¹ Dɛ̃ rǝ̀dù, Pyɛɛrɛ ǹdǝ́ Zhã zɛ̃̀ bǝ tó dwã bǝ̀ la Yi jì wǝ, bǝ̀ la Yi co; yi-kár bɔ̀l w yi-co wǝ́. ² Bal mǝ̀dù yà ń ŋwɛ́nɛ́ ń ná lùl mo gwànà. Twéé gakó, bǝ̀ y'à n'ê kwè mo bǝ̀ twí è cĩ́ Yi jì y kɔ̀nɔ́ w bwǝ̀rǝ̀ y bǝ̀ n'ê byẽ̀ bǝ̀ : Bwǝ̀rǝ̀ náàcɛ̀nɛ́ y mɔ́ nyí ni, ń mǝ́ ń lwǝ̀l wársɛ lyì bí byɛ̀bɛ́ bǝ̀ n'ê zwì Yi jì y w mú ni. ³ Ń gǝ́ nɔ Pyɛɛrɛ ǹdǝ́ Zhã bǝ̀ n'ê lyɛ̃ bǝ̀ la zú, n zɛ̃̀ ń nǝ́ ń lwǝ̀l be kɔna. ⁴ Pyɛɛrɛ ǹdǝ́ Zhã bǝ pyìrhí bǝ nyǐ mu shɛ́shɛ́, bǝ wɔ̀ mɔ: Nyǐ nǝ́ba! ⁵ Bal mɔ́ já n zɛ̃̀ n kwɛrhɛ ń nǝ́ ń nyǐ bi, ń gǝ ń yà ń nǝ́ ń bùl bǝ̀ wɔ́ kɔn bǝ̀ la mɔ pɔ. ⁶ Pyɛɛrɛ zɛ̃̀ n wɔ̀ mɔ: Àmyɛ́ bǝ sánǝ́má ráá sǝ̀byì-kùlì zhe à la mɔ́ pɔ yé. Sǝ kɔn rɛ́ dɛ̀bɛ́ à zhe mó, wɔ́ rǝ̀myɛ́ à la mɔ́ pɔ: Nazarɛtɛ lyì bal Yezu Kristǝ yil ré yilǝ, zɛ̃̀ ń vò. ⁷ N cèlè ń jɛ̃̀ y n zǝ bal mɔ́ jǝ̀jĩ́ ni, n zhẽ̌ mo dɛ̃̌. Rǝ̀myɛ́ yó né cìcì, bal mɔ́ nèsé j'a k'a bǝ̀ sǝ jàà y w náàcɛ̀nɛ́, ⁸ n zɛ̃̀ pá ń zhǐ ń nèsé yó ń nǝ́ ń zhǝ̀lǝ̀. N tó Pyɛɛrɛ ǹdǝ́ Zhã nɛ n zù Yi jì y kɔ̀nɔ́ w wa, ń nǝ́ ń zhǝ̀lǝ̀, ń nǝ́ ń fwɛ̃́, ń mǝ́ ń cèrhé Yi. ⁹ Lyì-zhǎ bɛ́ gakó nǝ mɔ ǹdǝ́ ń nǝ́ ń zhǝ̀lǝ̀ ǹdǝ́ ń mǝ́ ń cèrhé Yi. ¹⁰ Lyì bí gǝ́ lwar bǝ̀ wɔ́ ńmyě ń yà ń nǝ́ ń jòm Yi jì y kɔ̀nɔ́ w bwǝ̀rǝ̀ y bǝ̀ n'ê byẽ̀ bǝ̀ : Bwǝ̀rǝ̀ náàcɛ̀nɛ́ y mɔ́ nyí ni ń lwǝ̀l mó, bǝ̀ wun zɛ̃̀, ywẽ zɛ̃̀ rǝ̀ zhe be, kɔn rɛ́ dɛ̀bɛ́ rǝ̀ wɛ̀rhɛ́ èta mɔ́ yilǝ. ¹¹ Bal mɔ́ kǝ́ ń yǝ̀ Pyɛɛrɛ ǹdǝ́ Zhã kwã nɛ́ kwɛ̃̀ yé. Kɔn jàr lyì-zhǎ bɛ́ dɛ̃́dɛ̃́. Bǝ dùr bǝ vò Pyɛɛrɛ ǹdǝ́ Zhã sono, zɔ́nɔ́ w kɔ̀bɔ́ bǝ̀ n'ê byẽ̀ bǝ̀: Salǝmɔ zɔ́nɔ́ mɔ́ wẽ́. ¹² Pyɛɛrɛ gǝ́ nɔ rǝ̀myɛ́ n wɔ̀ lyì-zhǎ bɛ́ nɛ: Esǝrayɛl lyì, byè yil kɔn rɛ́ rǝ̀ wɛ̀rhɛ́ èta jàr ába? Byè yil á n'á nyǐ nǝ́ba èta ǹdǝ bal mɔ́ wɔ́ nǝ́myɛ̌ sǝ̀pwà jàn, ráá nǝ́ gǝ́ zhí Yi ni ǹdǝ́ nǝ́ wun gakó mó è ce n wárh èta? ¹³ Lwar-na bǝ̀ wɔ́ nǝ́ nàmbala bɛ́, Abǝraham ǹdǝ Yǝzakɛ ǹdǝ́ Zhakɔɔbɛ, ǹdǝ́ bǝ̀ dwã bɛ́ gakó Yi rí rǝ̀ ce rǝ̀ tùntùnnǝ Yezu zùwǝ́ y du. Wɔ́ ámyɛ̌ cìcì á zɔ mɔ á pǝ cɔ w yé né cìnǝ́ bé ne. Pyǝlatɛ yà ń nǝ́ ń yǎl n yẽ̌ mo, sǝ á yǝ̀ shɛ̀nɛ́ yé. ¹⁴ Á zhɔ̃̀ mɔ̀bɔ́ ń wɔ́ Yi lò, n jà ń bǝ dóó zhe mó, á zɛ̃̀ á lwǝ̀l Pyǝlatɛ nɛ n vùr mɔ̀bɔ́ ń wɔ́ lyì-gurnǝ mó byǝ̀nǝ́-jù wǝ̀. ¹⁵ Á ce bǝ gu mɔ̀bɔ́ ń nǝ́ ń pɛ nyǔ mú, sǝ Yi k'a bwìrhì mu n du cùùri wẽ́. Nǝ́myɛ̌ wɔ́ rǝ̀myɛ́ zhǝ̀n-cínnǝ. ¹⁶ Nǝ́ zhí Yezu yil ré ne. Wɔ́ rǝ̀myɛ́ è ce n pǝ jàn bal mɔ́ mɔ̀bɔ́ á na, á j'ǎ yě ń pár èta mɔ́ nɛ. Wɔ́ Yezu ni zhú mú è ce bal mɔ́ ń zhǐ á yé né èta mɔ́ nǝ bǝsàzùlí námpúm. ¹⁷ Zǝ̀nà, da-byǎ, à yě bǝ̀ ámyɛ̌ ǹdǝ́ á yó-cìnǝ́ bé ga yǝ̀l kɔn dɛ̀bɛ́ á wɛ̀rhɛ́ Yezu ni èta mɔ́ kùr yé. ¹⁸ Sǝ Yi tó rǝ̀myɛ́ dɛnnɛ rǝ pyìrh kɔn dɛ̀bɛ́ rǝ̀ y'à tó rǝ̀ nyì-zwennǝ bé gakó dɛnnɛ rǝ byili mú. Rǝ̀ byili bǝ̀ kɔn wɔ́ nyɔ́ɔ́ bǝ̀ Kristǝ mó mà n nwɛ̀nɛ̀. ¹⁹ Rǝ̀myɛ́ ce, pyìrhí-nǝ á wun, s'á k'á bǝ̀ Yi sono, mùni rǝ pǝ ába á yǝ̀-bǝlwàálɛ́ sǔbri. ²⁰ Èta, Cǐnnǝ mó mà n twĩ̀ Kristǝ n bǝ̀ n súlí á jàn. Wɔ́ ńmyɛ̌ ń wɔ́ Zwennǝ mó ń yà ń tɛnɛ á yil mó. ²¹ Ń gwẽ̌ mà n jòm Arǝzana w kɔn m'e yí kɔn gakó gǝ tú è kwɛrhɛ. Yi tó rǝ̀ nyì-zennǝ bé dɛnnɛ rǝ byili rǝ̀myɛ́ shãã shãã ga. ²² Muyiisi yà ń wòwǝ̀: Cǐnnǝ à Yi rí mà n cír lò á wẽ́ n jǐrh ń nyì-zwennǝ ǹdǝ àmyɛ́ ta, s'á cili kɔn tɛ̀bɛ́ gakó ń la ába byilu mú. ²³ Lò mɔ̀bɔ́ gakó ń gǝ yǝ̀ nyì-zennǝ mó ńmyɛ̌ zɔ̀mà nɛ́ zwẽ, bǝ̀ m'a vùr mo Yi dwí rí wẽ́ bǝ gu. ²⁴ Pyɛɛrɛ súlí n wɔ̀: Yi nyì-zwennǝ bé byɛ̀bɛ́ gakó bǝ̀ lyɛ̃, kɔn zhì Samǝwǝǝ ǹdǝ́ byɛ̀bɛ́ bǝ̀ yàl yàl nyí-zwennǝ ń kwã nɛ́ mɔ́ gakó jɛ̀rɛ̀ bǝ zɔ̀m kɔn rɛ́ dɛ̀bɛ́ rǝ̀ n'ê wɛ̀rhɛ́ dwã nɛ́ nyɛ̀bɛ́ wẽ́ mó yò. ²⁵ Kɔn rɛ́ dɛ̀bɛ́ Yi y'à tó rǝ̀ nyì-zwennǝ bé dɛnnɛ rǝ bwǝl rǝ̀ nyí wɔ́ ámyɛ̌ ylǝ. Nyǐ á twǝ́r ŋwɛ́nɛ́ dɔbrɛ́ Yi zɔ ǹdǝ́ á nàmbala bɛ́ mɔ́ myɛ wẽ́. Rǝ̀ zɔ̀m ǹdǝ́ Abǝraham rǝ wɔ̀: À b'a tó ǹ nɛ̀mɛ́ nɛ́ dɛnnɛ a cĩ́ bwǝl lũ w lyì bí gakó yó wǝ. ²⁶ Lwar-na bǝ̀ è jɛ̀rɛ̀ wɔ́ ámyɛ̌ yil Yi byẽ̀ rǝ̀ tùntùnnǝ mó, rǝ zɛ̃̀ rǝ twĩ̀ mu á sõ, mùnì n cĩ́ bwǝl á yó, sǝ n ce á mǝ̀dù mǝ̀dù gakó pyìrhí ń wu n yẽ̌ ń tùntùm-bǝjǝ́ǝ́lé ne.