¹ Fesǝtuusi gǝ́ tú tǝnà y èmyɛ́ wa, ń dwã nǝ̀tɔ̀ yùwǝ̀, n zɛ̃̀ n zhì Sǝzarɛ n vò Zhǝrǝzalɛm. ² Ń gǝ́ yú gàà, Yi jì y vwĩ̀-zwǝ́l bé yé né cìnǝ́ bé, ǹdǝ́ Zhwifubá lyì-fwààlɛ́ bǝ̀ ń sõ, bǝ̀ n'ê cĩ́ mu Pwǝǝ yò wǝ́. ³ Bǝ cǝ̀ǝ̀le bǝ̀ n'ê lwǝ̀l Fesǝtuusi ni bǝ̀ ń ce bǝ k'a zǝ Pwǝǝ bǝ m'e bǝ̀ Zhǝrǝzalɛm. Bǝ̀ y'à wɛ̀rhɛ́ nyí rǝ̀dù bǝ̀ n'ê yǎl bǝ shèè bǝ gu Pwǝǝ sɔ́má yó ⁴ Fesǝtuusi wɔ̀ bɛ: Pwǝǝ ŋwɛ́nɛ́ byǝ̀nǝ́-jù w Sǝzarɛ nɛ́, sǝ àmyɛ́ cìcì mú k'â n'â yǎl a vò dwã nɛ́ nyɛ̀bɛ́ nɛ. ⁵ Nd'á jàlà gǝ wɔ̌, sǝ bǝ bǝ̀ bǝ tó ne bǝ vò. Bǝ̀ gǝ yúwǝ́, kɔn dɛ̀bɛ́ ń wɛ̀rhɛ́ rǝ̀ wɔ́ lwɛlɛ, bǝ̀ m'a byili. ⁶ Sǝ Fesǝtuusi yǝ̀ dwã lyɛlɛ ráá dã shí lyɛ̃ Zhǝrǝzalɛm nɛ́ yé, n ká n kwɛ̃̀ n vo Sǝzarɛ. Ń gǝ́ yú gàà, è zɛ̃̀ nǝkɔkɔ́lɛ́ y yùwǝ̀, n vò n jòm bùrsí jàà y wa. N ce bǝ zǝ Pwǝǝ bǝ bà. ⁷ Pwǝǝ gǝ́ tú n yí, Zhwifubá byɛ̀bɛ́ bǝ̀ tó bǝ shí Zhǝrǝzalɛm mɔ́ zɛ̃̀ bǝ kǝ́kɛ́lɛ́ mɔ, bǝ̀ n̰'ê cĩ́ ywẽ̀ nánzhǝzhɔ̌ nyɛ̀bɛ́ nǝ̀ jɛ̀ ń yó wǝ. E j'à wàr kaka bǝ̀ n'ê byili bǝ̀ ywẽ̀ né nǝ̀myɛ́ mɔ́ wɔ́ zhǝ̀n yé. ⁸ Pwǝǝ zɛ̃̀ n wɔ̀: À yǝ̀ Zhwifubá nyǝ́ né lyɛ̃ yé. À yǝ̀ Yi y cɔ̀ yé. À yǝ̀ Orɔm pyɔ̌ mɔ́ myɛ dwé yé. ⁹ Sǝ Fesǝtuusi yà ń nǝ́ ń yǎl n wɛ̀rhɛ́ Zhwifubá pùbùlǝ̀. N zɛ̃̀ n bwǝ̀rh Pwǝǝ n wɔ̀: Ǹ b'ǎ vò Zhǝrǝzalɛm bǝ vò e bùr ǹ bùrsí à yírh w gàà? ¹⁰ Pwǝǝ wɔ̀: Wɔ́ Orɔm pyɔ̌ mɔ́ bùrsí jì y wẽ́ bǝ̀ zǝ nɛ bǝ zù ní. Wɔ́ gàà à bùrsí mǝ̌ sǝ sǝ bùr né. Ǹmyɛ̌ cìci mú yě náàcɛ̀nɛ́ b'à yǝ̀ Zhwifubá ne dwé yé. ¹¹ À gǝ y'à dó dóó kɔ̀bɔ́ ò b'a ce bǝ gu ni, à y'à t'â la à gu mú yò cõ yé. Sǝ ywẽ̀ né nyɛ̀bɛ́ bǝ̀ n'ê cĩ́ à yó w mó òdù ga gǝ dǝ̀ zhǝ̀nà, lò bǝ sɔ́má zhe ń mà n zǝ nɛ n pǝ Zhwifubá ne yé.À n'â yǎl bǝ̀ orɔm pyɔ̌ mɔ́ bǔr à bùrsí. ¹² Fesǝtuusi zɛ̃̀ n zɔ̀m ǹdǝ́ ń sanna bɛ́, n zɛ̃̀ n wɔ̀ Pwǝǝ ne: Ǹ gǝ́ wò bǝ̀ ǹ nǝ́ ǹ yǎl bǝ̀ Orɔm pyɔ̌ mɔ́ bǔr ǹ bùrsí mú ce, wɔ́ ńmyɛ̌ sõ ǹ b'ǎ vò né. ¹³ Dwã màngɛlɛ́ rǝ̀myɛ́ kwã nɛ́, pyɔ̌ Agǝrǝpa ǹdǝ́ ń nǝkɔ́ Bereniisi bǝ̀ Sǝzarɛ bǝ̀ la Fesǝtuusi co, ¹⁴ sǝ bǝ̀ dɛnɛ gàà. Fesǝtuusi já n byili bi Pwǝǝ yò w pyɔ̌ mɔ́ nɛ n wɔ̀: Fyilisi yẽ̌ lò mǝ̀dù ni byǝ̀nǝ́-jù w nyɔ̀nɔ̀. ¹⁵ À gǝ́ zhǝ̀l Zhǝrǝzalɛm yó, Yi jì y vwĩ̀-zwǝ́lnǝ bé yé né cìnǝ́ bé ǹdǝ́ Zhwifubá náncɛsɛ́ zɔ̀m ń yò ǹdǝ́ nɛ. Bǝ̀ n'ê yǎl b'à kǝ́ ń bùrsi a pɔ̃ dóó, ¹⁶ sǝ à wò be bǝ̀ nyǐ Orɔm lyì bí t'â pɛ sɔ́má bǝ̀ kɛ́ lò bùrsi èta yé. Ńmyɛ̌ ǹdǝ́ byɛ̀bɛ́ bǝ̀ n'ê cĩ́ yò ń yó w mó ga mǝ̌ sǝ bǝ jòm tɛ̃́, ńmyɛ cĩ́ ń nyí yò. ¹⁷ Bǝ j'a zɛ̃̀ bǝ tó ne bǝ bà. È zɛ̃̀ nǝkɔkɔ́lɛ́ yá, a vo a jòm bùrsí jàa y wa, a ce bǝ zǝ bal mɔ́ bǝ bà. ¹⁸ Byɛ̀bɛ́ bǝ̀ n'ê cĩ́ yò w ń yó mó myɛ bà. Àmyɛ́ y'à n'â bùl bǝ̀ wɔ́ yò kɔ̀bɔ́ ò jɛ̀ ń wɛ̀rhɛ́, sǝ à pwírí è dǝ̀ èta yé. ¹⁹ Wɔ́ bǝ̀myɛ Yi-sɔ́má nyǝ̀ná nyǝ̀-pǎr bǝ̀ y'à n'ê mà, e súlí lò mǝ̀dù ń yíl Yezu, sǝ lò mó ńmyɛ̌ mɔ́ cùwǝ̀. Pwǝǝ zɛ̃̀ ń zhe bǝ̀ ń ŋwɛ́nɛ́. ²⁰ Ámyɛ́ yǝ̀l à gǝ́ m'ǎ bùr bùrsí sǝ̀myɛ́ mɔ́ dwí rí ní yé. Rǝ̀myɛ́ ce, à bwǝ̀rh a nyǐ ǹdǝ́ ń gǝ nǝ́ ń yǎl n vò Zhǝrǝzalɛm bǝ bùr ń bùrsí gàà. ²¹ Sǝ ń wò bǝ̀ ń nǝ́ ń yǎl bǝ̀ Orɔm pyɔ̌ mɔ́ bǔr si. Wɔ́ rǝ̀myɛ́ è ce, à ce bǝ yẽ̌ mo byǝ̀nǝ́-jù w gwẽ̌, sǝ à b'a wɛ̀rhɛ́ a ce bǝ zǝ mɔ bǝ vò Orɔm pyɔ̌ mɔ́ sõ. ²² Agǝrǝpa zɛ̃̀ n wɔ̀ Fesǝtuusi ni: Àmyɛ n'â yǎl a cili ń zɔ̀mà nɛ́. Fesǝtuusi wɔ̀ mɔ: Nǝkɔl à b'a ce bǝ zǝ mɔ bǝ̀ n zɔ̀m ń cili. ²³ È zɛ̃̀ nǝkɔkɔ́lɛ́ y yùwǝ̀, Agǝrǝpa ǹdǝ́ Bereniisi ǹdǝ́ bǝ̀ kwã-lyì bí b'e zù bùrsí jì y wǝ, bǝ jòm tɛ̃́, bǝ̀myɛ́ ǹdǝ́ shǝ̀dɛ́ɛ́sɛ́ yó-cìnǝ́ bé, ǹdǝ́ cɔ w lyì-fwààlɛ́. Fesǝtuusi zɛ̃̀ n pǝ nyí bǝ zǝ Pwǝǝ bǝ bà. ²⁴ N zɛ̃̀ n wɔ̀ mɔ: Pyɔ̌ Agǝrǝpa, ǹd'ámyɛ̌ byɛ̀bɛ́ gakó á tó nǝ́ba á jě nyɔ̀nɔ̀ mɔ́, nyǐ-nǝ wɔ́ bal mɔ́ mɔ̀bɔ́ yil Zhwifubá nánzhǝzhɔ̌ tú à sõ Zhǝrǝzalɛm nɛ́ ǹdǝ́ nyɔ̀nɔ̀ ga, bǝ̀ n'ê búbwéé bǝ̀ ń mǝ̌ ǹdǝ́ gu. ²⁵ sǝ àmyɛ́ pwírí kaka tɛ̀nɛ́ rǝ̀ n'ê byili bǝ̀ ń mǝ̌ ǹdǝ́ gu yé. Sǝ ń cìcì byili bǝ̀ ń nǝ́ ń yǎl bǝ̀ Orɔm pyɔ̌ mɔ́ bǔr ń bùr bùrsí. Rǝ̀myɛ́ ce, à b'a ce n vò gàà. ²⁶ Kɔn j'à tɛ̀nɛ́ à nǝ pamparɛ̃ɛ̃ à b'a kɛ̃ a byili pyɔ̌ nɛ ń yil yé. Wɔ́ rǝ̀myɛ́ yil à ce bǝ zǝ mɔ bǝ bǝ̀ á yé né. Kɔn du, ń zhǐ ǹ yé né pyɔ̌ Agǝrǝpa. Bwǝ̌rh mo. Ń gǝ byili kɔn gǝ́ wɔ́ nɛ́, à m'a zɛ̃̀ a nǝ kɔn a kɛ̃. ²⁷ È wɔ́ àmyɛ́ yilǝ, ǹ gǝ ce byǝ̀nǝ́ jì lò zhǝ̀l pyɔ̌ yé né ǹdǝ́ ǹ yǝ̀ yò w kùr nǝ ń byili, rǝ̀ bǝ kùr zhe yé.