¹ Rǝ̀myɛ́ kwã nɛ́, nǝ́ zhǐr nǝ́ yẽ̌ Efɛɛzɛ Kristǝ-lyì gùlú w yé né cìnǝ́ bé ne, nǝ́ zù bǔ-bwǝl nǝ́ byɛrhɛ nǝ́ vò Hɔɔsɛ. È zɛ̃̀ nǝkɔkɔ́lɛ́ y nǝ́ vò Oroode, nǝ́ zhì gàà nǝ́ lyɛ̃ nǝ́ vò Patara. ² Nǝ́ gǝ́ yú gàà, nǝ́ nǝ bǔ-bwǝl rǝ̀ la Fenishi, nǝ́ j'á zù rǝ̀myɛ́, nǝ́ lyɛ̃ nǝ́ la. ³ Nǝ́ gǝ́ tú nǝ́ yí nǝ̀-fɔ̀lɔ̀ w cǝcǝl wǝ, nǝ́ cǝ̀r Shilipu nǝ́ ce nǝ́ jǝ̀gwã̀ nɛ, nǝ́ lyɛ̃ nǝ́ la Siri. Nǝ́ yí nǝ́ só Tiiri ní, bǝ̀ wɔ́ gàà bǝ̀ y'à mǝ̌ sǝ bǝ só bǔ-bwǝl ré wẽ̀ ré né. ⁴ Nǝ́ nǝ gàà Kristǝ kwã-lyì bí, sǝ nǝ́ mɛ̃ bǝ̀ sõ nǝ́ wɛ̀rhɛ́ dwã nyàlpyɛ̀. Eshirhǝ náàcɛ̀nɛ́ ce bǝ wɔ̀ Pwǝǝ ne bǝ̀ ń bǝ̀ká n vò Zhǝrǝzalɛm yé. ⁵ Dwã nɛ́ nyàlpyɛ̀ y yùwǝ̀, nǝ́ zhǐr gàaè, sǝ bǝ̀myɛ́ ǹdǝ́ bǝ̀ kana ǹdǝ́ bǝ̀ bǝ̀sɔ́ná gakó zɛ̃̀ bǝ̀ n'ê zhìì nǝ́ba. Nǝ́ gǝ́ tú nǝ́ n'é dwi cɔ w wa, nǝ́ jòm nǝ́ nǝ̀dwǝ́nǝ́ yó bù-cǔ w yó nǝ́ lwǝ̀l Yi, ⁶ nǝ́ zɛ̃̀ nǝ́ ce dwã nǝ̀báná, bǝ k'â la jè, nǝ́yɛ j'á zù bǔ-bwǝl ré. ⁷ Nǝ́ zhǐr Tiiri ní ǹdǝ́ bǔ-bwǝl ré nǝ́ vò Tǝlǝmǝyiisi, nǝ́ j'á du nɛ̃̌ mɔ́ wẽ́ gàà, nǝ́ vò e ce Kristǝ-lyì bí. Nǝ́ mɛ̃ bǝ̀ sõ nǝ́ zɔ̃̀. ⁸ Cɛ y gǝ́ tú e lá, nǝ́ lyɛ̃ ǹdǝ́ nǝ́ nèrh nǝ́ vò Sǝzarɛ, yò-ècɔ̀nɔ̀ nyí rí bwǝ̀lnǝ Shilipu sõ kɛ̀lɛ́ wa, nǝ́ mɛ̃ ń sõ. Ń yà ń wɔ́ lyì bí bwàlpyɛ̀ y bǝ̀ y'à cír Zhǝrǝzalɛm nɛ́ mɔ́ mǝ̀dù. ⁹ Ń yà ń zhe bǝ̀kwá bǝ̀na, bǝ̀ yǝ̀ byǝ́nǝ́ jí yé. Bǝ̀ y'à wɔ́ lyì byɛ̀bɛ́ bǝ̀ n'ê zɔ̀m zɔ̀mà nyɛ̀bɛ́ Yi byili mú. ¹⁰ Nǝ́ wɛ̀rhɛ́ dwã nánzhǝzhɔ̌ gàà, sǝ dɛ̃ rǝ̀dù Yi nyì-zwennǝ mǝ̀dù shí Zhide n bǝ̀ cɔ w wa, ń yíl Agǝbuusi. ¹¹ N lyɛ̃ n bǝ̀ nǝ́ sõ, n kwè Pwǝǝ cã̌-tɔ̀nɔ̀ w n lyẽ ń cìcì nèsé ǹdǝ́ ń jɛ̀sɛ́ n wɔ̀: Eshirhǝ náàcɛ̀nɛ́ wòwǝ̀: Zhwifubá byɛ̀bɛ́ bǝ̀ ŋwɛ́nɛ́ Zhǝrǝzalɛm nɛ́ mɔ́ b'a zǝ cã̌-tɔ̀nɔ̀ w kɔ̀bɔ́ cǝ́-bal mɔ́ bǝ lyẽ èta, bǝ pǝ lyì byɛ̀bɛ́ bǝ̀ dǝ̀ Zhwifubá ne. ¹² Nǝ́ gǝ́ nyɛ̀ɛ̀ rǝ̀myɛ́, nǝ́myɛ̌ Szarɛ cɔ w Kristǝ-lyì bí zɛ̃̀ nǝ́ n'é lwǝ̀l Pwǝǝ ne sǝ n yẽ̌, ń bǝ̀ká n vò Zhǝrǝzalɛm yé. ¹³ Pwǝǝ zɛ̃̀ n wɔ̀: Wɔ́ bǝ̀kɔ́n yil á n'á kúrhǝ́, á la m'a zhìlì à wu ní? Bǝ̀ gǝ la nɛ zal bǝ lyẽ, bǝ̀ la nɛ zal bǝ gu Zhǝrǝzalɛm nɛ́ myɛ Cǐnnǝ Yezu yil ré yilǝ, à m'a shɛ̀nɛ́. ¹⁴ Nǝ́ gǝ́ pwírí nǝ́ cǝ̀r cǝ̀r mo nǝ́ ga, ń yǝ̀ shɛ̀nɛ́ mɔ́ ce nǝ́ j'á yẽ̌ mo, nǝ́ zɛ̃̀ nǝ́ wɔ̀ bǝ̀ kɔn yál Cǐnnǝ mó pùbùlǝ̀. ¹⁵ Nǝ́ wɛ̀rhɛ́ dwã màngɛlɛ́ Sǝzarɛ nɛ́, sǝ dwã nɛ́ nǝ̀myɛ́ kwã nɛ́, nǝ́ zɛ̃̀ nǝ́ tɛnɛ nǝ́ zhǐr nǝ́ la Zhǝrǝzalɛm. ¹⁶ Sǝzarɛ cɔ w Kristǝ-lyì bí jàlà zɛ̃̀ bǝ zhìì nǝ́ba bǝ m'e vò bal mǝ̀dù sõ, ń shí Shipiri, ń yíl Manasɔ̃, wɔ́ ńmyɛ̌ sõ nǝ́ y'ǎ mǝ̌ sǝ nǝ́ zul né. Ń yà ń wɔ́ Kristǝ-kwã lò. Sǝ ń gǝ́ jǐrh Kristǝ-lò mó d,ɛnɛ. ¹⁷ Nǝ́ gǝ́ tú nǝ́ yí Zhǝrǝzalɛm yi ní, Kristǝ-lyì bí zwẽ nǝ́ba ǹdǝ́ wu-nyɔ̃̀. ¹⁸ È nǝkɔkɔ́lɛ́ y yùwǝ̀, Pwǝǝ zǝ nǝ́ba n mǝ n vò Zhakɛ sõ. Wɔ́ gàà mɔ́ Kristǝ-gùlú w yé né cìnǝ́ bé gakó y'à gùlí dwã nɛ́. ¹⁹ Pwǝǝ ce be, n zɛ̃̀ n byili bi kɔn dɛ̀bɛ́ Yi tó ń tum rí dɛnnɛ rǝ wɛ̀rhɛ́ lyì bí byɛ̀bɛ́ bǝ̀ dǝ̀ Zhwifubá ne mó gakó yilǝ. ²⁰ Bǝ̀ gǝ́ nyɛ̀ɛ̀ kɔn dɛ̀bɛ́ Pwǝǝ byili bi mú bǝ zhɛ̀, bǝ zɛ̃̀ bǝ cèrhé Yi, bǝ wɔ̀ Pwǝǝ ne: Da-byǐ, lwar bǝ̀ Zhwifubá mɔ̀ɔ̀rhɛ nánzhǝzhɔ̌ zù Yezu Kristǝ. Bǝ̀ zhe yǝ̀wǎl, bǝ̀ gakó j'à n'ê zwẽ Muyiisi nyǝ́ né cɛ̀nɛ̀. ²¹ Sǝ bǝ̀ nyɛ̀ɛ̀ bǝ̀ ǹ nǝ́ ǹ byili Zhwifubá byɛ̀bɛ́ bǝ̀ ŋwɛ́nɛ́ cɛmɛ nɛ́ dwã bɛ́ wẽ́ mó ne, bǝ̀ bǝ̀ yẽ̌ Muyiisi nyǝ́ né ne; ǹ nǝ́ ǹ byili bǝ̀ bǝ̀ bǝ̀k'a gõ̀ bǝ̀ bǝ̀sɔ́ná bɛ́ yé; sǝ bǝ̀k'a zwẽ Zhwifubá lùl-e-pwírí y nyǝ́ né. ²² Wɔ́ etǝr nǝ́ b'ǎ wɛ̀rhɛ́ nɛ́? Bǝ̀ m'a pamparɛ̃ɛ̃ bǝ̀ ǹ ŋwɛ́nɛ́ nyɔ̀nɔ̀, ²³ sǝ nǝ́ la mɔ́ kɔn rǝ̀dù byilu ń wɛ̀rhɛ́. Nǝ́ zhe lyì bǝ̀na nyɔ̀nɔ̀ bǝ̀ y'à bwǝl kɔn nyí Yi ni. ²⁴ Zǝ bɛ ń mǝ́ vò, sǝ́ tó ń vò bǝ̀ gǝ́ la bǝ̀ yò w kɔrhɔ ǹdǝ́ Yi mǝ̀gã̌. Kɔn dɛ̀bɛ́ bǝ̀ zhe rǝ̀ tum yò w kɔrhɔ yilǝ, sǝ́ kwɛ̃̌ rɛ ń pǝ bɛ, mùnì bǝ ŋwɛ̀nɛ́ bǝ pǎr bǝ̀ bǝ̀ ywẽ́ né. Ǹ gǝ wɛ̀rhɛ́ èta, lyì bí gakó b'a lwar bǝ̀ ǹmyɛ́ cìcì nǝ́ ǹ zwẽ Muyiis nyǝ́ né, sǝ bǝ̀ b'a pwírí kɔn dɛ̀bɛ́ bǝ̀ n'ê zɔ̀m ǹ yil mó dǝ̀ zhǝ̀n yé. ²⁵ Sǝ è wɔ́ byɛ̀bɛ́ bǝ̀ dǝ̀ Zhwifubá bǝ̀ jǐrh Kristǝ-lyì mú yilǝ, nǝ́ kɛ̃ sɛ́bɛ́ nǝ́ pɛ bɛ nǝ́ byili kɔn dɛ̀bɛ́ bǝ̀ mǝ̌ sǝ bǝ wɛ̀rhɛ́. Nyǐ kɔn dɛ̀bɛ́ nǝ́ byili bi mú: Á bǝ̀k'á dɔ̃̀ vwàmá nyɛ̀bɛ́ bǝ̀ zwǝ́l vwẽ̀ tɛ̀bɛ́ rǝ̀ dǝ̀ Yi yó nàmá yé, á bǝ̀k'á jí jal yé, á bǝ̀k'á dɔ̃̀ vwǎm mɔ̀bɔ́ shǐ yǝ̀ mǝ̀ byã w ce yé: á bǝ̀ká fwǝ̌l yé. ²⁶ Rǝ̀myɛ́ yó, Pwǝǝ zɛ̃̀ n zǝ lyì bí bǝ̀myɛ́ bǝ̀na yá. È zɛ̃̀ nǝkɔkɔ́lɛ́ y yùwǝ̀, ńmyɛ̌ ǹdǝ́ bǝ̀myɛ́ ga kwɛrhɛ bǝ̀ yò ǹdǝ́ Yi, n zɛ̃̀ n vò Yi jì y kɔ̀nɔ̀ w wa, n byili dɛ̃ rɛ́ tɛ̀bɛ́ bǝ̀ yò w kɔrhɔ ǹdǝ́ Yi mú tumǝ né la zhɔ̌ mɔ́. Wɔ́ dɛ̃ rɛ́ yù w bǝ̀ la bǝ̀myɛ́ bǝ̀na mǝ̀dù mǝdù gakó vwĩ̀ rí zwǝ́l. ²⁷ Dwã nɛ́ nyàlpyɛ̀ y bǝ̀ kwɛrhɛ bǝ̀ yò ǹdǝ́ Yi nǝ̀ wẽ́ mó gǝ́ tú nǝ bwǝlse zhɔ̌, Zhwifubá byɛ̀bɛ́ bƎ shí Azhi tǝnà y wẽ́ mó jàlà nǝ Pwǝǝ Yi jì y kɔ̀nɔ́ w wa. Bǝ zɛ̃̀ bǝ cìrh lyì-zhǎ bɛ́ bǝ ce né, bǝ zɛ̃̀ sɔ̀ nɛ Pwǝǝ yó wǝ, bǝ j'a tó rǝ̀myɛ́ dɛnnɛ bǝ zǝ mɔ. ²⁸ Sǝ bǝ̀ y'à n'ê búbwéé bǝ̀ zhe: Esǝrayɛl lyì, bà-nà á sɛ̃ nǝ́ba. Nyǐ wɔ́ bal mɔ́ mɔ̀bɔ́ ń nǝ́ ń tó jààsɛ́ gakó wǝ, ǹdǝ́ lyì bí gakó sõ, ń nǝ́ ń cèrhè lyì bí ni bǝ̀ nǝ́ dwí rí ǹdǝ́ rǝ̀ nyǝ́ né ǹdǝ́ Yi jì y bǝ kùr zhe mó. Sǝ èlǎsɛ̃́, ń gaga mɔ́ kwɛrhɛ cɛ n zǝ lyì byɛ̀bɛ́ bǝ̀ dǝ̀ Zhwifubá n zù Yi jì y kɔ̀nɔ́ w jàà y kɛ̀bɛ́ Zhwifubá dúdú zhe sɔ́má bǝ̀ zwì ní mú n cɔ̀ ya. ²⁹ Bǝ̀ y'à nɔ Efɛɛzɛ lyì bal Terofyimi Pwǝǝ kwã nɛ́ cɔ w wa, bǝ zɛ̃̀ bǝ̀ y'à n'ê bùl bǝ̀ ń gǝ ń zǝ mɔ n zù jàà y èmyɛ́ wa. Wɔ́ rǝ̀myɛ́ è ce bǝ̀ zɔ mɔ. ³⁰ Cɔ w gakó j'a dom. Lyì dùr bǝ shí jààsɛ́ gakó w bǝ bà, bǝ zǝ Pwǝǝ Yi jì y kɔ̀nɔ́ w wẽ́ bǝ m'e du pwẽ̀ ne. Bǝ yǝ́yɛ́lɛ́ bǝ pyi bwǝ̀ǝ̀ ré. ³¹ Bǝ̀ y'à n'ê yǎl bǝ gu mu, sǝ shǝ̀dɛ́ɛ́sɛ́ yó-cǝ́bal mɔ́ gǝ́ nyɛ̀ɛ̀ bǝ̀ dweme n'ê dom Zhǝrǝzalɛm púlǝ́púlǝ́ wǝ, ³² n já n zɛ̃̀ n zǝ shǝ̀dɛ́ɛ́sɛ ǹdǝ́ sǝ̀ yé né cìnǝ́ jàlà n dùr n vò dweme ré gǝ́ n'ê dom mǝ̀ gã̌ mɔ́.Lyì-zhǎ bɛ́ gǝ́ nɔ shǝ̀dɛ́ɛ́s:é ǹdǝ́ sǝ̀ yó-cǝ́bal mɔ́ , bǝ̀ k'ê yǝ̀ Pwǝǝ mà yé. ³³ Shǝ̀dɛ́ɛ́sɛ́ yó-cǝ́bal mɔ́ yí Pwǝǝ nyí ni, n ce bǝ zǝ mɔ bǝ lyẽ ǹdǝ́ nyáná nǝ̀lyè. N zɛ̃̀ n bwǝ̀rh bǝ̀ wɔ́ yẽ̀ lò n[dǝ́ mɔ, sǝ wɔ́ bǝ̀kɔ́n ń wɛ̀rhɛ́? ³⁴ Lyì-zhǎ bɛ́ gakó zɛ̃̀ bǝ̀ n'ê bya, lò gakó ǹdǝ́ ń nyǝ̀ná. Bǝ̀ sɔ̀ɔ̀rɛ́ ce shǝ̀dɛ́ɛ́sɛ́ yó-cǝ́bal mɔ́ yà ń kǝ́ ń bǝ bǝ̀ zɔ̀mà nɛ́ kùrǝ̀ nyɛ̌ yé. N ce bǝ zǝ Pwǝǝ bǝ vò shǝ̀dɛ́ɛ́sɛ́ jàà y wa. ³⁵ Pwǝǝ gǝ́ yú shǝ̀dɛ́ɛ́sɛ́ jàà y nyí ni, sǝ̀ gǝ́ n'ê tó mǝ̀gã̌ sǝ̀ jìl mó, sǝ kwè mo sǝ m'e jì, lyì-zhǎ bɛ́ gǝ́ y'à n'ê wɛ̀rhɛ́ jàn mɔ́ yilǝ. ³⁶ Lyì bí gakó y'à pú ń kùr bǝ̀ n'ê bya bǝ̀ zhe: Gu-nǝ mo! Gu-nǝ mo! ³⁷ Bǝ̀ gǝ́ tú bǝ̀ n'ê yǎl bǝ zǝ Pwǝǝ bǝ zù shǝ̀dɛ́ɛ́sɛ́ jàà y wa, n zɛ̃̀ n wɔ̀ shǝ̀dɛ́ɛ́sɛ́ yó-cǝ́bal mɔ́ nɛ: À n'â lwǝ̀l mó sǝ́ yẽ̌ a byili mú zɔ̀mɛ̀. Shǝ̀dɛ́ɛ́sɛ́ yó-cǝ́bal mɔ́ bwǝ̀rh n wɔ̀: Ǹ nyɛ̌ gǝ̀rɛ́kɛ? ³⁸ È dǝ̀ ǹmyɛ́ ǹ wɔ́ Ezhipti lyì bal mɔ́ ǹ ce zɔ̀mà nɛ́ jòm cɔ w wa, ń zǝ lyi̇gurnǝ mɔ̀ɔ̀rhɛ rǝ̀na ń vò gɔ-elũ èpòlò w w kɔn gwẽ̌ yǝ̀ dɛnɛ mɔ́ nà? ³⁹ Pwǝǝ wɔ̀ : Àmyɛ́ wɔ́ Zhwifu. Bǝ̀ lùl ne Tarsɛ nɛ́, Shilishi tǝnà y wa. À da-dǒ w cǝ-fɔ̀lɔ̀. À n'â lwǝ̀l mó sǝ́ yẽ̌ a zɔ̀m ǹdǝ́ lyì bí. ⁴⁰ Shǝ̀dɛ́ɛ́sɛ́ yó-cǝ́bal mɔ́ zɛ̃̀ n pɔ̃ sɔ́má bǝ̀ ń zɔ̌m ǹdǝ́ lyì bí. Pwǝǝ zɛ̃̀ n zhì dɛ̃̌ gàà n zhẽ̌ ń jɛ̃̀ n ce lyì bí ni. Bǝ yẽ̌ bǝ̀ sɔ̀ w nɛ, n zɛ̃̀ n zɔ̀m ǹdǝ́ bɛ ǹdǝ́ Zhwifubá zɔ̀mà nɛ́ n wɔ̀: