koussoube-marc-lee_act_text

Kǝ̀kàl-fwɛ̀lɛ̀ 18

¹ Rǝ̀myɛ́ kwã nɛ́, Pwǝǝ zhǐr n vó Kɔrɛ̃tɛ. ² ń gǝ́ yú gàà, n nǝ Zhwifu mǝ̀dù ń yíl Akǝlaasɛ, ń Pɔ̃ tǝnà y lò. Ńmyɛ̌ ǹdǝ́ ń kɛ̃ Pǝrrishii y'à shí Yitǝlyi bǝ bǝ̀ dùlìdùlì, bǝ Orɔm pyɔ̌ Kolote yà ń pɔ nyí bǝ̀ Zhwifubá gakó du Orɔm nɛ́. Pwǝǝ lyɛ̃ n vò bǝ̀ sõ. ³ Ńmyɛ̌ ǹdǝ́ bǝ̀myɛ́ ga tum rí y'à wɔ́ rǝ̀dù: Bǝ̀ y'à n'ê swɛ̃̀ wẽ̀ ré tɛ̀bɛ́ bǝ̀ m'ê pwí kwǝ̀ǝ́rhé mó. Ń yà ń nǝ́ ń zwɛ̃̀ bǝ̀ sõ, bǝ̀ m'ê tó dwã bǝ̀ twĩ̀. ⁴ Shìrhǝ́ dɛ̃ gakó, Pwǝǝ yà ń nǝ́ ń zhǝ̀l Zhwifubá dwã-gùlú jì y wǝ, ń nǝ́ ń zhǝrh ǹdǝ́ Zhwifubá ńdǝ́ Gǝrɛkɛbá, munì ga n pul bǝ̀ surhǝ. ⁵ Shǝlaasɛ ǹdǝ́ Timote shí Masɛdwaanɛ bǝ lyɛ̃ bǝ bà. Pwǝǝ já n yẽ̌ tumǝ né dwã bɛ́ gakó ne, ń nǝ́ ń bwǝ̀l Yi zɔ̀mɛ̀ rɛ́. Ń yà ń nǝ́ ń byili Zhwifubá ne pamparɛ̃ɛ̃ bǝ̀ wɔ́ Yezu ń wɔ́ Kristǝ mó. ⁶ Sǝ Zhwifubá y'à t'â cili kɔn dɛ̀bɛ́ Pwǝǝ yà ń nǝ́ ń byili mú yé. Bǝ̀ y'à n'ê tùrh mo. N zɛ̃̀ n sǝ̃̀ ń jɛ̀rh n yẽ̌ be, n wɔ̀: Á gǝ dwĩ̀ á cìnǝ̀, wɔ́ ámyɛ̌ cìcì yò. Rǝ̀myɛ́ k'ê dǝ̀ àmyɛ́ yò yé. Sǝ kɔn zhí èlǎsɛ̃́, wɔ́ byɛ̀bɛ́ bǝ̀ dǝ̀ Zhwifubá mɔ́ sõ à la nɛ́. ⁷ N zhǐr gàà n vò bal mǝ̀dù sõ. Bal mɔ́ yíl Ticuusi Zhusǝtuusi. Ń yà ń só Yi. Ń kɛ̀lɛ́ y'à ŋwɛ́nɛ́ dwã-gùlú w jì y nyí ni. ⁸ Dwã-gùlú jì y yó-cǝ́bal Krisipuusi ǹdǝ́ ń kɛ̀lɛ́ y lyì bí gakó j'a zù Cǐnnǝ mó. Kɔrɛ̃tɛ lyì nánzhǝzhɔ̌ gǝ́ cili Pwǝǝ zɔ̀mà nɛ́, bǝ̀myɛ j'a zù Kristǝ, bǝ j'a mɔ́lɛ́ bɛ nɛ̃̌ wa ⁹ Cǝcɛ̃ èdù, Cǐnnǝ mó lyí mu, n wɔ̀ mɔ: Bǝ̀ká shĩ̌ ǹ nyí yé. Zɔ̌m; sǝ ǹ bǝ̀ká dùr ywẽ yé, ¹⁰ bǝ̀ àmyɛ́ cìcì ŋwɛ́nɛ́ ǹdǝ́ mɔ́. Lò lò wàr ń la mɔ́ zal n wɛ̀rhɛ́ lwɛlɛ yé, bǝ̀ byɛ̀bɛ́ bǝ̀ wɔ́ àmyɛ́ lyì mú já cɔ w kɔ̀bɔ́ wa. ¹¹ Pwǝǝ mɛ̃ Kɔrɛ̃tɛ n wɛ̀rhɛ́ byin ǹdǝ́ fwã́, ń mǝ́ ń byili Yi zɔ̀mɛ̀ rɛ́ lyì bí ni. ¹² Rǝ̀myɛ́ kwã nɛ́, bal mǝ̀dù ń yíl Galyɔ jǐrh Akǝyi tǝnà y yó-cǝ́bal. Zhwifubá zɛ̃̀ bǝ̀ n'ê jí zùzùri ndǝ́ Pwǝǝ. Bǝ wɛ̀rhɛ́ nyí rǝ̀dù bǝ zǝ mɔ bǝ m'e vò bùrsí gùlú w yé né, ¹³ bǝ wɔ̀: Bal mɔ́ mɔ̀bɔ́ nǝ́ ń cìrh lyì bí ń ce né, mùnì ga bǝ̀ bǝ̀k'a k'e cèrhé Yi ǹdǝ nǝ́ nyǝ́ né gǝ́ n'e byili ní yé. ¹⁴ Pwǝǝ zɛ̃̀ ń la lyár. Galyɔ̃ já n wɔ̀ bɛ: Ámyɛ̌ Zhwifibá cili-nǝ. È gǝ y'à wɔ́ èmà-bǔr tumǝ ń twĩ̀, ráá yò kɔ̀bɔ́ ò jɛ̀ ń wɛ̀rhɛ́, à y'à m'a cili á zɔ̀mà nɛ́ ǹdǝ kɔn gǝ́ mǝ̌ nɛ́. ¹⁵ Sǝ è wɔ́ ámyɛ zɔ̀mà, ǹd'á nyǝ́ né shò-kwã nɛ́ á n'á mà nǝ̀-pǎr nɛ́ mɔ́, rǝ̀myɛ́ ŋwɛ́nɛ́ ámyɛ̌ jɔ̃̀ wa. Àmyɛ́ wàr gàà à la nɛ́ zú yé. ¹⁶ N jì bi bùrsí jì y wẽ́ n ce pwẽ̀ ne. ¹⁷ Bǝ yǝ́yɛ́lɛ́ bǝ zǝ dwã-gùlú w yó-cǝ́bal Sɔsǝtɛnnɛ bùrsí jì y nyí ni cìcì bǝ mà. Sǝ Galyɔ̃ yǝ̀ rǝ̀ so nyǐ yé. ¹⁸ Rǝ̀myɛ́ kwã nɛ́, Pwǝǝ mɛ̃ Kɔrɛ̃tɛ nɛ́ gwẽ̌ n dɛnɛ, fòró n zɛ̃̀ n zhǐr n yẽ Kɔrɛ̃tɛ lyì bí ni, ńmyɛ̌ ǹdǝ́ Pǝrishii ǹdǝ́ Akǝlaasɛ, bǝ vò Sǝncere. Ń yà ń bwǝl kɔn nyí Yi ni. Rǝ̀myɛ́ ce, bǝ̀ gǝ́ yú gàà, n fɔ̃̀ ń yó wǝ́. Bǝ zɛ̃̀ bǝ zù bǔ-bwǝl bǝ̀ la mwǝ̃́ byɔrhɔ bǝ lyɛ̃ bǝ̀ vò Siri. ¹⁹ Bǝ̀ gǝ́ byɛrhɛ mwǝ̃́ y bǝ zhɛ̀, bǝ só Efɛɛzɛ nɛ́. N wɔ̀ Pǝrishii ǹdǝ́ Akǝlaasɛ nɛ bǝ̀ bǝ̀ mɛ̃ gàà. N zɛ̃̀ n lyɛ̃ n vò Zhwifubá dwã-gùlú jì y wẽ́ n zhǝrh ǹdǝ́ bɛ. ²⁰ Sǝ bǝ̀ y'à n'ê lwǝ̀l mo bǝ̀ ń mɛ̃ bǝ̀ sõ dwã màngɛlɛ́. N cẽ, n wɔ̀ bɛ: Kɔn gǝ wɔ́ Yi pùbùlǝ̀, à m'a k'a bà. ²¹ Pwǝǝ zɛ̃̀ n zhǐr Efɛɛzɛ nɛ́ n kǝ́ n zù bǔ-bwǝl ²² n byɛrhɛ n vò Sǝzarɛ. N zhì gàà n vò Zhǝrǝzalɛm, n ce Kristǝ-lyì bí, n zɛ̃̀n ká n vò Ancɔɔsɛ, ²³ n dɛnɛ námpɔ́lɛ́. N kǝ́ n zhǐr n tó Galashi ǹdǝ́ Fǝrizhi tǝnèsé wǝ, mùnì ga n cící Kristǝ kwã-lyì bí gàà mɔ́ gakó, n súlí bǝ̀ wu-jɔ̀. ²⁴ Zhwifu mǝ̀dù yà ń tú Efɛɛzɛ ń yíl Apɔlɔɔsɛ. Ń yà ń wɔ́ Alǝsãdǝri lyì bal. Ń yà ń zhe surhǝ, ń yě Yi zɔ̀mɛ̀ rɛ́ sɛ́bɛ́ rɛ́ zɔ̀mà nɛ́ náàcɛ̀nɛ́. ²⁵ Bǝ̀ y'à byili mu Cǐnnǝ mó sɔ́má yá. Sǝ è wɔ́ nɛ̃̌-mɔ́lɔ́ mɔ́ shò-kwã nɛ́, wɔ́ Zhã nɛ̃̌-mɔ́lɔ́ mɔ́ dúdú yò ń yà ń yě. Ǹdǝ́ rǝ̀myɛ́ ga, ń yà ń nǝ́ ń bwǝ̀l Yezu yò-ècɔ̀nɔ̀ nyí rí ǹdǝ́ ń wu gakó, ń nǝ́ ń byili rǝ̀ kùr ré náàcɛ̀nɛ́. ²⁶ N vò Zhwifubá dwã-gùlú jì y wẽ́, n ji kùr ń nǝ́ ń zɔ̀m ǹdǝ́ wu-jɔ̀. Sǝ Pǝrishii ǹdǝ́ Akǝlaasɛ gǝ́ nyɛ̀ɛ̀ ń zɔ̀mà nɛ́, bǝ zǝ mɔ bǝ vò bǝ̀ sõ, bǝ kwɛrhɛ bǝ byili Yi sɔ́má y yé-shò pamparɛ̃ɛ̃. ²⁷ Rǝ̀myɛ́ kwã nɛ́, n zɛ̃̀ ń nǝ́ ń yǎl n vò Akǝyi tǝnà y wa. Efɛɛzɛ Kristǝ-lyì bí wɔ̀ bǝ̀ kɔn càn. Bǝ zɛ̃̀ bǝ kɛ̃ sɛ́bɛ́ bǝ pɔ̃, bǝ̀ ń gǝ yú sǝ n pǝ tǝnà èmyɛ́ Kristǝ-lyì bí ni, mùnì ga bǝ zwẽ ń zhǝǝle cɛ̀nɛ̀. Ń gǝ́ yú gàà, Yi sɛ̃ mɔ n ŋwɛ̀nɛ́ n sɛ̃ Kristǝ-lyì byɛ̀bɛ́ bǝ̀ ŋwɛ́nɛ́ gàà mɔ́ nɛ dɛ̃́dɛ̃́. ²⁸ Ńmyɛ̌ ǹdǝ́ Zhwifubá gǝ la zɔ̌m gakó, ń yà n zɔ̀m n ji bi tɛ̃́ lyì bí gakó yírh wǝ. Sǝ ń yà ń nǝ́ ń tó Yi zɔ̀mɛ̀ rɛ́ sɛ́bɛ́ rɛ́ zɔ̀mà nɛ́ dɛnnɛ ń byili bǝ̀ wɔ́ Yezu ń wɔ́ Kristǝ mó.