¹ Agǝrǝpa wɔ̀ Pwǝǝ ne: «Ǹ wɔ̌ ǹ zɔ̀m èlǎsɛ̃́.» Pwǝǝ zɛ̃̀ n zhẽ̌ ń jɛ̃̀ dɛ̃̌ n wɔ̀: ² «Pyɔ̌ Agǝrǝpa, à gǝ́ zhǐ ǹ yé né zà à la byili ywẽ̀ né nyɛ̀bɛ́ gakó Zhwifubá n'ê cĩ́ à yó w mó ce à wu nyɛ̀, ³ bǝ̀ ǹ yě bǝ̀ lùl-e-pwírí y ǹdǝ́ bǝ̀ nyǝ̀-pàárɛ́ gǝ́ wɔ́ nɛ́ náàcɛ̀nɛ́. Rǝ̀myɛ́ ce, à n'â lwǝ̀l mɔ́, sǝ́ zhìlì ǹ yala nɛ ń cili kɔn dɛ̀bɛ́ à la zɔ̌m. ⁴ «Zhwifubá gakó yě à gǝ́ yàl nɛ́ à bǝ̀swɛ́nɛ́ yi ní ga à dwí rí wẽ́ ǹdǝ́ Zhǝrǝzalɛm nɛ́. ⁵ Bǝ̀ yě à pár kɔn dɛnɛ. Bǝ̀ yě b'à wɔ́ Farɛzhɛ̃ɛ̃, e j'à wɔ́ Farɛzhɛ̃ɛ̃bá bǝ̀ zum dɛ̃́dɛ̃́ Muyiisi nyǝ́ né zõ mó yil du bǝ̀ dwã bɛ́. Zhwifubá gǝ n'ê yàlá, bǝ̀ wɔ̌ bǝ̀ byili bǝ̀ nyǐ rǝ̀myɛ́ wɔ́ zhǝ̀nà. ⁶ À n'â dɛ̃̀ kɔn rɛ́ dɛ̀bɛ́ Yi bwǝl rǝ̀ nyí nǝ́ nàmbala bɛ́ nɛ mɔ́. Wɔ́ rǝ̀myɛ́ yil bǝ̀ zɔ nɛ èlǎsɛ̃́ bǝ̀ m'ê bùrǝ̀. ⁷ Nǝ́ dwí rí kwálsɛ́ shí ǹdǝ́ sǝ̀lyè y lyì bí n'ê dɛ̃̀ kɔn rɛ́ dɛ̀bɛ́ Yi bwǝl rǝ̀ nyí mú, bǝ̀ m'ê cèrhé Yi cǝcɛ̃ ǹdǝ́ nǝ̀nyɔ́nɔ́. Pyɔ̌ Agǝrǝpa, àmyɛ n'â dɛ̃̀ kɔn rɛ́ rǝ̀myɛ́ mɔ́. Wɔ́ rǝ̀myɛ́ yil Zhwifubá n'ê cĩ́ ywẽ̀ à yó wǝ. ⁸ Wɔ́ byè yil ámyɛ̌ Zhwifubá nǝ t'á yǎl á zwẽ nyí bǝ̀ nyǐ Yi m'a bwìrhì cùùrì? ⁹ «Àmyɛ́ cìcì mú y'à n'â bùl b'à mǝ̌ s'a wɛ̀rhɛ́ à gǝ́ wɔ̌ nɛ́ gakó a cɔ̀ Nazarɛtɛ lyì bal Yezu yil ré. ¹⁰ Wɔ́ èta à y'à n'â wɛ̀rhɛ́ nɛ́ Zhǝrǝzalɛm nɛ́. Yi jì y vwĩ̀-zwǝ́lnǝ bé yé né cìnǝ́ bé y'à pɔ nɛ sɔ́má à n'â zal Yi lyì nánzhǝzhɔ̌ à ce byǝ̀nǝ́-jù wǝ̀. Sǝ bǝ̀ gǝ pɔ nyí bǝ̀ bǝ̀ mǝ̌ ǹdǝ́ gu, à wu y'a zǝ nyɛ̀n rǝ̀ yilǝ. ¹¹ À y'à n'â tó Zhwifubá dwã-gùúlí jìsí wẽ́ à nwɛ̀nɛ̀ Kristǝ-lyì bí, à n'â yǎl a nyɛ́ɛ́ bɛ bǝ yẽ̌ Yezu ni zhú mú ni. À lyim y'à zɛ̃̀ dɛ̃́dɛ̃́ ǹdǝ́ bɛ. A twèlé a vò a nwɛ̀nɛ̀ bɛ̀ cɛmɛ dwã w myɛ. ¹² «Dɛ̃ rǝ̀dù, vwĩ̀-zwǝ́lnǝ bé yé né cìnǝ́ bé y'à twĩ̀ nì à la Damaasɛ a vò a zǝ Kristǝ-lyì bí. ¹³ Pyɔ̌ Agǝrǝpa, à tú a yí sɔ́má yó, ǹdǝ́ yi rí yú yǝ́-pɛ̀lɛ́ ecǝl wǝ, a j'a nǝ pwẽ̀ nánfɔ̀lɔ̀ rǝ̀ shí dɛ̃̌, rǝ yǝ̌r rǝ kǝ́kɛ́lɛ́ àmyɛ́ ǹdǝ́ byɛ̀bɛ́ bǝ̀ y'à tó ne mó ga. Rǝ̀ y'à du nǝ̀nyɔ́nɔ́ pwẽ̀. ¹⁴ Nǝ́ gakó j'a ló tɛ̃́. A nyɛ̀ɛ̀ cǝl rǝ̀ byẽ̀ nè ǹdǝ́ nǝ́ dwí rí zɔ̀mà rǝ wɔ̀: ‹Swǝǝ, Swǝǝ, byè yil ǹ nǝ́ ǹ nwɛ̀nɛ̀ nɛ̀? Byè yil ǹ nǝ́ ǹ jíjǐ ǹdǝ vwǎm mɔ̀bɔ́ mǝ̀ cǝ́bal nǝ́ ń mà ǹdǝ́ dǝ̀-dɔ̀lɔ̀ ta?› ¹⁵ «A zɛ̃̀ a bwǝ̀rh a wɔ̀: ‹Yó-cǝ́bal, ǹmyɛ́ wɔ́ mɔ̌ lò?› N wɔ̀ nɛ̀: ‹Àmyɛ́ wɔ́ Yezu. Wɔ́ àmyɛ́ ǹ nǝ́ ǹ nwɛ̀nɛ̀ mɔ́. ¹⁶ Zɛ̃̀ ń zhì dɛ̃̌, b'à cír mó ǹ la yǝ̀ à tùntùnnǝ̀. Wɔ́ rǝ̀myɛ́ yil à byili mú à cìnǝ̀. Ǹ b'ǎ yǝ̀ à zhǝ̀n-cínnǝ, mùnì ga ń byili lyì bí dwã bɛ́ nɛ kɔn gǝ́ tó né ń bǝ́ nǝ nɛ zà, sǝ́ byili bi kɔn dɛ̀bɛ́ à gwẽ̌ la ce ǹ yírhǝ́ nǝ mɔ́ myɛ. ¹⁷ À b'a yìlì mú Zhwifubá ǹdǝ́ byɛ̀bɛ́ bǝ̀ dǝ̀ Zhwifubá mó wẽ́. Wɔ́ bǝ̀myɛ́ sõ à la mɔ́ nɛ́ tũ̌, ¹⁸ mùnì ń púr bǝ̀ yírhǝ́, bǝ du cǝ-byín wẽ́ bǝ bǝ̀ pwẽ̀ wǝ̀; bǝ du Shǝtana jɔ̃̀ w bǝ zù Yi, mùnì bǝ nǝ bǝ̀ yǝ̀-bǝlwàálɛ sǔbri, sǝ bǝ nǝ cǝl jàà y kɛ̀bɛ́ Yi cĩ́ rǝ̀ lyì bí ni mú wẽ́.› ¹⁹ «Pyɔ̌ Agǝrǝpa, kɔn zhí rǝ̀myɛ́ yi ní ga, à yǝ̀ kɔn rɛ́ dɛ̀bɛ́ Yi zhì dɛ̃̌ rǝ byili ni èta mɔ́ cẽ yé. ²⁰ À jɛ̀rɛ̀ a bwǝ̀l Yi zɔ̀mɛ̀ rɛ́ a byili Damaasɛ lyì bí ni; a zɛ̃̀ a bwǝ̀l rè a byili Zhǝrǝzalɛm lyì bí ni; rǝ̀myɛ́ kwã nɛ́, a bwǝ̀l rè a byili Zhide tǝnà y lyì bí gakó ne; a zɛ̃̀ a bwǝ̀l rè a byili cɛmɛ nɛ́ dwã bɛ́ lyì bí ni, bǝ̀ bǝ̀ pyìrhí bǝ̀ wun bǝ zù Yi, sǝ bǝ twĩ̀ tùntwǝ̃̀ǝ̃̀ nyɛ̀bɛ́ nǝ̀ b'a byili bǝ̀ bǝ̀ pyìrhí bǝ̀ wun zhǝ̀nà. ²¹ «Wɔ́ rǝ̀myɛ́ è ce Zhwifubá zǝ nɛ ǹdǝ́ à ŋwɛ́nɛ́ Yi jì y kɔ̀nɔ́ w wa, bǝ̀ y'à n'ê yǎl bǝ gu ni. ²² Sǝ Yi sɛ̃ nɛ kɔn m'e yí zà, à gwẽ̌ zhǐ à wɔ́ rǝ̀ zhǝ̀n-cínnǝ lyì-fwààlɛ̀ ǹdǝ́ byɛ̀bɛ́ bǝ̀ dǝ̀ lyì-fwààlɛ̀ ga yé né. Wɔ́ kɔn rɛ́ dɛ̀bɛ́ Yi nyì-zwennǝ bé ǹdǝ́ Muyiisi byili bǝ̀ rǝ̀ mǝ̌ sǝ rǝ wɛ̀rhɛ́ mɔ́ yò à n'â zɔ̀mà, sǝ è dǝ̀ kɔn dõ yé. ²³ Bǝ̀ wò bǝ̀ bǝ̀ m'a nwɛ̀nɛ̀ Kristǝ mó, sǝ wɔ́ ńmyɛ̌ ń mà n yǝ̀ nã́yǝ́ǝ́ mó n bwìrhì n zɛ̃̀ n du cùùrì wẽ́, n bwǝ̀l pwẽ̀ ré yò n byili Zhwifubá ǹdǝ́ byɛ̀bɛ́ bǝ̀ dǝ̀ Zhwifubá mó ne.» ²⁴ Pwǝǝ gwẽ̌ nǝ́ ń byili kɔn gǝ́ tó né mó, sǝ Fesǝtuusi bya n wɔ̀ mɔ̀: «Ǹ cèrhè dɛ̃́dɛ̃́; rǝ̀myɛ́ ce ǹ wu w jé ń jǐrh nyǝ̀nyà.» ²⁵ Pwǝǝ wɔ̀ mɔ̀: «À yó-cǝ́bal mɔ́ sõ, à yǝ̀ nyǝ̀nyà jǐrh yé. Zɔ̀mà nɛ́ nyɛ̀bɛ́ à n'â byili mú wɔ́ zhǝ̀nà. Nǝ̀ dǝ̀ zɔ̀mà nyɛ̀bɛ́ nǝ̀ bǝ kùr zhe yé. ²⁶ Pyɔ̌ Agǝrǝpa dǝ̀ zhǝ-bal ywẽ̀ né nyɛ̀bɛ́ wẽ́ yé. Ń yě nǝ̀ yé-shò. Nǝ̀ yǝ̀ shèè gɔ́gwã́ w nǝ m'e wɛ̀rhɛ́ yé. Wɔ́ rǝ̀myɛ́ è ce à m'a zɔ̀m kɔn gakó ń yé né ǹdǝ́ à wu gakó. ²⁷ Pyɔ̌ Agǝrǝpa, ǹ nǝ́ ǹ zwẽ kɔn dɛ̀bɛ́ Yi nyì-zwennǝ bé byili mú nyí? À n'â bùl bǝ̀ nyǐ ǹ nǝ́ ǹ zwẽ rǝ̀ nyí.» ²⁸ Agǝrǝpa wɔ̀: «Ǹ nǝ́ ǹ yǎl ń ce a jǐrh Kristǝ-lò ǹ kùr yó èlǎsɛ̃́?» ²⁹ Pwǝǝ wɔ̀ mɔ̀: «È gǝ wɔ́ èlǎsɛ̃́, ráá kɔn m'a dɛnɛ ń mǝ́ jǐrh Kristǝ-lò myɛ, àmyɛ́ n'â lwǝ̀l Yi ni s'e bǝ̀k'a yǝ̀ ǹ dúdú yé, s'e yǝ̀ ámyɛ̌ byɛ̀bɛ́ gakó á zhǐ zà á n'á cili à zɔ̀mà nɛ́ mɔ́, mùnì ga ámyɛ jǐrh ǹdǝ àmyɛ ta. Sǝ à t'â yǎl bǝ̀ bǝ̀ zǝ ámyɛ bǝ lyẽ ǹdǝ àmyɛ́ ta yé.» ³⁰ Rǝ̀myɛ́ yó, pyɔ̌ mɔ́ ǹdǝ́ cɔ w cǝ́bal mɔ́ ǹdǝ́ Bereniisi, e súlí lyì bí byɛ̀bɛ́ bǝ̀ y'à tó bǝ̀ ŋwɛ́nɛ́ gàà mɔ́ gakó shí tɛ̃́ bǝ zɛ̃̀, ³¹ bǝ zǝ dwã bǝ vò kwã nɛ́, bǝ̀ n'ê zɔ̀m ǹdǝ́ dwã bǝ̀ zhe: «Bal mɔ́ mɔ̀bɔ́ yǝ̀ kaka wɛ̀rhɛ́ rǝ̀ n'ê byili bǝ̀ ń mǝ̌ ǹdǝ́ gu, ráá byǝ̀nǝ́-jù w co yé.» ³² Agǝrǝpa zɛ̃̀ n wɔ̀ Fesǝtuusi ni: «Ń gǝ yà ń yǝ̀ wǝ̀l bǝ̀ wɔ́ Orɔm pyɔ̌ mɔ́ ń mà n bùr ń bùrsí, nǝ́ y'ǎ b'ǎ dwĩ̀ mù.»