¹ Pwǝǝ zhǐr ǹdǝ́ Apɔlɔɔsɛ ŋwɛ́nɛ́ Kɔrɛ̃tɛ nɛ́, n tó cɛmɛ nɛ́ nyɛ̀bɛ́ nǝ̀ ŋwɛ́nɛ́ payààrɛ́ w mɔ́ wa, n lyɛ̃ n vò Efɛɛzɛ. N yí n nǝ Kristǝ-lyì jàlà gàà. ² N bwǝ̀rh be n wɔ̀: Á gǝ́ zù Kristǝ mó Eshirhǝ náàcɛ̀nɛ́ só á yó? Bǝ wɔ̀ mɔ: Nǝ́ gwẽ̌ yǝ̀l bǝ̀ Yi twĩ̀ Eshirhǝ náàcɛ̀nɛ́ e bǝ̀ yé. ³ N zɛ̃̀ n bwǝ̀rh be n wɔ̀: Nɛ̃̌-mɔ́lɔ́ mɔ̌ bǝ̀ mɔ́lɛ́ ába mǝ̀ wẽ́? Bǝ wɔ̀ mɔ: Wɔ́ Zhã nɛ̃̌-mɔ́lɔ́ mɔ́. ⁴ Pwǝǝ wɔ̀ bɛ: Zhã yà wɔ́ byɛ̀bɛ́ bǝ̀ pyìrhí bǝ̀ wun ní, ń yà ń nǝ́ ń mɔ́lɛ́ nɛ̃̌ wa, ń yà ń nǝ́ wǝ̀l Esǝrayɛl lyì bí ni bǝ̀ bǝ̀ zú mɔ̀bɔ́ ń la tà-kwã n bǝ̀ mɔ́. Wɔ́ Yezu yò ń yà ń nǝ́ ń zɔ̀mà. ⁵ Bǝ̀ gǝ́ nyɛ̀ɛ̀ rǝ̀myɛ́, bǝ j'a ce bǝ mɔ́lɛ́ bɛ nɛ̃̌ w Cǐnnǝ Yezu yil ré yilǝ, ⁶ Pwǝǝ zɛ̃̀ n cĩ́ ń jɛ̀rh bǝ̀ yó, Eshirhǝ náàcɛ̀nɛ́ só bǝ̀ yó. Bǝ zɛ̃̀ bǝ̀ n'ê zɔ̀m zɔ̀mà dwí dwã, ǹdǝ́ zɔ̀mà nyɛ̀bɛ́ Yi byili bi mú myɛ. ⁷ Bǝ̀ gakó y'à yú nunǝ shí ǹdǝ́ bǝ̀lyè. ⁸ Pwǝǝ wɛ̀rhɛ́ cànsɛ sǝ̀tɔ̀ ǹdǝ́ ń nǝ́ ń zhǝ̀l Zhwifubá dwã-gùlú jì y wẽ́, ń nǝ́ ń zɔ̀m ndǝ́ wu-jɔ̀ ń nǝ́ ń bwǝ̀l Yi pyɛ̀lɛ̀ rɛ́ yò, sǝ ń yà ń nǝ́ ń ce jàn nɛ́ mùnì ga byɛ̀bɛ́ bǝ̀ n'ê cili ń zɔ̀mà nɛ́ mɔ́ zwẽ nyí bǝ zù Kristǝ. ⁹ Sǝ ǹdǝ́ rǝ̀myɛ́ ga, jàlà y'à wɔ́ yó-kùùli cìnǝ́. bǝ cẽ, bǝ̀ yǝ̀ nyí zwẽ yé. Bǝ̀ y'à n'ê zɔ̀m bǝ̀ m'ê fulsi cǐnnǝ mó sɔ́má y lyì bí gakó yé né, sǝ Pwǝǝ zǝ Kristǝ kwã-lyì bí n zhǐr n vò ń nǝ́ ń cèrhè be kàrmɔ jì èdù wẽ́, è cǝ́bal yà ń yíl Tirǝnuusi. ¹⁰ Ń cèrhè kàrmɔ́ byinǝ nǝ̀lyè. Èta, Zhwifubá ǹdǝ́ byɛ̀bɛ́ bǝ̀ dǝ̀ Zhwifubá bǝ̀ ŋwɛ́nɛ́ Azhi tǝnà y wẽ́ mó gakó nyɛ̀ɛ̀ Cǐnnǝ mó zɔ̀mɛ̀ rɛ́. ¹¹ Yi y'à n'ê tó Pwǝǝ dɛnnɛ rǝ̀ wɛ̀rhɛ́ màmyaarhɛ. ¹² Bá bǝ̀ gǝ zǝ ń yala gàndɛ́, ráá kàmǝ̀-jɛ̀rh shɛ̀bɛ́ ń dwǝ̀rh ǹdǝ́ ń jɛ̃̀ myɛ cìcì bǝ̀ dwǝ̀rh nǝ̀bwànà bɛ́, bǝ̀ y'à wárh. Nǝ̀cílsi námmǝlwǎlsɛ myɛ yẽ̌ byɛ̀bɛ́ sǝ̀ y'à zhe mó ne. ¹³ Zhwifubá jàlà y'à ŋwɛ́nɛ́ bǝ́ wɔ́ cǝ́mǝ́ cìnǝ́, bǝ̀ y'à n'ê tó dɛ̃̌ bǝ̀ zhǝ̀lǝ̀. Sǝ bǝ̀myɛ́ mɔ́ y'à n'ê yǎl bǝ Cǐnnǝ Yezu yil ré bǝ jì nǝ̀cílsi námmǝlwǎlsɛ. Bǝ̀ y'à n'ê wǝ̀l nǝ̀cílsí ni: À n'â wǝ̀l mó Yezu mú mɔ̀bɔ́ Pwǝǝ nǝ́ ń bwǝ̀l ń yò w mó yil ré yilǝ: du! ¹⁴ È y'à wɔ́ Zhwifubá vwĩ̀-zwǝ́lnǝ bé yé né cǝ́bal mǝ̀dù ń yíl Sɛva. Wɔ́ ńmyɛ̌ byǎ bwàlpyɛ̀ bǝ̀ n'ê wɛ̀rhɛ́ èta mɔ́. ¹⁵ Sǝ nǝ̀cílí námmǝlwɛ̀lɛ́ y'à zhe bal mǝ̀dù. E zɛ̃̀ e wɔ̀ bɛ: À yě Yezy párá. À yě Pwǝǝ gǝ́ wɔ́ lò ná-dwí yilǝ. Sǝ ámyɛ̌, yẽ̀ lyì ǹd'ába? ¹⁶ Bal mɔ́ mɔ̀bɔ́ nǝ̀cílí y y'à zhe mó já n zɛ̃̀ bǝ̀ yó wǝ, n ŋwɛ̀nɛ́ bǝ̀ gakó, n nwɛ̀nɛ̀ bɛ, n cɛ̀mɛ̀ bɛ. Bǝ dùr bǝ du pwẽ̀ ne nánlwǝ̀rh. ¹⁷ Efɛɛzɛ Zhwifubá ǹdǝ́ byɛ̀bǝ́ bǝ̀ dǝ̀ Zhwifubá mó gǝ́ nyɛ̀ɛ̀ rǝ̀myɛ́, bǝ̀ gakó wun zɛ̃̀. Sǝ kɔn zhí dɛ̃ rɛ́ rǝ̀myɛ́, Cǐnnǝ Yezu yil ré nɔ còrhó. ¹⁸ Byɛ̀bɛ́ bǝ̀ zù Kristǝ mó nánzhǝzhɔ̌ y'à n'ê twí bǝ̀ byili bǝ̀ tumǝ né pamparɛ̃ɛ̃. ¹⁹ Jǝ̀-myaárhɛ cìnǝ́ nánzhǝzhɔ̌ pwà bǝ̀ jǝ̀-myaárhɛ́ sábá nɛ́ bǝ b'e ji myǐn lyì bí gakó yírh wǝ. Sǝ bǝ̀ jǝ̀ǝ̀le sábá nɛ́ nǝ̀myɛ́ gakó ye yǝ́, bǝ pwírí nǝ̀ wársɛ́ gakó y'à yú byinǝ zɔ̌m ǹdǝ́ shí-ènu tum wársɛ. ²⁰ Èta, Yi zɔ̀mɛ̀ rɛ́ y'à n'ê yí jààsɛ́ gakó wẽ́ ǹdǝ́ Cǐnnǝ mó jàn. ²¹ Rǝ̀myɛ́ kwã nɛ́, Pwǝǝ tɛ́rɛ́ ń wẽ́ bǝ̀ ń mà n zhǐr n tó Masɛdwanɛ, n lyɛ̃ n tó Akǝyi n vò Zhǝrǝzalɛm, bǝ̀ sǝ ń gǝ yú gàè, kɔn mǝ̌ bǝ̀ ń lyɛ̃ n vò Orɔm. ²² Ń gǝ́ tɛ́rɛ́ èta n zhɛ̀, n zɛ̃̀ n twĩ̀ ń sanna bǝ̀lyè bǝ tó yé bǝ vò Masɛdwanɛ, è wɔ́ Timote ǹdǝ́ Eraasɛ. Sǝ ń cìcì mú mɛ̃ Azhi tǝnà y wẽ́ gwẽ̌ n wɛ̀rhɛ́ dwã màngɛlɛ́. ²³ Rǝ̀myɛ́ yi ní, lyì bí zɛ̃̀ bǝ̀ n'ê ce sɔ̀ dɛ̃́dɛ̃́ Cǐnnǝ mó sɔ́má y shò-kwã nɛ́. ²⁴ Sǝ̀byì-zùrhnǝ mǝ̀dù yà ń ŋwɛ́nɛ́ ń yíl Dǝmǝtǝrǝyuusi. Ń yà ń nǝ́ ń sǝ̀byì-kùlì ń wɛ̀rhɛ́ yi rí tɛ̀bɛ́ bǝ̀ y'à n'ê byẽ̀ bǝ̀ Arǝtǝmyiisi mú jì y nyaarhɛ námpɔ́lsɛ. Sǝ yi rí rǝ̀myɛ́ mɔ́ y'à wɔ́ kɛ̃. ²⁵ Sǝ Dɛ̃ rǝ̀dù, Dǝmǝtǝrǝyuusi zɛ̃̀ n byẽ̀ ń tó-dwã bɛ́ ǹdǝ́ byɛ̀bɛ́ gakó bǝ̀myɛ y'à n'ê twĩ̀ tum rí rǝ̀myɛ́ mɔ́ dwã yó, n wɔ̀ bɛ: Á yě bǝ̀ wɔ́ nǝ́ tum rí èta mɔ́ wẽ́ nǝ́ n'é nɛ nyɔ̀ɔ̀rhɛ́ nɛ́. ²⁶ Sǝ á yírhǝ́ na, á zhã̌ myɛ j'à nyɛ̌ bǝ̀ Pwǝǝ mó zhe bǝ̀ yǝ né nyɛ̀bɛ́ numbyínsi n'ê wɛ̀rhɛ́ mɔ́ bǝ kùr zhe yé, sǝ Efɛɛzɛ lyì nánzhǝzhɔ̌ zwẽ ń zɔ̀mà nɛ́ nǝ̀ myɛ́ mɔ́. S'e dǝ̀ Efɛɛzɛ lyì bí dúdú yé. Kɔn nyɛ̌ ǹdǝ wɔ́ Azhi tǝnà y púlǝ́púlǝ́ ta. ²⁷ Sǝ rǝ̀myɛ́ b'a ce nǝ́ tum rí k'ê t'â la kùr zal yé. Rǝ̀ b'a ce Arǝtǝmyiisi còrhó w jì y myɛ k'ê t'â la kùr zal yé. E jà Azhi tǝna y lyì bí ǹdǝ́ lũ w púlǝ́púlǝ́ n'ê cèrhé Arǝtǝmyiisi. ²⁸ Bǝ̀ gǝ́ nyɛ̀ɛ̀ rǝ̀mɛ́, bǝ̀ lyimǝ zɛ̃̀, bǝ zɛ̃̀ bǝ̀ n'ê bya bǝ̀ zhe: Efɛɛzɛ lyì yi Arǝtǝmyiisi jàn bǝ swɛ̃́ zhe yé! ²⁹ Cɔ w púlǝ́púlǝ́ j'a dom. Bǝ zǝ Gǝyuusi ǹdǝ́ Arǝsǝtarkɛ bǝ m'e vò cɔ w lyì bí dwã-jóló jàà y wa. Bǝ̀myɛ́ bǝ̀lyè y y'à wɔ́ Masɛdwanɛ lyì bǝ̀ tó Pwǝǝ ne. ³⁰ Pwǝǝ yà ń nǝ́ ń yǎl n vò n zɔ̀m ǹdǝ́ lyì bí, sǝ Kristǝ kwã-lyì bí dwã bɛ́ yǝ̀ shɛ̀nɛ́ yé. ³¹ Azhi tǝnà y lyì-fwààlɛ́ jàlà y'à wɔ́ Pwǝǝ dɔwabá, bǝ̀myɛ twĩ̀ bǝ̀ bǝ̀ wál mɔ bǝ̀ ń bǝ̀ká n vò dwã-joló w jàà y wẽ́ yé. ³² Lyí gakó y'à n'ê bya, lò gakó ǹdǝ́ ń nyǝ̀ná. E jǐrh sɔ̀ dúdú, sǝ bǝ̀ nánzhǝzhɔ̌ y'à yǝ̀l bǝ̀ dwa{ yó twírí y kùr yé. ³³ Zhwifubá vùr lò mǝ̀dù lyì-zwǎ bɛ́ wẽ́ ń yíl Allɛsãdǝrɛ, bǝ cìrh mo bǝ ce yé né. Bǝ̀ jàlà zɛ̃̀ bǝ byili mu kɔn gǝ́ tó né. N zɛ̃̀ n zhẽ̌ ń jɛ̃̀ ń nǝ́ ń yǎl n zɔ̀m ǹdǝ́ lyì bí ń mǝ́ ń zwẽ Zhwifubá nyí ni. ³⁴ Lyì-zhǎ gǝ́ tú bǝ lwar bǝ̀ ń wɔ́ Zhwifu, bǝ zɛ̃̀ bǝ tó dwã bǝ̀ n'ê bya bǝ̀ zhe: Efɛɛzɛ lyì yi Arǝtǝmyiisi jàn bǝ swɛ̃́ zhe yé! Sǝ bǝ̀ wɛ̀rhɛ́ èta, kɔn bwǝlse lùr rǝ̀lyè. ³⁵ Sǝ lò mó mɔ̀bɔ́ ń nǝ́ ń nyǐ cɔ w sábá nɛ́ yò mó ŋwɛ̀nɛ́ n ce bǝ yẽ̌ bǝ̀ sɔ̀ w nɛ. N zɛ̃̀ n wɔ̀ bɛ: Efɛɛzɛ lyì, lyì bí gakó yě bǝ̀ wɔ́ nǝ́myɛ̌ Efɛɛzɛ lyì bí nǝ́ r'é yìlì yi rí nánfɔ̀lɔ̀ w bǝ̀ n'ê byẽ̀ bǝ̀ Arǝtǝmyiisi mú ǹdǝ́ rǝ̀ nyɔrhɔ w ò shí dɛ̃̌ o swǝ́rh tɛ̃́ mɔ́ jì y ni. ³⁶ Lò lò wàr rǝ̀myɛ́ nyǝ̇-pɔ̌ ń la mǎ yé. Rǝ̀myɛ́ ce, yẽ̌-nǝ á sɔ̀ w nɛ, á zhì shɛ́shɛ́ á tɛ́rɛ́ á wẽ́. ³⁷ Á zǝ lyì bí byɛ̀bɛ́ á bǝ̀ nyɔ̀nɔ̀, bǝ j'à yǝ̀ lwɛlɛ nǝ́ yi rí jì y ni wɛ̀rhɛ́ yé, bǝ̀ yǝ̀ nǝ́ yi rí myɛ tùrh yé. ³⁸ Dǝmǝtǝrǝyuusi ǹdǝ́ ń kwã-lyì bí gǝ n'ê yǎl bǝ ce cà lò nyí ni, bùr-kárna bɛ́ ŋwɛ́nɛ́, bùrsí myɛ zhe dɛ̃, sǝ bǝ zǝ mɔ bǝ̀ vò gàà. ³⁹ È gǝ k'ê wɔ́ kɔn dõ rǝ̀ ŋwɛ́nɛ́ bǝ̀ la byilu, dwã-gùlú w nánfɔ̀lɔ̀ w lyì bí m'a nyǐ rǝ̀ yò. ⁴⁰ È gǝ dǝ̀ rǝ̀myɛ́, bǝ̀ b'a cĩ́ kɔn rɛ́ dɛ̀bɛ́ rǝ̀ ŋwɛ́nɛ́ zà èta mɔ́ yò w nǝ́ yó wǝ, bǝ wɔ̀ bǝ̀ nǝ́ t'á nyàm cɔ w yó-cìnǝ́ bé yé. E jà kɔn tɛ̀nɛ́ nǝ́ m'ǎ byili bǝ̀ wɔ́ rǝ̀myɛ́ è ce nǝ́ bǝ̀ dwã yó yé. ⁴¹ Ń gǝ́ zɔ̀m èta n zhɛ̀, n já n ce lyì bí làà dwã nɛ.