¹ Lyì-zhǎ bɛ́ gǝ́gǎm mɔ́ gǝ́ zhɛ̀ kwã nɛ́, Pwǝǝ zɛ̃̀ n byẽ̀ Kristǝ kwã-lyì bí n cĩ́ dwã yó n bǝ bɛ cícú, n ce bǝ̀ nǝ̀báná, n zɛ̃̀ n zhǐr ń la Masɛdwanɛ tǝnà y wa. ² Ń gǝ́ yú gàà mɔ́, ń tó cɛmɛ nɛ́ wa, n zhǝrh ǹdǝ́ Kristǝ-lyì bi n dɛnɛ, n mǝ n pǝ bɛ cícú, n zɛ̃̀ n lyɛ̃ n vò Gǝrɛsɛ tǝnà y wa. ³ N mɛ̃ gàà n wɛ̀rhɛ́ cànsɛ sǝ̀tɔ̀, sǝ rǝ̀myɛ́ kwã nɛ́, ń yà ń nǝ́ ń yǎl n byɛrhɛ ǹdǝ́ bǔ-bwǝl n vò Siri. Sǝ ń pwírí Zhwifubá shǝ̀l ǹdǝ́ dwã bǝ̀ n'ê yǎl bǝ zǝ mɔ, n jà ń gu ń wẽ́ bǝ̀ ń mà n ká n kwɛ̃̀ n tó Masɛdwanɛ. ⁴ Ń tó-dwã bɛ́ y'à wɔ́: Bere lyì bal Pyiruusi byǐ Sɔpatɛɛrɛ, ǹdǝ́ Tǝsǝloniki lyì byǎ Arǝsǝtarkɛ ǹdǝ́ Sǝkunduusi, ǹdǝ́ Dɛrbɛ lyì bal Gǝyuusi, ǹdǝ́Timote, e súlí Azhi lyì byǎ Tishiki ǹdǝ́ Tǝrofyimi. ⁵ Bǝ̀myɛ́ tó yé bǝ vò bǝ dɛ̃̀ nǝ́ba Tǝrǝwaasɛ nɛ́. ⁶ È gǝ wɔ́ nǝ́myɛ̌ yilǝ, búrú ò yǝ̀ sã̀-nǝ̀byẽ̌ ò wẽ́ ce mó címsí gǝ́ tú e lyɛ̃, nǝ́ zù bǔ-bwǝl Shilipu cɔ w wa, nǝ́ wɛ̀rhɛ́ dwã nǝ̀nu nǝ́ byɛrhɛ nǝ́ vò bǝ̀ sõ Tǝrǝwaasɛ nɛ́, nǝ́ wɛ̀rhɛ́ dwã nyàlpyɛ̀ gàà. ⁷ Shìrhǝ́ y dɛ̃ rɛ́ dǝ̀dɛ̀nɛ́ y nǝ́ gùlí dwã mùnì ga nǝ́ kǝ́ búrú w nǝ́ tǝ̀ ǹdǝ́ dwã. Pwǝǝ yà ń mǝ̌ sǝ n zhǐr gàà è zɛ̃̀ nǝkɔkɔ́lɛ́ yá. Rǝ̀myɛ́ ce, n zhǝrh ǹdǝ́ Kristǝ-lyì bí kɔn m'e yí ecǝ̃-swélé. ⁸ Nǝ́ y'ǎ ŋwɛ́nɛ́ dɛ̃̌-yó jì èdù wẽ́. Pàntámsɛ nánzhǝzhɔ̌ y'à ŋwɛ́nɛ́ gàà mɔ́. ⁹ Ébɔ́-dǎl mǝ̀dù yà ń jě túkwǝ́rǝ́ y yó, ń yíl Etiki. Jan y'à zù mu dɛ̃́dɛ̃́, sǝ Pwǝǝ zɔ̀mà nɛ́ gǝ́ dɛnɛ dɛ̃́dɛ̃́ mɔ́ ce, n dɛ̀ɛ̀ dɛ̀ɛ̀ n shí gàà n tu tɛ̃́. Bǝ̀ gǝ́ tú bǝ̀ la mɔ kǒ, bǝ pwírí ń cùwǝ̀. ¹⁰ Pwǝǝ já n só tɛ̃́, n lwǝl n kwè mo, n wɔ̀: Á wun bǝ̀k'a zɛ̃̀ yé, ń yǝ̀ cì yé. ¹¹ Pwǝǝ gǝ́ ká n jì dɛ̃̌-yó jì y wǝ, n kwè búrú w n kǝ́ dwã w nǝ́ tǝ̀ ǹdǝ́ dwã, n zɛ̃̀ n jí kùjú, n kǝ́ n ji zɔ̀mà nɛ́ kùr n zɔ̀m zɔ̀m kɔn m'e yí c;-lár, n zɛ̃̀ n zhǐr. ¹² È gǝ wɔ́ Ébɔ́-dǎl mɔ́ yilǝ, bǝ̀ zǝ mɔ bǝ kwɛ̃̀ ǹdǝ́ ń yírhǝ́. Sǝ rǝ̀myɛ́ zɔ lyì bí gakó wun ni. ¹³ Rǝ̀myɛ́ yó, Pwǝǝ yà ń byili bǝ̀ ń mà n kwè sɔ́má y ǹdǝ́ ń nèrh, nǝ́myɛ̌ zɛ̃̀ nǝ́ zù bǔ-bwǝl nǝ́ tó yé nǝ́ la Asɔɔsɛ; nǝ́ gǝ́ yú gàà, sǝ nǝ́ kwè mo. ¹⁴ Nǝ́ gǝ́ yúwǝ́, Pwǝǝ bǝ̀ n nǝ nǝ́ba gàà, nǝ́ kwè mo ǹdǝ́ bǔ-bwǝl ré nǝ́ m'e vò Myǝtǝlɛ̃ɛ̃. ¹⁵ Nǝ́ zhì gàà nǝ́ kwè bǔ-bwǝl. È zɛ̃̀ nǝkɔkɔ́lɛ́ y yùwǝ̀, nǝ́ bwǝlse Cɔɔsɛ. È lyẽ̌ yù w nǝ́ yí Samɔɔsɛ, è dwã nǝ̀tɔ̀ yù w nǝ́ yí Myǝlɛ. ¹⁶ Pwǝǝ yà ń tá ń yǎl n jíjírhí Azhi tǝnà y wẽ́ yé. Ń yírh y'à lum. Bǝ̀ ń yà ń nǝ́ ń yǎl ǹdǝ́ Yi gǝ sɛ̃ sǝ n yí Zhǝrǝzalɛm Pantekɔtɛ címsi yilǝ. Rǝ̀myɛ́ ce, ń yǝ̀ Efɛɛzɛ tó yé.Nǝ́ zhì gàà nǝ́ k'é kwè bǔ-bwǝl. È zɛ̃̀ nǝkɔkɔ́lɛ́ y yùwǝ̀, ¹⁷ Pwǝǝ zɛ̃̀ n zhì Myǝlɛ nɛ́ n twĩ̀ bǝ byẽ̀ Efɛɛzɛ Kristǝ-lyì gùlú w yé né cìnǝ́ bé. ¹⁸ Bǝ̀ gǝ́ túwǝ́, n wɔ̀ bɛ: À gǝ́ tú Azhi tǝnà y wẽ́ mó, á yě à tùntwǝ̃̀ǝ̃̀ né gǝ́ yàl nɛ́ ǹd'ába. ¹⁹ À twĩ̀ Cǐnnǝ mó tum rí ǹdǝ́ cìn-lwǝl ǹdǝ́ yǝ́-nàná, ǹdǝ́ nɔ̀nɔ̀, bǝ̀ Zhwifubá y'à n'ê pyà lwɛlɛ ǹdǝ́ nɛ. ²⁰ À byili ába kɔn dɛ̀bɛ́ gakó rǝ̀ wɔ̌ rǝ̀ b'a sɛ̃ ába. A bwǝl Yi zɔ̀mɛ̀ rɛ́ a byili ába á sõ kǎlsɛ́ wẽ́, ǹdǝ́ lyi bí gakó yé né, à byili ába rǝ̀ kùrǝ̀. ²¹ À ce Zhwifubá ǹdǝ byɛ̀bɛ́ bǝ̀ Zhwifubá mó lwar bǝ̀ bǝ̀ mǝ̌ sǝ pyìrhí bǝ̀ wun bǝ zǎ Yi, sǝ bǝ zù nǝ́ Cǐnnǝ Yezu. ²² Èlǎsɛ̃́, à la Zhǝrǝzalɛm, sǝ wɔ́ Eshirhǝ náàcɛ̀nɛ́ è n'ê nyɛ́ɛ́ nɛ b'à zhǝl. À yǝ̀l kɔn dɛ̀bɛ́ rǝ̀ la wɔ̀rhɔ́ gàà yé. ²³ Sǝ cɛmɛ nɛ́ nyɛ̀bɛ́ gakó à tó nǝ̀ wẽ́ mó, Eshirhǝ́ náàcɛ̀nɛ́ n'ê byili bǝ̀ bǝ̀ m'a nwɛ̀nɛ̀ nɛ, bǝ ce ne byǝ̀nǝ́-jù wǝ̀. Wɔ́ rǝ̀myɛ́ dúdú à yě. ²⁴ Sǝ è wɔ́ àmyɛ́ yilǝ, è wɔ́ cu ráá à gǝ :nwɛ́nɛ́ myɛ, rǝ̀myɛ́ dǝ̀ kaka à yil yé, àmyɛ́ wírí a bwǝ̀l Yi pɛnɛ́ nánfò w yò-cɔ̀nɔ̀ nyí rí a báásɛ, bǝ̀ wɔ́ rǝ̀myɛ́ Cǐnnǝ Yezu pɔ nɛ b'à wɛ̀rhɛ́. ²⁵ À jòm á sono a bwǝ̀l Yi pyɛ̀lɛ̀ rɛ́ yò wǝ́. Sǝ èlǎsɛ̃́, à yě bǝ̀ ámyɛ̌ mǝ̀dù ga kǝ́ ń tá ń la nɛ nɔ yé. ²⁶ Rǝ̀myɛ́ ce, à n'â wǝ̀l ába zà: á gǝ zɛ̃̀ á tú á yẽ̌ kɔn dɛ̀bɛ́ à bwǝ̀l a byili ába mó ne, rǝ̀myɛ́ k'ê dǝ̀ àmyɛ́ yò yé, ²⁷ b'à byili ába kɔn dɛ̀bɛ́ gakó Yi n'ê yàlá. À yǝ̀ ába kaka shèè yé. ²⁸ Ámyɛ̌ cìcì mú dɛ̃̌-na á cìnǝ̀. Yìlì-nǝ lyì bí Eshirhǝ náàcɛ̀nǝ́ pɔ ába bǝ̀ yìlì-nǝ mó, ǹdǝ vwã̌-ènɔ̀n gǝ́ nǝ́ ń yìlì ń vwàmá ta, s'á nyǐ Yi gùlú w lyì bí yò. Yi tó rǝ̀ cìcì Byǐ mú jal mɔ́ mǝ̀ ló tɛ̃́ dɛnnɛ rǝ̀ cǐ mú. ²⁹ À yě bǝ̀ àmyɛ́ gǝ tú à k'â tɛ̀nɛ́, lyì b'a fwĩ́ tɛ̃́ ǹdǝ gɔ-kǔl-bǝlwǎlsɛ ta, sǝ bǝ̀ t'â la vwàmá nɛ́ nɛ yõ̌ yé. ³⁰ Èta myɛ, lyì b'a zɛ̃̀ ámyɛ̌ cìcì wẽ́ ǹdǝ́ kɔma , bǝ m'e vwɛ̃ Kristǝ kwã-lyì nánzhǝzhɔ̌ bǝ tó bǝ̀ kùrǝ̀. ³¹ Rǝ̀myɛ́ ce, dɛ̃̌-na á cìnǝ̀, s'á lyǐrh b'à yàl nɛ́ ǹd'ába byinǝ nǝ̀tɔ̀, sǝ à y'à n'â cící ába twéé twéé ǹdǝ́ yǝ́-nàná. ³² Èlǎsɛ̃́, à n'â yẽ̌ ába à ce Yi jɔ̃̀ wa, sǝ rǝ pɛnɛ́ nánfò w zɔ̀mɛ̀ rɛ́ yìlì ába, bǝ̀ zɔ̀mɛ̀ rɛ́ rǝ̀myɛ́ wɔ̌ rǝ̀ b'a súlí á jàn, rǝ ce á n:a cǝl nǝ̀cɛ̀ndɛ́ tɛ̀bɛ́ Yi cĩ́ rǝ̀ lyì bí ni mú wẽ́. ³³ À yǝ̀ lò wɛ́rɛ́ ǹdǝ́ lò sánǝ́má ǹdǝ́ lò gɔ̀nɔ̀ yǎl yé. ³⁴ Á cìcì yě bà wɔ́ à jɛ̀sɛ́ shɛ̀bɛ́ èta mɔ́ à m'a twĩ̀ á nǝ àmyɛ́ ǹdǝ à tó-dwã bɛ́ ga nyí kùjú. ³⁵ À byili ába twéé gakó bǝ̀ twĩ̌-nǝ èta, mùnì á ŋwɛ̀nɛ́ á sɛ̃ nǝ̀mwà nɛ, s'á lyǐrh Cǐnnǝ Yezu cìcì zɔ̀mɛ̀ rɛ́. Ń wòwǝ̀: Lò mɔ̀bɔ́ ń nǝ́ ń pɛ, ń wɔ́ wu-nyɔ̃̀ cí du lò mɔ̀bɔ́ bǝ̀ n'ê pɛ mɔ mɔ́. ³⁶ Pwǝǝ gǝ́ wò èta, n jòm ń nǝ̀dwǝ́nǝ́ yó, ńmyɛ̌ ǹdǝ́ bǝ̀myɛ́ ga tó dwã bǝ̀ n'ê ce Yi. ³⁷ Bǝ̀ gakó zɛ̃̀ bǝ̀ n'ê kúrhǝ́, bǝ̀ n'ê kwǝ̀ǝ̀le mo. ³⁸ Wɔ́ Pwǝǝ gǝ́ yà ń wò bǝ̀ bǝ̀ k'ê t'â la mɔ nɔ mɔ́ è ce bǝ̀ wun zhìlì dɛ̃́dɛ̃́. Bǝ zɛ̃̀ bǝ zhìì mu bǝ vò e ce bué-bwǝl ré wǝ.