koussoube-marc-lee_act_text

Kǝ̀kàl-fwɛ̀lɛ̀ 16

¹ Rǝ̀myɛ́ kwã nɛ́, Pwǝǝ zhǝ̀l Dɛrbɛ, n lyɛ̃ n vò Lyisitiri. Kristǝ kwã-lò mǝ̀dù yà ń ŋwɛ́nɛ́ gàà, ń yíl Timote. Ń da yà ń dǝ̀ Zhwifu yé. Wɔ́ ń ná ń yà ń wɔ́ Zhwifu, sǝ ń yà ń zù Kristǝ. ² Kristǝ-lyì bí byɛ̀bɛ́ bǝ̀ y'à ŋwɛ́nɛ́ Lyisitiri ǹdǝ́ Yǝkɔnǝyɔm nɛ́ mɔ́ y'à n'ê zɔ̀m Timote yil náàcɛ̀nɛ́. ³ Pwǝǝ yà ń nǝ́ ń yǎl bǝ̀ ń tó mo. Rǝ̀myɛ́ ce, ń zɔ mɔ n vò n gõ̀, Zhwifubá byɛ̀bɛ́ bǝ̀ y'à ŋwɛ́nɛ́ gàà mɔ́ yilǝ, bǝ̀ bǝ̀ gakó y'à yě bǝ̀ ń da dǝ̀ Zhwifu yé. ⁴ Pwǝǝ ǹdǝ́ ń tó-dwã bɛ́ y'à n'ê tó cɛmɛ nɛ́ w bǝ̀ byili nyǝ́ né nyɛ̀bɛ́ tùntúmǝ́ bé ǹdǝ́ Zhǝrǝzalɛm Kristǝ-lyì bí yé né cìnǝ́ bé vùr mó bǝ̀ da-byǎ bɛ́ nɛ. Sǝ bǝ̀ y'à n'ê lwǝ̀l bè bǝ̀ bǝ̀ zwẽ ne. ⁵ Kristǝ-lyì gùúlí y'à zhí Yi ni dɛ̃́dɛ̃́, sǝ lyì dwã y'à n'ê twí bǝ̀ súlí bi twéé twéé. ⁶ Pwǝǝ ǹdǝ́ ń tó-dwã bɛ́ y'à la Azhi tǝnà y wẽ́ tó bǝ bwǝ̀l yò-ècɔ̀nɔ̀ nyí rí, sǝ Eshirhǝ náàcɛ̀nɛ́ cǝ̀r bè. Rǝ̀myɛ́ ce, bǝ̀ tó Fǝrizhi ǹdǝ́ Galǝshi tǝnèsé wẽ́ bǝ lyɛ̃. ⁷ Bǝ̀ gǝ́ tú bǝ bwǝlse Myizhi tǝnà yá, bǝ̀ y'à n'ê yǎl bǝ vò Byitini tǝnà y wa, sǝ Yezu Eshirhǝ y yǝ̀ sɔ́má pɛ yé. ⁸ Bǝ zɛ̃̀ bǝ tó Myizhi bǝ lyɛ̃ bǝ vò Tǝrǝwaasɛ. ⁹ Cǝcɛ̃ èdù Pwǝǝ dàrh Masɛdwanɛ lyì bal mǝ̀dù ń tú n zhì ń yó w n lwǝ̀l mò ǹdǝ́ ń wu gakó bǝ̀ ń bǝ̀ Masɛdwanɛ n sɛ̃ bɛ. ¹⁰ Nǝ́ j'á zɛ̃̀ nǝ́ r'é pyà sǝ nǝ́ vò Masɛdwanɛ, bǝ̀ nǝ́ y'ǎ yě pamparɛ̃ɛ̃ bǝ̀ wɔ́ Yi rǝ̀ n'ê byẽ̀ nǝ́ba bǝ̀ nǝ́ zhǝl gàà mɔ́ nǝ́ bwǝ̀l yò-ècɔ̀nɔ̀ nyí rí. ¹¹ Nǝ́ zɛ̃̀ nǝ́ zù bǔ-bwǝl Tǝrǝwaasɛ nɛ́, nǝ́ byɛrhɛ nǝ́ j'á vò cɔ òdù ò ŋwɛ́nɛ́ nǝ̀-fɔ̀lɔ̀ w cǝcǝl w bǝ̀ n'ê byẽ̀ bǝ̀ Samɔtǝraasɛ. Nǝ́ mɛ̃ gàà nǝ́ zɔ̃̀, nǝ́ dùlí nǝ́ vò Neyǝpoli. ¹² Nǝ́ zhì gàà, nǝ́ lyɛ̃ nǝ́ vò cɔ Orɔm lyì bí y'à já ò wẽ́, bǝ̀ n'ê byẽ̀ bǝ̀ Shilipu cɔ mɔ́ wa. Ò y'à ŋwɛ́nɛ́ Masɛdwanɛ tǝnà y nyí rí nã́yéé ré wẽ́. Nǝ́ wɛ̀rhɛ́ dwã màngɛlɛ́ gàà. ¹³ Shìrhǝ́ y dɛ̃ rɛ́ gǝ́ yúwǝ́, nǝ́ du cɔ w wa, nǝ́ vò bwǐ èdù nà nɛ̀. Nǝ́ y'ǎ n'é bùl bǝ̀ dɛ̀ga Zhwifubá Yi-co jàà ŋwɛ́nɛ́ gàà. Nǝ́ yí nǝ́ pwírí kana jàlà y'à jě dwã yó gàà, nǝ́ jòm tɛ̃́ nǝ́ zɔ̀m ǹdǝ́ bɛ. ¹⁴ Kɛ̃ mǝ̀dù yà ń ŋwɛ́nɛ́ bǝ̀ wẽ́ ń yíl Lyidi. Ń shí cɔ òdù bǝ̀ n'ê byẽ̀ bǝ̀ Tiyǝtiiri. Kɛ̃ mɔ́ ńmyɛ̌ mɔ́ yà ń nǝ́ ń dɔ̌l kàmǝ̀-jɛ̃̀-shɛ̃̀rh, sǝ̀ y'à càn dɛ̃́dɛ̃́. Ń yà ń só Yi. Ń yà ń nǝ́ ń cili nǝ́ zɔ̀mà nɛ́, sǝ Cinnǝ mú pul ń surhǝ n zwẽ kɔn dɛ̀bɛ́ Pwǝǝ yà ń nǝ́ ń byili mú. ¹⁵ Bǝ j'a mɔ́lɛ́ Ńmyɛ̌ ǹdǝ́ ń kɛ̀lɛ́ y lyì bí ga nɛ̃̌ wa. N zɛ̃̀ n wɔ̀ nǝ́ba: «Á gǝ n'á bùl b'à zù Cinnǝ mú zhǝ̀nà, s'á bǝ̀ á zul à sõ.» N zɔ̀m zɔ̀m èta, n ŋwɛ̀nɛ́ n ce nǝ́ vò ń sõ kɛ̀lɛ́ wa. ¹⁶ Dɛ̃ rǝ̀dù, nǝ́ y'ǎ zɛ̃̀ nǝ́ la Yi-co jàà y wa. Kɛ̃-byǐ èdù è y'à wɔ́ kɛ̀lɛ́ tùntùnnǝ̀ zɛ̃̀ e bǝ̀ e jǝl nǝ́ba. Nǝ̀cílí námmǝlwɛ̀lɛ́ y'à zhe yǝ, e ce è wɔ̌ è n'ê byili ywẽ̀ nyɛ̀bɛ́ nǝ̀ bànà. È y'à n'ê tó ywẽ̀ né nǝ̀myɛ́ mɔ́ byilu dɛnnɛ è nɛ wársɛ nánzhǝzhɔ̌ è pɛ è yó-cìnǝ́ ne. ¹⁷ E zɛ̃̀ e j'a tó nǝ́myɛ̌ ǹdǝ́ Pwǝǝ kùrǝ̀, è m'ê bya è zhe: «Lyì bí byɛ̀bɛ́ wɔ́ Dɛ̃̌ cǝ́bal mɔ́ tùntùnnǝ̀. Bǝ̀ tú bǝ̀ n'ê byili ába sɔ́má kɛ̀bɛ́ á b'ǎ tó á vwǎrh á cìn mú.» ¹⁸ Kɛ̃-byǐ y wɛ̀rhɛ́ èta dwã nánzhǝzhɔ̌, sǝ Pwǝǝ lyim zɛ̃̀, n pyìrhí n zɔ̀m ǹdǝ́ nǝ̀cílí y è zhe kɛ̃-byǐ y mú n wɔ̀: «À n'â pɛ mɔ́ nyí Yezu Kristǝ yil ré yilǝ: yẽ̌ kɛ̃-byǐ y ni.» E j'a yẽ̌ kɛ̃-byǐ y ni rǝ̀myɛ́ yi ní cìcì. ¹⁹ Kɛ̃-byǐ y yó-cìnǝ́ bé gǝ́ pwírí è k'ê t'â la wársɛ nɔ e pǝ bɛ, bǝ zɛ̃̀ bǝ zǝ Pwǝǝ ǹdǝ́ Shǝlaasɛ bǝ m'e vò cɔ w yé né cìnǝ́ bé sõ, cɔ w lyì bí dwã-joló jàà y wa, ²⁰ bǝ zǝ bɛ bǝ lyɛ̃ bǝ vò Orɔm bùr-kárna bɛ́ yé né, bǝ wɔ̀: «Lyì bí byɛ̀bɛ́ èta mɔ́ wɔ́ Zhwifubá. Bǝ̀ n'ê gù cɔ w lyì bí dwã nɛ. ²¹ Bǝ̀ n'ê byili lùl-e-pwírí dõ, e jà nǝ́myɛ̌ Orɔm lyì bí lùl-e-pwírí y bǝ shɛ̀ rǝ̀myɛ́ yò yé.» ²² Lyì-zhǎ bɛ́ lyim zɛ̃̀ rǝ̀ n'ê yì Pwǝǝ ǹdǝ́ Shǝlaasɛ. Bùr-kárna bɛ́ ce bǝ lwǝ̌r bǝ̀ kàmǝ̀-zwǐsí bǝ mà bɛ̀ ǹdǝ́ dànǝ̀shàárɛ. ²³ Bǝ mà bɛ̀ twǝr nánzhǝzhɔ̌, bǝ ce be byǝ̀nǝ́-jù wǝ̀, bǝ pǝ nyí byǝ̀nǝ́-jì y yìlnǝ̀ mó ne bǝ̀ ń yìlì bì cɛ̀nɛ̀. ²⁴ Ń gǝ́ nɔ nyí rí rǝ̀myɛ́, n zɛ̃̀ n zǝ bɛ n vò n cĩ́ byǝ̀nǝ́-jì y tǝtwã y kùr wǝ̀, n zǝ bǝ̀ nèsé n mǝ n lyẽ dǎr nɛ. ²⁵ Cɛ y gǝ́ tú e swǝl yi ní, Pwǝǝ ǹdǝ́ Shǝlaasɛ zɛ̃̀ bǝ̀ n'ê ce Yi, bǝ̀ n'ê nún bǝ̀ m'ê cèrhé re. Bǝ̀ dwã byǝ̀nǝ́-jì lyì bí y'à n'ê cili bǝ̀ gǝ́ n'ê nún bǝ̀ m'ê cèrhé Yi ní. ²⁶ Rǝ̀myɛ́ yó, cɛ y j'a zhìzhì e zhízhǐ dɛ̃́dɛ̃́ ǹdǝ́ byǝ̀nǝ́-jì y ga. Bwǝ̀ǝ̀lé gakó pul, nyáná nɛ́ bǝ̀ y'à m'e lyẽ byǝ̀nǝ́-jì y lyì bí mú sá nǝ yẽ̌ be. ²⁷ Byǝ̀nǝ́-jì y yìlnǝ̀ mó shí jɛ̃ w n zɛ̃̀, n pwírí bwǝ̀ǝ̀lé gakó pul, n zɛ̃̀ ń nǝ́ ń bùl bǝ̀ byǝ̀nǝ́-jì y lyì bí gǝ è shǝ́r bǝ dùr. N zɛ̃̀ n kwè ń búlǝ́ shù ń mǝ́ ń la ń cìn gu. ²⁸ Pwǝǝ zɛ̃̀ n zhì jì y wẽ́ n bya dɛ̃̌ dɛ̃̌ n wɔ̀: «Nǝ́ gakó ŋwɛ́nɛ́. Lò lò yǝ̀ dùr yé. Bǝ̀ká gu ǹ cìn yé.» ²⁹ Byǝ̀nǝ́-jì y yìlnǝ̀ mó zɛ̃̀ n lwǝ̀l myǐn, n mǝ n dùr n zù jì y wẽ́ ǹdǝ́ ń gakó nǝ́ ń pǝ́pǎ. N jòm ń nǝ̀dwǝ́nǝ́ yó Pwǝǝ ǹdǝ́ Shǝlaasɛ yé né, ³⁰ n ce bǝ du pwẽ̀ nè, n zɛ̃̀ ń nǝ́ ń lwǝ̀l bè ń zhe: «À lyì, wɔ́ etǝr à m'a tó né a nǝ vwǎrh?» ³¹ Bǝ wɔ̀ mɔ̀: «Zwẽ nyí ń zù Cinnǝ Yezu. Èta, ǹmyɛ́ ǹdǝ́ ǹ kɛ̀lɛ́ y lyì bí ga b'ǎ nǝ vwǎrh.» ³² Bǝ j'a tó rǝ̀myɛ́ dɛnnɛ bǝ bwǝ̀l yò-ècɔ̀nɔ̀ nyí rí bǝ byili ńmyɛ̌ ǹdǝ́ lyì bí byɛ̀bɛ́ gakó bǝ̀ y'à ŋwɛ́nɛ́ ń sõ kɛ̀lɛ́ w mɔ́ nɛ. ³³ Byǝ̀nǝ́-jì y yìlnǝ̀ mó já n zǝ bɛ rǝ̀myɛ́ yó cìcì, n shàrh bǝ̀ yala nɛ́ gǝ́ y'à mɔ̌r mɔ̌r mǝ̀gã̌ mɔ́ gakó cǝcɛ̃ y wẽ́. Bǝ j'a yǝ́yɛ́lɛ́ bǝ pǝ nɛ̃̌-mɔ́lɔ́ ńmyɛ̌ ǹdǝ́ ń kɛ̀lɛ́ lyì bí gakó ne. ³⁴ Rǝ̀myɛ́ kwã nɛ́, n ce Pwǝǝ ǹdǝ́ Shǝlaasɛ zù ń sõ jù wǝ̀, bǝ pǝ bɛ kùjú bǝ jí. Sǝ wu-nyɔ̃̀ nánfɔ̀lɔ̀ zɔ ńmyɛ̌ ǹdǝ́ ń kɛ̀lɛ́ lyì bí gakó, bǝ̀ gǝ́ zwẽ nyí bǝ zhí Yi ni èta mɔ́ yilǝ. ³⁵ Cɛ y gǝ́ tú e lá, bùr-kárna bɛ́ zɛ̃̀ bǝ twĩ̀ lyì byǝ̀nǝ́-jì y yìlnǝ̀ mó sõ bǝ̀ ń vǔr Pwǝǝ ǹdǝ́ Shǝlaasɛ. ³⁶ Byǝ̀nǝ́-jì y yìlnǝ̀ mó myɛ zɛ̃̀ n byili Pwǝǝ ne n wɔ̀: «Bùr-kárna bɛ́ pɔ nyí bǝ̀ bǝ̀ vǔr ába. Rǝ̀myɛ́ ce, á nɔ sɔ́má. Du-nǝ á vò.» ³⁷ Pwǝǝ zɛ̃̀ n wɔ̀ lyì bí bùr-kárna bɛ́ twĩ̀ mú ni: «Nǝ́myɛ̌ wɔ́ Orɔm lyì, bǝ zɛ̃̀ bǝ zǝ nǝ́ba. Bǝ̀ yǝ̀ jɛ̀rɛ̀ bǝ bùr nǝ́ bùrsí ǹdǝ kɔn gǝ́ n'ê tó né yé, sǝ bǝ̀ ce bǝ mà nǝ́ba lyì bí gakó yírh wǝ, bǝ yǝ́yɛ́lɛ́ bǝ ce nǝ́ba byǝ̀nǝ́-jù wǝ̀. Èlǎsɛ̃́ bǝ zɛ̃̀ bǝ shèè bǝ̀ la nǝ́ba vǔr ǹdǝ́ lò lò yǝ̀l yé. È gǝ wɔ́ èta, kɔn wàr yé. Rǝ̀myɛ́ yilǝ, sǝ bǝ̀ cìcì bǝ̀ bǝ vùr nǝ́ba.» ³⁸ Lyì bí k'a vò bǝ cĩ́ kɔn rɛ́ dɛ̀bɛ́ Pwǝǝ zɔ̀m mɔ́ bùr-kárna bɛ́ nɛ. ³⁹ Bùr-kárna bɛ́ gǝ́ lwar bǝ̀ Pwǝǝ ǹdǝ́ Shǝlaasɛ wɔ́ Orɔm lyì, bǝ̀ wun zɛ̃̀, bǝ zɛ̃̀ bǝ bǝ̀ Pwǝǝ ǹdǝ́ Shǝlaasɛ sõ, bǝ lwǝ̀l bè sǔbri, bǝ ce bǝ du byǝ̀nǝ́-jì y wǝ, bǝ lwǝ̀l bè bǝ̀ bǝ̀ du cɔ w wa. ⁴⁰ Bǝ̀ gǝ́ du byǝ̀nǝ́-jì y wẽ́ bǝ zhɛ̀, bǝ j'a lyɛ̃ bǝ vò Lyidi sono, bǝ yí gàà be nǝ bǝ̀ da-byǎ bɛ́, bǝ cící bi bǝ zǝ bǝ̀ wun ni. Rǝ̀myɛ́ kwã nɛ́, bǝ̀ k'e lyɛ̃ bǝ zhílí bǝ̀ sɔ́má y bǝ̀ la.