¹ «À dabá, à zhǝ̀m-má ǹdǝ́ à nyáná, cili-nǝ kɔn rɛ́ dɛ̀bɛ́ à la ába byilu mú à cìn-vwǎrh yilǝ...» ² Bǝ̀ gǝ́ pwírí Pwǝǝ wɔ́ bǝ̀ dwí rí zɔ̀mà nɛ́ ń nǝ́ ń zɔ̀mà, bǝ j'a kwɛrhɛ bǝ̀ zhǐ shɛ́shɛ́. Pwǝǝ súlí n wɔ̀: ³ «À wɔ́ Zhwifu. Bǝ̀ lùl nè Tarsɛ nɛ́, Shilishi tǝnà y wa, sǝ wɔ́ Zhǝrǝzalɛm nɛ́ nyɔ̀nɔ̀ bǝ̀ kɔ̀n nɛ̀ nɛ́. Wɔ́ Gamalǝyǝǝ ń byili ni nǝ́ dabá lùl-e-pwírí y nyǝ́ né pamparɛ̃ɛ̃. À y'à n'â ce yǝ̀wǎl nɛ́ dɛ̃́dɛ̃́ ǹdǝ́ Yi tum rí ǹdǝ ámyɛ gakó gǝ́ n'á wɛ̀rhɛ́ nɛ́ zà mɔ́. ⁴ À y'à n'â nwɛ̀nɛ̀ lyì bí byɛ̀bɛ́ bǝ̀ n'ê tó Yezu Kristǝ sɔ́má y mɔ́. À y'à n'â ce bǝ̀ zal bǝ̀ bala ǹdǝ́ bǝ̀ kana ga bǝ lyẽ bǝ ce byǝ̀nǝ́-jù wǝ. À y'à n'â ce bǝ̀ gwi jàlà myɛ. ⁵ Yi jì y vwĩ̀-zwǝ́lnǝ bé yé né cìnǝ́ bé gakó náncɛ y ǹdǝ́ Zhwifubá náncɛsɛ́ gakó yě bǝ̀ wɔ́ zhǝ̀n à n'â zɔ̀mà. Bǝ̀ y'à pɔ nɛ sábá à m'â la vò a pǝ nǝ́ da-byǎ Zhwifubá byɛ̀bɛ́ bǝ̀ ŋwɛ́nɛ́ Damaasɛ nɛ́ mɔ́ nɛ, mùnì ga a ŋwɛ̀nɛ́ a zǝ lyì bí byɛ̀bɛ́ bǝ̀ zù Yezu mú a k'a m'a bǝ̀ Zhǝrǝzalɛm bǝ pǝ bɛ còrhò-tum. ⁶ «À gǝ́ kwè sɔ́má y a b'à n'â bwǝlse, twǝr rǝ̀dù sá, nǝ̀nyɔ́nɔ́ cǝcǝl wǝ, pwẽ̀ nánfɔ̀lɔ̀ rǝ̀ n'ê jǝ́jɛ̀mɛ́ shí dɛ̃̌ rǝ yǝ̌r rǝ kǝ́kɛ́lɛ́ nɛ. ⁷ A tu tɛ̃́ a j'a nyɛ̀ɛ̀ cǝl rǝ̀ n'ê wǝ̀l nè: ‹Swǝǝ, Swǝǝ, byè yil ǹ nǝ́ ǹ nwɛ̀nɛ̀ nɛ̀?› ⁸ A zɛ̃̀ a bwǝ̀rh a wɔ̀: ‹Ǹmyɛ́ wɔ́ mɔ̌ lò yó-cǝ́bal?› Cǝl ré wɔ̀: ‹Àmyɛ́ wɔ́ Nazarɛtɛ lyì bal Yezu, mɔ̀bɔ́ ǹ nǝ́ ǹ nwɛ̀nɛ̀ mɔ́.› ⁹ Byɛ̀bɛ́ bǝ̀ y'à tó ne mó nǝ pwẽ̀ ré, sǝ bǝ̀ yǝ̀ mɔ̀bɔ́ ń yà ń nǝ́ ń zɔ̀m ǹdǝ́ nɛ mɔ́ cǝl ré nyɛ̀ɛ̀ yé. ¹⁰ A zɛ̃̀ a wɔ̀: ‹Cinnǝ, wɔ́ bǝ̀kɔ́n à mǝ̌ s'a wɛ̀rhɛ́?› N wɔ̀ nɛ̀: ‹Zɛ̃̀ ń vò Damaasɛ. Ǹ gǝ yú gàà, bǝ̀ m'a byili mú kɔn dɛ̀bɛ́ Yi n'ê yǎl bǝ̀ ǹ wɛ̀rhɛ́.› ¹¹ Pwẽ̀ ré gǝ́ y'à n'ê jǝ́jɛ̀mɛ́ dɛ̃́dɛ̃́ mɔ́ ce, rǝ lyǝ̌r à yírhǝ́ né, nǝ̀ y'à k'ê bɛ̃́ nɛ yé, sǝ à tó-dwã bɛ́ zɔ à jɛ̃̀ nɛ̀ bǝ m'e vò Damaasɛ. ¹² «Bal mǝ̀dù yà ń ŋwɛ́nɛ́ gàà ń yíl Ananyaasɛ. Ń yà ń nǝ́ tó Yi ni ǹdǝ́ ń wu gakó, ń nǝ́ ń zwẽ rǝ̀ nyǝ́ né náàcɛ̀nɛ́, sǝ Zhwifubá byɛ̀bɛ́ bǝ̀ y'à ŋwɛ́nɛ́ gàà mɔ́ gakó y'à n'ê zɔ̀m ń yil náàcɛ̀nɛ́. ¹³ N zɛ̃̀ n bǝ̀ à sõ n wɔ̀: ‹Da-byǐ Swǝǝ, ǹ yírhǝ́ né m'a k'a púr!› À yírhǝ́ né j'a púr rǝ̀myɛ́ yi ní cìcì, a nǝ mɔ pamparɛ̃ɛ̃. ¹⁴ N zɛ̃̀ n wɔ̀ nɛ̀: ‹Nǝ́ nàmbala bɛ́ Yi rí cír mó shãã ga, mùnì ga ń lwar rǝ̀ pùbùlǝ̀ né, sǝ́ nǝ wu-cángá cǝ́bal Yezu ǹdǝ́ ǹ yírhǝ́, sǝ́ nyɛ̀ɛ̀ ń cìcì nyì-zɔ̀mɛ̀, ¹⁵ bǝ̀ ǹ b'ǎ yǝ̀ ń zhǝ̀n-cínnǝ lyì bí gakó yé né, sǝ ǹ b'ǎ bwǝ̀l kɔn dɛ̀bɛ́ ǹ yírhǝ́ nɔwa, ǹ zhã̌ j'a nyɛ̀ɛ̀ mɔ́ ń byili. ¹⁶ Èlǎsɛ̃́, bǝ̀kɔ́n ǹ kǝ́ ǹ jě ǹ nǝ́ ǹ dɛ̃̀? Zɛ̃̀ dɛ̃̌ ń zù Cinnǝ mú, ń zwẽ nɛ̃̌-mɔ́lɔ́, mùnì ga ń nǝ ǹ yǝ̀-bǝlwàálɛ́ sǔbri.› ¹⁷ «Rǝ̀myɛ́ kwã nɛ́, a k'a kwɛ̃̀ a vò Zhǝrǝzalɛm. Dɛ̃ rǝ̀dù, à y'à ŋwɛ́nɛ́ Yi jì y kɔ̀nɔ́ w wa, à n'â ce Yi. Kɔn j'a wɛ̀rhɛ́ nɛ ǹdǝ dàrhà ta. ¹⁸ A nǝ Cinnǝ mú, n wɔ̀ nɛ̀: ‹Zɛ̃̀ ń du Zhǝrǝzalɛm nɛ́ làlà, bǝ̀ ò lyì bí t'â la shɔ̀nɔ́ bǝ zwẽ kɔn rɛ́ dɛ̀bɛ́ ǹ la byilu à shò-kwã nɛ́ mɔ́ yé.› ¹⁹ A zɛ̃̀ a wɔ̀: ‹Cinnǝ, bǝ̀ cìcì mú yě b'à y'à n'â zhǝ̀l bǝ̀ dwã-gùúlí jìsí wẽ́, a ce bǝ zǝ lyì bí byɛ̀bɛ́ gakó bǝ̀ zù ǹmyɛ́ mɔ́, bǝ ce bé byǝ̀nǝ́-jù w bǝ mà. ²⁰ Bǝ̀ gǝ́ gu ǹ zhǝ̀n-cínnǝ Ecẽẽ yi ní, àmyɛ́ cìcì y'à ŋwɛ́nɛ́ gàà, sǝ à nyí y'à ŋwɛ́nɛ́ byɛ̀bɛ́ bǝ̀ gu mu mú kwã. Wɔ́ àmyɛ́ à y'à n'â yìlì bǝ̀ kàmǝ̀-zwǐsí ni.› ²¹ Cinnǝ mú zɛ̃̀ n wɔ̀ nɛ̀: ‹Zhǝl! À n'â twĩ̀ mú yé né yé né, byɛ̀bɛ́ bǝ̀ dǝ̀ Zhwifubá mó sono.›» ²² Lyì-zhǎ bɛ́ cili cili Pwǝǝ zɔ̀mà nɛ́ kɔn m'e yí ń gǝ́ wò bǝ̀ Cinnǝ mú twĩ̀ mù byɛ̀bɛ́ bǝ̀ dǝ̀ Zhwifubá sõ mó, bǝ zɛ̃̀ bǝ̀ n'ê bya bǝ̀ zhe: «Ce bǝ gu bal mɔ́ mɔ̀bɔ́ n jé lũ w kɔ̀bɔ́ wẽ́! Ń bǝ mǝ̌ sǝ n yǝ̀ nɛ́ kǝ́dò yé.» ²³ Bǝ zɛ̃̀ bǝ̀ n'ê búbwéé, bǝ̀ n'ê vùr bǝ̀ kàmǝ̀-zǔrh bǝ̀ dul dɛ̃̌, bǝ̀ n'ê tɛ̃́ shó bǝ̀ lɛ dɛ̃̌. ²⁴ Shǝ̀dɛ́ɛ́sɛ́ yó-cǝ́bal mɔ́ zɛ̃̀ n pǝ nyí bǝ̀ bǝ̀ zǝ Pwǝǝ bǝ zù shǝ̀dɛ́ɛ́sɛ́ jàà y wa, sǝ bǝ̀ mà mɔ̀ ǹdǝ́ dànǝ̀shàárɛ, mùnì ga n byili kɔn rɛ́ dɛ̀bɛ́ rǝ̀ ce lyì-zhǎ bɛ́ n'ê búbwéé bǝ̀ m'ê pyà ń lwɛlɛ èta mɔ́. ²⁵ Bǝ̀ gǝ́ lyẽ mo ǹdǝ́ nyínsí bǝ̀ la mǎ, n wɔ̀ shǝ̀dɛ́ɛ́sɛ zɔ̌m yó-cǝ́bal mɔ́ ń yà ń zhǐ gàà mɔ́ nɛ: «Á wɔ̌ á mà Orɔm lò ǹd'á yǝ̀ ń bùrsì bùr?» ²⁶ Shǝ̀dɛ́ɛ́sɛ zɔ̌m yó-cǝ́bal mɔ́ gǝ́ nyɛ̀ɛ̀ rǝ̀myɛ́, n zhǐr n vò n wɔ̀ sǝ̀ gakó yó-cǝ́bal mɔ́ nɛ: «Nyǐ ǹ yà ǹ la yò pyǎ. Bal mɔ́ wɔ́ Orɔm lò.» ²⁷ Sǝ̀ yó-cǝ́bal mɔ́ zɛ̃̀ n yí n wɔ̀ Pwǝǝ ne: «Ǹ gǝ wɔ́ Orɔm lò zhǝ̀n ga, sǝ́ wɔ̀ nɛ̀.» Pwǝǝ wɔ̀ mɔ̀: «À wɔ́ Orɔm lò.» ²⁸ Yó-cǝ́bal mɔ́ zɛ̃̀ n wɔ̀ mɔ̀: «Àmyɛ́ yil wɔ́ wársɛ nánzhǝzhɔ̌ à kwɛ̃̌ a b'a jǐrh Orɔm lò.» Pwǝǝ wɔ̀ mɔ̀: «Àmyɛ́ da wɔ́ Orɔm lò.» ²⁹ Rǝ̀myɛ́ yó, byɛ̀bɛ́ bǝ̀ y'à la mɔ mǎ mɔ́ j'a làà dwã nɛ bǝ yẽ̌ mo. Yó-cǝ́bal mɔ́ gǝ́ tú n lwar bǝ̀ Pwǝǝ wɔ́ Orɔm lò, ń wu zɛ̃̀, ń gǝ́ ce bǝ zǝ mɔ bǝ lyẽ ǹdǝ́ nyáná mɔ́ yilǝ. ³⁰ Shǝ̀dɛ́ɛ́sɛ́ gakó yó-cǝ́bal mɔ́ yà ń nǝ́ ń yǎl n lwar kɔn rɛ́ dɛ̀bɛ́ è ce Zhwifubá n'ê ce cà Pwǝǝ nyí ni mú kùr pamparɛ̃ɛ̃. Rǝ̀myɛ́ ce, è zɛ̃̀ nǝkɔkɔ́lɛ́ yá, n ce bǝ byẽ̀ Yi jì y vwĩ̀-zwǝ́lnǝ bé yé né cìnǝ́ bé ǹdǝ́ Zhwifubá bùrsí gùlú w lyì bí bǝ bǝ̀ dwã yó. N zɛ̃̀ n ce bǝ lwǝ̌r nyáná nɛ́ nyɛ̀bɛ́ bǝ̀ y'à m'e lyẽ Pwǝǝ mó, n ce bǝ zǝ mɔ bǝ bǝ̀ bùrsí gùlú w lyì bí yé né.