koussoube-marc-lee_act_text

Kǝ̀kàl-fwɛ̀lɛ̀ 4

¹ Yi jì y vwĩ̀-zwǝ́lnǝ bé ǹdǝ́ Yi jì y yìlnǝ bé ǹdǝ́ Sadǝsǝnyɛbá bǝ̀ ǹdǝ́ Pyɛɛrɛ ǹdǝ́ Zhã gwẽ̌ n'ê zɔ̀m ǹdǝ́ lyì bí. ² Bǝ̀ lyimǝ zɛ̃̀ nǝ̀ n'ê yì Pyɛɛrɛ ǹdǝ́ Zhã dɛ̃́dɛ̃́, bǝ̀ gǝ́ n'ê cèrhè kàrmɔ́ lyì bí ni, bǝ̀ n'ê byili bǝ̀ Yezu gǝ́ bwìrhì mú ce cùùrí myɛ m'a bwìrhì mú yilǝ. ³ Bǝ zɛ̃̀ bǝ zǝ Pyɛɛrɛ ǹdǝ́ Zhã. Sǝ cɛ y gǝ́ y'à yìì mú ce, bǝ ce be byǝ̀nǝ́-jù wǝ, bǝ̀ m'ê dɛ̃̀ cǝ-lár. ⁴ Ǹdǝ́ rǝ̀myɛ́ ga, byɛ̀bɛ́ bǝ̀ cili Pyɛɛrɛ ǹdǝ́ Zhã kàrmɔ́ mɔ́ nánzhǝzhɔ̌ zù Kristǝ; sǝ bala bɛ́ y'à mù dwã nɛ bǝ̀ y'à yú nunǝ mɔ̀ɔ̀rhɛ rǝ̀nu. ⁵ E zɛ̃̀ nǝkɔkɔ́lɛ́ y yùwǝ̀, Zhwifubá yó-cìnǝ́ bé ǹdǝ́ náncɛsɛ́, ǹdǝ́ Muyiisi nyǝ́ né byilnǝ bé byẽ̀ dwã Zhǝrǝzalɛm nɛ́, ⁶ bǝ̀myɛ́ ǹdǝ́ vwĩ̀-zwǝ́lnǝ bé yé né cìnǝ́ bé gakó náncɛ y Annɛ, ǹdǝ́ Kǝyifu ǹdǝ́ Alǝsãdǝrɛ, e súlí byɛ̀bɛ́ gakó bǝ̀ ŋwɛ́nɛ́ vwĩ̀-zwǝ́lnǝ bé dwí rí wẽ́, ⁷ bǝ ce bǝ zǝ Pyɛɛrɛ ǹdǝ́ Zhã bǝ bǝ̀ bǝ̀ yé né, bǝ bwǝ̀rh be bǝ wɔ̀: Mɔ̌ lò ń pɔ mɔ́ ŋwɔ̀nɔ́, ráá mɔ̌ lò yil yil á wárh nǝ̀bwɛ̃̀ mɔ́? ⁸ Rǝ̀myɛ́ yó, Pyɛɛrɛ sú ǹdǝ́ Eshirhǝ náàcɛ̀nɛ́, zɛ̃̀ n wɔ̀ bɛ: ⁹ Nǝ́ wɛ̀rhɛ́ cɛ̀nɛ̀ nǝ̀bwɛ̃̀ mǝ̀dù ni. Ámyɛ̌ cɔ w yó-cìnǝ́ bé ǹdǝ́ ámyɛ̌ náncɛsɛ́ zɛ̃̀ á n'á bwǝ̀rh nǝ́ba zà, á la lwar ń gǝ́ tó né n mǝ n wárh. ¹⁰ Ámyɛ̌ gakó, e súlí Esǝrayɛl lyì bí gakó, lwar-na pamparɛ̃ɛ̃ bǝ̀ wɔ́ Nazarɛtɛ lyì bal Yezu Kristǝ mó á pǝpa dǝ̀-jɔrhɔ́ w yó n cì, Yi k'a bwìrhì mu n du cù̀ùri wẽ́ mó, wɔ́ ńmyɛ̌ yil ré jàn yil bal mɔ́ mɔ̀bɔ́ wárh ń zhǐ á yé né. ¹¹ Nyǐ bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ wɔ̀: Wɔ́ nǝ́kulu w kɔ̀bɔ́ jì-lùrnǝ bé vùr bǝ dwĩ̀ kwã nɛ́ mɔ́, ò jǐrh jì y jàn nǝ́kulu wǝ́. Wɔ́ ámyɛ̌ á wɔ́ jì-lùrnǝ bé bǝ̀myɛ́ mɔ́. Wɔ́ Yezu ń wɔ́ nǝ́kulu wǝ́. ¹² Wɔ́ ńmyɛ̌ dúdú ń wɔ̌ ń mà n vwǎrh nǝ́ba. Lũ w púlǝ́púlǝ́ wẽ́, Yi yǝ̀ lò dõ lyì bí ni pɛ ń wɔ̌ ń mà n vwǎrh nǝ́ba yé. ¹³ Pyɛɛrɛ ǹdǝ́ Zhã y'à n'ê zɔ̀m ǹdǝ́ wu-jɔ̀. Bùrsí gùlú w lyì bí j'a pwírí bǝ̀ wɔ́ lyì byɛ̀bɛ́ bǝ̀ yǝ̀ sɛ́bɛ́ cèrhè yé. Rǝ̀myɛ́ jàr bɛ, bǝ zɛ̃̀ bǝ lwar myɛ, bǝ̀ bǝ̀ y'à n'ê tó Yezu ni. ¹⁴ Bǝ nǝ bal mɔ́ ń wárh mɔ́ myɛ ń zhǐ dɛ̃̌ Pyɛɛrɛ ǹdǝ́ Zhã nyí ni. Bǝ̀ k'ê yǝ̀ ŋwɛ̀nɛ́ bǝ lyár bǝ̀ kaka yé. ¹⁵ Bǝ ce bǝ du bùrsí jì y wǝ, bǝ zɛ̃̀ bǝ̀ n'ê zɔ̀m ǹdǝ́ dwã bǝ̀ zhe: ¹⁶ Etǝr nǝ́ b'ǎ wɛ̀rhɛ́ lyì bí byɛ̀bɛ́ nɛ́? Zhǝrǝzalɛm lyì bí gakó yírhǝ́ nɔ màmyɔ w kɔ̀bɔ́ bǝ̀ wɛ̀rhɛ́ mɔ́, ce nǝ́ wàr nyǝ̀-pɔ̌ nǝ́ la mǎ yé. ¹⁷ Sǝ wɔ́ búlǝ́ nǝ́ m'ǎ ji bi, nǝ́ m'é cǝ̀r be, bǝ̀ bǝ̀k'a k'e zɔ̀m Yezu yò ǹdǝ́ lò gaga yé, mùnì lyì bí bǝ̀k'a kwɛrhɛ bǝ nyɛ̀ɛ̀ yò w kɔ̀bɔ́ kǝ́dò yé. ¹⁸ Bǝ zɛ̃̀ bǝ k'a byẽ̀ be, bǝ pǝ bɛ nyí, bǝ̀ bǝk'a k'e zɔ̀m, ráá bǝ cèrhè lyì bí ni Yezu yil ré shò-kwã nɛ́ yé. ¹⁹ Pyɛɛrɛ ǹdǝ́ Zhã wɔ̀ bɛ: È gǝ wɔ́ Yi yil mó, ámyɛ tɛ́rɛ́-na á nyǐ, wɔ́ ámyɛ̌ nyí ni nǝ́ mǝ̌ sǝ nǝ́ shɛ̀nɛ́, ráá wɔ́ Yi nyí ni? ²⁰ È gǝ wɔ́ nǝ́myɛé yilǝ, nǝ́ wàr nǝ́ b'ǎ yẽ̌ kɔn dɛ̀bɛ́ nǝ́ yírhǝ́ nɔwa, nǝ́ zhã̌ j'a nyɛ̀ɛ̀ mɔ́ byilu mú ni yé. ²¹ Bùrsí gùlú lyì bí yǝ̀ kaka nɛ rǝ̀ b'a ce bǝ pǝ bɛ còrhò-tum yé. Bǝ k'e ji bi búlǝ́, bǝ zɛ̃̀ bǝ yẽ̌ be, bǝ̀ lyì bí y'à n'ê cèrhé Yi, kɔn dɛ̀bɛ́ rǝ̀ wɛ̀rhɛ́ mɔ́ yilǝ. ²² Bal mɔ́ mɔ̀bɔ́ bǝ̀ wárh èta mɔ́, yà ń du byinǝ shǝ́-èna, s'e yàl kɔ̀-jàrma lyì bí yilǝ. ²³ Bǝ̀ gǝ́ yẽ̌ Pyɛɛrɛ ǹdǝ́ Zhã nɛ kwã nɛ́, bǝ shǝ́r, bǝ vò bǝ̀ tó-dwã bɛ́ sono, bǝ byili bi nyí rí tɛ̀bɛ́ Yi jì y vwĩ̀-zwǝ́lnǝ bé yé né cìnǝ́ bé ǹdǝ́ náncɛsɛ́ pɔ bɛ mɔ́. ²⁴ Bǝ̀ tó-dwã bɛ́ gǝ́ nyɛ̀ɛ̀ rǝ̀myɛ́, bǝ̀ gakó mù dwã nɛ bǝ̀ n'ê lwǝ̀l Yi bǝ̀ zhe: Cǐnnǝ, ǹmyɛ́ ǹ wɛ̀rhɛ́ dɛ̃̌ ǹdǝ́ cɛ y ǹdǝ́ mwǝ̃́ y ǹdǝ́ wẽ̀ ré tɛ̀bɛ́ gakó rǝ̀ ŋwɛ́nɛ́ rǝ̀ wẽ́ mó, ²⁵ wɔ́ ǹmyɛ́ ǹ tó Eshirhǝ náàcɛ̀nɛ́ dɛnnɛ ń ce nǝ́ nàmbal Dǝvyidi, ń wɔ́ ǹ tùntùnnǝ mó, zɔ̀m n wɔ̀: Byè yil lũ w tǝnèsé lyì bí n'ê ŋwɔ́ŋwɔ̌? Byè yil bǝ̀ n'ê bùl bùlǝ̀ nyɛ̀bɛ́ nǝ̀ bǝ kùr zhe? ²⁶ Lũ w pyǎ bɛ́ gakó zɛ̃̀ bǝ wɛ̀rhɛ́ nyí rǝ̀dù, bǝ̀ la m'e bú ǹdǝ́ Cǐnnǝ mó ǹdǝ́ mɔ̀bɔ́ ǹ cír mó. ²⁷ Zhǝ̀n ga, Erɔɔdɛ ǹdǝ́ Pyǝlatɛ, e súlí lũ w tǝnèsé dwã bɛ́ lyì bí, ǹdǝ́ Esǝrayɛl lyì bí gakó wɛ̀rhɛ́ nyí rǝ̀dù cɔ w kɔ̀bɔ́ wẽ́ bǝ m'e bú ǹdǝ́ ǹ tùntùnnǝ nántwǝ̌ Yezu, mɔ̀bɔ́ ǹ cír mó. ²⁸ Bǝ̀ wɛ̀rhɛ́ èta, bǝ m'e pyìrh kɔn dɛ̀bɛ́ ǹ yà ǹ kɔ́ ń cĩ́ shãã ga ǹdǝ́ ǹ jàn rɛ́, ǹdǝ ǹ gǝ́ nǝ́ ǹ yǎl nɛ́ mɔ́. ²⁹ Cǐnnǝ, nyǐ bǝ̀ gǝ́ n'ê wɛ̀rhɛ́ nǝ́myɛ̌ byɛ̀bɛ́ nǝ́ wɔ́ ǹ tùntùnnǝ bé né èlǎsɛ̃́. Sɛ̃ nǝ́ba nǝ́ bwǝ̀l ǹ zɔ̀mɛ̀ rɛ́ ǹdǝ́ wu-jɔ̀. ³⁰ Cèlè ǹ jɛ̃̀ nǝ́ yó, ń ce nǝ́ wárh nǝ̀bwànà, sǝ nǝ́ wɛ̀rhɛ́ màmyaarhɛ ǹdǝ́ wò-jààrɛ, ǹ tùntùnnǝ nántwǝ̌ Yezu mú yil yilǝ. ³¹ Bǝ̀ gǝ́ lwǝ̀l Yi bǝ zhɛ̀, jàà y kɛ̀bɛ́ bǝ̀ y'à ŋwɛ́nɛ́ è wẽ́ mó j'a zhízhǐ. Bǝ̀ gakó j'a sú ǹdǝ́ Eshirhǝ náàcɛ̀nɛ́, bǝ zɛ̃̀ bǝ̀ n'ê bwǝ̀l Yi zɔ̀mɛ̀ rɛ́ ǹdǝ́ wu-jɔ̀. ³² Lyì bí byɛ̀bɛ́ gakó bǝ̀ y'à zù Kristǝ mó wun ní y'à wɔ́ rǝ̀dù. Bǝ̀ bùlǝ̀ né myɛ y'à wɔ́ rǝ̀dù. Mǝ̀dù ga y'ǎ tá ń wǝ̀l bǝ̀ ńmyɛ̌ kɔn rɛ́ wɔ́ ń dúdú ń cǐ yé. Rǝ̀ y'à wɔ́ bǝ̀ gakó nyǎn. ³³ Tùntúmǝ́ bé y'à n'ê byili zhǝ̀n Cǐnnǝ mó bùrhù mú shò-kwã nɛ́ ǹdǝ́ jàn nánfɔ̀lɔ̀. Sǝ Yi y'à n'ê cĩ́ bwǝl bǝ̀ gakó yó dɛ̃́dɛ̃́. ³⁴ Bǝ̀myɛ́ mǝ̀dù ga yà ń tá ń mwìrì kɔn dɛ̀bɛ́ ń zhe rǝ̀ tum yé, bǝ̀ byɛ̀bɛ́ gakó bǝ̀ y'à zhe cɛrh ǹdǝ́ kǎlsɛ mɔ́ y'à n'ê yè se, bǝ zǝ sǝ̀ wársɛ́ bǝ bà, ³⁵ bǝ pǝ sɛ tùntúmǝ́ bé ne, bǝ tǝ̀ bǝ pǝ lò gakó ne shɛ̀bɛ́ ń zhe sǝ̀ tum mú. ³⁶ Lò mǝ̀dù myɛ yà ń ŋwɛ́nɛ́ bǝ̀ wẽ́ ń yíl Zhozefu, ń yà ń wɔ́ Levyi dwí rí lò, ń shí Shipiri. Tùntúmǝ́ y'à co ń yi-lyéré bǝ̀ Barnabaasɛ: Rǝ̀ kùr wɔ́: Cícírnǝ. ³⁷ Ń yà ń zhe cɛ. N kwè y n yè, n zǝ è wársɛ́ n bǝ̀ n pǝ tùntúmǝ́ bé ne.