¹ Zhide lyì jàlà y'à tú Ancɔɔsɛ, sǝ bǝ̀ y'à zɛ̃̀ bǝ̀ n'ê cèrhè kàrmɔ̀ Kristǝ-lyì bí ni bǝ̀ zhe: «Lò mɔ̀bɔ́ ǹ yǝ̀ ce bǝ gõ̀ mó ǹdǝ Muyiisi nyí rí gǝ́ n'ê byili ní, ǹ tá ǹ la ǹ cìn ² Sǝ Pwǝǝ ǹdǝ́ Barnabaasɛ cẽ, bǝ̀ yǝ̀ bǝ̀ nyǝ̀ná nɛ́ zwì yé. Bǝ zɛ̃̀ bǝ̀ n'ê mà dwã nyǝ̀-pǎr dɛ̃́dɛ̃́ rǝ̀myɛ́ shò-kwã nɛ́. Bǝ̀ gakó zɛ̃̀ bǝ wɛ̀rhɛ́ nyí rǝ̀dù, bǝ wɔ̀ bǝ̀ Pwǝǝ ǹdǝ́ Barnabaasɛ ǹdǝ́ Kristǝ-lyì jàlà b'a vò Zhǝrǝzalɛm bǝ byili yò w òmyɛ́ tùntúmǝ́ bé ǹdǝ́ Kristǝ-lyì gùlú w yé né cìnǝ́ bé ne. ³ Ancɔɔsɛ Kristǝ-lyì gùlú w pǝ bɛ sɔ́má. Bǝ zɛ̃̀ bǝ tó Fenishi, bǝ lyɛ̃ bǝ tó Samarɛ bǝ̀ m'ê la, ǹdǝ́ bǝ̀ n'ê byili Kristǝ-lyì bí ni bǝ̀ byɛ̀bɛ́ bǝ̀ dǝ̀ Zhwifubá mó myɛ pyìrhí bǝ̀ wun bǝ zù Kristǝ. Kristǝ-lyì bí gakó wun yǝ̀ nyɛ̀n rǝ̀myɛ́ yilǝ. ⁴ Bǝ̀ gǝ́ tú bǝ yí Zhǝrǝzalɛm, Kristǝ-lyì bí ǹdǝ́ tùntúmǝ́ bé ǹdǝ́ yé né cìnǝ́ bé zwẽ bǝ̀ zhǝǝle. Pwǝǝ ǹdǝ́ Barnabaasɛ byili kɔn dɛ̀bɛ́ gakó Yi tó bǝ̀ dɛnnɛ rǝ wɛ̀rhɛ́ mɔ́. ⁶ Farɛzhɛ̃ɛ̃bá byɛ̀bɛ́ bǝ̀ zù Kristǝ mó jàlà zɛ̃̀ bǝ̀ zhe: «Kɔn wɔ́ nyɔ́ɔ́ bǝ̀ bǝ̀ góm Kristǝ-lyì bí byɛ̀bɛ́ bǝ̀ dǝ̀ Zhwifubá mó, sǝ bǝ pǝ bɛ nyí bǝ̀ bǝ̀ zwẽ Muyiisi nyǝ́ né.» ⁵ Tùntúmǝ́ bé ǹdǝ́ yé né cìnǝ́ bé zɛ̃̀ bǝ jòm dwã yó mùnì ga bǝ nyǐ yò w òmyɛ́ mɔ́ yò. ⁷ Bǝ zɔ̀m ǹdǝ́ dwã bǝ dɛnɛ. Pyɛɛrɛ zɛ̃̀ n zhì dɛ̃̌ n wɔ̀: «Da-byǎ, á yě bǝ̀ Yi cír ne á wẽ́ kɔn dɛnɛ, b'à bwǝ̌l yò-ècɔ̀nɔ̀ nyí rí a byili byɛ̀bɛ́ bǝ̀ dǝ̀ Zhwifubá mó ne, mùnì ga bǝ nyɛ̀ɛ̀ rɛ̀, sǝ bǝ zwẽ nyí bǝ zù Yezu Kristǝ. ⁸ Yi yě numbyíní gakó wu. Rǝ̀ pɔ bɛ Eshirhǝ náàcɛ̀nɛ́ ǹdǝ nǝ́myɛ ta, rǝ m'e byili bǝ̀ rǝ̀ shɛ̀nɛ́ bǝ̀ yò. ⁹ È gǝ wɔ́ rǝ̀ yilǝ, nǝ́myɛ̌ ǹdǝ́ bǝ̀myɛ́ ga wɔ́ kɔn rǝ̀dù. Rǝ̀ vùr bǝ̀ lwɛlɛ rɛ́ rǝ yẽ̌ be wárhgáá, bǝ̀ gǝ́ zù Kristǝ mó yilǝ. ¹⁰ Zhĩĩ tɛ̀bɛ́ nǝ́ nàmbala bɛ́ yǝ̀ ŋwɛ̀nɛ́ bǝ zhĩ, s'e b'e zɔ̀m nǝ́myɛ̌ zɔ̀mà mɔ́, byè yil á n'á yǎl á cĩ́ ri Kristǝ kwã-lyì bí yó wǝ, á m'á n'á zhẽ̀ Yi? ¹¹ Nǝ́ r'é zwẽ nyí bǝ̀ wɔ́ Cinnǝ Yezu pɛnɛ́ y nánfò w dɛnnɛ nǝ́myɛ̌ ǹdǝ́ bǝ̀myɛ́ ga tó né nǝ́ nǝ vwǎrh.» ¹² Lyì bí gakó y'à jě shɛ́shɛ́ bǝ̀ n'ê cili Barnabaasɛ ǹdǝ́ Pwǝǝ zɔ̀mà nɛ́, sǝ bǝ̀ byili màmyaarhɛ́ ǹdǝ́ wò-jààrɛ́ tɛ̀bɛ́ gakó Yi tó bǝ̀ dɛnnɛ rǝ wɛ̀rhɛ́ byɛ̀bɛ́ bǝ̀ dǝ̀ Zhwifubá mó sõ mó. ¹³ Barnabaasɛ ǹdǝ́ Pwǝǝ gǝ́ zɔ̀m bǝ zhɛ̀, Zhakɛ zɛ̃̀ n wɔ̀: «Da-byǎ, cili-nǝ kɔn dɛ̀bɛ́ à la ába byilu: ¹⁴ Shǝmɔ byili nǝ́ba Yi gǝ́ tó né ǹdǝ́ rǝ̀ cìcì pùbùlǝ̀, kùr-ju yi ní ga, rǝ m'e cír lyì, byɛ̀bɛ́ bǝ̀ dǝ̀ Zhwifubá mó wẽ́, bǝ̀ la yǝ̀ rǝ̀myɛ́ lyì. ¹⁵ Sǝ rǝ̀myɛ́ yàl ǹdǝ Yi nyì-zwennǝ bé gǝ́ y'à byili ní. Bǝ̀ kɛ̃ bǝ̀ Yi wòwǝ̀: ¹⁶ ‹Rǝ̀myɛ́ kwã nɛ́, à m'a k'a bà, sǝ à m'a k'a lù Dǝvyidi kɛ̀lɛ́ y è ló tɛ̃́ mɔ́; a kwɛrhɛ ń jǝ̀-bwǝ̀ǝ̀ré a cĩ́ dɛ̃̌, ¹⁷ sǝ lyì bí byɛ̀bɛ́ bǝ̀ dàl mɔ́ gakó ǹdǝ́ tǝnèsé shɛ̀bɛ́ gakó à byẽ̀ sǝ̀ lyì bí bǝ jǐrh àmyɛ́ lyì mú b'a pyà nɛ̀. Wɔ́ Cinnǝ mú ń zɔ̀m èta. ¹⁸ Wɔ́ ńmyɛ̌ ń byili ywẽ̀ né nǝ̀myɛ́ kùr-ju yi ní ga.›» ¹⁹ Zhakɛ súlí n wɔ̀: «Àmyɛ́ n'â bùl bǝ̀, è gǝ wɔ́ byɛ̀bɛ́ bǝ̀ dǝ̀ Zhwifubá, bǝ̀ pyìrhí bǝ̀ wun bǝ zù Yi mú yilǝ, kɔn bǝ mǝ̌ sǝ bǝ ce be zwini wẽ́ yé. ²⁰ Sǝ ǹdǝ́ rǝ̀myɛ́ ga, bà-nà nǝ́ kɛ̃ sɛ́bɛ́ nǝ́ pǝ bɛ nǝ́ m'é byili bi bǝ̀ bǝ̀ bǝ̀k'a dɔ̃̀ vwàmá nyɛ̀bɛ́ bǝ̀ zwǝ́l wẽ̀ tɛ̀bɛ́ rǝ̀ dǝ̀ Yi yó nàmá yé, bǝ̀ nàmá bɛ́ bǝ̀myɛ́ n'ê pɛ jìmdì; sǝ bǝ̀ bǝ̀k'a fwǝ̌l yé, sǝ bǝ̀ bǝ̀k'a dɔ̃̀ vwǎm mɔ̀bɔ́ shǐ yǝ̀ mǝ̀ byã w ce yé, sǝ bǝ̀ bǝ̀k'a jí jal yé. ²¹ Kùr-ju yi ní ga, lyì ŋwɛ́nɛ́ bǝ̀ n'ê bwǝ̀l Muyiisi nyǝ́ né cɛmɛ nɛ́ gakó wẽ́, bǝ̀ n'ê kàrmǝ̀ nɛ̀ bǝ̀ dwã-gùúlí jìsí wẽ́ shìrhǝ́ dɛ̃ gakó, kɔn m'e yí zà.» ²² Rǝ̀myɛ́ yó, tùntúmǝ́ bé ǹdǝ́ yé né cìnǝ́ bé ǹdǝ́ gùlú w lyì bí púlǝ́púlǝ́ wɔ̀ bǝ̀ bǝ̀ m'a cír lyì bǝ̀myɛ́ cìcì wẽ́, bǝ tó Pwǝǝ ǹdǝ́ Barnabaasɛ nɛ bǝ vò Ancɔɔsɛ. Bǝ zɛ̃̀ bǝ cír Zhidǝ mó mɔ̀bɔ́ bǝ̀ n'ê byẽ̀ bǝ̀ Barsabaasɛ mɔ́ ǹdǝ́ Shǝlaasɛ, bǝ̀ bǝ̀myɛ́ bǝ̀lyè y y'à zhe nyɔ̀mɔ̀ Kristǝ-lyì bí wẽ́. ²³ Bǝ kɛ̃ sɛ́bɛ́ bǝ pǝ bɛ bǝ̀ bǝ̀ zhǝl bǝ pǝ Ancɔɔsɛ Kristǝ-lyì bí ni. Bǝ̀ kɛ̃ sɛ́bɛ́ rɛ́ wẽ́ bǝ wɔ̀: «Nǝ́myɛ̌ Kristǝ tùntúmǝ́ bé ǹdǝ́ Kristǝ-lyì gùlú w yé né cìnǝ́ bé nǝ́ r'é ce ámyɛ̌ byɛ̀bɛ́ á wɔ́ nǝ́ da-byǎ á ŋwɛ́nɛ́ Ancɔɔsɛ nɛ́, ǹdǝ́ Siri ǹdǝ́ Shilishi tǝnèsé wẽ́, á dǝ̀ Zhwifubá mó. ²⁴ Nǝ́ nyɛ̀ɛ̀ bǝ̀ lyì shí nǝ́ sõ ǹdǝ́ bǝ̀ sǝ̀pwà zɔ̀mà bǝ b'è n'ê jǝ́jɛ̀rɛ́ ába bǝ̀ m'ê zhízhǐ á surhǝ né. Sǝ lwar-na b'è dǝ̀ nǝ́myɛ̌ nǝ́ twĩ̀ bì yé. ²⁵ Wɔ́ rǝ̀myɛ́ è ce, nǝ́ gakó wɛ̀rhɛ́ nyí rǝ̀dù nǝ́ vùr lyì bǝ̀ bǝ̀ tó nǝ́ da-byǎ nántwǝ̌rh Barnabaasɛ ǹdǝ́ Pwǝǝ ne bǝ bǝ̀ á sõ. ²⁶ Nyǐ-nǝ Barnabaasɛ ǹdǝ́ Pwǝǝ zhɔ̃̀ bǝ̀ myǝ̀lǝ́ né nǝ́ Cinnǝ Yezu Kristǝ yilǝ. ²⁷ È gǝ wɔ́ Zhidǝ ǹdǝ́ Shǝlaasɛ yilǝ, nǝ́ twĩ̀ bì mùnì ga bǝ byili ába kɔn dɛ̀bɛ́ nǝ́ kɛ̃ sɛ́bɛ́ rɛ́ wẽ́ mó ǹdǝ́ bǝ̀ nyí bǝ súlí. ²⁸ «Nǝ́myɛ̌ ǹdǝ́ Eshirhǝ náàcɛ̀nɛ́ cìcì n'ê bùl bǝ̀ kɔn bǝ mǝ̌ bǝ̀ nǝ́ pǝ ába zhĩĩ dõ ǹdǝ́ è dǝ̀ tɛ̀bɛ́ rǝ̀ wɔ́ nyɔ́ɔ́ mɔ́ yé: ²⁹ á bǝ̀k'á dɔ̃̀ vwàmá nyɛ̀bɛ́ bǝ̀ zwǝ́l wẽ̀ tɛ̀bɛ́ rǝ̀ dǝ̀ Yi yó nàmá yé; á bǝ̀k'á jí jal yé; á bǝ̀k'á dɔ̃̀ vwǎm mɔ̀bɔ́ shǐ yǝ̀ mǝ̀ byã w ce yé; á bǝ̀k'á fwǝ̌l yé. Á gǝ dɛ̃̀ á cìn ǹdǝ́ rǝ̀myɛ́ gakó, á wɛ̀rhɛ́ cɛ̀nɛ̀. Wɔ́ rǝ̀myɛ́ rǝ̀ wɔ́ nyɔ́ɔ́. Wɔ́ rǝ̀myɛ́ nǝ́ y'ǎ n'é yǎl nǝ́ byili ába. Yi b'a sɛ̃ ába.» ³⁰ Byɛ̀bɛ́ tùntúmǝ́ bé twĩ̀ mú zhǐr bǝ vò Ancɔɔsɛ. Bǝ̀ gǝ́ yúwǝ́, bǝ ce bǝ byẽ̀ Kristǝ-lyì bí gakó dwã yó, bǝ kwè sɛ́bɛ́ rɛ́ bǝ pǝ bɛ. ³¹ Bǝ zwẽ re bǝ kàrmɔ̀, sǝ bǝ̀ gakó wun yàl nyɛ̀n, bǝ̀ gǝ́ pɔ bɛ cícú èta mɔ́ yilǝ. ³² Zhidǝ ǹdǝ́ Shǝlaasɛ cìcì mú gǝ́ y'à wɔ́ Yi nyì-zwennǝ mó ce, bǝ̀myɛ súlí bǝ cící bi, bǝ zǝ bǝ̀ wun ni ǹdǝ́ zɔ̀mà nánzhǝzhɔ̌. ³³ Bǝ dɛnɛ gàà námpɔ́lɛ́ fòró bǝ nǝ sɔ́má bǝ k'a kwɛ̃̀ ǹdǝ́ yǝ̀-zùlǝ́ bǝ vò byɛ̀bɛ́ bǝ̀ y'à twĩ̀ bì mú sõ. ³⁴ [Sǝ Shǝlaasɛ pwírí kɔn mǝ̌ bǝ̀ ń mɛ̃ gàà.] ³⁵ Pwǝǝ ǹdǝ́ Barnabaasɛ mɛ̃ Ancɔɔsɛ nɛ́. Bǝ̀myɛ́ ǹdǝ́ lyì dwã nánzhǝzhɔ̌ y'à n'ê bwǝ̀l Cinǝ mú zɔ̀mɛ̀ rɛ́, sǝ bǝ̀ y'à n'ê cèrhè kàrmɔ̀ lyì bí ni. ³⁶ Dwã màngɛlɛ́ rǝ̀myɛ́ kwã nɛ́, Pwǝǝ wɔ̀ Barnabaasɛ nɛ: «Bǝ̀ nǝ́ k'á tó cɛmɛ nɛ́ nyɛ̀bɛ́ gakó nǝ́ bwǝ̀l Cinnǝ mú zɔ̀mɛ̀ rɛ́ nǝ̀ wẽ́ mó wǝ, nǝ́ byɛ́lɛ́ Kristǝ-lyì bí, nǝ́ nyǐ wɔ́ etǝr kɔn nyɛ̌ nɛ́ bǝ̀ yilǝ.» ³⁷ Barnabaasɛ yà ń nǝ́ ń yǎl n zǝ Zhã mɔ́ mɔ̀bɔ́ bǝ̀ n'ê byẽ̀ bǝ̀ Markɛ mɔ́ n tó be. ³⁸ Sǝ Zhã-Markɛ gǝ́ yà ń pɔr bǝ̀ kwã nɛ́ Pǝ̃fyili ní, ń yǝ̀ bǝ̀ tó n twĩ̀ bǝ̀ tumǝ né mó ce, Pwǝǝ pwírí kɔn dǝ̀ sɔ́má bǝ̀ ń tó be yé. ³⁹ Sǝ ńmyɛ̌ ǹdǝ́ Barnabaasɛ yǝ̀ dwã yó lwé yé, bǝ pɔr dwã nɛ. Barnabaasɛ zǝ Markɛ bǝ vò e zù bǔ-bwǝl bǝ byɛrhɛ bǝ vò Shipiri. ⁴⁰ 40 Pwǝǝ zɛ̃̀ n zǝ Shǝlaasɛ. Kristǝ-lyì bí lwǝ̀l Cinnǝ mú bǝ̀ ń yìlì mù. ⁴¹ 41 N zhǐr n tó Siri ǹdǝ́ Shilishi tǝnèsé wǝ, n cící Kristǝ-lyì gùúlí, n pǝ bɛ wu-jɔ̀.