¹ Rǝ̀myɛ́ kwã nɛ́, bǝ zɛ̃̀ bǝ pǝ nǝ́ba sɔ́má bǝ̀ nǝ́ zhǝl nǝ́ zù bǔ-bwǝl nǝ́ byɛrhɛ nǝ́ vò Yitǝlyi. Bǝ ce Pwǝǝ ǹdǝ́ byǝ̀nǝ́-jì lyì dwã màngɛlɛ́ tó shǝ̀dɛ́ɛ́sɛ zɔ̌m yó-cǝ́bal mǝ̀dù ń yíl Zhilyuusi ni. Ńmyɛ̌ ǹdǝ́ ń shǝ̀dɛ́ɛ́sɛ́ ŋwɛ́nɛ́ gùlú w kɔ̀bɔ́ bǝ̀ y'à n'ê byẽ̀ bǝ̀ «Orɔm pyɔ̌ shǝ̀dɛ́ɛ́sɛ» mɔ́ wẽ́. ² Nǝ́ yí nǝ́ nǝ bǔ-bwǝl rǝ̀dù rǝ̀ y'à shí cɔ w kɔ̀bɔ́ bǝ̀ n'ê byẽ̀ bǝ̀ Adǝrǝmyiiti mú, rǝ̀ n'ê zhǐr rǝ̀ la Azhi tǝnà y cɛmɛ nɛ́ nyɛ̀bɛ́ nǝ̀ bwǝ́l nǝ̀-fɔ̀lɔ̀ w nɛ mɔ́ wa. Masɛdwanɛ tǝnà y cɔ w bǝ̀ n'ê byẽ̀ bǝ̀ Tesǝloniki mú lyì bal mǝ̀dù yà ń tó nǝ́ba. Ń yíl Arǝsǝtarkɛ. ³ È zɛ̃̀ nǝkɔkɔ́lɛ́ yá, nǝ́ yí Shǝdɔ̃. Zhilyuusi yà ń zhe Pwǝǝ náàcɛ̀nɛ́. N pɔ̃ sɔ́má n vò n nǝ ń dɔwabá, bǝ sɛ̃ mɔ ǹdǝ́ kɔn dɛ̀bɛ́ ń zhe rǝ̀ tum. ⁴ Rǝ̀myɛ́ kwã nɛ́, nǝ́ zhǐr gàà nǝ́ la, sǝ nǝ́ pwírí zho w zǎ né yé. Rǝ̀myɛ́ ce, nǝ́ k'á byǝ́byɛ́lɛ́ nǝ́ tó cɔ w ò ŋwɛ́nɛ́ nɛ̃̌ mɔ́ cǝcǝl w ò yíl Shipiri mú kwã nɛ́. ⁵ Nǝ́ lyɛ̃ nǝ́ tó nɛ̃̌ mɔ́ w kɔn zǎ Shilishi tǝnà y ǹdǝ́ Pǝ̃fyili tǝnà y sǝta nǝ́ m'é yí Myǝra, Lyisi tǝnà y wa. ⁶ Shǝ̀dɛ́ɛ́sɛ yó-cǝ́bal mɔ́ nǝ bǔ-bwǝl rǝ̀dù gàà rǝ̀ y'à shí cɔ w bǝ̀ n'ê byẽ̀ bǝ̀ Alɛsãdǝri mú, rǝ̀ n'ê zhǐr rǝ̀ la Yitǝlyi, n já n ce nǝ́ zù rǝ̀myɛ́. ⁷ Nǝ́ wɛ̀rhɛ́ dwã nánzhǝzhɔ̌ ǹdǝ́ bǔ-bwǝl ré n'ê zhǝ̀l námpɔ́lɛ́ námpɔ́lɛ́. Nǝ́ nwɛ̀nɛ̀ nwɛ̀nɛ̀ nǝ́ b'ě bwǝlse cɔ w kɔ̀bɔ́ bǝ̀ n'ê byẽ̀ bǝ̀ Ciniidi mú. Zho w gǝ́ y'à zǎ nǝ́ yé mó ce, nǝ́ k'á tó jàà èdù sǝta è yíl Salǝmɔnnɛ. Nǝ́ lyɛ̃ nǝ́ byǝ́byɛ́lɛ́ nǝ́ tó cɔ w ò ŋwɛ́nɛ́ nɛ̃̌ mɔ́ cǝcǝl w bǝ̀ n'ê byẽ̀ bǝ̀ Kǝrɛtɛ mɔ́ kwã nɛ́. ⁸ Nǝ́ kwè Kǝrɛtɛ bù-cǔ w dwɛ̀lɛ̀, nǝ́ nwɛ̀nɛ̀ nwɛ̀nɛ̀ ǹdǝ́ bǔ-bwǝl ré nǝ́ vò nǝ́ yí jàà èdù bǝ̀ n'ê byẽ̀ bǝ̀ «Bǔ-bwǝlǝ zhǔ jàà kɛ̀bɛ́ è càn». Jàà y èmyɛ́ ǹdǝ́ cɔ w kɔ̀bɔ́ bǝ̀ n'ê byẽ̀ bǝ̀ Lazɛ mɔ́ bwǝ́l dwã nɛ. ⁹ Nǝ́ gǝ́ dɛnɛ mɔ́ ce, yi-byíní cànà y nyì-lyõṍ w y'à lyɛ̃. Kɔn zɛ̃̀ e jǐrh zwini ǹdǝ́ bǔ-bwǝl m'e vò jàà wà. ¹⁰ Pwǝǝ zɛ̃̀ n wɔ̀: «À lyì, à yě bǝ̀ zwini la nɛ́ yál dɛ̃́dɛ̃́ sɔ́má y yó. Bǔ-bwǝl ré ǹdǝ́ wẽ̀ ré tɛ̀bɛ́ rǝ̀ ŋwɛ́nɛ́ rǝ̀ wẽ́ mó la zhìlù. Sǝ nǝ́myɛ̌ cìcì mú gǝ yǝ̀ dɛ̃̀, nǝ́ t'á la lú yé.» ¹¹ Shǝ̀dɛ́ɛ́sɛ yó-cǝ́bal mɔ́ yà ń zhe lò mó mɔ̀bɔ́ ń nǝ́ ń dùr bǔ-bwǝl ré mó ǹdǝ́ bǔ-bwǝl ré cǝ́bal mɔ́ zhǝ̀n du Pwǝǝ zɔ̀mà nɛ́. ¹² Kɔn súlí myɛ, è gǝ́ y'à wɔ́ wàr yi mú ce, bǝ̀ y'à wàr bǝ̀ b'a mɛ̃ jàà y èmyɛ́ wẽ́ yé. Wɔ́ rǝ̀myɛ́ è ce, lyì bí byɛ̀bɛ́ bǝ̀ y'à ŋwɛ́nɛ́ bǔ-bwǝl ré wẽ́ mó nánzhǝzhɔ̌ y'à n'ê yǎl sǝ bǝ zhǐr gàà ǹdǝ́ kɔn gǝ wɔ̌, sǝ bǝ lyɛ̃ bǝ yí bǔ-bwǝlǝ jàà dõ wǝ. Bǝ̀ n'ê byẽ̀ jàà y èmyɛ́ bǝ̀ Fǝnishi. Èmyɛ ŋwɛ́nɛ́ Kǝrɛtɛ nɛ́. È zǎ yi-zùr sǝta. Wɔ́ gàà bǝ̀ y'à n'ê yǎl bǝ mɛ̃ nɛ́ bǝ dɛ̃̀ wàr yi rí gǝ tú è lyɛ̃. ¹³ Rǝ̀myɛ́ yi ní, zho zɛ̃̀ o shí nǝ́ jǝ̀gwã̀ nɛ̀ ò n'ô ce námpɔ́lɛ́ námpɔ́lɛ́. Lyì bí byɛ̀bɛ́ bǝ̀ ŋwɛ́nɛ́ bǔ-bwǝl ré w mó pwírí kɔn b'a yǝ̀ ǹdǝ bǝ̀ gǝ́ n'ê yǎl nɛ́. Bǝ j'a zhǐr ǹdǝ́ bǔ-bwǝl ré bǝ kwè Kǝrɛtɛ bù-cǔ w dwɛ̀lɛ̀ bǝ̀ m'ê la. ¹⁴ Nǝ́ gǝ́ zhǐr námpɔ́lɛ́, zho nánfɔ̀lɔ̀ k'a shí nǝ́ jǝ̀jĩ́ ni, Kǝrɛtɛ pyàr rɛ́ sǝta, o zɛ̃̀ ò n'ô ce. ¹⁵ Zho w j'a zǝ bǔ-bwǝl ré ò la. O ce rǝ̀ k'ê wàr sǝ rǝ zǎ nǝ́ gǝ́ y'ǎ n'é yǎl má yé. O j'a zǝ nǝ́ba ò m'ô la. ¹⁶ Cǝ-bwɛ̀lɛ́ èdù ŋwɛ́nɛ́ nɛ̃̌ mɔ́ cǝcǝl wǝ, è yíl Kɔda. Nǝ́ vò nǝ́ tó è sǝta nǝ́ r'é lyɛ̃. Bǔ-bwǝl námpɔ́lɛ́ y'à lyẽ nánfɔ̀lɔ̀ w kwã ǹdǝ́ nyínsi lyì bí zõ yilǝ. Sǝ nǝ́ gǝ́ yú cǝ-bwɛ̀lɛ́ y èmyɛ́ sǝta, e cǝ̀r zho w yé ne, ce nǝ́ ŋwɛ̀nɛ́ nǝ́ nwɛ̀nɛ̀ nwɛ̀nɛ̀ nǝ́ vwɛ̃ vwɛ̃ bǔ-bwǝl ré námpɔ́lɛ́ yá, ¹⁷ nǝ́ kwè y nǝ́ cĩ́ nánfɔ̀lɔ̀ w wa. Lyì bí byɛ̀bɛ́ bǝ̀ n'ê dùr rè mó zɛ̃̀ bǝ zǝ nyínsi bǝ lyẽ nánfɔ̀lɔ̀ wá, bǝ zɛ̃̀ bǝ̀ n'ê bùl bǝ̀ bǔ-bwǝl ré gǝ è bwǝlse nyɔ̀rhɔ́ w ò ŋwɛ́nɛ́ Lyibyi bù-cǔ w sǝta mɔ́ nɛ. Ywẽ zɛ̃̀ rǝ̀ zhe be bǝ̀, dɛ̀ga rǝ̀ b'a yí nyɔ̀rhɔ́ w nɛ rǝ tu. Dɔ̌ nánfɔ̀lɔ̀ òdù y'à ŋwɛ́nɛ́ rǝ̀ wẽ́. Ywẽ ré ce bǝ lyẽ w bǔ-bwǝl ré ne, bǝ ji nɛ̃̌ mɔ́ wa, o zǝ rɛ o zǎ zho w gǝ́ la mǝ̀gã̌ mɔ́. ¹⁸ Zho w j'a gwẽ̌ cǝ̀ǝ̀lè ò n'ô nwɛ̀nɛ̀ nǝ́ba dɛ̃́dɛ̃́, rǝ̀myɛ́ zɛ̃̀ nǝkɔkɔ́lɛ́ yá, lyì bí zɛ̃̀ bǝ̀ n'ê vùr wẽ̀ ré tɛ̀bɛ́ rǝ̀ ŋwɛ́nɛ́ bǔ-bwǝl ré wẽ́ mó bǝ̀ lwé nɛ̃̌ mɔ́ wa. ¹⁹ È lyẽ̌ yùwǝ̀, bǝ pwà bǔ-bwǝl ré cìcì wu w wẽ̀ ré bǝ dwĩ̀ nɛ̃̌ mɔ́ wa. ²⁰ Nǝ́ wɛ̀rhɛ́ dwã nánzhǝzhɔ̌ ǹdǝ́ yi rí yǝ̀ dwi lò nǝ rɛ ǹdǝ́ ń yírh yé; cã̀mǝ́sɔ̀wá myɛ yǝ̀ dwi cǝcɛ̃ nɛ lò nǝ y ǹdǝ́ ń yírh yé. Zho w y'à gwẽ̌ n'ô ce dɛ̃́dɛ̃́. Rǝ̀myɛ́ ce, nǝ́ y'ǎ k'é t'á bùl bǝ̀ nǝ́ b'ǎ lú gaga yé. ²¹ Lyì bí byɛ̀bɛ́ bǝ̀ y'à ŋwɛ́nɛ́ bǔ-bwǝl ré wẽ́ mó j'a dɛnɛ ǹdǝ́ kùjú jú. Rǝ̀myɛ́ yó, Pwǝǝ zɛ̃̀ n zhì lyì bí gakó yé né n wɔ̀ bɛ: «À lyì, á gǝ y'ǎ cili à zɔ̀mà nɛ́, nǝ́ mɛ̃ Kǝrɛtɛ nɛ́, nǝ́ y'ǎ t'á la zwini rí tɛ̀bɛ́ nɔ yé, wẽ̀ ré tɛ̀bɛ́ rǝ̀ jé mó myɛ y'à t'â la jó yé. ²² Sǝ èlǎsɛ̃́, à n'â lwǝ̀l ába s'á zǝ á wun, bǝ̀ lò mǝ̀dù ga tá ń la cú á wẽ́ yé. Bǔ-bwǝl ré dúdú rǝ̀ m'a jé. ²³ Yi rí tɛ̀bɛ́ à n'â cèrhé, rǝ̀ cǐ ni mú twĩ̀ rǝ̀ màlɛ́ka cǝcɔ̃ wa, ²⁴ e wɔ̀ nɛ̀: ‹Pwǝǝ, bǝ̀ká dùr ywẽ yé. Bǝ̀ m'a zǝ mɔ́ bǝ vò bǝ m'e bùr Orɔm pyɔ̌ mɔ́ yé né. Yi m'a tǝ̀ ǹmyɛ́ yil rǝ ce lyì bí byɛ̀bɛ́ bǝ̀ tó mó bǝ̀ ŋwɛ́nɛ́ bǔ-bwǝl ré wẽ́ mó gakó lú.›» ²⁵ N súlí n wɔ̀ bɛ: «Rǝ̀myɛ́ ce, à lyì, zǝ-na á wun, b'à yě pamparɛ̃ɛ̃ bǝ̀ dɛ̀bɛ́ Yi byili ni mú b'a yǝ̀ zhǝ̀nà. ²⁶ Sǝ cɔ òdù ŋwɛ́nɛ́ nɛ̃̌ mɔ́ cǝcǝl wǝ. Nɛ̃̌ mɔ́ b'a dul bǔ-bwǝl ré ò bù-cǔ w yó, ǹdǝ́ nǝ́ ga.» ²⁷ Dwã shí ǹdǝ́ nǝ̀na ǹdǝ́ nǝ́ ŋwɛ́nɛ́ nǝ̀-fɔ̀lɔ̀ w wẽ́, zho w y'à n'ô lyɛ̀ɛ̀ nǝ́ba. Èmyɛ́ cǝcɛ̃ y wẽ́, cɛ y gǝ́ tú e swǝl, lyì bí byɛ̀bɛ́ bǝ̀ n'ê dùr bǔ-bwǝl ré mó y'à n'ê bùl bǝ̀ rǝ̀ bwǝlse cɛ y nɛ. ²⁸ Bǝ zɛ̃̀ bǝ kwè nyíní y è y'à ŋwɛ́nɛ́ bǔ-bwǝl ré wẽ́, bǝ̀ lyẽ cɔ̀bɔ́ nɛ mɔ́, bǝ ji nɛ̃̌ mɔ́ w bǝ m'e myɛrhɛ mǝ̀ lyìmì rí. Bǝ pwírí mǝ̀ lyìmì rí yú mɛ́tǝrɛ shǝ́-ètɔ̀ ǹdǝ́ bwàlpyɛ̀. Bǝ̀ gǝ́ twẽ̌ bǝ yí yé né námpɔ́lɛ́, bǝ k'e myɛrhɛ nɛ̃̌ mɔ́ lyìmì rí, bǝ pwírí rǝ̀ bɔ̀, rǝ jǐrh mɛ́tǝrɛ shí-èlyè ǹdǝ́ lyɛlɛ. ²⁹ Ywẽ y'à zhe be, bǝ̀ dɛ̀ga bǔ-bwǝl ré b'a zhǝ̀r nǝ̀myìn-pyàr nɛ̀. Bǝ zɛ̃̀ bǝ kwè nyínsi sǝ̀na sǝ̀ y'à ŋwɛ́nɛ́ bǔ-bwǝl ré wẽ́, bǝ̀ lyẽ cǝ̌brɛ nánfwààlɛ̀ nɛ́, bǝ zǝ rɛ bǝ lyẽ bǔ-bwǝl ré kwã nɛ́ bǝ ló nɛ̃̌ mɔ́ wa, mùnì ga bǔ-bwǝl ré ŋwɛ̀nɛ́ rǝ zhì, bǝ̀ m'ê dɛ̃̀ cǝ-lár ǹdǝ́ cǝ̀cɔ̀rɔ́. ³⁰ Lyì bí byɛ̀bɛ́ bǝ̀ n'ê dùr bǔ-bwǝl ré mó y'à n'ê yǎl bǝ shǝ́r bǝ dùr mùnì ga bǝ lú. Bǝ zɛ̃̀ bǝ shèè bǝ vùr bǔ-bwǝl ré námpɔ́lɛ́ y bǝ ji nɛ̃̌ mɔ́ wa, bǝ zɛ̃̀ bǝ̀ n'ê wɛ̀rhɛ́ ǹdǝ wɔ́ cǝ̌brɛ dwã bǝ̀ la bǔ-bwǝl ré yé né lyõ bǝ ló nɛ̃̌ mɔ́ wẽ́ ta. ³¹ Pwǝǝ wɔ̀ shǝ̀dɛ́ɛ́sɛ́ ǹdǝ́ sǝ̀ yó-cǝ́bal mɔ́ nɛ: «Á gǝ yẽ̌ lyì bí byɛ̀bɛ́ èta mɔ́ shǝ́r bǔ-bwǝl ré wǝ, á t'á la lú yé.» ³² Shǝ̀dɛ́ɛ́sɛ́ zɛ̃̀ sǝ gõ̀ nyínsí shɛ̀bɛ́ sǝ̀ lyẽ bǔ-bwǝl ré námpɔ́lɛ́ y nɛ mɔ́, nɛ̃̌ mɔ́ zǝ rɛ mǝ lyɛ̃. ³³ Pwǝǝ zɛ̃̀ n wɔ̀ lyì bí gakó ne ǹdǝ́ cɛ y gwẽ̌ yǝ̀ lɛ́, bǝ̀ bǝ̀ jí kùjú. Ń wòwǝ̀: «Á gǝ́ n'á dɛ̃̀ bǝ̀ zho w kwi mú, zà wɔ́ dwã shí ǹdǝ́ nǝ̀na, ǹd'á gwẽ̌ yǝ̀ kùjú á nyú w ce yé. ³⁴ A zɛ̃̀ à n'â lwǝ̀l ába s'á jí kùjú á b'á zwẽ á myǝ̌l ré, b'ǎ mǝ̀dù ga ywǝ́ èdù myɛ cìcì t'â la tɛ̃́ tu yé.» ³⁵ Ń gǝ́ wò èta, n zɛ̃̀ n kwè búrú, n ce Yi nǝ̀bán lyì bí gakó yé né, n zɛ̃̀ n kǝ́ w dwã w ń nǝ́ ń dɔ̀mà. ³⁶ Bǝ̀ gakó wun za, bǝ̀myɛ zɛ̃̀ bǝ jí kùjú. ³⁷ Sǝ nǝ́myɛ̌ byɛ̀bɛ́ nǝ́ y'ǎ ŋwɛ́nɛ́ bǔ-bwǝl ré wẽ́ mó gakó y'ǎ wɔ́ nunǝ zwã̌-àlyè ǹdǝ́ shǝ́-shàlpyɛ̀ ǹdǝ́ bwǝ̀ldù. ³⁸ Bǝ̀ gǝ́ jú bǝ sú, bǝ pwà jíjí-ywǝ́ǝ́lé bǝ ló nɛ̃̌ mɔ́ wa, mùnì ga bǔ-bwǝl ré jǐrh fúlǝ́ǝ́. ³⁹ Cɛ y gǝ́ lɔ́wá, byɛ̀bɛ́ bǝ̀ n'ê dùr bǔ-bwǝl ré mó nǝ bù-cǔ wǝ́, sǝ bǝ̀ y'à yǝ̀l bù-cǔ w òmyɛ́ mɔ́ pár yé. Bǝ zɛ̃̀ bǝ nǝ nǝ̀-fɔ̀lɔ̀ w gɔ́gwã́ èdù ǹdǝ́ nyɔ̀rhɔ́ ò pyě dǝ̀dóló nɛ̃̌ mɔ́ wa, sǝ bǝ̀ y'à n'ê yǎl ǹdǝ́ bǝ̀ gǝ wɔ̌ sǝ bǝ zǝ bǔ-bwǝl ré bǝ yí gàà, sǝ bǝ ce rǝ zhì. ⁴⁰ Bǝ zɛ̃̀ bǝ lwǝ̌r cǝ̌brɛ́ bǝ ló mwǝ̃́ y wǝ, bǝ j'a zhízhílí bǝ bwèlé bǔ-bwǝl ré nǝ̀núsí nyínsí, bǝ zɛ̃̀ bǝ twẽ̌ bǔ-bwǝl ré kàmǝ̀-jɛ̃̀ y nánfwɛ̀lɛ̀ y e bǝ̀ dɛ̃̌, zho w zɛ̃̀ ò n'ô cìrh rè rǝ zǎ nyɔ̀rhɔ́ w sǝta. ⁴¹ Nɛ̃̌ mɔ́ y'à n'ê dùr mǝ̀ jǝl dwã jàà èdù wẽ́, sǝ mǝ̀ y'à pwà nyɔ̀rhɔ́ mǝ cĩ́ dwã yó gàà. Bǔ-bwǝl ré gǝ́ yú gàà, rǝ̀ yé y mɔ́rh. Rǝ̀ k'ê wàr sǝ rǝ twẽ̌ yé, sǝ nǝ̀-zha y y'à n'ê wǔr rǝ̀ kwã yá. ⁴² Shǝ̀dɛ́ɛ́sɛ́ zɛ̃̀ sǝ̀ n'ê yǎl sǝ gu byǝ̀nǝ́-jì lyì bí, mùnì mǝ̀dù ga bǝ̀ká n tu nɛ̃̌ mɔ́ wẽ́ n ŋwɛ̀nɛ́ n yɛ n jé yé. ⁴³ Sǝ shǝ̀dɛ́ɛ́sɛ́ yó-cǝ́bal mɔ́ gǝ́ yà ń nǝ́ ń yǎl n zwẽ Pwǝǝ mó ce, ń yǝ̀ shɛ̀nɛ́ sǝ gu bi yé. N pǝ nyí shǝ̀dɛ́ɛ́sɛ́ ǹdǝ́ byǝ̀nǝ́-jì lyì bí ga nɛ, bǝ̀ byɛ̀bɛ́ bǝ̀ gǝ yě nɛ̃̌ yɔ, sǝ bǝ zɛ̃̀ bǝ fwɛ̃́ nɛ̃̌ mɔ́ wa, bǝ vò bù-cǔ w ni, ⁴⁴ sǝ byɛ̀bɛ́ bǝ̀ dàl mɔ́ zǝ táàbàr, ráá bǔ-bwǝl ré yǝywaalɛ́ rǝ̀ dàl mɔ́ bǝ m'e vò. Wɔ́ èta nǝ́ wɛ̀rhɛ́ nɛ́ nǝ́ b'é ŋwɛ̀nɛ́ nǝ́ yí bù-cǔ w ni sǝ nǝ́ gakó lú.