¹ Pwǝǝ ǹdǝ́ Shǝlaasɛ tó Anfyipoli ǹdǝ́ Apoloni bǝ lyɛ̃ bǝ vò Tesǝloniki. Zhwifubá dwã-gùlú jì èdù y'à ŋwɛ́nɛ́ gàà. ² Shìrhǝ́ y dɛ̃ rɛ́ gǝ́ tú e yí, Pwǝǝ zɛ̃̀ n vò dwã-gùlú jì y wǝ, ǹdǝ ń gǝ́ ya n wɛ̀rhɛ́ nɛ́, sǝ ń zhǝ̀l gàà twǝr rǝ̀tɔ̀ n zhǝrh ǹdǝ́ lyì bí byɛ̀bɛ́ bǝ̀ ŋwɛ́nɛ́ gàà mɔ́ Yi zɔ̀mɛ̀ rɛ́ shò-kwã nɛ́. E j'à wɔ́ shìrhǝ́ dɛ̃ dɛ̃ ń yà ń nǝ́ ń zhǝ̀lǝ̀. ³ Ń yà ń nǝ́ ń byili bi bǝ̀ bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ bǝ̀ Kristǝ mó mà n nwɛ̀nɛ̀ n cì, sǝ ń mà n ká n bwìrhì. N zɛ̃̀ n súlí n wɔ̀ bǝ̀ wɔ́ Yezu mú mɔ̀bɔ́ ń nǝ́ ń bwǝ̀l ń yò w èta mɔ́ ń wɔ́ Kristǝ mó. ⁴ Zhwifubá jàlà shɛ̀nɛ́ bǝ zwẽ Pwǝǝ ǹdǝ́ Shǝlaasɛ zɔ̀mà nɛ́. Gǝrɛkɛbá byɛ̀bɛ́ bǝ̀ y'à só Yi mú myɛ nánzhǝzhɔ̌ zwẽ nyí, e súlí kana nánzhǝzhɔ̌ bǝ̀ y'à wɔ́ lyì-fwààlɛ̀. ⁵ Zhwifubá dwã bɛ́ zɛ̃̀ bǝ̀ n'ê dùr bwɛ̃̌. Bǝ byẽ̀ cɔ w lyì-bǝywààlɛ̀ jàlà ǹdǝ́ lyì dwã nánzhǝzhɔ̌ bǝ cĩ́ dwã yó. Lyì bí bǝ̀myɛ́ mɔ́ ǹdǝ́ Zhwifubá ga ce dweme cɔ w wa, bǝ vò Zhasɔ̃ sõ kɛ̀lɛ́ wa, bǝ̀ n'ê pyà Pwǝǝ ǹdǝ́ Shǝlaasɛ, bǝ̀ la m'e vò cɔ w lyì bí yé né, ⁶ sǝ bǝ̀ pyà pyà bɛ̀ bǝ ga. Bǝ zɛ̃̀ bǝ zǝ Zhasɔ̃ ǹdǝ́ Kristǝ-lyì dwã bǝ m'e vò cɔ w bùr-kárna bɛ́ yé né. Bǝ̀ gǝ́ zǝ bɛ bǝ yí bǝ zhɛ̀, bǝ zɛ̃̀ bǝ̀ n'ê bya bǝ̀ zhe: «Lyì bí byɛ̀bɛ́ èta mɔ́ wɔ́ cǝ-lwǝǝ́re jààsɛ́ gakó wǝ, sǝ bǝ̀ zǝ bǝ̀ cǝ-lwǝǝ́ré bǝ yí nyɔ̀nɔ̀. ⁷ Bǝ̀ gakó n'ê cẽ Orɔm pyɔ̌ mɔ́ nyǝ́ né; bǝ̀ n'ê byili bǝ̀ pyɔ̌ dõ ŋwɛ́nɛ́ ń yíl Yezu, sǝ Zhasɔ̃ zwẽ be ń sõ kɛ̀lɛ́ wa.» ⁸ Zɔ̀mà nɛ́ nǝ̀myɛ́ mɔ́ zɛ̃̀ lyì-zhǎ bɛ́ ǹdǝ́ cɔ w bùr-kárna bɛ́ lyimǝ ne, ⁹ sǝ bùr-kárna bɛ́ ce Zhasɔ̃ ǹdǝ́ Kristǝ-lyì bí dwã bɛ́ kwɛ̃̌, fòró bǝ dwĩ̀ bì. ¹⁰ Cɛ y gǝ́ yìì, Kristǝ-lyì bí j'a ce Pwǝǝ ǹdǝ́ Shǝlaasɛ lyɛ̃ bǝ vò Bere. Bǝ̀ gǝ́ yú gàà, bǝ lyɛ̃ bǝ vò Zhwifubá dwã-gùlú jì y wẽ́. ¹¹ Sǝ Zhwifubá byɛ̀bɛ́ bǝ̀ ŋwɛ́nɛ́ gàà mɔ́ pwèlè bǝ̀ wun du byɛ̀bɛ́ bǝ̀ ŋwɛ́nɛ́ Tesǝloniki ní mú, bǝ zwẽ Yi zɔ̀mɛ̀ rɛ́ náàcɛ̀nɛ́, bǝ zɛ̃̀ bǝ̀ n'ê tɛ́rɛ́ rɛ, bǝ̀ la nyǐ rǝ̀myɛ́ ǹdǝ́ tɛ̀bɛ́ bǝ̀ kɛ̃ Yi zɔ̀mɛ̀ rɛ́ sɛ́bɛ́ rɛ́ wẽ́ mó wɔ́ rǝ̀dù, mùnì ga bǝ lwar ǹdǝ́ kɔn rɛ́ dɛ̀bɛ́ Pwǝǝ nǝ́ ń byili mú gǝ wɔ́ zhǝ̀nà, ¹² sǝ bǝ̀ nánzhǝzhɔ̌ zù Kristǝ. Gǝrɛkɛbá kana byɛ̀bɛ́ bǝ̀ wɔ́ lyì-fwààlɛ̀ ǹdǝ́ bǝ̀ bala nánzhǝzhɔ̌ myɛ shɛ̀nɛ́ bǝ zù Kristǝ. ¹³ Tesǝloniki Zhwifubá gǝ́ nyɛ̀ɛ̀ bǝ̀ Pwǝǝ nǝ́ ń bwǝ̀l Yi zɔ̀mɛ̀ rɛ́ Bere né myɛ, bǝ twèlé bǝ vò gàà, bǝ ce lyì bí zɛ̃̀ bǝ ce dweme. ¹⁴ Kristǝ-lyì bí j'a zhì dɛ̃̌ bǝ ce bǝ zhìì Pwǝǝ bǝ cĩ́ mwǝ̃́ y sɔ́má y yó. Sǝ Shǝlaasɛ ǹdǝ́ Timote mɛ̃ Bere né. ¹⁵ Byɛ̀bɛ́ bǝ̀ y'à n'ê zhìì Pwǝǝ mó j'a zǝ mɔ bǝ yí Atɛnnɛ. N zɛ̃̀ n lwǝ̀l bè, bǝ̀ bǝ̀ gǝ k'â yúwǝ́, sǝ bǝ wɔ̀ Shǝlaasɛ ǹdǝ́ Timote ne, bǝ̀ bǝ̀ ce jàn nɛ́ bǝ bǝ̀ ń sõ làlà. ¹⁶ Pwǝǝ gǝ́ yà ń ŋwɛ́nɛ́ Atɛnnɛ nɛ́ ń nǝ́ ń dɛ̃̀ Shǝlaasɛ ǹdǝ́ Timote yi ní, n pwírí cɔ w òmyɛ́ lyì bí wɔ́ wẽ̀ tɛ̀bɛ́ rǝ̀ dǝ̀ Yi dúdú bǝ̀ n'ê zwǝ́lǝ́. Rǝ̀myɛ́ ce ń wu zhìlì dɛ̃́dɛ̃́. ¹⁷ N zù Zhwifubá dwã-gùlú jì y wẽ́ ń nǝ́ ń zhǝrh ǹdǝ́ bɛ, ǹdǝ́ lyì bí byɛ̀bɛ́ bǝ̀ dǝ̀ Zhwifubá bǝ j'à só Yi mú, sǝ ń yà ń nǝ́ ń zhǝrh ǹdǝ́ lyì bí byɛ̀bɛ́ gakó ń yà ń nǝ́ ń nɛ cɔ w lyì bí dwã-joló jààsɛ́ wẽ́ mó twéé twéé. ¹⁸ Surhǝ cìnǝ́ kùrǝ̀ nǝ̀lyè myɛ y'à ŋwɛ́nɛ́, bǝ̀ n'ê byẽ̀ bǝ̀ Epyiciriyẽbá ǹdǝ́ Esǝtoyishẽbá. Bǝ̀myɛ́ mɔ́ jàlà zɛ̃̀ bǝ̀ n'ê zɔ̀m ǹdǝ́ mɔ. Bǝ̀ jàlà y'à zhe: «Wɔ́ bǝ̀kɔ́n sɔ̀ mɔ̀bɔ́ nǝ́ ń ce myɛ̌?» Bǝ̀ dwã myɛ y'à zhe: «È nyɛ̌ ǹdǝ wɔ́ yǝ dwã yò ń nǝ́ ń zɔ̀m ta.» E j'à wɔ́ Yezu ǹdǝ́ cùùrì bùrhù yò Pwǝǝ yà ń nǝ́ ń bwǝ̀lǝ̀. Wɔ́ rǝ̀myɛ́ è ce bǝ zɛ̃̀ bǝ̀ n'ê zɔ̀m èta. ¹⁹ Bǝ zǝ mɔ bǝ vò cɔ w cìnǝ́ bé gùlú w yé né. Bǝ bwǝ̀rh mò bǝ wɔ̀: «Ǹ wɔ̌ ǹ b'ǎ byili nǝ́ba kàrmɔ́ nándùl mó ǹ tú ǹ nǝ́ ǹ cèrhè mó kùrǝ̀? ²⁰ Kɔn rɛ́ dɛ̀bɛ́ ǹ nǝ́ ǹ byili nǝ́ba mó wɔ́ kɔn nándùl, e zɛ̃̀ nǝ́ só sǝ nǝ́ lwar rǝ̀ kùrǝ̀.» ²¹ Atɛnnɛ lyì bí ǹdǝ́ zhǝlǝ bé byɛ̀bɛ́ bǝ̀ y'à tó be bǝ̀ ŋwɛ́nɛ́ gàà mɔ́ gakó y'à j'â wɔ́ kɔn rɛ́ rǝ̀myɛ́ nándùl ré dúdú bǝ̀ n'ê cili, bǝ j'à n'ê byili ri dwã nɛ myɛ. ²² Pwǝǝ zɛ̃̀ n zhì cɔ w cìnǝ́ bé gùlú w yé né n wɔ̀: «Atɛnnɛ lyì, à pwírí á wɔ́ lyì byɛ̀bɛ́ á n'á pyà Yi kɔn gakó wẽ́. ²³ À y'à tó á cɔ w wa à n'â byɛ́lɛ́ wa, à n'â nyǐ vwĩ̀-jùúlí tɛ̀bɛ́ á n'á zwǝ́l á vwǝ̃̀ né rǝ̀ yó á m'á cèrhé á yǝ né mó. À nɔ vwĩ̀-jìlú òdù bǝ̀ kɛ̃ ò yó bǝ wɔ̀: ‹Nǝ́ yǝ̀l Yi rí tɛ̀bɛ́ pár yé.› Lwar-na bǝ̀ Yi rí tɛ̀bɛ́ á yǝ̀l rǝ̀ párá, á j'ǎ n'á zwǝ́l vwǝ̃̀ á m'á cèrhé re mó, wɔ́ rǝ̀myɛ́ yò à tú à n'â bwǝ̀l à byili ába. ²⁴ Wɔ́ Yi rí tɛ̀bɛ́ rǝ̀ wɛ̀rhɛ́ lũ w ǹdǝ́ kɔn dɛ̀bɛ́ gakó rǝ̀ ŋwɛ́nɛ́ ò wẽ́ mó, rǝ̀ cǐ dɛ̃̌ ǹdǝ́ cɛ yá. Rǝ̀ t'â jòm jì kɛ̀bɛ́ numbyínǝ́ lù wẽ́ yé. ²⁵ Rǝ̀ bǝ numbyíní sɛ̃ɛ̃́ tum zhe yé, bǝ̀ kaka yǝ̀ rǝ̀ mwìrì yé. Wɔ́ rǝ̀myɛ́ gaga mɔ́ rǝ̀ ce numbyíní ŋwɛ́nɛ́; rǝ̀myɛ́ rǝ̀ n'ê pɛ y myǝ̌l ǹdǝ́ kɔn gakó. ²⁶ Rǝ̀ tó lò mǝ̀dù sásá dɛnnɛ rǝ wɛ̀rhɛ́ numbyínǝ́ bé dwǝ́ né gakó, mùnì ga bǝ jòm lũ w cǝ-yala nɛ́ gakó wǝ. Rǝ pǝ dwí gakó jàà; rǝ ce shí ǹdǝ́ fɔ̀ ǹdǝ́ nǝpwã̀ ŋwɛ́nɛ́. ²⁷ «Rǝ̀ wɛ̀rhɛ́ èta, mùnì ga numbyínǝ́ bé pyà rɛ̀, sǝ dɛ̀ga ǹdǝ́ bǝ̀ gǝ tú bǝ̀ la rɛ pyǎ, sǝ bǝ tǝ́tɛ̀lɛ́ rɛ bǝ na. Sǝ è gǝ wɔ́ zhǝ̀n yilǝ, Yi bǝ nyɛ ǹdǝ́ nǝ́myɛ̌ mǝ̀dù ga yé, ²⁸ bǝ̀ wɔ́ rǝ̀myɛ́ rǝ̀ n'ê pɛ nǝ́ba myǝ̌l; rǝ̀myɛ́ rǝ̀ ce nǝ́ ŋwɛ́nɛ́; rǝ̀myɛ́ rǝ̀ ce nǝ́ wɔ̌ nǝ́ zhẽ̌ nǝ́ nà nǝ́ ji. Á surhǝ cìnǝ́ jàlà myɛ kɛ̃ bǝ wɔ̀: ‹Zhǝ̀nà, nǝ́ wɔ́ rǝ̀ byǎ.› ²⁹ «Sǝ nǝ́ gǝ wɔ́ Yi byǎ, nǝ́ bǝ mǝ̌ sǝ nǝ́ bù bǝ̀ kɔn dɛ̀bɛ́ numbyíní n'ê tɛ́rɛ́ e zɛ̃̀ e zǝ sánǝ́má, ráá kã̀mɔ, ráá nǝ́kulu e wɛ̀rhɛ́ mɔ́ nyɛrhɛ dwã ǹdǝ́ Yi yé. ³⁰ Lyì bí y'à n'ê wɛ̀rhɛ́ wẽ̀ ré rǝ̀myɛ́ mɔ́ shãã ga, bǝ̀ gǝ́ y'à yǝ̀l Yi gǝ́ wɔ́ kɔn ná-dwí yil né mó yilǝ, sǝ rǝ̀ k'ê t'â nyǐ shãã ga nyǝ̀ná nɛ́ nǝ̀ lyɛ̃ mɔ́ ǹdǝ yò ta yé. Rǝ̀ n'ê byẽ̀ lyì bí gakó jààsɛ́ gakó wẽ́ èlǎsɛ̃́, bǝ̀ bǝ̀ pyìrhí bǝ̀ wun, ³¹ bǝ̀ rǝ̀ vùr dɛ̃ rǝ̀ la m'e tó mɔ̀bɔ́ rǝ̀ cír mó dɛnnɛ rǝ bùr lyì bí gakó bùrsì ǹdǝ́ cángá. Rǝ̀ bwìrhì mu, rǝ m'e byili lyì bí gakó ne bǝ̀ wɔ́ ńmyɛ̌ ń la bùrsí kɔ́.» ³² Bǝ̀ gǝ́ nyɛ̀ɛ̀ Pwǝǝ nǝ́ ń zɔ̀m cùùrì bùrhù yò, bǝ̀ jàlà zɛ̃̀ bǝ̀ n'ê fulsi mu; jàlà zɛ̃̀ bǝ̀ zhe: «Ǹ zɔ̀mà nɛ́ nǝ̀myɛ́ wɔ́ dɛ̃ dõ nǝ́ b'ǎ cili ni.» ³³ Sǝ Pwǝǝ zhǐr n yẽ̌ be. ³⁴ Ǹdǝ́ rǝ̀myɛ́ ga, bǝ̀ màngɛlɛ́ zwẽ nyí, bǝ zhǐr bǝ tó ń kùrǝ̀, bǝ zù Kristǝ. Bal mǝ̀dù yà ń ŋwɛ́nɛ́ bǝ̀ wẽ́, ń yíl Dǝni, ń yà ń wɔ́ Atɛnnɛ yé né cìnǝ́ bé gùlú w lò, ǹdǝ́ kɛ̃ mǝ̀dù ń yà ń yíl Damarɛ, e súlí lyì dwã.