¹ Nǝ́ gǝ́ lú nǝ́ zhɛ̀, nǝ́ zɛ̃̀ nǝ́ lwar bǝ̀ cɔ w ò ŋwɛ́nɛ́ nǝ̀-fɔ̀lɔ̀ w cǝcǝl w mó yíl Maltɛ. ² Sǝ ò lyì bí zɔ nǝ́ba náàcɛ̀nɛ́. Dwà y'à n'ê nywɛ̀. Rǝ̀myɛ́ ce wàr rɛ́ y'à ŋwɛ́nɛ́. Bǝ zɛ̃̀ bǝ jéé myǐn tɛ̃́, bǝ byẽ̀ nǝ́ba, nǝ́myɛ̌ ǹdǝ́ bǝ̀myɛ́ ga kǝ́kɛ́lɛ́ mɔ nǝ́ r'é ywǝ̀lǝ̀. ³ Pwǝǝ zɛ̃̀ n pwà dǝ̀-bwàálɛ ń la myǐn mú w co, sǝ́ nyǐ kùwǝ̀ y'à ŋwɛ́nɛ́ dǝ̀-bwàálɛ́ wa. Myǐn mú lumi rí gǝ́ kwǝ̀l yǝ̀, e j'a shǝ́r e byǝ́byɛ́lɛ́ ń jɛ̃̀ nɛ̀. ⁴ Cɔ w lyì bí gǝ́ nɔ kùwǝ̀ y è byǝ́byɛ́lɛ́ ń jɛ̃̀ y nɛ, bǝ zɛ̃̀ bǝ̀ n'ê zɔ̀m ǹdǝ́ dwã bǝ̀ zhe: «Dǒ dǒ myɛ bal mɔ́ mɔ̀bɔ́ mà n yǝ̀ lyì-gurnǝ. Ń lú nǝ̀-fɔ̀lɔ̀ w wa, sǝ ǹdǝ́ rǝ̀myɛ́ ga, Yi gǝ́ wɔ́ cángá mɔ́ ce, rǝ̀ t'â yǎl bǝ̀ ń yál nɛ́ yé.» ⁵ Pwǝǝ zhɛ́rhɛ́ kùwǝ̀ y n ji myǐn mú wǝ, sǝ è yǝ̀ mɔ kaka wɛ̀rhɛ́ yé. ⁶ Bǝ̀ gakó y'à n'ê bùl bǝ̀ ń mà n nyǝ̀lɛ̀, ráá ń mà n tu tɛ̃́ n já n cì. Sǝ bǝ̀ dɛ̃̀ dɛ̃̀ rǝ̀myɛ́ bǝ ga, kɔn dɛnɛ, bǝ pwírí kaka yǝ̀ mɔ̀ wɛ̀rhɛ́ yé. Bǝ̀ bùlǝ̀ né k'a zhízhílí, bǝ zɛ̃̀ bǝ wɔ̀ bǝ̀ ń wɔ́ yi. ⁷ Cɔ w lò mó mɔ̀bɔ́ ń yà ń wɔ́ lyì-fɔ̀lɔ̀ du lyì bí gakó mó yà ń zhe jàà bwǝ́lbwǝ́l gàà. Lò mó ńmyɛ̌ mɔ́ yà ń yíl Pubyiliyuusi. Ńmyɛ̌ mɔ́ ce nǝ́ bǝ̀ ń sõ kɛ̀lɛ́ wa, nǝ́ wɛ̀rhɛ́ dwã nǝ̀tɔ̀, sǝ ń zɔ nǝ́ba cɛ̀nɛ̀ ǹdǝ ń dɔwabá ta. ⁸ Ń da jà ń yà ń bǝ jàn zhe yé. Pɔ̃̀ɔ̃́ ǹdǝ́ sábá y'à zhe mo ń pyě tɛ̃́. Pwǝǝ vò n nǝ mɔ, n cĩ́ jɛ̀rh ń yó, n lwǝ̀l Yi ń yilǝ, n wárh. ⁹ Rǝ̀myɛ́ yó, cɔ w nǝ̀bwànà dwã nánzhǝzhɔ̌ y'à n'ê twí Pwǝǝ sõ, ń wárh bɛ. ¹⁰ Sǝ rǝ̀myɛ́ ce lyì bí y'à n'ê nyàm nǝ́ba. Nǝ́ gǝ́ tú nǝ́ r'é zhìrǝ́, bǝ pǝ nǝ́ba kɔn dɛ̀bɛ́ gakó nǝ́ zhe rǝ̀ tum sɔ́má y kǒ yilǝ. ¹¹ Nǝ́ wɛ̀rhɛ́ cànsɛ̀ sǝ̀tɔ̀ Maltɛ nɛ́, nǝ́ zɛ̃̀ nǝ́ zhǐr. Bǔ-bwǝl rǝ̀dù y'à shí Alɛsãdǝri, sǝ è gǝ́ y'à wɔ́ wàr yi mú ce rǝ̀ y'à mɛ̃ Maltɛ nɛ́. Wɔ́ rǝ̀myɛ́ nǝ́ j'á zù. Bǝ̀ y'à n'ê byẽ̀ dè bǝ̀ «Kasǝtɔɔrɛ», bǝ j'à n'ê byẽ̀ dè bǝ̀ «Poluusi» myɛ. ¹² Nǝ́ gǝ́ yú Sǝrǝcuusi, nǝ́ mɛ̃ gàà nǝ́ wɛ̀rhɛ́ dwã nǝ̀tɔ̀. ¹³ Nǝ́ zhì gàà nǝ́ k'é zù bǔ-bwǝl ré nǝ́ tó bù-cǔ w vɔ̃̀ nɛ̀, nǝ́ lyɛ̃ nǝ́ vò Erǝjo. È zɛ̃̀ nǝkɔkɔ́lɛ́ y yùwǝ̀, zho w j'a shí nǝ́ kwã ò n'ô cìrh nǝ́ba, nǝ́ j'á yí Puzoole nǝ́ dwã nǝ̀lyè yùwǝ̀. ¹⁴ Sǝ nǝ́ nɔ Kristǝ-lyì cɔ w òmyɛ́ wẽ́. Bǝ lwǝ̀l nǝ́ba bǝ̀ nǝ́ mɛ̃ bǝ̀ sõ nǝ́ wɛ̀rhɛ́ dwã nyàlpyɛ̀. Wɔ́ èta nǝ́ Orɔm y zhǝl mó tó né. ¹⁵ Cɛmɛ nǝ̀lyè y'à ŋwɛ́nɛ́ sɔ́má y yó; òdù w zhe ya, bǝ̀ n'ê byẽ̀ bǝ̀ Apyuusi-ya; ò dõ mó yíl Zulǝ́-jààsɛ̀-sǝ̀tɔ̀. Sǝ Orɔm Kristǝ-lyì bí gǝ́ nyɛ̀ɛ̀ bǝ̀ nǝ́ bànà, bǝ b'e jǝl nǝ́ba jààsɛ́ sǝ̀myɛ́ wẽ́. Pwǝǝ gǝ́ nɔ bɛ, n ce Yi nǝ̀báná, sǝ ń wu k'a za. ¹⁶ Nǝ́ gǝ́ yú Orɔm, bǝ pǝ jàà Pwǝǝ ne ń dúdú, ǹdǝ́ shǝ̀dáá èdù è la mɔ yìlù. ¹⁷ Pwǝǝ gǝ́ yú Orɔm n zhɛ̀, ń dwã nǝ̀tɔ̀ yù w n zɛ̃̀ n byẽ̀ Zhwifubá byɛ̀bɛ́ bǝ̀ ŋwɛ́nɛ́ Orɔm nɛ́ mɔ́ yé né cìnǝ́ bé bǝ bǝ̀ ń sõ. Bǝ̀ gǝ́ tú bǝ nǝ dwã ń sõ bǝ zhɛ̀, n zɛ̃̀ n wɔ̀ bɛ: «À yǝ̀ nǝ́ dwí rí gwar, a j'à yǝ̀ nǝ́ nàmbala bɛ́ lùl-e-pwírí y myɛ nǝ dwé yé. E jà ǹdǝ́ rǝ̀myɛ́ ga, bǝ̀ zɔ nɛ Zhǝrǝzalɛm nɛ́ bǝ pǝ Orɔm lyì bí ni. ¹⁸ Orɔm lyì bí zɛ̃̀ bǝ bwǝ̀rh nè kɔn gǝ́ tó né, bǝ pwírí à yǝ̀ kaka wɛ̀rhɛ́ rǝ̀ n'ê byili b'à mǝ̌ ǹdǝ́ gu yé. Bǝ zɛ̃̀ bǝ̀ k'â n'ê yǎl bǝ dwĩ̀ nì. ¹⁹ Zhwifubá zɛ̃̀ bǝ̀ t'â yǎl bǝ̀ bǝ̀ dwĩ̀ nì yé. Wɔ́ rǝ̀myɛ́ è ce a zɛ̃̀ a byili bǝ̀ wɔ́ Orɔm pyɔ̌ mɔ́ à n'â yǎl bǝ̀ ń bǔr à bùrsí, sǝ à yǝ̀ shɛ̀nɛ́ a tǝ̀ rǝ̀myɛ́ yil a cĩ́ yò à dwí rí yó w yé. ²⁰ Wɔ́ rǝ̀myɛ́ yil à n'â yǎl sǝ nǝ́ nǝ dwã, a byili ába bǝ̀ wɔ́ à gǝ́ zhí mɔ̀bɔ́ Esǝrayɛl lyì bí n'ê dɛ̃̀ mɔ́ ni mú è ce bǝ zǝ nɛ bǝ lyẽ ǹdǝ́ nyáná nɛ́.» ²¹ Bǝ zɛ̃̀ bǝ wɔ̀ mɔ̀: «Bǝ̀ yǝ̀ sɛ́bɛ́ rǝ̀dù ga kɛ̃ rǝ shí Zhide rǝ bǝ̀ nǝ́ sõ nyɔ̀nɔ̀ rǝ zɔ̀m ǹ yò yé. Nǝ́ dwí rí lò mǝ̀dù ga myɛ kǝ́ ń yǝ̀ twí n wɔ̀ nǝ́ba kaka, ráá n zɔ̀m ǹ yil námmǝlwɛ̀lɛ́ yé. ²² Nǝ́ yě bǝ̀ jààsɛ́ gakó lyì bí bǝ sɔ́má y kɛ̀bɛ́ ǹ zù mú só yé. Rǝ̀myɛ́ ce, nǝ́ r'é yǎl sǝ ǹmyɛ́ cìcì mú byili nǝ́ba kɔn dɛ̀bɛ́ ǹ nǝ́ ǹ bùlǝ̀.» ²³ Bǝ̀myɛ́ ǹdǝ́ Pwǝǝ ga zɛ̃̀ bǝ pǝ dɛ̃ bǝ̀ la k'e m'e nǝ dwã. Dɛ̃ rɛ́ rǝ̀myɛ́ yù w Zhwifubá bǝ̀ Pwǝǝ sõ nánzhǝzhɔ̌ dwini shãã ga mɔ́. Pwǝǝ byili zɔ̀mà nánzhǝzhɔ̌; ń yà ń nǝ́ ń zɔ̀m Yezu yò ń byili bi, sǝ ń yà ń nǝ́ ń wɛ̀rhɛ́ ń gǝ́ wɔ̌ nɛ́, ń tó Muyiisi nyǝ́ né ǹdǝ́ Yi nyì-zwennǝ bé sábá nɛ́ dɛnnɛ ń byili bi, mùnì ga bǝ zwẽ nyí bǝ zù Yezu Kristǝ. Sǝ bǝ̀ jòm bǝ cili zɔ̀mà nɛ́ nǝ̀myɛ́ nǝkɔkɔ́lɛ́ kɔn m'e yí dǝ̀dɛ̀nɛ́. ²⁴ Lyì jàlà shɛ̀nɛ́ bǝ zwẽ kɔn dɛ̀bɛ́ Pwǝǝ byili mú nyí, sǝ jàlà yǝ̀ nyí zwẽ yé. ²⁵ Bǝ zɛ̃̀ bǝ k'â la jè ǹdǝ́ bǝ̀ bǝ dwã zɔ̀mà kùr nyɛ̌ yé. Pwǝǝ zɛ̃̀ n wɔ̀ bɛ: «Eshirhǝ náàcɛ̀nɛ́ gǝ́ tó Yi nyì-zwennǝ Ezǝyi dɛnnɛ e zɔ̀m ǹdǝ́ nǝ́ nàmbala bɛ́ mɔ́, è y'a zhe bwìrì. ²⁶ È tó ń dɛnnɛ e wɔ̀: ‹Zhǝl ń wɔ̀ dwí rí tɛ̀bɛ́ èta mɔ́ nɛ: Á m'ǎ cili náàcɛ̀nɛ́, sǝ á t'á la nǝ̀ kùrǝ̀ nyɔ̀ɔ̀ yé. Á m'ǎ nyǐ náàcɛ̀nɛ́, sǝ á yírhǝ́ t'â la kaka nɔ yé. ²⁷ Bǝ̀ dwí rí tɛ̀bɛ́ lyì bí jǐrh yó-kùùlì cìnǝ́. Bǝ̀ shĩ bǝ̀ zhã̌ nɛ́, bǝ pyi bǝ̀ yírhǝ́ né, mùnì ga bǝ̀ yírhǝ́ bǝ̀k'a na, sǝ bǝ̀ zhã̌ bǝ̀k'a nyɛ̀ɛ̀, sǝ bǝ̀ surhǝ né myɛ bǝ̀k'a pul, bǝ pyìrhí bǝ̀ wun bǝ k'a b'à sõ yé. Wɔ́ rǝ̀myɛ́ è ce à yǝ̀ ŋwɛ̀nɛ́ a wárh bɛ yé.›» ²⁸ Pwǝǝ súlí n wɔ̀: «Lwarna bǝ̀ Yi ce bǝ̀ n'ê byili rǝ̀ vwǎrh mɔ́ yò w lyì bí byɛ̀bɛ́ bǝ̀ dǝ̀ Zhwifubá mó ne, sǝ lyì bí bǝ̀myɛ́ m'a cili.» ²⁹ [Pwǝǝ gǝ́ zɔ̀m n zhɛ̀, Zhwifubá zɛ̃̀ bǝ̀ n'ê ce sɔ̀ dɛ̃́dɛ̃́ ǹdǝ́ dwã bǝ̀ m'ê la jè.] ³⁰ Pwəə wὲrhέ byinə nǝ̀lyè jàà ń yà ń zwẽ ń ŋwέnέ è wẽ́ mó wə, ǹdǝ́ ń nǝ́ ń zwẽ lyì bí byὲbέ gakó bə n'ê twí ń sono mó. ³¹ Ń yà ń nǝ́ ń bwǝ̀l Yi pyὲlὲ rέ yò w ń byili bi, ń súlí ń byili kɔn rέ dὲbέ rǝ̀ ŋwέnέ Yezu Kristə shò-kwã mɔ́ ǹdǝ́ wu-jɔ̀, sə lòlò yà ń tá ń cǝ̀r mo yé.