê dùr bǝ̀ bwɛ̃̌. ¹⁸ Bǝ ce bǝ zǝ bɛ lyì bí gakó yírh w bǝ ce byǝ̀nǝ́-jù wǝ̀. ¹⁹ Sǝ cɛ y gǝ́ tú e yìì, Cinnǝ mú màlɛ́ka bǝ̀ e pul byǝ̀nǝ́-jì y bwǝ̀ǝ̀lé, e ce tùntúmǝ́ bé du pwẽ̀ nè, e wɔ̀ bɛ: ²⁰ «Zhǝl-nǝ Yi jì y kɔ̀nɔ́ w wẽ́, á bwǝ̀l nyǔ mǝ̀ t'â la zhɔ̌ zɔ̀mà nɛ́ á byili lyì bí ni.» ²¹ Bǝ zwẽ nyí, bǝ zɛ̃̀ nǝkɔkɔ́lɛ́ shãã shãã bǝ vò bǝ̀ n'ê cèrhè kàrmɔ̀ Yi jì y kɔ̀nɔ́ w wa. Vwĩ̀-zwǝ́lnǝ bé yé né cìnǝ́ bé gakó náncɛ y ǹdǝ́ ń kwã-lyì bí ce bǝ byẽ̀ cɔ w náncɛsɛ́ gakó dwã yó, bǝ jòm bǝ̀ bùrsí gùlú w nánfɔ̀lɔ̀ wá. Bǝ zɛ̃̀ bǝ pǝ nyí bǝ̀ bǝ̀ zhǝl bǝ vùr tùntúmǝ́ bé byǝ̀nǝ́-jù w bǝ m'e bà. ²³ Sǝ lyì bí byɛ̀bɛ́ bǝ̀ twĩ̀ mú gǝ́ yú byǝ̀nǝ́-jì y wǝ, bǝ pwírí tùntúmǝ́ bé tɛ̀nɛ́ yé. Bǝ k'a kwɛ̃̀ bǝ vò bùrsí gùlú w lyì bí yé né, bǝ wɔ̀: ²² «Nǝ́ yú nǝ́ nǝ byɛ̀bɛ́ bǝ̀ n'ê yìlì byǝ̀nǝ́-jì y ni mú bǝ̀ jě è nyí ni. Nǝ́ pwírí bwǝ̀ǝ̀lé gakó sàásɛ náàcɛ̀nɛ́. Sǝ nǝ́ gǝ́ pul bwǝ̀ǝ̀lé, nǝ́ pwírí lò lò tɛ̀nɛ́ byǝ̀nǝ́-jù w yé.» ²⁴ Yi jì y yìlnǝ̀ bé yé né cǝ́bal mɔ́, ǹdǝ́ vwĩ̀-zwǝ́lnǝ bé yé né cìnǝ́ bé gǝ́ nyɛ̀ɛ̀ bǝ̀ tùntúmǝ́ bé tɛ̀nɛ́, rǝ jàr bɛ̀ dɛ̃́dɛ̃́; bǝ zɛ̃̀ bǝ̀ n'ê tɛ́rɛ́ yò w gǝ́ la nɛ́ yál. ²⁵ Lò zɛ̃̀ n bǝ̀ n wɔ̀ bɛ: «Nyǐ-nǝ lyì bí byɛ̀bɛ́ á y'ǎ co byǝ̀nǝ́-jù w mú bǝ̀ ŋwɛ́nɛ́ Yi jì y kɔ̀nɔ́ w wẽ́ bǝ̀ n'ê cèrhè kàrmɔ̀ lyì bí ni!» ²⁶ Yi jì y yìlnǝ̀ bé yé né cǝ́bal mɔ́ ǹdǝ́ ń kwã-lyì bí zɛ̃̀ rǝ̀myɛ́ yó cìcì, bǝ vò bǝ zǝ tùntúmǝ́ bé bǝ k'a m'e bà. Bǝ̀ gǝ́ y'à n'ê dùr ywẽ bǝ̀ lyì bí b'a zǝ nǝ́kulǝ bǝ dul be mó ce, bǝ̀ yǝ̀ tùntúmǝ́ bé jàn wɛ̀rhɛ́ yé. ²⁷ Bǝ̀ gǝ́ zǝ be bǝ bǝ̀ bùrsí gùlú w lyì bí yé né bǝ zhɛ̀, vwĩ̀-zwǝ́lnǝ bé yé né cìnǝ́ bé gakó náncɛ y bwǝ̀rh bè n wɔ̀: ²⁸ «Nǝ́ y'ǎ pɔ ába nyí b'ǎ gǝ la á kàrmɔ́ wɔ̀rhɔ́, s'á bǝ̀k'á k'á byẽ̀ bal mɔ́ mɔ̀bɔ́ yil ré yé. Á zɛ̃̀ á cẽ, á zǝ á kàrmɔ́ mǝ̀myɛ́ mɔ́ á sú Zhǝrǝzalɛm púlǝ́púlǝ́, á zɛ̃̀ á n'á yǎl á cĩ́ ń cu mú yò w nǝ́myɛ̌ yó wǝ!» ²⁹ Pyɛɛrɛ ǹdǝ́ tùntúmǝ́ bé dwã bɛ́ wɔ̀: «Wɔ́ Yi nyí ni nǝ́ mǝ̌ sǝ nǝ́ shɛ̀nɛ́ nɛ́, sǝ è dǝ̀ numbyínsi nyí ni yé. ³⁰ Wɔ́ ámyɛ̌ á pǝpa Yezu mú dǝ̀-jɔrhɔ́ yó á gu, sǝ nǝ́ nàmbala bɛ́ Yi rí bwìrhì mù, ³¹ rǝ zhẽ̌ ń yó dɛ̃̌ ń jě rǝ̀ jǝ̀jĩ́ ni Arǝzana wa, rǝ ce ń wɔ́ pyɔ̌ ǹdǝ́ Zwennǝ, mùnì ga Esǝrayɛl lyì bí pyìrhí bǝ̀ wun bǝ nǝ bǝ̀ yǝ̀-bǝlwàálɛ́ sǔbri. ³² Nǝ́myɛ̌ wɔ́ rǝ̀myɛ́ gakó zhǝ̀n-cínnǝ, nǝ́myɛ̌ ǹdǝ́ Eshirhǝ náàcɛ̀nɛ́ y Yi pɔ byɛ̀bɛ́ bǝ̀ n'ê shɛ̀nɛ́ rǝ̀ nyí ni mú ni mú.» ³³ Bùrsí gùlú w lyì bí gǝ́ nyɛ̀ɛ̀ zɔ̀mà nɛ́ nǝ̀myɛ́, bǝ̀ lyimǝ zɛ̃̀, bǝ zɛ̃̀ bǝ̀ n'ê pyà tùntúmǝ́ bé gu. ³⁴ Bùrsí gùlú w lò mǝ̀dù ń yà ń yíl Gamalǝyǝǝ, ń yà ń wɔ́ Farɛzhɛ̃ɛ̃, n jà ń yà ń wɔ́ Muyiisi nyǝ́ né byilnǝ, lyì bí gakó y'à n'ê nyàm mɔ; ńmyɛ̌ mɔ́ zɛ̃̀ n zhì dɛ̃̌, n wɔ̀ bǝ̀ bǝ̀ ce tùntúmǝ́ bé du pwẽ̀ nè námpɔ́lɛ́. ³⁵ N zɛ̃̀ n wɔ̀ bùrsí gùlú w lyì bí ni: «Esǝrayɛl lyì, dɛ̃̌-na á cìn ǹdǝ́ kɔn dɛ̀bɛ́ á n'á yǎl á wɛ̀rhɛ́ lyì bí byɛ̀bɛ́ nɛ mɔ́. ³⁶ Á cìcì yě bǝ̀ bal mǝ̀dù yà ń fwĩ́ tɛ̃́ kɔn gwẽ̌ bǝ nyɛ yé, ń yà ń yíl Tɛda; ń yà ń zhe bǝ̀ ńmyɛ̌ wɔ́ lyì-fɔ̀lɔ̀. Sǝ bǝ̀ gu mu. Lyì y'à yú ǹdǝ zwã̌-àna ta bǝ̀ n'ê tó mo, sǝ lyì bí bǝ̀myɛ́ mɔ́ gakó làà dwã nɛ. Bǝ̀ k'ê t'â zɔ̀m ń yò yé. ³⁷ Rǝ̀myɛ́ kwã nɛ́, gál mɔ́ yi ní, wɔ́ Gǝlile lyì bal Zhidǝ, ńmyɛ zɛ̃̀ n vwɛ̃ lyì nánzhǝzhɔ̌ bǝ̀ n'ê tó mo; sǝ bǝ̀ gu ńmyɛ. Lyì bí byɛ̀bɛ́ bǝ̀ y'à n'ê tó mo mó gakó làà dwã nɛ. ³⁸ Nyǐ-nǝ kɔn rɛ́ dɛ̀bɛ́ à n'â yǎl a byili ába èlǎsɛ̃́ mɔ́: á bǝ̀k'á ce á cìn byɛ̀bɛ́ èta mɔ́ yò w wẽ́ yé. Yẽ̌-nǝ bǝ vò, bǝ̀ tum rí ǹdǝ́ bǝ̀ tùntwǝ̃̀ǝ̃̀ né gǝ́ wɔ́ numbyínǝ́ nyǝ̀ná, sǝ́ nyǐ nǝ̀ t'â la zhǔ yé. ³⁹ Sǝ nǝ̀ gǝ wɔ́ Yi nyǝ̀ná, sǝ́ nyǐ á wàr nɛ̀ á la cǝ̌r yé. Rǝ̀myɛ́ ce, dɛ̃̌-na á cìnǝ̀, á bǝ̀k'á jǐrh Yi zwǝ̀ yé.» Sǝ bùrsí gùlú w lyì bí shɛ̀nɛ́ tɛ̀bɛ́ ń byili mú. ⁴⁰ Bǝ zɛ̃̀ bǝ k'a byẽ̀ tùntúmǝ́ bé, bǝ ce bǝ mà bɛ̀, bǝ pǝ bɛ nyí, bǝ̀ bǝ̀ bǝ̀k'a k'e zɔ̀m Yezu yò kǝ́dò yé. Bǝ zɛ̃̀ bǝ dwĩ̀ bì. ⁴¹ Tùntúmǝ́ bé zhǐr bùrsí gùlú w lyì bí yé né ǹdǝ́ wu-nyɔ̃̀, bǝ̀ Yi ce bǝ̀ mǝ̌ sǝ bǝ nwɛ̀nɛ̀ bɛ̀, bǝ fulsi bi Yezu yil ré yilǝ. ⁴² Sǝ bǝ̀ y'à cǝ̀ǝ̀lè bǝ̀ n'ê bwǝ̀l yò-ècɔ̀nɔ̀ nyí rí dɛ̃ gakó Yi jì y kɔ̀nɔ́ w wa, ǹdǝ́ kǎlsɛ́ wẽ́, bǝ̀ m'ê byili bǝ̀ wɔ́ Yezu ń wɔ́ Kristǝ mó.