koussoube-marc-lee_act_text

Kǝ̀kàl-fwɛ̀lɛ̀ 14

¹ Pwǝǝ ǹdǝ́ Barnabaasɛ gǝ́ tú bǝ yí Yǝ kɔnǝyɔm, kɔn yàl ǹdǝ Ancɔɔsɛ nɛ́ ta: Bǝ lyɛ̃ bǝ vò Zhwifubá dwã-gùlú jì y wẽ́, bǝ bwǝ̀l Yi zɔ̀mɛ̀ rɛ́. Zhwifubá ǹdǝ́ byɛ̀bɛ́ bǝ̀ dǝ̀ zhwifubá mó nánzhǝzhɔé zwẽ nyí bǝ zù Kristǝ, ² sǝ Zhwifubá byɛ̀bɛ́ bǝ̀ yǝ̀ nyí zwẽ mó cìrh byɛ̀bɛ́ bǝ̀ dǝ̀ Zhwifubá mɔ́ bǝ ce né, mùnì ga bǝ bù lwɛlɛ ǹdǝ́ Kristǝ kwã-lyì bí. ³ Pwǝǝ ǹdǝ́ Barnabaasɛ jòm Yǝkɔnǝyɔm nɛ́ kɔn dɛnɛ. Bǝ y'à zhí Cǐnnǝ mó ne dɛ̃́dɛ̃́, bǝ̀ n'ê bwǝ̀l ń zɔ̀mɛ̀ rɛ́ ǹdǝ́ wu-jɔ̀. Ń yà ń nǝ́ pɛ bɛ ŋwɔ̀nɔ́ bǝ̀ m'ê wɛ̀rhɛ́ wo̱-jààrɛ ǹdǝ́ màmyaarhɛ. Ń tó rǝ̀ dɛnnɛ n byili bǝ̀ Yi pɛnɛ́ y nánfò w zɔ̀mɛ̀ rɛ́ bǝ̀ n'ê bwǝ̀l mó wɔ́ zhǝ̀nà. ⁴ Cɔ w lyì bí pɔr dwã nɛ. Jàlà zù Zhwifubá, jàlà zù tùntúmǝ́ bé. ⁵ Zhwifubá ǹdǝ́ byɛ̀bɛ́ bǝ̀ dǝ̀ Zhwifubá mó, e súlí bǝ̀ yé né cìnǝ́ bé zɛ̃̀ bǝ̀ n'ê pyà Pwǝǝ ǹdǝ́ Barnabaasɛ nɔ̀nɔ̀ sǝ bǝ dul be ǹdǝ́ nǝ́kulǝ bǝ gu. ⁶ Pwǝǝ ǹdǝ́ Barnabaasɛ gǝ́ tú bǝ lwar, bǝ dùr bǝ vò Lyiditiiri ǹdǝ́ Dɛrbɛ; ǹdǝ́ jààsɛ́ shɛ̀bɛ́ sǝ̀ bwǝ́l gàà mɔ́ wa, Lyikǝwoni tǝnà y wa, ⁷ bǝ zɛ̃̀ bǝ̀ n'ê bwǝ̀l Yi zɔ̀mɛ̀ rɛ́ gàà mɔ́ myɛ. ⁸ Bal mǝ̀dù yà ń ŋwɛ́nɛ́ Lyisitiiri ní, ń nèsé cù ń bǝ̀sɔ́nɛ́ yi ní ga. Ń yà ń wàr ń nǝ́ ń zɛ̃̀ ń zhì dɛ̃̌ ń zhǝ̀l yé. ⁹ Dɛ̃ rǝ̀dù, Pwǝǝ yà ń nǝ́ zɔ̀mà, sǝ bal mɔ́ yà ń nǝ́ ń cili ń zɔ̀mà nɛ́. Pwǝǝ nyǐ mu shɛ́shɛ́ n pwírí ń zhí Yi ni, bǝ̀ rǝ̀ wɔ̌ rǝ̀ b'a wárh mɔ. ¹⁰ N zɛ̃̀ n bya n wɔ̀: Zɛ̃̀ ń zhì dɛ̃̌! Bal mɔ́ já n shí tɛ̃́ n zɛ̃̀ pá, ń zhǐ ń nèsɛ́ yó ń nǝ́ ń zhǝ̀lǝ̀. ¹¹ Lyì zhǎ bɛ́ gǝ́ nɔ kɔn rɛ́ tɛ̀bɛ́ rǝ̀ wɛ̀rhɛ́ mɔ́, Bǝ bya ndǝ́ lyǝkǝwoni lyi bí zɔma nɛ́ bǝ wɔ̀: Nyǐ wɔ́ yǝ nǝ̀ jǐrh numbyínsi nǝ só tɛ̃́ nǝ́ sõ. ¹² Bǝ zɛ̃̀ bǝ ce Barnabaasɛ yil bǝ̀ Zǝyuusi. È gǝ́ wɔ́ Pwǝǝ ń yà ń nǝ́ ń zɔ̀m zɔ̀mà nɛ́ mɔ́ ce, bǝ̀ co ń yil bǝ̀ Erǝmɛɛsɛ. ¹³ Zǝyuusi jì y vwĩ̀-zwǝ́lnǝ mó n zǝ nǝ̀-byerh bǝ̀ co pùnǝ́ sǝ̀ ywẽ́ né ne, n mǝ n bǝ̀ cɔ w bwǝ̀rǝ̀ y nyí ni. Ńmyɛ̌ ǹdǝ́ lyì-zhǎ bɛ́ la m'e zwǝ́l vwĩ̀ bǝ pǝ Barnabaasɛ ǹdǝ́ Pwǝǝ ne. ¹⁴ Tùntúmǝ́ bé gǝ́ lwar bǝ̀ wɔ́ bǝ̀myɛ́ nɛ bǝ̀ la vwĩ̀ rí zwǝ́l bǝ pa, bǝ kǎr bǝ̀ gàndɛ́, bǝ dùr bǝ zù lyì-zwǎ bɛ́ wẽ́, bǝ bya bǝ wɔ̀: ¹⁵ Nǝ́ lyì, wɔ́ byè yil á n'á wɛ̀rhɛ́ eta mɔ́? Nǝ́myɛ wɔ́ numbyínsi ǹdǝ á ta. Wɔ́ yò-ècɔ̀nɔ̀ nyí rí nǝ́ tú nǝ́ n'é bwǝ̀l nǝ́ byili ába. Yẽ̌-nǝ yǝ né nyɛ̀bɛ́ nǝ̀ bǝ kùr zhe mó ne, s'á pyìrhí á wun á zù Yi nã́nyì yǝ́, bǝ̀ wɔ́ rǝ̀myɛ́ rǝ̀ wɛ̀rhɛ́ dɛ̃̌ ǹdǝ́ cɛ y ǹdǝ́ nǝ̇̀-fɔ̀lɔ̀ wá; ǹdǝ́ kɔn dɛ̀bɛ́ gakó rǝ̀ ŋwɛ́nɛ́ rǝ̀ wẽ́. ¹⁶ Shãã ga mɔ́ Yi y'à yẽ̌ lyì bí gakó ne bǝ̀ n'ê tó bǝ̀ sǝ̀pwà sɔ́msɛ, ¹⁷ e jà rǝ zhì dɛ̃̌ rǝ ce dwà y n'ê nywɛ̀ á yilǝ; fɔ̀ yi gǝ yúwǝ́, rǝ ce á jòró w yǝ̀ cɛ̀nɛ̀, rǝ pǝ ába á nyí kùjú; rǝ ce á wun yǝ̀ nyɛ̀n dɛ̃́dɛ̃́. Rǝ̀ tó rǝ̀myɛ́ dɛnnɛ rǝ byili ába rǝ̀ sónó wǝ́. ¹⁸ Bǝ̀ gǝ́ zɔ̀m èta, bǝ cǝ̀r lyì-zwǎ bɛ́ yé ne, bǝ̀ yǝ̀ ŋwɛ̀nɛ́ bǝ zwǝ́l vwĩ̀ rí yé, sǝ kɔn yǝ̀ nàná yàl yé. ¹⁹ Rǝ̀myɛ́ yó, Zhwifubá shí Ancɔɔsɛ ǹdǝ́ Yǝkɔnǝyɔm, bǝ b'e cìrh lyì-zwǎ bɛ́ bǝ ce né, bǝ zǝ nǝ́kulǝ bǝ dul Pwǝǝ bǝ ji tɛ̃́, bǝ̀ y'à n'ê bùl bǝ̀ ń cùwǝ̀, bǝ fwàl mɔ tɛ̃́ bǝ m'e du cɔ w wa, bǝ ji tɛ̃́, bǝ zhǐr bǝ yẽ̌ mo. ²⁰ Sǝ Kristǝ-lyì bí tú bǝ kǝ́kɛ́lɛ́ mɔ. N shí tɛ̃́ n zɛ̃̀ n ká n zù cɔ w wa. È zɛ̃̀ nǝkɔkɔ́lɛ́ yá, ńmyɛ̌ ǹdǝ́ Barnabaasɛ vò Dɛrbɛ. ²¹ Pwǝǝ ndǝ́ Barnabaasɛ bwǝ̀l yò-ècɔ̀nɔ̀ nyí rí Dɛrbɛ nɛ́, sǝ lyì nánzhǝzhɔ̌ jǐrh Kristǝ-lyì. Rǝ̀myɛ́ kwã nɛ́, bǝk'a vò Lyisitiiri, bǝ lyɛ̃ bǝ vò Yǝkɔnǝyɔm, bǝ zhì gàà bǝ lyɛ̃ bǝ vò Ancɔɔsɛ, Pyisidi tǝnà y wa. Bǝ̀ y'à n'ê cící Kristǝ-lyì bí bǝ̀ n'ê zal bǝ̀ wun ni, ²² mùnì ga bǝ zhí Yi ni kẽkẽ. Bǝ̀ y'à wǝ̀lǝ̀: Kɔn wɔ́ nyɔ́ɔ́ bǝ̀ nǝ́ nwɛ̀nɛ̀ dɛ̃́dɛ̃́, mùnì ga nǝ́ zù Yi tǝnà y wa. ²³ Bǝ zɛ̃̀ bǝ cír lyì bǝ cĩ́ Kristǝ-lyì gùlú òdú gakó yé né, bǝ zɛ̃̀ bǝ lyẽ bǝ̀ nyí, bǝ lwǝ̀l Cǐnnǝ mó ne bǝ̀ ń yìlì bi, bǝ̀ gǝ́ zhí mu mú yilǝ. ²⁴ Bǝ zɛ̃̀ bǝ tó Pyisidi, bǝ lyɛ̃ bǝ vò Pǝ̃fyili, ²⁵ bǝ bwǝ̀l Yi zɔ̀mɛ̀ rɛ́ Pɛrzhɛ nɛ́, bǝ zɛ̃̀ bǝ zhǐr bǝ vò Atǝlyi. ²⁶ Bǝ zhì gàà bǝ zù bǔ-bwǝl, bǝ vò Ancɔɔsɛ, Siri tǝnà y wa. Wɔ́ cɔ w òmyɛ́ wẽ́ Kristǝ-lyì gùlú w yé né cìnǝ́ bé y'à lwǝ̀l Yi ní bǝ̀ rǝ̀ yìlì Pwǝǝ ǹdǝ́ Barnabaasɛ nɛ bǝ m'e twĩ̀ tum rí tɛ̀bɛ́ èta mɔ́. ²⁷ Bǝ̀ gǝ́ yú Ancɔɔsɛ, bǝ byẽ̀ Kristǝ-lyì bí gakó bǝ cĩ́ dwã yó. Bǝ byili bi kɔn dɛ̀bɛ́ gakó Yi tó bǝ̀ dɛnnɛ rǝ wɛ̀rhɛ́ mɔ́, bǝ súlí bǝ byili bi myɛ Yi gǝ́ tó né rǝ pul sɔ́má rǝ pǝ byɛ̀bɛ́ bǝ̀ dǝ̀ Zhwifubá mó ne bǝ zù Kristǝ né. ²⁸ Sǝ bǝ̀ mɛ̃ Kristǝ kwã-lyì bí sõ gàà kɔn dɛnɛ.