¹ Shǝ̀dɛ́ɛ́sɛ́ gǝ́ zǝ Pwǝǝ sǝ vò sǝ pǝ cɔ w cǝ́bal Fyilisi ni, è dwã nǝ̀nu yùwǝ̀, Yi jì y vwĩ̀-zwǝ́lnǝ bé yé né cìnǝ́ bé gakó náncɛ y Ananyaasɛ ǹdǝ́ Zhwifubá náncɛsɛ́ jàlà zɛ̃̀ bǝ vò bǝ nǝ cɔ w cǝ́bal mɔ́, bǝ̀myɛ́ ǹdǝ́ lò mǝ̀dù ń nyí yě zɔ̀mà bùrsì jàà wà, ń yíl Tǝrtuluusi, mùnì ga bǝ cĩ́ yò Pwǝǝ yó w cɔ w cǝ́bal mɔ́ yé né. ² Bǝ ce bǝ byẽ̀ Pwǝǝ n bà. Tǝrtuluusi zɛ̃̀ n ji kùr ń nǝ́ ń cĩ́ yò Pwǝǝ yó w ń zhe: «Cɔ cǝ́bal, nǝ́ zhe yǝ̀-zùlǝ́ nántwǝ̌ nǝ́ cɔ w wẽ́, sǝ wɔ́ ǹmyɛ́ jàn yilǝ. Ǹ tumǝ né ce nǝ́ cɔ w kwɛrhɛ dɛ̃́dɛ̃́. ³ Nǝ́ nǝ cɛ̀nɛ̀ rɛ́ rǝ̀myɛ́ mɔ́ twéé twéé, jààsɛ́ gakó, nǝ́ zɛ̃̀ nǝ́ r'é ce ǹ nǝ̀bán dɛ̃́dɛ̃́ rǝ̀myɛ́ gakó yilǝ. ⁴ À t'â yǎl a lyɛ̀ɛ̀ mɔ́ dɛ̃́dɛ̃́ yé, sǝ à n'â lwǝ̀l mó ǹ wu-bɔ̀nɔ̀ w yilǝ, sǝ́ cili kɔn dɛ̀bɛ́ nǝ́ la byilu mú námpɔ́lɛ́. ⁵ «Nǝ́ pwírí bal mɔ́ mɔ̀bɔ́ wɔ́ lyì-bǝlwɛ̀lɛ́. Ń nǝ́ ń lwe Zhwifubá dwã nɛ lũ w púlǝ́púlǝ́ wẽ́. E jà ń wɔ́ Nazarɛtɛ lyì bí gùlú w yé né cǝ́bal. ⁶ Ń gaga mɔ́ yà ń nǝ́ ń yǎl n wɛ̀rhɛ́ ywẽ̀ jàlà rǝ̀ n'ê byili bǝ̀ ń tá ń nyàm Yi jì y yé. Nǝ́ zɛ̃̀ nǝ́ zǝ mɔ. [Nǝ́ y'ǎ n'é yǎl nǝ́ bùr ń bùrsí sǝ tó ǹdǝ nǝ́ nyí rí gǝ́ n'ê byili ní, ⁷ sǝ shǝ̀dɛ́ɛ́sɛ́ yó-cǝ́bal Lǝzhaasɛ zwẽ mo nǝ́ jɔ̃̀ w ǹdǝ́ jàn. ⁸ N zɛ̃̀ n pǝ nǝ́ba nyí bǝ̀ nǝ́ zǝ mɔ nǝ́ b'ě byili yò w ǹmyɛ́ nɛ.] Bwǝ̌rh mo ǹ cìcì ni. Ǹ b'ǎ lwar bǝ̀ tɛ̀bɛ́ gakó nǝ́ r'é byili bǝ̀ ń wɛ̀rhɛ́ mɔ́ wɔ́ zhǝ̀nà.» ⁹ Sǝ Zhwifubá swéné tɛ̀bɛ́ Tǝrtuluusi byili mú. Bǝ wɔ̀ bǝ̀ wɔ́ èta cìcì. ¹⁰ Cɔ w cǝ́bal mɔ́ zɛ̃̀ n zhẽ̌ ń jɛ̃̀ dɛ̃̌ n wɔ̀ Pwǝǝ ne bǝ̀ ń zɔ̌m. Pwǝǝ zɛ̃̀ n wɔ̀ mɔ̀: «À yě bǝ̀ ǹ gǝ́ wɔ́ dwí rí tɛ̀bɛ́ bùr-kárna mɔ́ byinǝ né já. Wɔ́ rǝ̀myɛ́ è ce à zhǐ ǹ yé né à n'â byili mú à yò w kùr ǹdǝ́ wu-jɔ̀, b'à yě bǝ̀ ǹ b'ǎ nyɛ̀ɛ̀ ò kùrǝ̀. ¹¹ Ǹ cìcì mú wɔ̌ ǹ lwar rɛ: à gǝ́ tú Zhǝrǝzalɛm Yi còrhó yil mó bǝ dwã shí ǹdǝ́ nǝ̀lyè du yé. ¹² Bǝ̀ yǝ̀ nɛ nɛ à zhǐ Yi jì y kɔ̀nɔ́ w ráá Zhwifubá dwã-gùúlí jìsí wǝ, ráá cɔ w wa, àmyɛ́ ǹdǝ́ lò n'é mà dwã nyǝ̀-pǎr, ráá à ce lyì-zhǎ n'ê bwí dwã yé. ¹³ Ywẽ̀ né nyɛ̀bɛ́ gakó bǝ̀ n'ê cĩ́ à yó w mó, kaka tɛ̀nɛ́ rǝ̀ n'ê byili bǝ̀ nǝ̀ wɔ́ zhǝ̀n yé. ¹⁴ «Cili kɔn dɛ̀bɛ́ à la mɔ́ byilu mú: àmyɛ́ n'â tó Yezu Kristǝ sɔ́má y à b'â cèrhé nǝ́ nàmbala bɛ́ Yi rí. À j'à n'â zwẽ kɔn dɛ̀bɛ́ gakó rǝ̀ kɛ̃ Muyiisi nyǝ́ né sɛ́bɛ́ rɛ́, ǹdǝ́ Yi nyì-zwennǝ bé sábá nɛ́ wẽ́ mó nyí. Bǝ̀myɛ́ zɛ̃̀ bǝ̀ n'ê wǝ̀l bǝ̀ sɔ́má y èmyɛ́ dǝ̀ zhǝ̀n yé. ¹⁵ Kɔn rǝ̀dù à n'â dɛ̃̀ Yi sõ: byɛ̀bɛ́ bǝ̀ n'ê cĩ́ ywẽ̀ né à yó w mó myɛ n'ê dɛ̃̀ kɔn rɛ́ rǝ̀myɛ́ mɔ́. Nǝ́myɛ̌ ga yě bǝ̀ Yi b'a bwìrhì wu-cángá cìnǝ́, ǹdǝ́ byɛ̀bɛ́ bǝ̀ dǝ̀ wu-cángá cìnǝ́ ga. ¹⁶ Wɔ́ rǝ̀myɛ́ è ce àmyɛ n'â ce jàn nɛ́ twéé gakó mùnì ga à bǝ̀k'a gwar Yi ráá lò yé. ¹⁷ «À zhǐr Zhǝrǝzalɛm nɛ́, a wɛ̀rhɛ́ byinǝ nánzhǝzhɔ̌ ǹdǝ́ à k'â yǝ̀ gàà zhǝ̀l yé. Rǝ̀myɛ́ kwã nɛ́, a zɛ̃̀ a zǝ sǝ̀byǐ a bǝ̀ à la m'a sɛ̃ à dwí rí ni, s'a pǝ à jɛ̃̀-kɔn Yi ni. ¹⁸ À gǝ́ tó a wɛ̀rhɛ́ jìmdì vǔr tum rí a zhɛ̀, wɔ́ Yi jì y kɔ̀nɔ́ w wẽ́ bǝ̀ nɔ nɛ nɛ́. Lyì-zhǎ y'à tɛ̀nɛ́ gàà, búlǝ́ myɛ y'à tɛ̀nɛ́ gàà yé. ¹⁹ «Azhi tǝnà y Zhwifubá jàlà y'à ŋwɛ́nɛ́ gàà. Kɔn gǝ y'à ŋwɛ́nɛ́, wɔ́ bǝ̀myɛ́ bǝ̀ y'à mǝ̌ sǝ bǝ zhì ǹ yé né èlǎsɛ̃́ bǝ byili ri. ²⁰ Ráá bǝ̀ gǝ́ zǝ nɛ bǝ vò Zhwifubá bùrsí gùlú w nánfɔ̀lɔ̀ w lyì bí yé né mó yi ní, lyì bí byɛ̀bɛ́ bǝ̀ ŋwɛ́nɛ́ nyɔ̀nɔ̀ mɔ́ gǝ pwírí à wɛ̀rhɛ́ kɔn dɛ̀bɛ́ rǝ̀ bǝ càn, sǝ bǝ byili wɛ̀. ²¹ À zhì bùrsí cìnǝ́ yé né a bya a wɔ̀: ‹E zɛ̃̀ wɔ́ à gǝ́ wò bǝ̀ nyǐ à n'â zwẽ nyí bǝ̀ Yi b'a bwìrhì cùùrì mú yil bǝ̀ zǝ nɛ bǝ b'ǎ yé né?› Wɔ́ rǝ̀myɛ́ dúdú à zɔ̀m.» ²² Bǝ̀ y'à zɔ̀m Yezu Kristǝ sɔ́má y zɔ̀mà Fyilisi sõ ń yě è yò zhǝ̀nà. Sǝ ń yǝ̀ bùrsí kɛ́ rǝ̀myɛ́ yó yé. N zɛ̃̀ n wɔ̀ Zhwifubá ne: «Shǝ̀dɛ́ɛ́sɛ́ gakó yó-cǝ́bal Lǝzhaasɛ gǝ túwǝ́, à b'a nyǐ á yò w ma.» ²³ N zɛ̃̀ n pǝ nyí shǝ̀dɛ́ɛ́sɛ zɔ̌m yó-cǝ́bal mɔ́ nɛ bǝ̀ ń yìlì Pwǝǝ ne, sǝ ń bǝ̀ká n lyẽ mo yé, bǝ̀ ń dɔwabá gǝ tú bǝ̀ n'ê yǎl bǝ sɛ̃ mɔ, sǝ ń bǝ̀ká n cǝ̀r be yé. ²⁴ Dwã màngɛlɛ́ rǝ̀myɛ́ kwã nɛ́, cɔ cǝ́bal Fyilisi ǹdǝ́ ń kɛ̃ Dǝrǝshii bà. Ń kɛ̃ mɔ́ ńmyɛ̌ mɔ́ yà ń wɔ́ Zhwifubá bǝ̀kɔ́. N zɛ̃̀ n ce bǝ byẽ̀ Pwǝǝ n bǝ̀ ń nǝ́ ń zɔ̀m Yezu Kristǝ ne zhú mú yò, n zɛ̃̀ ń nǝ́ ń cili. ²⁵ Sǝ Pwǝǝ yà ń nǝ́ ń byili lò gǝ́ mǝ̌ sǝ́ zǝ ǹ cìn ní, ǹdǝ́ ǹ gǝ́ mǝ̌ sǝ́ wɛ̀rhɛ́ nɛ́, mùnì ga ǹ tùntwǝ̃̀ǝ̃̀ né sú Yi yírhǝ́. Sǝ ń byili n súlí bǝ̀ nyǐ Yi b'a kǝ́ lyì bí gakó bùrsì. Rǝ̀myɛ́ ce ywẽ zǝ Fyilisi, n zɛ̃̀ n wɔ̀ Pwǝǝ ne: «Yẽ̌ èta sǝ́ vò. À gǝ tú à zhe ǹ tum dɛ̃, à m'a byẽ̀ mó.» ²⁶ Ń yà ń nǝ́ ń bùl bǝ̀ Pwǝǝ gǝ ń mà n pɔ̃ wársɛ. Rǝ̀myɛ́ ce, ń yà ń nǝ́ ń byẽ̀ mò ń twí ń sõ bǝ̀ zhǝrhǝ. ²⁷ Kɔn wɛ̀rhɛ́ byinǝ nǝ̀lyè, rǝ̀myɛ́ kwã nɛ́, Porǝshuusi Fesǝtuusi bǝ̀ n zwẽ Fyilisi jàà yá. Sǝ Fyilisi gǝ́ yà ń nǝ́ ń yǎl n wɛ̀rhɛ́ Zhwifubá pùbùlǝ̀ mó ce, ń já n yẽ̌ Pwǝǝ ne byǝ̀nǝ́-jì y wǝ.